العلم عندي وانا ابو هندي خبر تصاريح الأسلحه

[سواق الوايت]

السلام عليكم ورحمة الله وبركاته


الشهر عليكم مبارك


حيا الله أعضاء المنتدى كل بإسمه


انا الله يسلمكم رحت الأسبوع اللي راح



وصرحت لي شوزل وخرازه وفرد



وكلها صرحوهاا حتى وانا عندهم واحد معه ابو عطفه


وهم ينقلون الأرقام من عليه بيصرحونه


المهم مالكم بطولة الهرج


اذا كنت احد سكان الرياض فرح طول الله عمرك امسك طريق المدينه ( يمر على السويدي ((بيعلمكم انه من سكان السويدي)) لين تجيك اشارة اللي يحطون قبلها تفتيش دايم وادخل يسار على شارع ابن باز الله يرحمه وابتل بتجيك اشاره على طول ... تعدها ثم الإشاره اللي عقبها ادخل معها يسار واطلع الكبري (بيصير مستشفى الشميسي يسارك ) وابتل واطلع الكبري اللي عقبه ثم خلك ماسك اليمين الكبري الثالث خلك تحته ولف يسار وابتل عاد الشارع نهايته مسكر ( انواع الصبات ) فيه مديور قبل نهايته ديور معه وبتجيك مدرسه على اليمين لف عقبها وفيه مدرسه عقبها ( يهني لف من بين المدرستين ) واول لفه خلها وثاني لفه لف معها يمين وامش شوي تجيك على اليسار





اهـ اهـ اهـ تعبت





طبعا هذا وصف محلهم عاد اذا رحت عندهم تلقى عندهم نموذجين

واحد اذا كنت موظف والثاني اذا كنت غير موظف طبعا الموظف يوقع الورقه من العمل ( انه موظف وحبيب ولهوب يعض ههههههههههه) والغير موظف يوقعه من عند العمده في الحي وثنين شهود

ثم اذا رجعت لهم تجيب معك اربع صور شمسيه وصوره زياده عشان يحطونها على التصريح المؤقت
( طيب قل خمس من أول )

وتصور بطاقة أحوالك واذا ماأمداك عادي عندهم هندي فيذاك اسمه بابول يصور بطاقات الأحوال

وعندهم نموذج تعبيه وان كان الموظف رايق عباه هو لك ايييييييييييييه نسيت ترى الصور مقاس 2*3
اذا جبت 4*6 بيردونك ( حسبي الله عليهم ردوني ومتحسف والله على ذيك الصوره وانا اللي اروح اشترى مقص واقعد اقصقص في الصور لين طلعت 1*1 هههههههههه)


عاد وانت داخل عليهم تآخذ بنادقك معك


ابد شوي ويناديك ويقرى الأرقام اللي عليها ويقول كم تبي من طلقه (( طبعا اكثر شي 100 طلقه ))

ويعطيك عليها تصريح مؤقت لمدة أربعة أشهر لين يطلع تصريحك

ثم تطلع للمدير فوق يوقعها

وسلالالالالالالالالالالالالالامتكم


[/size]

[سواق الوايت]

عاد الطلبات بإختصار

1- 5 صور شخصية 2*3
2- صورة بطاقة الأحوال + الأصل
3- تعبي النوذج اللي عندهم وتختمه وتوقعه
4- ملف علاقي ( اووووووووووووووووووووووووه عودنا عشان نشتريه من الجوازات اللي حولهم )
عاد وتجيب السلاح اللي عندك هذا بالنسبة للي أول مره يعني ماعنده ملف عندهم

[CRUISE**كروز]

كفيت ووفيت الله يعطيك العافيه انت ووايتك:)
عز الله ماقصرت حتى بابول تعرفت عليه وجبت اسمه:)

[بليزر]

الحقيقه ان العلم عندك ممتاز وكفيت ووفيت

[المربد]

جزاك الله خير ، شرح وطرافة وفائدة بوقت واحد
ممكن الله لا يهينك توصف المكان بطريقة اخرى ، لأن وانا اخوك من سكان شرق الرياض

[( أبو فهد )]

الله يجزاك كل خير هذا للي بيطلع تصريح جديد وإلا اللي بيجدد اخوووووي؟؟؟

[عبدالله الصالح]

لـــــــــــــــــحظه :

هل التصريح (( حـــــــــمل )) او (( اقتـــــــناء ))

الرجاء الافادة .


اخوكم القصمنجي ...

