مجموعة من الاسئلة

[ابو مجاور]

السلام عليكم ورحمة الله وبركاته

الحمدلله والصلاة والسلام على رسول الله وعلى آله وصحبه أجمعين اما بعد

عندي كم سؤال يا جماعة الخير و ابي لها اجوبة باسرع وقت لاهنتو

1/كيف اعرف ذكر الطير من الإنثى

2/الحر الشاهين الوكري و الجير كيف افرق بينها

3/ماهي افضل المواصفات من حيث الطول و اللون و الشكل

4/طيري تبع شاهين جبلي كلما قربت يدي منه كي المسه و اسرح ريشه يخاف و يعضني وش الحل

5/ما معنى ثنداه, هجر, قحوف, منسر, كف

6/ ماهي مقاسات انواع الشواهين (المثلوث ,التبع ,.....)إلخ

7/ كيف اعرف التبع من المثلوث من الكامل

8/وش معناتها الى قال لي حر 16.5 والا 17*17

واتأسف كامل الاسف للإطاله مع تمنياتي الشديدة بأن تجاب اسئلتي في اسرع وقت

وتكفون يا جماعة لاحد يقول لي اقرى الكتاب الفلاني او رح للموقع الفلاني لاني عجزت و انا اقرى بس مالقيت الحل

ومشكورين

وهذي صورة للطير

http://www.0zz0.com/2005/10/05/879848126.jpg

[عاشق الجنوب]

بجاوبك على السؤال الرابع الي اعرفه وسمعت عنه انه الصقر ماحيب احد يلمسه اذا حبيت تلعبه حطه على يدك ورفعه ونزله ونت تناديه بأسمه

[bond]

بعطيك اللي أعرفه وانشالله تستفيد
أول شي بالصقور الانثى يجيك حجمها أكبر من حجم الذكر وانا أعرفها والله كذا من أول نظره بس كيف والله اني مدري لكن من الله سبحانه وتعالى
أخي الكريم تقدر تفرق بين الحر والشاهين والوكري أول شي لكي تتأكد ان الطير صقر أول شي لازم تكون عيونه سوداء وكبيره لأن فيه ناس يقول لك عندي صقر وعندي صقر واذا جاب لك الصقر تلاقيه شبط ولا باز
ثاني شي تعرف الحر بالمواصفات التاليه أول شي ظهره صافي ماهو منقط وحجمه تسبير (كبير) وأهم شي عيونه مافيها مدامع يعني يجيك راسه لون واحد يعني تحت عيونه مافيه خط الشيهانه تلاقي تحت عينها سواد أو لون غامق قوي وواضح ومستحيل تلاقي الحر كذا
الوكري نفس الشي تحت عينه لون خفيف بس حجمه أصغر والوانه معروفه يجيك بني ويجيك على راسه من فوق لون أحمر وفيه الوكري حرار اللي يجيك راسه كاشف أبيض .
أفضل مواصفات للطير اذا كان حجمه 18*18 وصاحي ومزيون يعني اذا شفته يملا عينك .
أخي الكريم طيرك اذا تبي طيرك يوالفك وتقدر تلمسه اتبع التالي : أول شي لاتلمسه من ظهره اطلاقاً ولاتجيه من ورى . ثاني شي
مثلا انت عشيت طيرك اليوم بكره لاتعطيه شي لين يجي الليل بعد صلاة العشا شيله وحطه على يدك وتكون عندك سمانه طازج دوبك ذابحها قطعها قطع صغيره وعط الطير من يدك خله ياكل من يدك واثناء ماياكل من يدك امسح على صدره شوي شوي وعطه الثانيه لين يتعود على اللمس ولكن لاتلمسه غير مع صدره ومسح عليه . هذي الطريقه استخدمها مع طيري كان أول يعظ واللحين أحط اصبعي بفمه والمس منقار وتحت عينه ولايعظ ولا يسوي شي . اذا ارتاح لك الطير وعرفك خلاص أهم شي تطول بالك عليه وتعرف مزاجه اذا كان خايف واذا كان جيعان واذا كان عطشان إوانه طفشان .

أتمنى اني أفدتك أخي الكريم وتراني حاولت أبسط لك قدر المستطاع لاني لقيت نفس المشاركه بمنتدى ثاني ولسا أشوفك قلقان
باقي الاسأله مشروحه تقريباً بالتفصيل في أغلب المنتديات
واعذروني اذا فيه خطأ أو شي الرجاء التصحيح وكل صقار وخبرته
وشكرا للجميع

[ابو مجاور]

نعم يا بوند انا متظايق لاني ما اعرف صقارين اجلس معهم فمالي الا الكتب و مواقع الانتر نت

بس اني هاوي الصقارة و احب اتعلمها

ويعطيكم العافية كلكم

بس 55 زائر ومافيه إلا مشاركتين!!!!

[bond]

الله يعافيك أخوي
نسيت أسألك انت من وين ؟
تحياتي

[ابو مجاور]

من السعودية-الرياض

[حر الجنوب]

بسم الله الرحمن الرحيم
السلام عليكم ورحمة الله وبركاته
الله بالخير اخوي يابس :D
فيه كتب عن الصقور مثل
الصقر والصقار & والصقور في صور وغيرها........
تراك بتلاقي ظالتك فيها ولو انك حاب الصقاره بتتعلم اسرع مما تتوقع
وبلتوفيق

[ابو مجاور]

اخواني انا عندي كتاب الصقر و الصقار الي اكثر الكلام الي فيه يرجع للصقار نايف الدعجاني

و قريت الكتاب كله في ليلة واحدة و قبل ان اسجل بالمنتدى هذا و منتدى المقناص وهي نفس الليلة التي شريت فيها الصقر وهنا المشكله

ان كل الاسئله التي اطرحها اكثرها تجاب على بجمل منقوله نصيا من هذا الكتاب وانا اطرح الاسئله رغبة في زيادت الدقه و التفصيل

مع كامل اسفي لإزعاجكم ولاكني ارغب في التعلم من خبرتكم الفريدة

[الأعصـــــار]

يسلمووووووووووووو أخوي بوند على هالنصايح الحلوه الخفيفه لا خلى ولا عدم
الله يبارك لك بالطير يابو مجاور وأذا عندك أي أستفسار الشباب ماراح يقصرون معاك
وتراني مثلك أتعلم أخوكم الأعصــــــــــــــــــــــــــــــــار

[مجنون الحبارى]

والله غنيتنى عن الاجابه يا bond واسلوبك جد رائع والله ازيدك من علمه ان شاء الله
والسلام عليكم

[bond]

ألف شكر أخوي مجنون الحباري
الله يعطيك العافيه ويتقبل دعاك
تحياتي