فزعتكم ياهل الخبرة : ابي اروح للمدينة من الرياض!!!!!

[خالد القبيلي]

السلام عليكم ورحمة الله وبركاته



لايدخل إلا وسيع صدر .... لكثرة الأسئلة .... مو شرط تجاوب على كل الأسئلة اللي يعرف يدلو بدلوه والله يجزاكم خير







انا ناوي بإذن الله أطلع للمدينة المنورة من الرياض لأول مرة ثم إلى مكة عشان ناخذ عمرة ثم إلى جدة والعودة إلى الرياض؟؟



السؤال الأول : ماهو الطريق الأفضل من الرياض للمدينة ؟ مع العلم اني ابطلع أنا وزوجتي والوالدة الله يحفظها يعني انا والعائلة ولا معي خوي ؟ وماهو التوقيت المناسب الصبح ولا بالليل ؟ وهل يوجد ساهر بالطريق ؟؟





السؤال الثاني : لأهل المدينة المنورة .... أيهم أفضل بالنسبة للمدينة أجي يوم الثلاثاء والأربعاء أو السبت والأحد .؟ وهل فيه فندق مناسب قريب من الحرم النبوي؟ وهل توجد أماكن تنصحون بزيارتها؟ بالنسبة للإحرام من ميقات راح يكون .؟؟ اذكر مرة كنا في حملة واحرمنا من ميقات بالمدينة المنورة؟ وين مكانه؟





السؤال الثالث : لأهل مكة المكرمة .... متى يأتون المعتمرين عادة من خارج مكة ( معتمرين الحملات بالباصات ) اي يوم واي ساعة ؟ وما رأيكم بفندق كرستالة التميز ..اظن اسمه كذا في محبس الجن ؟؟ بالنسبة لزمزم التعبئة الجديدة وين الاقيه ؟؟ كيف الجو عندكم هذي الأيام ؟؟؟





السؤال الرابع : هل ذبلت تسبودكم من كثرة الأسئلة ؟ إذا نعم ...أنا آسف ..وإذا لا .. فكثر الله خيركم



:fأخوكم ابوسعود:f

[اسامه الحربي]

موفق خير اخوووي..
افضل طريق هو طريق القصيم اللي من الرياض للقصيم ومن القصيم للمدينة طبعاً الخط سريع ^_^ اذا عبيت بنزين من الرياض تعبي بالقصيم اللي يسمونه الدائري حق القصيم وفيه محطة قبل المدينة بـ 250 تقريباً صغيرة وبعدها فيه محطة بالحناكيه وهي قبل المدينة بـ 100 كم .
وانت معك عائله امشي بالبنهار ازين لك واوونس وساهر موجود بعد ما تطلع من الرياض بحدود 100 او 80كم وبالدائري حق القصيم وقبل المدينه بحدود 60 او 70كم
ورح للمدينة يوم الثلاثاء عشان زحمه الفنادق وتراها وااجد عند المسجد النبوي وزور مسجد قباء والسبع المساجد وايضاً واذا تبي مجمعات رح للراشد مول او مجمع النور
وميقات المدينة اللي اسمه ميقات ذي الحليفة وانت طالع لمكة مع خط الهجرة طبعاً طالع من عند المسجد النبوي فيه اشارة عندها محطة حجاج الجو والبحر اذا تعديت الاشارة تمشي تقريبا 700متر او اكثر بشوي تجيك لوحة مكتوب عليها ميقات ذي الحليفة وتتجه لليمين ومن الميقات امشي على اللوحات حتى ترجع نفس الخط اللي نزلت منه للميقات وهو خط مكه جدة خط سريع وجميل جداً يتميز بكثرة محطات الوقود^_^
هاذي المعلومات اللي عندي انا من سكان المدينه وحالياً بالرياض وحافظ هالخطوط اللي قلتها لك لاني قطعتها رايح جاي
ومووووفق خير يا خوي سعود بس لا تنسانا من الدعاء امانتي لك انك تدعي لي بالوظيفة والزوجه الصالحه اخوووك الحربي

[M Fox]

من الرياض امسك طريق القصيم .. تقريباً 800 كيلو وتاصل المدينة على خط واحد .. لا وصلت المدينة يجيك الدائري بعد مفرق طريق غير المسلمين خذ مع الدايري يمين وامسك الخدمه 3 كيلو تقريباً يجيك دوار خذ معه يسار و سيدا والحرم بوجهك .. بالنسبة للطريق امش متى ما بغيت الطريق آمان .. [ المحطات متقطعه .. انتبه ] .. بالنسبه للسكن .. الوقت المدينه فاضيه لذلك لا تقلق .. ولا سمح الله ضعت ترا أهل المدينه رجال ويخدمونك ..

[عبدالله المنصور]

السؤال الأول : ماهو الطريق الأفضل من الرياض للمدينة ؟ مع العلم اني ابطلع أنا وزوجتي والوالدة الله يحفظها يعني انا والعائلة ولا معي خوي ؟ وماهو التوقيت المناسب الصبح ولا بالليل ؟ وهل يوجد ساهر بالطريق ؟؟





طبعا بلا شك طريق الرياض القصيم .. القصيم المدينة السريع

اطلع من الرياض كانك متجه للقصيم الطريق السريع ما يوقف الا بالمدينة.........

ساهر موجود الى 100 كم وانت طالع من الرياض

وفيه قبل القصيم بـ30-40 كم موجود

وقبل المدينة بـ 60 كم تقريبا

والطريق فيه المحطات بكثره وجميع الخدمات متوفره فيها


رحلة سعيدة وتوصل بالسلامة

[البشير11]

الله يسهل دربك الاخوان ماقصروا

بس لاتنسانا من الدعاء اخوي

[خالد القبيلي]

اسامه الحربي

ام فوكس

عبود 20

البشير11

الله يعطيكم العافية ياشباب على الردود وماقصرتوا

باقي أهل مكة يردون على سؤالي ...
السؤال الثالث : لأهل مكة المكرمة .... متى يأتون المعتمرين عادة من خارج مكة ( معتمرين الحملات بالباصات ) اي يوم واي ساعة ؟ وما رأيكم بفندق كرستالة التميز ..اظن اسمه كذا في محبس الجن ؟؟ بالنسبة لزمزم التعبئة الجديدة وين الاقيه ؟؟ كيف الجو عندكم هذي الأيام ؟؟؟

[abu_ahmad_241]

اخى الكريم انا من اهل المدينة بالنسبة للطريق الشباب ماقصروا اما الفنادق كلما اقترب من الحرم زاد سعر الفندق واذا وصلت المدينة ان شاء الله بالسلامة انا تحت امرك بس ارجوا من عدم السرعة لان السرعة مافيها خير ابدا وبرسلك رقم جوالى على الخاص بس لو مافى كلفه عليك ارجو الاتصال على بعد الساعة 2 ظهرا

[binamerah]

السؤال الثاني : لأهل المدينة المنورة .... أيهم أفضل بالنسبة للمدينة أجي يوم الثلاثاء والأربعاء أو السبت والأحد .؟
اذا ما وراك شغل تعال السبت والاحد لان الزوار اقل من باقي الايام وبالتوفيق ان شاء الله

[الخادم]

الله يوديك و يردك بالسلامة