[سواق الوايت]

اشكركم على تفاعلكم الفعال المتفاعل ( هذي فعل واخواتها )

بالنسبة لأخوي المربد

فأتوقع ان فيه مكان ثاني في الملز يصرحون فيه ان كان مانيب واهم

لأني اذكر مريت من عنده مره منذ مبطي وكتوب عليه قسم الأسلحة والذخائر أو المتفجرات

لكن مدري وش سنعهم لكن اخوي اذا بغيت وصف واضح لكن مشوار شوي لكن تحمل

تمسك الله يسلمك الدائري الشرقي موجه جنوب لين يطلعك على الدائري الجنوبي وامسكه لين يجيك مخرج طريق المدينه

امسكه (طريق المدينه ) تعدي تقريبا اربع اشارات والخامسه يجي على يسارك البديعة مول

والسادسه تلف معها يسار

ثم تعد أول إشاره والثانيه تعدها ( تراني كنت ناسيها في الوصف الأول ) والثالثه لف معها يسار وتكملة الوصف فوق


واخوي ابو فهد مسيك بالخير

بالنسبة للي عنده ملف من قبل يوم كنت عندهم قالوا لواحد بيجدد وبيضيف وحده زياده خذو صورة التصريح أو خذوه كله مدري والله بالضبط لكن المراد ان امره سهل يعني مايحتاج يجيب تعريف من دوامه ابد يروح ببنادقه معه وتصريحه القديم معه وان شاء الله ان امره سهل


اما بالنسبة لأخوي القصمنجي الله يسلمه

فالبنادق المخصصة للصيد مايعطون عليها حمل ابدا

يكتبون لك في التصريح انه تصريح اقتناء

لكن بالنسبة للفرد فيعطون عليه تصريح حمل

[رسلان]

بارك الله فيك أخي على التوضيح ...

[البحر الأبيض]

ليه كل هل الخوف والتعقيد في التوصيف

مكانهم بالضبط بالضبط عند المباحث وسجن عليشة
بس أنتبه تغلط بالبوابه !!!
واللي مايعرف هذا المكان مهوب سعودي ابدا

بس اذا ضاع سلاحك بتحول للمحكمة الجزئية للتاديب والغرامة المالية
وهذا واحد من ربعي تم تحويله الى المحكمة بسبب سرقة السلاح من بيته بالدرعيه

[رفيع الشان]

بيض الله وجهك ...

وحبيت أسألك عن عدد الاسلحه الاعلى لأن عندي حدود سته قطع مابين فرد الى فرخ بلجيك يعطوني تصاريح ولا فيها كيني ميني :)

بعدين بالنسبه للفشق يعطونك للشوزن فقط والا لأي سلاح ؟

وكذلك وش الفرق بين الاقتناء والحمل ؟

يعني اذا اعطوني اقتناء ومريت تفتيش وحصلوا السلاح نمشي ولا لا :)

وشكرا لك

[الوافي99]

مشكور وماقصرت

يالله انك توفقه لما تحبه وترضاه...آمين

[عاشق الجنوب]

زين وتصريح الكلاشنكوف يصرح؟.
وكم مدة التصريح؟.

[سواق الوايت]

حياالله اخوي البحر الأبيض


ومشكور على المشاركه

اما بالنسبة للخوف مدري وش تقصد بالضبط ( ********************)

اما بالنسبة لمكانهم فهو صحيح في جمب المباحث حقة عليشه

لكن ماتقدر تجيهم من عندها لا زم تجي من ورى المباحث


وهذا الطريق مهوب كل واحد بيدله زييييييييييييييييييييييين


اما بالنسبه لضيعة السلاح يعني فالواحد يمكن يضبط عمره شوي يعني مهوب حاطه في مكان معرض للسرقه

عاد اذا انسرق هذا عاد خارج من اليد وش تسوي


لكن وش رايك


بالي ماصرح واذا اقبل على التفتيش اخترش وتلقاه يحسب للمكان اللي بيطلع فيه الف حساب ويحسب للتفاتيش

وحالته حاله


عاد اذا مسكوه باللي معه شف حالته وش لون

مرمطه وحوسه ويصادر السلاح وغرامه هذا اذا مااشتبهوا فيه انه احد افراد (********)

لكن واللللله مامثل اذا صرحت سلاحك واذا جيت عند التفتيش حطه على الطبلون مالحد عليك كلمه
( مهوب تصدقون عاد على الطبلون )



واخوي رفيع الشان مسيك بالخير

الله يسلمك ويجزاك خير

بالنسبة لعدد الأسلحة الصراحه هم ماحددو عدد معين ولا سألتهم عنه

لكن فيه خمس مدري اربع خانات للأسلحه في الورقه حقتهم عاد مدري يزودون تحت الجدول والا لا

