وين أهل الكيف ؟ .............. يا راعي الشاهي.

[طشي وامطري]

رحنا هالأيام ... قبل رمضان لديرة زايد
ودخلنا أنا وواحد من العيال ( الشباب ) لبقالة وصلنا لقسم الشاهي رايحين للثلاجات يوم الرجال اخترش تقل مهبول شاف شاهي اسمه ( محمود ).
وبدا يمدح بهالشاهي ويقول دورته بالامارات وبالسعودية مالقيته ، يقول إنه جاه هدية من الامارات أيام المهرجانات وفعلاً أخذت منه بكتين ، عطيت عزيز واحد وأخذت واحد.هو أخذ 8 بكتات كبر شاهي ربيع الواحد.
وحلته ( رميته ) بالبيت ونسيته ، وعقب المغرب جاء براد الشاهي كالعادة واشرب منه يوم طارت طباقة راسي ماردها إلا السقف من زينه والصراحة شيء غير طبيعي وسألت وصار شاهي محمود.
دقيت على اللي عطيته وسألته عنه قال شيء غير طبيعي ، وهو راعي صنف بالشاهي يحب الشاهي أكثر من أمه.
فلا يفوتكم
وتقبلوا تحياتي

[عاشق المزون]

مشكور المشكلة شهويتنا !!!!! وما علمتنا وين نحصلة بالرياض وشكرا

[طشي وامطري]

ما فيه منه بالرياض يوجد بالامارات

[الأعصـــــار]

شكله رهيب ومايصلح الا للمناسبات
يعطيك العافيه طشي وأمطري وأتمنى
لك التوفيق والتقدم...... أخوك
الأعصــــــــــار

[nahham]

اذا فاتك شاهي محمود لا يفوتك شاهي ممتاز - عماني -او على الاقل شاهي ابو كبوس - يماني

يعطيكم العافيه

[الأعصـــــار]

صح لسانك نهام أما شاي أبو كبوس هذا طيب عندي واحد من الربع طايح فيه وينصحنا فيه

[ابو رامي]

شاهي ابو كبوس لايفوتكم ياشباب والله ياهو كايف

[طشي وامطري]

ابجيب ابو كبوس واقوم بأبحاث عليه!!!!!
وبعدها نشوف أيهم أحسن
وترى فيه شاهي عند السدحان كيني يمدحونه ، نبي نجربهن جميع ونشوف أيهم أحسن
شكراً للجميع

[عاشق الجيب]

هههههههه حلاو اسم الشاهي هذا لا اعلمك طريقه تخلى الشاهي يعدل مزااجك وبقوووووه وخاصتن لكنت بالبر بربيع يمك الحطب السمر الله الله اعلوم حطلك كميه من شاهي ابو جبل وسط كاست شاهي وصب فيه مويه وخليه تصفيه وبعدين حطه بالبرادي خلايه يغلى غلي وجرب بعده وشووف

[الوافي99]

مشكور والله يعين نبي نتطيح عسانا نلقاه ان شاء الله

بس ترى ربيع اكسبرس حبيبات شي والله.

[**القنيص**]

أقول لا يفوتكم الشاهي الصيني الملفوف أذا شربت الشاهي وخلصت المويه يبقى
عندك الورق أطبخه مرة ثانية مايضره لو تطبخه خمس مرات

[sony2000]

غير كبوس لا تدور

[2500HD]

يا اخوان الكبوس يبيله مكان محفوظ والا تروح نكهته مع الوقت وله كميات معينة في البريق غير التلقيمة
يا ليت احد الاخوان يفيدنا عنه

[nahham]

هلا 2500اتش دي

شاي ابو كبوس مثل باقي انواع الشاهي يحتاج الى عنايه للحفظ بعد فتح الكرتون وابعاده عن اي روائح اخرى

افضل شيء يحفظ في علبة زجاج مثل علبة الجبن الكبيره

ثانيا ابعاده عن الشمس

طريقة عمله .... اذا غلى الماء شيل البراد عن النار وضع الشاهي بمعدل ملعقه صغيره مليانه لكل فنجال سكر واترك البراد حوالي خمس دقائق

وبالهنا والعافيه

[بودحيم]

بخصوص الشاهي الي يبي شاهي يروح لثميري سوق الزل اذدخلت مع الشارع وجهك شمال يجي على اليمين تراه يبيع شاهي بس الي يبع فيه شايب والله اعلم

[@أبو سراج@]

والله برااااااسي شااااااااهي كاااااااااايف




بس ترانا صايمين..!!!!



والله ودنا نجرب شاهي محمود

شهويتونا عليه



أخوكم
أبو سراج

[بيرق العزة]

مشكور بالي قلته في المعلومه ابو محمود لا بوه شاهي عنداولاد علي بالربوه اسموه شاهي الكيني سعره 35 ريتال لاراح شاهي واذا جاء شاهي ........ اجل جريش اكيد شاهي اولاوه شاهي على كيف كيفك يطير الحمام الي بالعشه من زينوه جربوه وشوفو انا جربته مسكت لا وعلى السمر اطعم بزود

[بيرق العزة]

الطريقه الي قالهاااااااااا نهاااااااااااااااام هي الصحيحه وبس شاهي مزاج تعزمن نهااااااااااام على بيالة شاهي ههههههههههههههه

[نهر العطاء]

ورق ربيع وبس
بس يبي له واحد حريف ووزنيه خاصه

[مرقاب الشرق]

محمود اسمه ؟؟؟؟؟؟؟؟؟؟ مدري بس .

