يا اهل الفزعه سيارتي غرقة تحت الماء

[مدرب الغوص]

يا اهل الفزعه سيارتي يوكن موديل 2000 باتت ليله كامله تحت ماء البحر عمق 3 متر و لسان حالها يقول(ليش انا مالي حق اتعلم غوص:D)ايش اسوي الان وايش الحل, هل فيه امل بعد الله انها راح تشتغل؟:( ارجو الرد السريع ولكم جزيل الشكر.

[خالد العمراني]

الله يعوضك خير


يفيدووووونك اهل الخبره

[slj1416]

الله يعوضك خير
غير جميع الزيوت مكينه جربكس دفرنسات وفرامل ودركسون
فك البواجي وشغل المحرك حتى يطلع الماء من فوق البساتم ومن الثلاجه(لاتحاول تشغيل المحرك قبل هذى الخطوه)

[AMAZ]

اول عمليه تقوم فيها تغسليها في ماء حلوه . بعدها تفرغ جميع زيوتها .
لكن اهم شي غسليها في مويه حلوه عن الملوحه .

[بليزر616]

انتبة تشغل السيارة الا بعد ان تجعلها بتجاه مايل الي الخلف حتى تتئكد ان الشكمان لا يوجد فية ماء

[عناز الحره]

زى ماقالولك الشباب ويفضل انك تغسله بماااء حلووو وخله بالشمس اربع ايام بعدين غير كل سائل فيه
ولاكن ماعلمتنااا ايش وصل الجمس لهالعمق يعنى علق برجلك قبل ماتطبح مثلا" ههههههههه

[مدرب الغوص]

شكر على هذه الردود المفيده وشكرا لكم اخواني وارجو الافاده عن الكمبيوتر والاشياء الاكترونيه ايش الوضع بضبط ؟ويش راح يكون وضع الجربكس لاني سحبتها وهيه في الدي بس مشت معاي عادي لمسافت 5 كيلو سحب. وعن كيف طاحت معي في البحر تفاجأت ونا ماشي باليل على الشاطئ الا وانا ساقط في حفره بطول 3 متر وعرض 300 متر طالع عليها ماء البحر وممتلئه بعيد عنكم, والحمد لله اني اسبح كان الامر مفزع جدا حاولت ان افتح الباب لم استطع وانا اسمع المياه تدخل علي من كل مكان وكأني في فلم مرعب وبفضل الله استطعت ان اكسر الزجاج وان اخرج اسبح وانا انظر الى سيارتي تختفي امام نظري تحت الماء وبعده استنجت بحرس الحدود في قيال والله ما قصرو وحظر قائدهم من مقنا بنفسه واخرجوها وكانو حريصين جدا والله لا يمكن ان اوفيهم حقهم من الشكر والعرفان لحرصهم وحسن صنيعهم لهم من الله خير الجزاء.

[سهيل تميم]

الحمدالله على السلامه والله يعوضك ان شالله..

من تجربه مماثله لكن بسيل ... وقف السيارة بالحوش وافصل الكمبيوتر وجميع الفيوزات الكبيره الي بالمكينه وخلها بالشمس ثلاث ايام .... والزيوت اهم شي غيرها كلها ودخل السياره تلميع كامل... ولو الله يفكك من الالتماسات انت بخير .. تحياااتي لك ..

[مدرب الغوص]

مشكور اخوي سهيل على مرورك ونصيحتك لك شكري وتقديري,,,,,,,,,

[مكسر الشوك]

الافضل تبيعها تشليح

[4*4]

قبل عدة سنوات احد الربع معه شاص غرق في سيل نفس حكايتك بس انت تحت مويه هذا من قوة السيل اندفن D:
شراه واحد اخر ميكانيكي من باب الفزعه يعني عشان يصلحه
تعزر وشاف الويل والولوال وتعب فيه ايما تعب ولابقي شي مافكه ولاحساس ماغيره ولا شريحه الا فكها وجلس يشتغل فيه حوالي 3 شهور
الخلاصه الله يعوضك ابرك منه ويرزقك من واسع فضله

[محمد العوني]

نصيحه بيعه تشليح واطلب تعويض ...