وبالنسبة للفشق فعلى كل قطعة سلاح يعطونك 100 طلقه كحد أعلى واذا بغيت اقل يسجلون لك مهما كان نوع السلاح


اما بالنسبة لنوع التصريح اقتناء او حمل

فالحمل تصير لا بسه مايقول لك شي

اما الإقتناء فتحت المرتبه يمدحونه ( طبعا على حسب العسكري اللي بتواجه ) لكن دامك مصرح فأمرك سهل

وحتى مره اذكر مرينا من عند تفتيش اللي عقب الوادي ( قشران شوي ) شافوا عزبنا واغراضنا

وجانا العسكري معكم سلاح قلنا معنا سلاح مصرح قال وروني التصريح وشافه ومشانا ( تصريح اقتناء )

وسلامتك


اما بالنسبة لأخوي

عاشق الجنوب

فأتوقع انه يصرح لكن للإحتياط رح لهم أول وأسألهم واذا قالوا ايه نزله من السياره

لأني يوم اروح لهم انواع الأسلحه ابد اتحرى لواحد يدخل علينا بدبابه عشان يصرحها (هههههههه)

[غيّام]

اقتناء ويخب بعد
تسلم ابو هندي

[nashmi]

يا جماعة عندنا في الشرقية مافي تصاريح بس في أخبار
يعني مثلا شعبة الذخاثر والمتفجرات في الدمام حسب مايقولو التعميم وصل لكنهم مافعلوه للحين ( منقول )
وفي الأحساء كلش مرررة وحدة ماعندهم خبر بهالشي أيد وهذا أنا بنفسي سألتهم فقالوا : للتجديد حياك الله ... لكن ...للترخيص أول مرة ... في أمان الله ... يعني ماوردنا شي بهالخصوص مرررررررررررررررررررررة

[سلطان القلوب]

الله يرحم والديك ياراعي الوايت ويرضى عليك

ويبارك في عمرك على هالخبر

اذا فيه علوم عن تصاريح الطايف تكفون

[ابوقاسم]

ابشر يالنشمي تراهم فتحوا باب التصاريح في الشرقية ......................
وانا يوم الاربعاء الموافق16 رمضان متصل عليهم بالاحساء وقالوا حياك الله يوم السبت لان الدوام انتهى ................
وانا السبت رايح رايح انشاء الله ومودي معاي اللزوم ................
وربك يسهل ....................

[شاص]

طيب لازم معروض وإلا لا ؟؟
والسلاح متى أجيبه لهم ؟؟
وبعدين لو تطلب يكون مع التصريح خمسين طلقة أو ثلاثين فهو أفضل حسب راي بعض الربع اللي قد صرح وما يمنع يكون عندك زود ملفوزة في مكان ما

[كبريت]

ما قصرت يالغالي كفيت ووفيت

لكن بغيت اسال هل ببيعون الشوزن بالسوق عادي؟؟

[هاوي البر]

جزاك الله اخوي سواق الوايت
طيب هل الصور ملونه ولا عاديه او اي شي ما يشترطون
بسرعه ارجوا الرد قبل ما اروح اصور ترى طاق الشخصيه متولم للتصوير :) بس احتري ردك و اقول للمصور اكشن :)

[الطلقة]

يعطيك العافيه اخوي

ياليت تخبروني فتح باب التصريح في جده ولا لا

ووين مكان التصرح

والسلام عليكم

[ذيب999]

السلام عليكم ورحمة الله وبركاته
اليوم الساعه عشر ونص رحت لشعبة الاسلحة الي بالملز قالوا جب 5صور3*2 وحسن سيرة وسلوك من مرجعك او من العمدة وصورة بطاقة الاحوال وملف علاق رحت جبت الطلبات ورجعت لهم بعد الظهر وساعه الاربع وخلصت صرحت الخرازه
قالوا راجعنا بعد شهر استلم رقم البيان

[الطلقة]

يا اخوان ارجو الرد

هل فتح باب التصريح في المنطقه الغربيه خصوصاً في جده
واين مكان التصريح فيها

ارجو الرد بأسرع وقت خلونا نلحق نصرح اسلحتنا

[سواق الوايت]

يا هوي البر

يقولون عادي الصور ملونه او ابيض واسود كله واحد

وبالنسبة للشوازل نسمع طريا انهم بيفتحون محلات زي المريح وطقته يبيعون الشوازل مصرحه