بين السكري........ والسنيدي ضاع........

[خشم الحصان]

الاخوه الغالين
السلام عليكم
اخواني غفر الله لي ولكم
تعرفون ان الادمان الله يكافيكم شره مهوب زين ولكن اخوكم (خشم الحصان) ادمن وبشده تمر السكري واصبح كل سنه هجوله وروحه يم القصيم وخاصه (بريده) ومع هالسنين عرفنا التمر الزين والشي لي ينشرا
وكثرة الروحات
هذي مهيب مشلكه ياربع لئنها تحصل في السنه مره يعني نتحمل هالعثاء
لكن المشكله اني يوم طعت الربع في الذهاب الي محلات السنيدي ودخلت محلهم مشاء الله الله لايضرهم كل شي تبيه
تلقاه يعني الله يجزهم عنا كل خير متخصصين في لوزم الكشتات والرحلات وشي يطري علي بالك وشي ماهقوتي يطري علي بالك
ودخلنا في دائره اخرا من الروحه والجيه يم محلات السنيدي
المقصد (يالسنيدي ) الله يغفر لنا ولك متي تفتحون محل لكم في الرياض وتفكونا وترحمونا من كثر الروحه والجيه
يم بريده وهذي مهيب مثل السكري يبي لها روحه في السنه مره لا الله يثيبكم هذي تبي كل اسبوع بيني وبينكم
خشم مافيه شده كل اسبوع روحه يم ................
ترا تكسبون فينا اجر ان شاء الله وتفكون من هالهجوله من شقاء هالطريق
قولو (تم) الله يثيبكم امين
اخوكم
خشم الحصان

[مرقاب الشرق]

ولاتنسوننا بالخبر محتاجين لمحل بحجم السنيدي .

[دله وفنجال]

السلام عليكم...
اي والله يالاخوان ترى خشم الحصان ماهوب مثل اول فيه شدة على الخطوط :no2: الحين يالله يتعكز على العصا وأذا جلس تعب ون وقف تعب :rolleyes: ونوبةً يقول لم العيال همزين سيقاني توجعن :p ونوبةً ينغزة بلعصا الي معه :confused: الله يحسن الخاتمة والمسلمين فلذالك نطالب بفتح محل في الرياض وتفكون شاينا من لعوزت التردد على محلاتكم ;) ....
وشكراً ودمتم سالمين ...
اخوكم دلة وفنجال....

[المربد]

شف محلهم بالنسيم جنوب المقبرة الله يغفر لنا ولك تضيع فيه من كبره

مير الله يخلف ، مقطوع سرك بذيك الديار مايعجبك غيرها الله يرحم ابييك.

منول يوم القصيم تمشيلها نهار كامل وانت تفرح بالمطراش لهم ، لو يقولون لك نبي (قبسه) قلت من القصيم
وهالحين يوم زانت الخطوط والسيارات وصرت توصلها بخمس ساعات ونصف فقط (حسب ماوردنا عن سفرتك الاخيرة) صرت تتزمل من الروحة لهناك.
ابو يراح الله يغفر لك ، وصلت الاخبار عن ارتفاع اسعار السكري ببريده اثري السبب زيارتك لهم . وش انت شاري حمولة تريله؟

[ريف النشاما]

:D :D :D

:)


الله يهيدك يالمربد وين تبي توديه لمقبرة النسيم :( أخاف ماياصل ويدحدر مايرده إلا خشم ما :D

تخبر القماشات تهرب زيتها ومافيه فرامل :j

لكن كود إنهم يحطونه عند الزديه :cool:

صح يابو يّراح

[ولد سليمان]

السلام عليكم ورحمة الله وبركاته
حياك الله ياخشم الحصان
مالك حق ياشايبنا ورا ماوصيتنا والشي يجي عندك ونكفيك العنوه لبريده ولو تبي سكري دايت بعد...
بس اخاف انك ودك ومن زود الحرص لازم ترقى النخله وتخرف بنفسك وتنقيهن تمره تمره تحسبك على نشاطك مثل قبل ثمانين سنه ...
وبعدين تعال وش يوديك للسنيدي المفروض انك تروح تشوف متحف بريده هو الي بتلقى فيه اشياء تصلح للي في عمرك من الميه سنه وانت طالع وخل السنيدي للي في عمرنا

الابروحتك الميمونه ماقابلت راعي الحتسي المصفصف ابو فالح ودنا نعرف علومه عقب الزواج

[حد السيف]

