والله يا جماعة احترت ؟؟؟؟

[anas]

السلام عليكم ورحمة الله وبركاته
بصراحة من فترة وانا ابحث عن سيارة مريحة في السفر ما تسمع صوت الماكينة ظاهر __ ( اخي عنده gxr 2004 وارد اليحي في الرياض يقول بعد 120 كلم/ساعة تسمع صوت الماكينة مزعج نوعا ما وكراسيها متعبة للظهر في السفر ) __ كراسيها ما توجع الظهر وزينة في الطعوس والبر ولا تطلب قطع غيار ولا تصرف بنزين بشكل ملفت للنظر وتجلس معاي بإذن الله 7 سنوات وحتى لو وصل سعر السيارة 180الف ريال .. كان معاي باث فايندر مكينته ضعيفة جدا موديل 2002 فل كامل اشتريته في سنته تصدقون بعته خلال 6 اشهر فقط :( .. الآن ابحث طبعا عن سيارة اكبر يعني ثلاث مقاعد .... شووووروا علي يا اخوان ؟؟؟

[عاشق النحم]

والله صراحة
شكلك تبي يوكون....!
اليوكون هي الي توفر لك كل هذا بس عيبه
البنزيييييييييييييييييييييييييييييييييين
وحط تحته عشرين خط

[طشي وامطري]

جراند شروكي بس احذف 7 سنوات.

ولا تصير طماع على هالمواصفات يالاه تصير قيمتها 300 ألف .

[ابو؟؟؟]

السلام عليكم ....

انا اقول خذ ارمادا اذا كنت تبي سيارة كبيرة و حلوة وتعيش بس الراحة وسط

انت روح الوكالة وخذ تست درايف وجربها واذا اعجبتك خذها

وشكرا....

[غيّام]

430 Ls

وارقد

[عاشق النفد]

والله انصحك


بالمورانو شكلة فخم وحلو وداخلية كذالك

لاكن راحته ما سقته

[anas]

السلام عليكم ورحمة الله وبركاته
عزيزي عاشق النحم : كأنك تقرأ افكاري ...
عزيزي غيام : ودي بــ 4x4
عزيزي ابو : كلامك زين بس السيارة جديدة ولا ادري كيف هي بالبر وانا من الناس اللي يطلع البر كل اسبوع مرة بالعايلة ومرة مع شباب اطعس طبعا على خفيف .
الأخ طشي وامطري : كان معاي شيروكي وتوبة منها ....
الأخ عاشق النفد : المورانو اعتقد غير مناسب بالمواصفات اللي ذكرتها .

[حرباش]

أبحث عن سياره 8 سلندر لأن السته والأربعه كلها تحن



تحياتي لك ;)

[حديث الفرعون]

لاند روفر و ريح بالك

[الباث الأسود]

انا من رأيي للراحه و الخطوط
كابريس ss

اما اذا كنت خطوط و راعي بر فأنصحك
اليوكون

وهذا مجرد رأي

[السارب]

السلام عليكم ورحمة الله وبركات
يوكون جديد من العيساء وتراه مايصرف بنزين واهم شي تشيك وكاله كل سنه من الصدام للصدام والقير تراه حساس لكن ابشر في الحر مكيف مربعانيه ومريح ولا تركب كفرات مضلعه تصارخ على الطريق والموتر خفيف ولفته احسن شي يعني ديره وبر يمشي وسال اهل اليوكن ولا تنسى تستخير

[طخيمان]

لاند كروزر 2003.

[anas]

وعليكم السلام ورحمة الله وبركاته
عز الله يا حرباش صدقت وهذا اللي افكر فيه بصراحة 8 سلندر .... اكره صوت الماكينة في السفريات

حديث الفرعون كلامك صحيح لاندروفر لكنها سيارة اعتقد ما تتحمل الأجواء عندنا ..

الباث الاسود والسارب اليوكون خاش صراحة دماغي بس ما تلاحظون انه عفش شوي ... ما ادري كيف اللاندكروزر 8سلندر بالنسبة للصرفية والقوة على الطريق

ابو الطواري لماذا بالذات 2003 ؟

[بو خليفه]

أشتر LR3 من لاندروفر الجديد سابقاً اسمه ديسكفري قوة العزم 425 الحصان 300 و هادئ مثل الرانج روفر و سبع أشخاص طبعاً ميزته تمشي 200 كيلو لا تسمع صوت ماكينه و لا تحس بالمطبات و جداً راسية في الطريق و ميزته يرتفع إلى 31 سم و ينزل للأطفال أو العربة وهو دفع دائم و البنزين اقتصادي و لا يستهلك قطع و الزيت كل 30 ألف كيلو و الصيانة كل 100 ألف كيلو و إذا تبغي التفاصيل على موقعهم
http://www.landroverusa.com/us/en/Vehicles/LR3/Overview.htm

أو أشتر رمادا أو يوكن أو اكسدبشن و هذه الثلاثة مريحه و البيع ما ينزل سعرها كثير

[شويح]