ربيع تلقيمه ولاتدور غير والكبوس اشوفه عند ناس لاكن ماهو تلقيمه يعني يطلع طعم الكيس بشاي .

[الذيب سرحان]

بالنسبة للشاهي الحقيقة اني من النوع اللي يمخمخ على الشاهي التلقيمة وجربت معظم الأنواع والى يومك من يوم جربت الكيني معاد غيرته ، وكل يمخمخ على النوع اللي يروق له وهذا رأي اخوكم ، ودايم اوصي عليه احد الشباب اللي يروح للاحساء ، وذكروا لي الشباب انه موجود عند بن بايوني في الخبر والكيلو ب 40 ريال 0

[أبو المثنى]

طيب وديمة وش رايكم به :d

[عاسف المهره]

شاهي واسمه محمود
ذا شاهي والا مدرس رياضيات

[عاسف المهره]

اسمع عاد ياراعي الكيف
الشاهي مثله مثل القهوه يعني مزاج وماكل شاهي شاهي يعني لازم تكتمل فيه جميع المقومات اللي تخليه كايف أما مقومات الشاهي المزاج مع الاعتذار للأخ أبو مزاج فهي كما يلي :
1- ورق الشاهي ويجب أن يكون جديد وغير معرض للغبار أو الضوء لفتره طويله ولم يخلط به أي مواد ملونه ( مثل ماهو الحال في شاهي الكبوس ) وفي اعتقادي الخاص والشخصي أن شاهي أبو جبل ويليه شاهي ربيع هما الأفضل وطبعاً التلقيمه أو الفله أفضل من أبو خيط لأنه يطعم في لشاهي .
2 - السكر ويجب أن يكون نقي خالي من الشوائب وكل ما كان جديد كان أفضل ولا يفضل المكعبات أوالناعم جداً .
3- الماء ويجب أن يكون حلو وطبعاً مافيه أحلى من ماء المطر .
4- البريق والبياله وفي رأيي الشخصي أن بريق الغضار هو الأفضل ، وغير بيالة بادريق لا تدور .
5- النار وأكيد مافيه مثل جمر الارطى أو السمر وأشين شي تصليح الشاهي على نار الكهرب .
6- طبعاً الشاهي حساس جداً ويتأثر بأي رائحه غريبه مثل رائحة دخان النار أو إذا كان هناك أي رائحة فيد الشخص اللي يصلحه مثل ريحة الطيب أو الصابون .
7- الوزنيه ويجب أن تكون جميع المقادير موزونه بشكل جيد يعني يبيلها يد حريف .
8- هناك من يفضل اضافة بعض المحسنات مثل النعناع ، الحبق ، الدوش ، العطره ، ماء الورد ، ماء اللقاح ،الزنجبيل ، الحليب ، الاعشاب ، الليمون ، الكمون ، وكل هذه الاضافات لاتقلل من قيمة الشاهي ولكنها تلغي عنه صفة المزاج .
9- وأخيراً هناك عدة عوامل تؤثر على الشاهي مثل الجلسة والوقت والجو والصحبه ، والحديث عن الشاهي طويل جداً ولكن حبيت أختصر .
أرجو أني أكون أفدتكم ولا طولت عليكم والعذر والسموحه والسلام ختام

[ضلع الرقيبه]

الله يعافيك يا عاسف المهره كفيت ووفيت

[مدمن القهوه]

ابو جبل وبس وبس وبس لا محمود ولا مصطفى
واهم شي يكون الماء صافي ونقي والسكر ايضا خبرة اكثر من ربع قرن بالشاهي ( شريّب فقط )

[فضلي]

بسم الله الرحمن الرحيم حبيت اشارك في الموضوع واضع معلومة عسى انها تفيدكم... انا من الناس الي احرص على الشاهي حرص شديد.. واقول للي يبحث عن انواع معينة من الشاهي .. انه انشالله راح يحصلها في هايبر بنده الي في شمال الرياض ..لأني مأشتري شاهي الا من عنده طبعأ يوجد هناك انواع كثيره من الشاهي لاتعد ولا تحصى حتى ان فيه نوع من انواع الشاهي عندهم الكيلو حقه 700 ريال والأصناف كثيرة وانشالله تجدون مرادكم وشكراً

[فتى احد]

السلام عليكم ...

أفضل شاهي ذقته الشاي الكيني من عند محلات بن بايونى بمدينة الخبر شارع الملك فهد بجوار الباحة للأجهزة الكهربائية وقرب مستشفى فخري ويباع بالكيلو وفيه شاهي أشتريه من الأردن أسمه الهلال وكذلك مستر هاني وكذلك شمس النهار كلها عليها الكلام من الاردن وفيه محل بالرياض في مركز سنتريا العليا هذا عنده أكثر من 360 نوع وصنف من الشاهي هاتف رقم 012194484 واللي يعرف أكثر عن الشاهي لايبخل علينا ومشكورين .