مشكلة مقلقتني وجايبة لي الهم

[ملوك الجن]

السلام عليكم ورحمة الله وبركاتة
يالربع انا جاي ابي مشورتكم من مشكلة قالقتني وجايبة لي الهم انا عندي جيب جي اكس ار موديله 97 ماشي 317 الف مشكلتة انة يدخن وينقص زيت المكينة اذا شغلتة وهو بارد اذا احتر وحمى يروح الدخان واذا مسكت به خط او وقفتة لمدة يومين ينقص زيت ماقدر احدد بالضبط كم علبة نص علبة مادري والله رحت بة لمكنيكية واجد الي يقول شنابر او شمبرة والي يقول جلد بلوف ولا ادري من اصدق وبالنسبة لدخانة مقدر اقول ازرق او ابيض لكن شورو علي وقولو لي تكفون لاتخلوني

[K.S.A.A]

والله أسمك يخوف أول شي ياملوك الجن
لكن ماشاء الله الجيب ماقصر لاتنسى انه موديل 97 وماشي فوق 300000 يعني توقع أنه يبي سبيكة وشنبر
لكن أن كان النقص شوي فلاتسوي شي أنتبه خله يمشيك لين يقول بس
مثلا ان كانك تسافر عليه مسافة 500 كيلو وينقص عليه وانت مسرع فلا تسوي شي خله .
بس دام الدخان يطلع وهو بارد فهذا يبي سبيكة وشنبر ..
لان جلد البلوف تطلع لما تجلس السيارة تشتغل لمدة 10 دقايق وتدعس قوة وقتها يدخن
بس مشكلتك شنبر وسبيكة ..
والله الله في الميكانيكي الجيد ..

[ملوك الجن]

والله من ناحية اسمي فهو عادي واما من ناحية سيارتي فأنا اسافر عليها بشكل متكرر ولا نيب قاعد كل يوم اشيك على الزيت لكن نبي خبرة زود هاتو ياعضاء ارائكم بدون قصور في الاخ الي رد

[saleh4800]

وعليكم السلام ورحمة الله وبركاته
بالنسبة للدخان اثناء البرودة فهذا اكيد من جلد البلوف
أما بالنسبة لنقص الزيت فهذا اكيد أنه من الشنبر
يعني الله يعينك تبدلهن كلهن وتريح راسك
وبالتوفيق لك

[نفداوي]

وعليكم السلام ورحمة الله وبركاته
بالنسبة للدخان اثناء البرودة فهذا اكيد من جلد البلوف
أما بالنسبة لنقص الزيت فهذا اكيد أنه من الشنبر
يعني الله يعينك تبدلهن كلهن وتريح راسك
وبالتوفيق لك
اتفــق مــعــك

[حصن زحام]

استفدت من موضوعك ومن ردود الإخوة لأن عندي مشكلة مشابهة في جمس 94
جزاكم الله خيرا.

[بدوي جنوبي]

ياخى كل شي تطور افحص ضغط بساتم المحرك
بالكمبيوتر ،، وشوف كم نسبة الضغط
وبعدها تقدر تحكم او الفنى يحدد اذا يحتاج توضيب .

كل الدعوه 100 فحص محرك فقط
افحص عند ورشة غير اللى ناوى تصلّح عندهم



بالتوفيق

[سفاري959]

لا تتعب نفسك هذا توضيب كان عندي جي اكس 94 سوا نفس الحركه و هو توه ماشي 300000 مع اني كنت محافظ عليه بالزيت واول ما شفت الدخان كلن قالي من البنزين معبي من محطه خالط البنزين والديزل لن ريحته فيها من ريحه الديزل بس استمر الدخان ولاحظت الزيت حصلته ينقص وبعد الفحص اتضح انه يبي توضيب وابشرك بعته بخرابه اختصر على نفسك وافحص كمبيوتر وريح راسك موفق خير يالغالي

[ملوك الجن]

طيب يالربع لو وضبتة كم بيكلفني اكثر حد له

[Abo gssar]

7500 يزيد او ينقص شوي

[ملوك الجن]

طيب يالربع ابي علامات تخبيط المكينة

[ناصر العدواني]

الشباب ماقصرو كفو و وفو
اذا الظروف ماتسمح انك توضب الحين او تسقط للسياره شنبر
خله كده بس حافظ على الزيت زوده بإستمرار
ودليل ان السياره تبي توضيب اذا غيرت له زيت ومشيت عليه ولو مشوار بسيط
تطلع عيار الزيت تلاقيه متغير لونه مو كأنك توك مغيره
اما التخبيط طال عمرك فالسياره توقف او تطلع لك البساتم او السبايك من جنب المكينه
الله ييسر امورك
ولو فيه غلط في معلوماتي اتمنى من الاخوه التصحيح
تحياتي لكم

[ملوك الجن]

والله عيار الزيت كلما طلعتة لقيتة اسود كني ماشي علية واجد وانا مامشيت علية والزيت اغيرة كل خمسة الاف او يمكن اقل بعد والمشكلة مهيب مشكلة فلوس المشكلة محد ضابط لي توضيب المكينة

[ملوك الجن]

اشكر كل من رد على الموضوع ولا نستغني عن الخبرة الي عندة خبرة يجيبها لايبخل علينا

[ناصر العدواني]

اجل الله يعينك توضب الموتر
يبي يكلفك حول 9000 تزيد تنقص
وتكون قطع اصليه
وترتاح بس الله الله بالورشه الزينه
في الطايف اقدر افيدك عن ورش ممتازه للجيوب
ورشة السواط شيخ الصنايعيه
وفيه ورشه ثانيه تخصصهم جيوب فقط
لاندكروزر فقط
واسم الورشه ابو حربه
وهذي الله يسلمك يبي لك تحجز معاهم وترجع بعد يومين او ثلاثه توقف سيارتك
وأسأل الله ان يعيينك ويسهل أمورك

[العمده 0ون0]

يا اخوي عندي لك حل سهل وبسيط ان شاء الله يمشيي امورك ويخفف صرفية الزيت اذا ظروفك ماتسمح توظب0
هو انك تغير زيت المكينة الى زيت اثقل مثلا اذا كان مقاس الزيت( 50-20) مثلا غير الزيت الى مقاس (50-40) مثل موبيل الثقيل وتحط معه علبة مادة (استوبSTB ) خاص حق الشنبر اذا تعرفه 0


وهذا حل اخر غير بستم و شنبر اذا (السرندل) نظيف خرط بلاده( وراس المكينه نظيف)
وبلوف يعني نص توظيب0


ان شاء الله اني افدتك0
وسلامة الجميع


بعدين هذااسم معررفك ملوك الجن خلهم يصلحونها ههههههههه :D:D مزحه
(اللهم سكنهم مساكنهم)

[فياض الربيع]

اذا مشيت خمسه الاف كم ينقص بعد ماتمشيها