السلام عليكم ورحمة الله وبركاته
ياسلام وياسلام الله ;)
ابو محمد الله يحسن العاقبة
وش جاب لجاب اقضو حوايجكم بالكتمان
على فكرة ياحبك للنغزات على قولت مشرفنا الغالي ايمن :D
عساة رخيص وطيب ياطيب وخابرك ماتبي الا الزين
بس سؤالي وش اخبار اكال النمل وخصوصا انك واصل القصيم حسب الروايات بخمس ساعات ونص عساك لقيتلة جح على الطريق
واكيد فية ملقوف يبي يسئل وشولة الجح اقولة واختصر العنوة ان اكال النمل ما يمشي الا على جح السيارات بانزين وهو جح وبدون بذر


عموما الحمد لله على السلامة

[صقر]

انتو وش فيكم طبيتوا بالرجال هالطبة .... الرجال يبي يقدم معروض للسنيدي علشان يفتح له فرع في ضاك ( بالرياض)

وبعدين التمر مسامير الركب والقدوع عنده من ركائز الحياة ....

والله احسنت الاختيار يابو جراح ... بريدة منها حج وقضيان حاجة ( شريت تمر وتقضيت من السنيدي )

اخاف باتسر تقول انقلوا فسايل النخل للرياض ما بنا شدة كل سنة مشوار .

لكن انا بنقل لك هالطلب شخصيا لـ عبدالرحمن السنيدي ... واخليه يفكر بالامر بجد... وتستاهل يابو جراح

[راعي المدّى]

حبيبي الغالي ... ابو جراح ... خشم الحصان
والله حاله كل درى بهالتمر اللي انت شريته ...بس اعتقد بعد عدة محاولات ... أولها مع رفيقك الغالي
والشهم اللي وداك .. بس يبدو لي إن عينك شرهه واجد ... هذا بالنسبة للتمر .0 أما السنيدي ... لاأنا أخالفك الرأي ... خله ببريدته وحنا نروح لمه المقصد اننا بروحتنا نزور حبايب وغالين تعرفهم وتصير حج قضيان حاجة ... وش رأيك .. لكن بعد الكبر شين وثقل الرجلين بعد مصيبة .
وتسلم لغاليك...
اخوك :
راعي المدّى
ابو ابراهيم
sisha003@yahoo.com

[خشم الحصان]