الكزس 470

وبس

مستعمل 2004
وترى موتري للبيع

[sultan8861]

تبي نصيحتي اصبر الين ينزل الباثفندر الجديد2006 تراه موووووووووة وبعدين خلوه ثلاث مراتب

[القماري]

عندك التالي:-
1- يوكون 4x4 حجمه معقول وسعره معقول 108 الف ريال فقط
2- Gmc سوبربان 4x4 (عائلي وكبير جدا)
3- نيسان ارمادا (حجم كبير وشكل مختلف وسعر معقول)
4- فورد (أكسبيديشن) عملية ويعيبها قلة الإقبال عليها مقارنة باليوكون

هذه بعض السيارات الرباعية الدفع والعائلية الحجم و8 سلندر ومنتشرة بكثرة في اليلد وأسعارها معقولة والطلب الأكثر حاليا لصالح (اليوكون) به مزايا عديده وبه أيضا عيوب فنية .

[الشقردي]

خذ VXR جديد 2006 دراهمك 180 ممكن تجيب لك VxR2 اللي يجي مثبت, والسيارة تطابق جميع المواصفات اللي ذكرت لكن لو ما انت مستعجل تصبر لـ 2007 لأنه احتمال كبير يتغير

اليوكن جيد لكن اضافة الى صرفية البنزين (داخل الديرة أما الخطوط فالصرفية معقوله) سيارة كبيرة مترامية الأطراف وانا أقول لك هالكلام عن واقع تجربة

نصيحة لوجه الله انك تستخير قبل تشتري يوكن طالما ان معك قيمة VXR , بتقول لي ليش أقول لك التالي:

اليوكون يتميز بالتالي عن اللاند
أكثر اقتصاد في الخطوط وأوسع من اللاند ....

ولكن أنتبه !!!!!!

ترى التماسك اللي في اللاند ماراح تحصله في اليوكن في المطبات وغيره هذا أولا ...
ثانيا اليوكن مرتفع أكثر من اللاند وبتحس بالفرق وبتحس بوجود تنسيم هواء وإزعاج في الخط مهوب مثل هدوء اللاند,
ثالثا اليوكن صوت مكينته أعلا وأكثر ازعاج من اللاند ...
رابعا اليوكن صحيح فيه مزايا كثيرة والكترونيات وأنظمة تحسين الثبات لكن قد تعيقك هذه الأنظمة نوعا ما في الطرق الرملية.

خامسا خاصية عزل الهواء في مكيف اليوكن ما منها فايده ويدخل عليك ريح سيارات الديزل والدخاخين (ويمكن هالمشكله عامة في الأمريكي)

ترى ما قلت لك هالنصيحة الا من تجربة لأن عندنا VXR2 موديل 98 يعني عمره 8 سنوات
وتونا شارين يوكن أفخم نوع 2005 دفرنسين ولاحظت فيه هالفروقات وحبيت أفيدك

[anas]

السلام عليكم ورحمة الله وبركاته
اشكر الأخوان
الشقردي
القماري
sultan8861
شويح
بو خليفة وبقية الأخوان
الشقردي
بيني وبينك يا بوخليفة lr3 لاندروفر داخل دماغي عرض بس يا اخي سيارة ما ادري تتحمل اجواءنا يعني تخدم حوالي 5 سنوات من غير صيانة مكلفة وخاصة انني اذهب البر كل اسبوع .... وبصراحة سأذهب الى الوكالة واسالهم ان كان في تجربة لها وان شاء الله انقل انطباعاتي لها .
يا شويح انا اشهد ان اللكزس موتر بر وكشخة على قولة المصريين بتاع كله بس 250الف ما يستاهلها .
الباث فايندر يا سلطان شكله ضيق شوي
يا القماري ما هي العيوب التي في اليوكون ؟
الله يجزاك الف خير يا الشقردي كفيت ووفيت اقولها بصدق انك فعلا اطفأت ما بي من هم لأنني فعلا بعد طول دراسة لجميع السيارات 4x4 صفي من السيارات نوعين vxr الفل كامل طبعا والجيب الكزس واليوكون .. ففكرت ان ابحث عن الجيب الكزس مستعمل موديل 2004 بسعر حوالي 150الف او اشتري يوكون جديد موديل جديد وكالة اما vxr الفل كامل فعلى حسب كلام الأخوان انه ثقيل في الطعوس والخط حتى انني رجعت لوزنه مع الجيب اللكزس وجدته يفرق كثير لا ادري لماذا ؟

[الأعصـــــار]

نصيحـــــــــــــــــه لك خذ الأرمادا ماشالله عليه مكينه جباره وفي السرعات العاليه ضغط الماكينه مايبعد عن رقم 3
يعني صرفية البانزين أقتصاديه مقارنة مع سيارات الفورويل الثانيه شكله وحش (بس ياويل الي بيحارشه) أنا شفت له مقاطع فيديو قومه وخط مع جمس سوبربان وفي أكس أر ونتفها نتف وقريت عنه أن مكيفه ثلج غير شكله رهيب ويكفيك أنه نيسان أتمنى
لك التوفيق في السياره الجديده ولاتنسى الأستخاره ...........

