@@ الفزعة ياخبراء الباثفندر ... تكفوووون @@

[البوياطلي]

بسم الله الرحمن الرحيم
أخواني الأعزاء أعضاء منتديات مكشات استفدت منكم الكثير في هذا المنتدى الغالي وأرجو من لديه الخبرة بالباثفندر أن يجاوبني على بعض الأسئلة لأنني قررت اشتري باثفندر2004 أو 2005 والأسئلة كالتالي :

1/ وش قصة مسامير الثلاجة وهل هي تنحل بموديل 2003 فقط أو 2004 و 2005 ؟؟؟


2/ هل مسامير الثلاجة إذا انحلت تضر الماكينة بشيء ؟؟؟


3/ كيف الحرارة بموديل 2005 و 2004 ؟؟؟


4/ ماهو أكثر شي أعطال ميكانيكية أو كهرباء ؟؟؟


5/ أسعار قطع الغيار هل هي مناسبة أم مرتفعة ؟؟؟


6/ قطع الغيار هل هي متوفرة لدى الموزعين أو لدى وكالة نيسان فقط ؟؟؟



وارجو التفاعل مع الموضوع .. لاني بحاجة للاجابة على هذه الأسئلة ...


ولكم خالص شكري ..

[القناص المميز]

1/ وش قصة مسامير الثلاجة وهل هي تنحل بموديل 2003 فقط أو 2004 و 2005 ؟؟؟

تنحل بموديل 2004 و 4 و 5 وافضل طريقه فك المسامير ورايح راسك ..


2/ هل مسامير الثلاجة إذا انحلت تضر الماكينة بشيء ؟؟؟

تخبط المكينه ..


3/ كيف الحرارة بموديل 2005 و 2004 ؟؟؟

الحراره في فصل الصيف توصل النص اذا كنت مسرع طيبعن افضل طريقه انك تسوي تسيخخ للأديتر كل سنه حتى تضبط الحراره ..


4/ ماهو أكثر شي أعطال ميكانيكية أو كهرباء ؟؟؟

الباثفندر مشكلته نقص الزيت يعني لازم تسقط شنبر للمكينه ..


5/ أسعار قطع الغيار هل هي مناسبة أم مرتفعة ؟؟؟

غاليه شوي ..


6/ قطع الغيار هل هي متوفرة لدى الموزعين أو لدى وكالة نيسان فقط ؟؟؟

نعم متوفرة ..

[المحترم أحمد]

4/ ماهو أكثر شي أعطال ميكانيكية أو كهرباء ؟؟؟

الباثفندر مشكلته نقص الزيت يعني لازم تسقط شنبر للمكينه ..


..

يالقناص المميز كيف حالك؟
س/ وش معنى تسقط شنبر المكينه ؟
بعدين انا معي باث ماينقص الزيت.

[عبدالرحمن السالم]

1/ وش قصة مسامير الثلاجة وهل هي تنحل بموديل 2003 فقط أو 2004 و 2005 ؟؟؟
* هذي مسامير صغيره تمسك اللهات من فوق مع الكرف وطلعات البر تطيح وتسبب تلف بالمكينه حلها شيل المسامير وترتاح ، طبعاً هذا خلل مصنعي المفروض الوكاله تسويها لكن ممكن تروح للوكاله ويفكونه لك بدون مقابل


2/ هل مسامير الثلاجة إذا انحلت تضر الماكينة بشيء ؟؟؟
* زي ماذكرت لك تسبب بتكسير البساتم وتخبيط المكينة والحل شيل هذي المسامير



3/ كيف الحرارة بموديل 2005 و 2004 ؟؟؟
* انا معي 2005 الحمد الله ولله الحمد ام اشتكي من الحراره ماشاء الله ممتازه حرارته عندي واعرف ناس ما اشتكو منها الا القليل



4/ ماهو أكثر شي أعطال ميكانيكية أو كهرباء ؟؟؟
* كهرباء مافيه مشاكل وحتى الميكانكية اذا انت شاري السياره نظيفه وخاليه من العيوب تماماً ، اهم شى واضب على الاشياء الاستهلاكيه مثل البواجي صفايه بنزين ويمشي معاك



5/ أسعار قطع الغيار هل هي مناسبة أم مرتفعة ؟؟؟
* والله تختلف على حسب القطعه فيه الغالي وفيه الرخيص


6/ قطع الغيار هل هي متوفرة لدى الموزعين أو لدى وكالة نيسان فقط ؟؟؟
* نعم متوفرة
والله يرزقك بالنظيف

[ابونوف الشهري]

كفو ووفو الاخوان
الله يجزاهم خير

[ابوعبدالله 22]

كان معي 2003 .. وسقطت له شنبر

وبصراحة اتعبني ومانصحك فيه

[البوياطلي]

مشكوريــــــــــــــــــــــــــن اخواني على الردود :::
وارجو من باقي الاعضاء تفاصيل أكثر خصوصا مسامير الثلاجة ؟؟؟
هذي مسامير صغيره تمسك اللهات من فوق مع الكرف وطلعات البر تطيح وتسبب تلف بالمكينه حلها شيل المسامير وترتاح وش المقصود باللهات وبعدين اذا فكيت المسامير وش اللي يمسك اللهات !!!

[PATHFINDER 4]

^^
اذا فكيت المسامير تشيل معها اللهات . ولا وش الفايدة من فك المسامير .

الكلام كله على اللهات اذا طاحت داخل البستم تخبط المكينة
واذا طاح المسمار تسمع طقطة داخل البستم ثم يطلع مع الشكمان

لكن المشكلة اذا طاح المسمار الثاني تطيح اللهات واذا طاحت اللهات خبطت مكينتك !

واللهات هذا شكلها (___) وهي موجودة داخل الثلاجة وعددها 6 والمسامير 12 (في كل قطعة مسمارين)