الاخوه الغالين
السلام عليكم وحياكم الله جميعآ كلن بسمه
.....................
الاخ الحبيب
نجم الحق
ياخيي الحين نقول الرياض وانت الله يثيبك تقول الخبر
اخوك
خشم الحصان
..........
نغزه...... الاخوه في المناطق الاخري الرجاء عدم تقديم المعاريض بفتح فروع الا بعد فتح فرع الرياض
دقشه..... دول الخليج اذا انتهينا من الفروع الاخري ان شاء الله ((بس سايده)) جيتكم الي بريده ........لكن dhl
ينفع او الشحن
........................
الاخ دددددددددددددددللللللللللللللله وفنجال
انت الحين ورا ماتهجد هقوتي ان حنا في رمضان الله يثيبك امين
قال شايب وش دعوا غلام السبيت
اقول ترا الطوفريه بدت ترقل والخوفه انها تطيح ثم تندفز الدله وتكسر الفناجيل
اجل يفتحون فرع علشاني حطني عذر
اخوك
خشم الحصان
...........
نغزه.........(((وتفكون شاينا ))) اقول الله يحسن اليك ناقصه حرف((ب))) هذا وانت توك شباب ودارس
منتاب مثلي ((محو اميه))) اقول ورا ماتقص :cool:
..............
الاخ الحبيب والغالي
(معقد الشوش)
المقبره .......... ياخيي الله يحسن الخاتمه لي ولك امين مدامك خابره مرن وخلن نروح يمه
اجل مقطوع سري بهاك الديار ترا ادري وش ترميله
اخيي يوم المطايا لها سجه و هيجنه الحين مع هاخطوط (خن بط ولاك واصل)
خمس ساعات ياخيي والله لوني امشي رجليه و بالريوس
الله يحسن اليك يالغالي فل مشاء الله اسدحني احسن اقول لي مزينه ان حنا في رمضان
اخوك
خشم الحصان
................
الاخ الغالي
ومشرفنا الفاضل
ريف النشاما
اقول انت بس فكنا من المعلاقات ووحنا بصحه وخير الله يجعل والدينا والديك بالجنه امين يارب العرش العظيم
ياخيي خلها علي الاوله احسن
الزديه عدوه ناقصنا ونوننه وصخاين وجباير الله يانت تحب (ن) بالحيل
لكن ياريف مالك الا خشم وصبر عليه الله يثيبك
اخوك
خشم الحصان
................
نغزه.......... ريف فكنا من الاخشوم الثانيه خلنا في خشمنا الله يحسن اليك مافينا شده ولا ضمه ولا همزه وانت تفهمها
............................
الاخ الغالي
ولد سليمان
حياك ربي يابعدهم مع ان كلامك يضيق الصدر اجل يومنك تقول((مالك حق ياشايبنا )) شابت عيون العدو والحسود
ول نخله ارقها الحين اذا رقيت السلام ادوخ وانت تبيني اسابق (دسكفري) في الارتفاع
الحين يابعدهم ندورك بالمناقيش وهذا حسيك
اخوك
خشم الحصان
..........
نغزه .......هو سز فيه متحف في بريده ياخيي مارسلو لي كتلوج ولا ادري عنه ولا عمرنا سمعنا به في الجريد او tv ...........
اخيي الله يثيبك حدي دوار الهديه وسوق التمر غيره لا تنشدن عن بريده
.................
الاخ الغالي
والحبيب
حد السيف
يازين كلمتك زيناه((اقضو حوايجكم بالكتمان ))
طيب وهذي ماتشملها مقولتكم الكريمه((بس سؤالي وش اخبار اكال النمل وخصوصا انك واصل القصيم حسب الروايات بخمس ساعات ونص عساك لقيتلة جح على الطريق
واكيد فية ملقوف يبي يسئل وشولة الجح اقولة واختصر العنوة ان اكال النمل ما يمشي الا على جح السيارات بانزين وهو جح وبدون بذر))
طيب انت ورا ماتكتم كتم الله صدر العدو
ابو سليمان ترا نسو الله يرفع قدرك امين
اخوك
خشم الحصان
........................
الاخ الغالي
ومشرفنا (صقر)
في البدايه الله ياني فرحت بفزعتك لكن شمية في اخر المقوله شي مهوب زين ( يفتح له فرع في((( ضاك )))
اجل وش تبيني اقول الله يثيبك امين تبيني اقول (بذا)
((اخاف باتسر تقول انقلوا فسايل النخل للرياض ما بنا شدة كل سنة مشوار))
ابو احمد ياخيي نقلنا بس مهوب مثل تمر بؤيده لي عندنا طالع مدلقم (مصاقيل)
صقر (تكفي) توص وقله ترا الرياض سبيره بالحيل ودنا بفرع ولو صغير ومع الزمن يصير سبير ان شاء الله
اخوك
خشم الحصان
..................
الاخ الغالي والحبيب
راعي المدي
ابو براهيم
شفت ياخيي هذا وهو تمر سكري ونشروها اجل لو حنا شارين ام الخشب ولا الونانه ولا سكري الحمرا من ابو شكاع سان وش يسد اثاميهم
اخيي الغالي هو لي جزمنا علي الروحه
بعد انت (عيني شرهه) كلبوه سطل وحيد .........وفهمها
مهيب مشكله اذا فتح في الرياض نقول هذا الفرع خاص بهل الرياض وعلي اهل القصيم الذهاب الي بريده يعني
تكرمو علينا بفرع
اقول ابو براهيم(الذيب مايهرول عبث) وش دعوا زياره اقول لاتكثر من الزيرات مثلي ترها تجيب الشك
وخاصه من لي انت خابر هذا وهو تمر وفي السنه مره
اجل لو نقول لهم نبي نروح كل شهر يم بريده سان يرقدونا علي سطح الخزان وضن هاليومين الرقده في السطح
تجيب الرقله
اخوك
خشم الحصان
.................
نغزه.......... اخي ابنشدك هالي في الصحن (توقيع) هو فشار محترق ولا وشو :cool:

[ريف النشاما]

:j

(((*************)))


خشم الحصان اللي على خط برلين =يوووومي علينا في شماغ ن يشله
جيتك وجاك الله على متن تربين=ماشي على جرتك دربك ندله
ناصيك في قافي مع الحرف حرفين = نهي أنا أنت وقم سو دله
وبليز عجل لا تحاول تلهين = بيكوز حالي من علومك مغله
وإشتك ِ تك بحالتي قولوا آمين=دقت بلوف النار في شك عله
يوم إن أبو يراح ذرب الغلامين= في كل فاصل كاتب ٍ نغزتله
ويرد علمه دايم الدوم لأثنين = راع الونيت وشافط النمل حله
ووراااااك ...مابوه.... سكري بالمواعين= شرق ٍعن اللي ساكن ن فلتله
راع المواعين الكثيرااااات ...ياشين = أو هو شمال عنه مدري حوّله