[القماري]

من عيوب اليوكون الجديد كثرة أعطال النوافذ ويكلف الأصلاح الواحد لكل نافذه مبلغ وقدره 580 ريال على أقل تقدير وغير مضمون أيضا.
سيارة ثقيلة مقارنة بالسيارات الأخرى.
هذه بعض العيوب في اليوكون وخصوصا (مشكلة النوافذ وأعطالها)

[هوى]

عندي معلومه بس مدري هي تمشي على اليوكون ولا لا ؟
المعلومه :
كل الجموس الصوالين التاليه يعني من 2000 وجاي دايم تخرب طرمبة البنزين فيها يعني مهوب مضمون تروح عليه للبر أو أي منطقه ثانيه ***
دايم تخرب وبشكل مزعج يعني تخيل في السنه تقريباً 6 مرات!!!!!!!!!!!!!!!!!!!!!!!!!!!!!!!!!!

[الشقردي]

الله يحييك ياأنس ولا شكر على واجب

أما بخصوص النفود فهذي النقطة ما يختلف عليها اثنين أن اليوكن أطلق من اللاند في النفود وزي ما قلت اليوكن أخف وزن وأقوى مكينة بمراحل من اللاند(بس فيه ملاحظة مهمه لازم تنتبه لها ان اللاند 2006 قوة المكينة
اختلفت في أمريكا بس ما أدري هل أختلف في الخليج او لا من 240 حصان الى 275 حصان شف الرابط
http://www.toyota.com/landcruiser/specs.html?s_van=GM_TN_LANDCRUISER_SPECS),
واليوكن 295 حصان يعني تقلص الفارق الي 20 حصان تقريبا
http://www.gmbuypower.com/vehicleHomePage.bp?make=GMC&model=Yukon&makeId=012&modelId=015&year=2006&subModelId=36&subModel=&categoryName=Performance&lowerPrice=&higherPrice=#0


لكن نرجع ونقول اذا العيوب اللي قالوها الشباب عن اليوكن ماتفرق معك كثير واذا الجودة ماتفرق معك خذه هو زين بس لاتعدى النفود وأما الوعر ودروب الصمان لا تقربها لأنه بيقربع معك بسرعة وهو مقربع خلقة
(يعني وهو جديد) ترى ما أقول هالكلام من واقع تعصب ولا حميه كل هذا من واقع تجربه, أنا في رأيي الشخصي الجودة أهم من قوة المكينة (مهيب سيارة سباق) ولو أدفع زود !!!!

وبالنسبة للاند في النفود مهوب سيئ الى ذيك الدرجة لكنه مهوب أزين من اليوكن ولا حتى الباترول بس انه يفك أزمة بقوة وتقدر تمشي بثقة واعرف الله يحفظك ان اللاند سيارة يعتمد عليها بعد الله في المهام الصعبة ولا تنسى أنه في السحب
وتطليع السيارات من الغراز تعتبر من أفضل السيارات ان ما كان أفضلها (من واقع تجربة-ساحب جمس دفرنسين متعلق الى الشاص)
لكن لابد من ممشى العقل ومسايسة الموتر وتجي الامور معك بأسهل من ما تتوقع
وعلى ما قالوا الخيل من خيالها !!!!


مقارنة سريعة للسيارتين
--------------------------------------------------اليوكن---------------------------اللاند VXR
Horsepower @ RPMالاحصنة--------295@5200------------------275@4800
Torque @ RPM العزم -----------------335@4000------------------332@3400
الوزن -----------------------------------------5210---------------------------5425
القير الاتوماتيك-------------------------------- أربع سرعات------------------- خمس سرعات
من موقع GM

[anas]

السلام عليكم ورحمة الله وبركاته
اشكر الأخوان
الاعصار
القماري
هوى
الشقردي
الأرمادا يا الاعصار بدت تدخل دماغي بس سعة ماكينتها كبيرة يعني شكلها تصرف بنزين مثل الجمس ويمكن اكثر
شكرا لك اخي القماري على هذا الايضاح المهم في الحقيقة
يعطيك العافية اخي الشقردي .. في الحقيقة انني وجدت الاند قبل كم سنة كان 250 حصان لكن من 2003 تقريبا وجدتهم يضحكون علينا الجي اكس ار 221 حصان فقط والفي اكس ار 228 حصان فقط يعني ابو جميل قاعد يضحك على الناس في احصنة الجيوب .

[بو خليفه]

يأخي العزيز يهمك في الجيب
قوة العزم لاندكروزو قوة العزم 320 نيوتن و الحسان 250 دورات الماكينه تكون عند 4500
أما اليوكن تقريباً 400 نيوتن والحصان 325 تكون دورات الماكينه 2500
أما Lr3 العزم 425 الحصان 300 لا تنسى قوة العزم تكون دوارت الماكينه عند 1800 تقريباً