ماهو الحل في لي الدافور

[القاطور]

بسم الله الرحمن الرحيم
السلام عليكم ورحمة الله وبركاته
حبيت اسئل اهل الخبرة عن مشكلة صارة معي امس لما كنا كاشتين برا
المهم طلعنا وكان المكان اللي نبيه ممطور واصر واحد من الشباب على شبت النار
المهم اشترينا الحطب وكان الحطب فيه مويه من المطر
خوينا اصر واخذه.
لما جينا نشب النار ما ولع الحطب
قمت تقديراً لخوينا عطيته دافوري الشبث من كوفيا
حط الحطب فوق الدافور لما ولع الحطب شلنا الدافور طفى الحطب
رجعنا الحطب على الدافور
رحت وانشغلت في شغله ويوم جيت الا وخووي مطلع الدافور
طفش يبي الشاهي
جاء يولع الدافور الا والنار تطلع من اللي
اثاري من الحرارة انخرق اللي وصار يهرب الغاز والشعلة تطلع من اللي
والقداح ( الزند) طار البلاستيك حقه

السؤال :

هل لهذا الدافور قطع غيار خصوصا اللي والقداحه ؟

وانا من اهل الغربية وين ممكن الاقيه
واذا ما يوجد الا بالرياض وين مكانه واذا فيه فكرة عن السعر


اشكركم اخواني لمشاركتي موضوعي اللي كان سببه الاول والاخير الاهمال والاستهتار في استخدام الشي في غير امكانياته
×

[الناب]

وعليكم السلام

عندنا مثل يقول (من قر بذنبه غفر الله له)
مثل قالوه الشياب

هل يمكنك وضع صورة الدافور ألي تتكلم نه لمعرفة النوعيه
حتى لو صوره من النت

على العموم يمكنك مراسلة الوكيل
وهو العضو (كوفيا1) معنا في مكشات
وهو يفيدك بالتأكيد

موفق خير
أخوك
بن فهد

[كوفيا 1]

أخي العزيز: أنت قلتها...الموقد ليس مخصصا لهذا...لو اشتريت قاذف لهب ب14 ريال لكفاك.
على أية حال الحمدلله على السلامة
اللي موجود وسعره 29 ريال، في الرياض عند برق الحيا.
كما يمكنك أيضا طلبه عن طريقنا مباشرة وسنقوم بشحنه لكم.
القداحة لا نستطيع توفيرها قبل اسبوعين من الآن.

تحياتي

[اصيل نجد]

اهم شي الحمدلله على السلامه وزين مولع الدافور كله لكن شي له قطع غيار مافيه مشكله وزي ماقال اخوي كوفيا 1 لو اخذت قاذف لهب كان اريح لك ( كل شي لما صنع له ) مره ثانيه اقول الحمد لله على السلامه

[wafi4sa]

بارك الله فيك يابا منصور كفيت ووفيت
ورحم الله والديك وبارك الله لك في مالك وحلال امين

[ابوصالح77]

أهم شيء إنبسطتم
الله يعوض عليك

[سرهيد]

السلام عليكم

هلا بك اخوي الكريم

مع اني اتمنى ان يكون هناك صورة ، لكن

الام باذن الله سهل بالنسبة للي : صناعية العويضة في الصناعية القديمة حول مسجد العويضة ، بتلقى محلات كبس ليات وبتلقى لي نفس النوعية وبالامكان انك تطوله بعد او تقصره ..

وبالمناسبة : احبتي الكرام مثل هذا الشيء الذي قمت به لا يعتبر ميزة للموقد هذا او ذاك ، فقد رأيت احدهم قد اولع النار بموقد بريموس العنكبوت والنتيجة القداحة راحت ..

لذا كان الاولى ولعة حطبه وحده ومن ثم نقلها للحطب للحاجة الماسبة للامر ...

اما القداحة فامرها لدى اخونا ابو منصور بحكم انه الوكيل

تقبل مودتي

[القاطور]

اعتذر والعذر من الله ثم منكم لان الانترنت انفصل هذا الاسبوع وردي هذا من الجوال وحاولت ارد على كل الردود لكن للاسف ماقدرت لان الجوال مو عاطيني مساحه وابشرو بالصور وياليت اخوي كوفيا ترسل رقمك على الخاص

[القاطور]

http://img509.imageshack.us/img509/8564/67084880iy1.jpg




وهذه الصورة من مواضيع اخوي سرهيد



http://sub3.rofof.com/img3/01uvtbq26.jpg




وهو نفس الدافور اللي املكه وانتظر رد اخواني وخصوصاً اخوي كوفياً لاني الدافور صار مثل الدومية

[ن م ر]

حسب ما فهمت انه يبيلك تغير اللّي والقداحه وهذي ما قصر فيها الأخ كوفيا1

[القاطور]

لكن الاخ كوفيا ١ ما صار يرد مدري وش فيه والا انا قلت له ارسل رقم جوالك على الخاص ما ارسله ليه مدريه

[كوفيا 1]

لكن الاخ كوفيا 1 ما صار يرد مدري وش فيه والا انا قلت له ارسل رقم جوالك على الخاص ما ارسله ليه مدريه


العذر منك، لك رسالة على الخاص

[سلمان 2000]

السلام عليكم ورحمة الله وبركاتة
اخي القاطور باالنسبة لموظوع الي والقداحة
الي مثل ماقال اخي سرهيد بامكانك كبسة من جديد
والقداحة انا ذابت عندي وجتني فكرة واستبدلتها بقداحة حقت الولاعة ام ريال والي الان شغال زي الحلاوه
ارجو ان افدتك وشكرا