وااذا كانت الحفره ماعليها سياج وتحدذيرات قدم شكوى في الي حفرها سوآ شركه او مؤسسه

والله يوفقك ويكتب لك الي فيه الخير

[YUKON_GMC]

الله يعوضك عليك اخي الكريم ... والموتر مارايح يرجع مثل اول لكن ان شاء الله يشتغل ولو اشتغل يكون حظك طيب واعتقد ان الكمبيوتر احترق

وانا اشور عليك اول خطوه تفصل البطاريه وتغسل الموتر بديزل كامل وتفك صرة المكينه اول شيء وتعبيها زيت خفيف حجم 10 الابيض او الاحمر او تعبيها قاز وتفرغه مرتين او ثلاثه حتى يروح الصدأ وتفك تانكي البنزين وتغسله والصفايه وتنفخ المواصير بالهواء وتختبر طرمبة البنزين عند كهربائي انها تشغل قبل تركب التانكي

ولاتنسى تغسل السياره كامله بالديزل وبعدها مويه حلوه وبعدها تنفخها بهواء وخصوصاً افياش الكمبيوتر والظفيره والفيوزات والسلف وافياش القير والدبل ومن ثم ترشها بزت خفيف 10 وتخليها اسبوع والكبوت مفتوح والمكينه زيت عادي بزياده علبه واحده

وبعد التغسل غير كل الزيوت المتبقيه

وبعد اسبوع وصل البطاريه وشغل

[الشوكيss]

الله يعوضك ابرك منه ويرزقك من واسع فضله

[طحلب]

اول شي وش وداها في عمق 3 متر اشرح لا هنت

[مدرب الغوص]

شكرا لكم اخوانى الاعزاء على نصحكم.
اساله سبحانه ان يعوضنا خير,انا حطيتها عند ورشه واعطيتهم فكره عن نصائحكم اذا مقسومه لنا بتصلح بأذن الله وراح اخبركم ايش صار معي قريبا انشاء الله ليستفيد الجميع, بس حاب اعرف كم تسوى اذا بعتها تشليح بعد المحاولات وذا شفت انها راح تكلف علي اشكر الجميع علي التفاعل والرد,,,

[AMAZ]

اول شي وش وداها في عمق 3 متر اشرح لا هنت


انت ذكرتني بالذي قالوا له فلان طاح من البعير و مات قال كيف مات .:D:D

[عاشق الكابرس]

اهم حاجه تفصل البطريه وتنزل كل الزيوت والسوائل من زيت المكينه وزيت القير زيت الدفرنش زيت البريك وتعبيهم وتفرغهم اكثر من مر عشن ينضف المحرك من الماء ولا تنس تانكي البنزين والموسير وتغسل الرديتر وتطلع الكمبيوتر من مكانه وتنشفه من الماء بواسطة الهواء وتفكك كل احسسات وتبدل الي خرب وتنشف الحجات السليمه وتئكد ان كل الاسلاك والافياش تكون ناشفه
والله يعوض عليك

[المريكبات]

شكلها غارت مثل راعيها الا لازم تصير غواصه وش زودها عنك بعد


ياشيخ الله يعوضك خير وترى الطرق اللي قالوها الشباب تكفي باذن الله

[الكمبيوتر]

ماعليك ياخوي من كلام الناس

خذ نصيحتي وحطها في قدر كبير وشغل النار خل الماء الموجود فيها يتبخر وبعدين سقها عادي

المهم لا توديها ورشه صيانه ولا تسال المختصين ماعليك من احد

خذ العلم وشب النار خل مويتها تتبخر شرط ماتسكر غطاء القدر اسرع للتبخر

اهم حاجه قبل ماتشغلها قل بسم الله وروح وياقلب لاتحزن

[abu_ahmad_241]

الحمد لله على سلامتك والله يحفظك دنياواخرة

[Abo gssar]

الله يعوض عليك اهم شي انك سلمت ولا كان معك عائلة او احد مايعرف يسبح كان وقعت الكارثة بس الله ستر عليك الحمدلله ....






ماعليك ياخوي من كلام الناس

خذ نصيحتي وحطها في قدر كبير وشغل النار خل الماء الموجود فيها يتبخر وبعدين سقها عادي

المهم لا توديها ورشه صيانه ولا تسال المختصين ماعليك من احد

خذ العلم وشب النار خل مويتها تتبخر شرط ماتسكر غطاء القدر اسرع للتبخر

اهم حاجه قبل ماتشغلها قل بسم الله وروح وياقلب لاتحزن
ان شاء الله الاخ طـــيـــب

[مدرب الغوص]

شكرا للجميع وعلى العموم فككناها وتركنها تنشف والله يستر,,,,,,,,,,,