استفسار حول : العزبة ... يرجى الدخوول

[الهيلا0]

:f

السلام عليكم ورحمة الله وبركاته

اخواني اعضاء منتدى مكشات

اولا ارجوا ان تقبلوني كعضو جديد

و لدي عدة استفسارات

ابي اعرف وين احصل العزبة + الفراش

وبكم اسعارها وانواعها واجودها


والاروقة * رواق * والخياام

كم اسعارها + اجودها + اماكن تواجدها

واستفسار اخير

عن السيارات

وين الاقي سيارات تاجير بها حوض

اتمنى ما اكون ثقل عليكم :eek::eek:

:f

[msm5022]

اولا يسعدني ويشرفني ان اكون اول من يرحب فيك بالمنتدى الرائع ويرد على موضوعك
بس انت علمنا بأي منطقة وانشألله نفيدك واللي ينقص يفيدوك الطيبين بالمنتدى.

[كايد]

طلعنا مرة يومين شرينا ب300ريال حطب

خذ لك صوبيا حقت السوريين يا لبيه عالكاز "مازوت" تدفي وما تاكل حطب
الضو شبها بالصبح وبعد المغرب اما قضية انك الضو 24ساعة مدهرة يبي لك دنة .
تقبل تحياتي .

[محب الشبه]

وش الصوبيا وين نحصلها

[الهيلا0]

انا من الرياض

[عاشق السيل]

وعليكم السلام ورحمة الله وبركاته ،،

ههههههههه وش بقى ما سألت عنه ؟؟؟

بالنسبة للحطب فيه على طريق الجنادرية سودانيين يبيعون حطب رخيص ( الحزمة بـ 7 ريال ) وإذا كانت الشبة من مسيان إلى 12 بالليل ومن صلاة الفجر إلى 9 الصبح يكفيكم 10 حزم ليوم وليلة وعليك الحساب !!

وبالنسبة لأغراض البر تلقاها عند السنيدي بالدائري الشرقي أو برق الحيا بطريق المية مخرج 15 ،،

أما السيارة لازم يكون معكم جيوب أو ونيتات دفع رباعي لأن الإيجار غالي بالحيل !!!!

هذا اللي عندي وآسف على القصور يالغالي .....

[msm5022]

بالنسبة للحطب الإخوان يفيدوك فيه وين تلقاه لأني من تبوك وماعرف الأسعار هناك لكن الكمية عدد 3 كوم من ابو 50 ريال سمر انشالله يكفي على حسب صرفيتك بالحطب .
العزبة او الرواقات اهل الرياض عندهم السنيدي والرماية واسعارهم طيبة غير اللي عندنا بالشمال وارخص لكن العزبة على حسب الإستخدام عزبة شاملة يعني طبخ وقهوة وشاي من200 الى 350 اما عزبة قهوة وشاي 150-170والرواقات عندك السنيدي اجودها بس غالية شوين 150-200-300على حسب الطول والإرتفاع
فراش النوم عندك القاضي او الرماية اشكال والوان طب واتخير وكلن له سعر من 150-600

وانشالله اني ماكون قصرت بالمعلومات واللي ينقص كماذكرت الاخوان فيهم الخير والبركة ممكن يفيدوك بعد احسن مني .
وتقبل مروري وتقديري واحترامي .

[سبتان]

وعليكم السلام ورحمة الله وبركاته ،
مرحباً وأهلاً بك في هذا المنتدى المبارك
وأنا شخصياً أعتبر أنك اخترت المنتدى المناسب ، ومع مرور الزمن سوف تصدق كلامي أكثر
أما أغراض العزبة فالأخوان أفادوك بما يكفي .

[ابو خالد 8]

الحطب وش تبيه له ؟؟
اذا تبيه لكل شي طبخ وضوية ما يكفيك حوض !
بس اذا للشاهي والقهوة
تكفية 3 ربطات ام 50 ريال

[أبو براك]

وعليكم السلام ورحمة الله وبركاته

يا هلا باخي الكريم

وسعيد بانضمامك وتسجيلك في منتدى الجميع مكشات

مع تمنياتي لك بالفائده ولجميع الاخوه

من خلال ما يطرح من مواضيع وردود

واشكر الاخوه الاعضاء على فزعتهم في الاجابه على استفساراتك

وهذا ما تعودناه من الاخوه الاعضاء

تحياتي لك ,, وللجميع

[حبران والمسمى]

اهلا فيك بين اخوانك
حاول ما تستعجل
لازم تتصفح خيمة الأدوات والتجهيزات وتقراه مضبوط علشان تستفيد من خبرة الشباب بكل شي من ناحية الأسعار والجوده والمواقع
وحاول تبعد قدر الإمكان عن سيارات التاجير لأن مشاكلها وضررها اكثر من نفعها
وموفق خير

[الهيلا0]

ان المشكلة مافيه مواتر 4×4 ولا مواتر حوض

مواترنا كلها سيدان

بس...

كييف اجييب مووتر هنا المششكلة

[ابو خالد 8]

الموتر اذا تعرف واحد قريب لك ولا خويك ولا معك بالدوام ..

[عاشق السيل]

ان المشكلة مافيه مواتر 4×4 ولا مواتر حوض

مواترنا كلها سيدان

بس...

كييف اجييب مووتر هنا المششكلة

عادي وأنا اخوك ممكن تكشت على سيارة سيدان ،، رح طال عمرك مع الردمية اللي ورى العاذرية ولا مشيت 12 كيلو اطلع من الردمية يمين إلين تاصل جال النفود ووقف السيارة وطق الخيمة وانبسط أنت وربعك بأحلى وأنظف مكان !!!!

