أربعة أسئلة لأهل الخبرة في المحولات والبطاريات ؟

[الطرشي]

السلام عليكم ورحمه الله وبركاته
أخواني الكرام :
لدي مكتب عقار عبارة عن غرفة خارج نطاق الاحياء السكنية غرب الرياض (نمار) ومحتاج إضاءة لأني أجلس من بعد العصر لين آذان العشاء , وأشتريت محول من ساكو أبو كرتون أزرق بــ 149 ريال تقريبا يعطي 250 واط أذا ماتخوني الذاكرة واشغله على بطارية السيارة والحمد لله تمام التمام :good: بس عندي استفسارات وهي :

1- الفيوز الي جات معه وكاله قوتها 20 واحترقت وركبت 15 هل هذا يضر بالمحول أو قوته وهل الافضل ارجع اركب 20 أو أزيد 25 مثلاً ؟

2-ناوي أشتري بطارية خاصة للمكتب وبفصل عليها درج خشب وبخليها هي والمحول في المكتب على طووول (عشان أكسب آجر في الحرامية:D) السؤال هو : هل أشتري بطارية 55 أمبير ولا 60 ووش الفرق وكم المدة الزمنية الافتراضية للبطارية علماً بأنني سوف أشغل 3 لمبات قوة الواحدة 30 واط بشكل يومي بمعدل ساعة ونصف تقريبا وهل أحتاج الى شحن البطارية بالسيارة مثلا كل فترة ؟؟

3-ناوي أشتري لمبتين ( البرية ) أم 3 واط واسلكها واثبتها في الزوايا هل هي أفضل من اللمبات ام 30 واط لاني شفت موضوع لها قبل فترة ويقولون انها عملية وتنفع للي مثل حالتي ؟

4-هل فيه تلفزيون اقدر اشغله على المحول اللي ذكرت ووين القاه وكم اسعاره ؟؟ عشان ليا جات مباراة للعالمي :D نتابعها في الهواء الطلق ؟؟

وسلامتكم .:good2:

[tammam]

اما استبدال فيوز 20 امبير بواحد 15 امبير فلا يضر بل ينفع لانه اذا حملت المحول بحمل اكثر من 15 يبي ينقطع الفيوز فطالما انه ما عندك نية تزيد الحمل خله احسن للمحول لا تبدل الفيوز بواحد اكثر من 20 امبير مهما تكن الحال
اما اللمبات فحتما ام ثلاثة واط افضل لك لانها اقل صرف واظنك تقصد لمبات ال اي دي وعشر منها تصرف صرف وحدة ام 30 واط
انا اشور عليك اما ان تركب خلية شمسية على سطح المكتب وتشحن بها البطاريه او تشتري شاحن بطاريت تحطه بالبيت ويكون عندك بطاريتين تعاقبهم وحدة تشحن وحدة تولع .واما التلفزيون والرسيفر فيتحملهم المحول واشتر تلغزيون عادي حق بيت اوالسي دي 17 بوصه بس اهم شي شوف كم واط التلفزيون لا يتجاوز 150 واط واتوقع تحصل 80 واط بسهوله حتى التلفزيون العادي
اما حجم امير البطارية مكل ما كان اكبر كان افضل ولكن تعبئتها تطول البطارية عبارة عن جابية او خزان فشف ويش الخزان الذي يناسب ضروفك

[الطرشي]

جزاك الله الف خير اخي الكريم
اين اجد الخلايا الشمسية ؟؟

[عبون الجواء]

يا طويل العمر عليك بالطاقه الشمسية ولا
ماطور هوندا كهرباء حجم دينمو ماء يفي بالغرض المطلوب
واذا مجبر على البطارية علبك بالبطارية الحجم الكبير مثل التريلات بحيث يكون الطاقه عاليه ولا يستهل الا بعد مدة واذا ضعف البطارية اسحنها بالسيارة
بصراحة كنت استخدامها في المكتب في شمال الرياض حي الامانة تقبل احترامي وتقدير اخوك ابو عبدالله