وأهي نهي صديق أنا فيه مسكين= يضحك ...علاااانا...جعلنا فدوتله
ويوّصف الصمان ذالحين ذالحين = يوم النشاما والقوارم تفله
ما بين ضاك وضاك صارت لواحين= في ذا ... وذيا... وذيتيه المجله
وأفهم ترا هرجي على العكس بابين=باب ٍ شمال وباب للغرب خله
والصدع ياروحي على الصدع صدعين= بين النفود وبين ردها ح أُوُله
يشدي حفاها لصافي الخد والعين= مثل الخطوط اللي رسم هرجتله
وجيب ٍ مصندق والقراشيع ألفين= حسبي على اللي وثقه في محله
شُقر بما ماجاب لوهو ريالين = والجنط بالتشليح مابه بدله
وبليز قف مي من علومك عناونين =اللي ذكرها الشيف في مشهدله
والشك شك ن لاتحكك له العين = ترقب مساره وين.... والخوف سله
بريدة الصمان ولا على عين = عين الجوا أو قاع هوبان.... ولـــّه
كله لعينا نازح الدار ياحسين= من عند أبو يراح ظرفي وصله
ومن قال صلوا مخطي الدرب لاوين=صلوا ماصلوا هقوتي في محله
هي مسألة (فيها كما قيل قولين)= في شوفت (الحلبي) عيوني تسله
وأجرح وداوي ياهو البال يازين= الله لنا (دافور في عشرة ٍ لــه)
وانبير قافي فوق ميه ثمانين = يضرب على الطبلون لي شاهدله
في هرجت اللي كلها الغاز شاطين= للي معي مفهومها صاحيله
هرج وعلوم وسالفه دون تقنين=وخطط على كيفك ترا القلب مله
ونغزه ختام القاف والناس نيمين= عزاه .... موووومعقول ... خيمه نشله

?

:rolleyes:

[فاهم]

صح لسانك يا مشرفنا الغالي على هالقصيدة .
وخشم الحصان صار يتردد اسمه بالقصائد .
ولكن اللي ما فهمته مع العلم إني فاهم :D قولتك ( شفاط النمل ) أبي أسأل وش جاب شفاط النمل بهالقصيدة ؟؟

تحيتي

[حد السيف]

السلام عليكم ورحمة الله وبركاته
اخيي خشم الحصان يالله القدات تراه صحن دخل مرصوصة لزوم التصوير
تكفي ياخشم الحصان الرجال ماقصر مدح قشك وكل طيبا فيك نبي ترد الهدية :D :D :D
حتى الدافور ابو عشرة جاب طارية ;)
وبعدين وش سالفة يشكون بك عطناها من الاول لو سمحت( اشم ريحة طردة من البيت )



محبك حد السيف

[nahham]

اعوذ بالله

ما صدقتو كلمة من ابو محمد

بس وهات .............

لو انا مكانك يابو محمد هونت من اكل التمر

الله يعطيك الصحة والعافيه ويتقبل منا ومنك الصيام والقيام

[خيال الغلبا]

خشم الحصان
تبي رأيي عاد

تزوج لك قصيميه وافتح لها بيت في بريده

علشان يصير حج وقضيان حاجه وانا اخوك

وكان تبي الفزعه ابشر بها

نعين ونعاون

[ابو درع]

السلام عليكم ورحمه الله وبركاته ..

وتقبل الله صيمنا وصيامكم وقيمنا وقيمكم ..

اقول مشاء الله عليك يا خشم الحصان أحبابك ولي يسألون عنك اكثار

ومتابعي اخبارك وتحركاتك اكثر ... ونت الحين خريت الزيت بترقعها لكن معليك انت بين آمرين اما ان تكشف

الحقيقة وتعترف امام ربعك واخوياك والا انك تجاوب وبكل صراحة عن سالفة

السكري .. والسنيدي .. اقول سكر ايه وبتاع ايه ;)

........ ضاع .. اقو مبعد شفت شي .

فهذي اصبحت قظيه العصر وكتبت عنها الصحف الصمانيه والشعبانيه بكل تكيد انت

اثرت جدل كبير حول هذا .

والحقيقه تختلف عن ما ذكرت .. السكري والسنيدي شماعه امام أصحابك ومن سئل من ابناك وين رايح يا بابا

وكلمت بابا تعني الكثير ..

والحقيقة هي ما تكنه في صدرك الذي والله لا حرج ان تعترف فيه إمام الناس فهو حلال محله الله

ولو كتبت عنوانك.. السكري ... والسنيدي ..... والمسيار .

لخففت عنك عنا هذه ألمحاكمه التي سوف تمثل امام كل قاري لهذ الموضوع الذي هو محاوله لصرف

القاري عن الحقيقة ..

يقفل المحضر .

.. تقرير دلس ..
......................

وكل الأسى والحزن ومن أعمق قلبي عليك ستفقد من هذه الساعة جلوس ابناك علشان يهمزونك

ونت امام الشاشة ..فأصبح الموضوع اكبر من سكري .

كما انه باستطاعتك الدفع وتبرئه الموقف ... فياخي ماتجي بالعقل سكري كل اسبوعين

وبعدين اشدعوى السنيدي يبيع خبز حار وجبنه وطحينية . خر مر ..

......