[عاشق القمرة]

السلام عليكم ورحمة الله وبركاته


حياك يالله وياهلا والله وسهلا في منتديات مكشات بين اخوانك .


اخوي ، بالنسبة للعزبة ..


بعطيك شرح مبسط وإن شاء الله انه يكون كافي ووافي بإذن الله وتستفيد منه


1- عزبة القهوة والشاهي


طبعا من المسمى سوف تكون للقهوة والشاهي ، وتراعي توفر الأدوات


مفواح قهوة وعليك بمفاويح الهندية تراها طيبة بالحيل المعدن وتستحمل وممتازة ، دلة قهوة تختلف من شخص إلى شخص ولكن بالنسبة لي افضل الدلة العسافية وحاليا في السوق موجود الأندونسية ولكن لامانع من شرائها فيكفي نظرتها ولمعانها ، والليفه للدله ، فناجيل والجراب حق الفناجيل واذا كنت راعي كيف عندك الفناجيل الدقة البغدادية المعروفة الكبار ، ، مطبقية تمر او اي حافظة تستخدم لوضع التمر واحرص على أن تكون حافظة من الهواء ، بيز ، حوافظ للهيل والقهوة ويفضل ان تكون ستن ستيل او قزاز ، وانصح بالستن ستيل ،


الشاهي ، ابريق الشاهي عندك ابو تاج الهندي وانصح به ، الغضاره ( ولاانصح به للمكاشيت ) الاصفر الكوري وأبتعد عن الصيني الله يعوذنا منه إن شاء الله ، بيالات طبعا وافضل شئ بيالات بادريق الفرنسية لكن بحكم ندرتها في السوق ، خذها لكن صناعة الامارات وتراها جيدة وجودتها عالية وممتازة يكفي صفاوة الشاهي فيها ودك بس تتفرج على البياله . ولاتنسى جراب للبيالات او بيت لهن . حافظة ستن ستيل للسكر والشاهي ، تراها تجي طقم اربع او خمس ، خل شئ للقهوة والهيل والباقي للسكر والشاهي


ودافور ، وعليك بالكوفيا سواء كان العقرب او راس وتركبه على الدبه الزرقاء معادة التعبئه ، او عندك بريموس العنكبوت ، او كولمان الشنطة الي يجي فيه عينين .


اللحين خلصنا من عزبة القهوة والشاهي .



2- عزبة الطبخ .


طبعا عزبة الطبخ تختلف تجهيزاتها من الشخص إلى شخص وحسب اهتمامه واحتياجه ، طبعا ، نبدا بالقدر سواء كان قدر ضغط وافضل السب الفرنسي وفيه طبعا احجام مختلفه حسب ماتبي ، او قدر عادي تاخذ احجام مختلفه تبي تسوي مرقه ـ، والا تسوي فيه مثلا فول ، وقطاعه على علشان تقطع الدجاج واللحم والخضره ، سكين وفيه نوعية سكين يابانية الحبة ب5 ريال شاريهن عقب ماشفتها في المنتدى ماعليها كلام حتى الوالده الله يرفعها بالعافية( قالت ياولدي تكفى خذ خمس زود للبيت هذولي زينات مامثلهن ماعاد تلقى شئ زين بالسوق ))


وابريق للتفويح الماء ويكون كبير علشان تستخدمه للطبخ تقدر تلقى الكوري الاصفر او الهندي ابو تاج مثل ماذكرت لك ومزل للرز ، وطاسة علشان تنقع الرز بعد ، وملاس ، ومقلاة او صاج تبي تسوي حميس ، والا مقلقل ، والا تسوي لك مصابيب ، فول ، يعني المقلا والصاج ضرورية ،


علب بلاستك أو ستن ستيل تحط فيها البهارات ( الملح ، فلفل ، دراسين ، بزار ، .. إلخ ) وبعدين تحط لها شنطة صغيره علشان ماتضيعهن .


ودافور مناسب للطبخ وانصح بالعنكبوت ايضا سواء كان بريموس او كوفيا .


إن شاء الله مانسيت شئ طبعا لازم تراعي حجم كل عزبة ، يعني عزبة الشاهي والقهوة تكون طبعا اصغر من عزبة الطبخ بحكم كبر الأدوات واختلاف حجمها ولاتنسى مهم جدا قماش العزبة وافضل يكون تنزاني وتلقاها في برق الحيا في الرياض عند مخرج 15



فراش النوم
عندك فرش القاضي ، الفصول الاربعه وهو عندي ومجربه ووممتاز ويميزه انه عريض وتاخذ راحتك ، أو تروح تفصل لك فراش من القماش تنزاني ، والرواق تلقى لك رواق جهاز وفيه تفصيل
أما الخيام فيه عندك شئ خفيف وسريع سريع وتختلف فيه الخفيفة وفيه الي قماشها ممتاز


البيرق عندك 3x3 من القاضي
وفيه عندك خيام التربو 3x3 من اخونا كوفيا 1 ( أبو منصور وكيل معتمد لشركة كوفيا وكولمان وماركة ذئب الصحراء )




إن شاء الله إن افدتك وإن شاء الله ياربي يرزقك العزبة الي توسع صدرك وتطيب خاطرك
إن اصبت فمن الله سبحانه وتعالى وإن اخطأت فمن الشيطان .


واذا فيه اي شئ حنا طال عمرك حاضرين ولايردك الا لسانك .محد طلع من بطن امه متعلم


حفظك الله ورعاك
إخوك ابو خليل