صوت طقطقه بالموتر اذا صار بارد وش السبب

[حبل الوريد]

السلام عليكم ورحمة الله وبركاته
صبحكم / مساكم الله بالخير
عندي الكامري 2001 الله لا يخلين منه :)
به مشكله :(:(
السالفه يا اخواني ان المزيونه باديتن تعتي على هاليومين ولي فتره الاحظ تهريب زيت
خفييييييف جدا
واليامني شغلته وهي بارده يطلع صوت طقطقه مزعج شوي :( بهذلن وتخبرون الواحد يحب يتسذب على عمره واقول لا الوضع طبيعي :p... عاد عندي اخوي الي حدري له شوية علوم بهالامور وقام يقولي يمكن طرمبة الزيت ما توصل صح او ان الصوفه الي بين الكرتير والطرمبه به مشكله
وهالصوت صوت البلوف او تكايات البلوف اذا ما جاهن زيت يطلع صوت الطقطقه :(
عاد انا ما اخذت بكلامه وماش ما اقتنعت .. قلت مالي الا الذيابه بمكشات:D
مع العلم انه اذا احتمى الموتر يختفي هالصوت بتاتا
الصدق اني غشيم بهالامور ولا بعد وديته ودي اسمع كلامكم قبل :good2:


تكفون يالذيابه خبرائنا ومشرفينا لا تبخلون:)

[ناصر العدواني]

الايام ذي برد واي مشكله في السياره تبين على طول
فعلاً كلام اخوك صحيح 100% اذا ان طرمبة الزيت مو شغاله على الوجه المطلوب
تبي تسمع صوت تكايات البلوف
بس يكون الصوت مستمر وتولع عندك لمبة الزيت بالطبلون
ولكن بالأول شيك الزيت لأنه اذا طول ماتغير وفقد لزوجته تبي تسمع صوت التكايات بعد
خبرتي في الكامري قليله ولكن هذا اللي اقدلا افيدك فيه
والاخوان ما رح يقصرون بيفيدونك اكثر مني بهالموضوع

[حبل الوريد]

وناخاوك مهوب يبطي

والزيت ما ابطيت مغيره ما بعد وصل الموتر 3000

[ابوالولد]

اذا لمبة الزيت تتأخر ماتطفى فأنه لاخاب ظني من طرمبة الزيت

[حبل الوريد]

لا وناخوك لمبة الزيت ما اشتغلت اساسا

[حبل الوريد]

رفع , رفع الله مقداركم

[ناصر العدواني]

الشباب معظمهم تستهويهم الجيوب والدفع الرباعي
لكن وانا اخوك اذا لمبة الزيت ماتشتغل اساسا فشيك على حساس الزيت احتمال يكون عطلان
وأبدأ بالحلول البسيطه قبل تدفع لحاجات كبيره وهي حلها بسيط
الحين الورش استغلال تغير وتصلح وتتعب ولا يصير اللي في بالك
شيك على حساس الزيت اذا شغال او لا
شيك على الزيت ولزوجته
اذا طولت السياره شغاله ودعست لها بنزين اذا طلع لها دخان هذي يبي لها جلد بلوف
اذا ماطلع دخان فريح نفسك وافحص كمبيوتر وشوف وين المشكله
والله يكون بعونك وانا اخوك
هذا اللي اقدر افيدك به
انا صارت لي المشكله بكابرس 2002
اذا اشتغلت السياره ومشيت عليها يطلع صوت تكايات البلوف
وتولع لمبة الزيت
بس مافيه دخان ولا شئ
وطلعت عندي طرمبة الزيت
وكان فكها وتركيبها هو المشكله لأن لازم تطلع المكينه من القير بوكس
وينفك صدر المكينه وتركب الطرمبه
تحياتي لك

[كديان]

انا مدري عن الكامري هل يوجد لمبة زيت اذا فتحة السويتش ؟؟؟
بمعنى افتح السويتش لكن بدون تشغيل الموتر هل تولع اللمبة ؟
بعدها شغل الموتر اذا شغلت تطفى اللمبة على طول ؟
غالبا المواتر بهالوقت تطقطق عند التشغيل في الصباح خصوصا الامريكي الجمس و الشيروكي و الباترول
التويوتا مادري عنه
نقطة اخرى انتبه تحط سيفون جديد من حقات البناشر لان الان يوجد جيوب مخبطة ببريدة بسبب السيفون التجاري
خذه من الوكيل فقط لا غير

السيفون الاصلي بداخله شخال حديد + اسفنج
التجاري العكس بداخله كرتون اذا احتمى الزيت تنفخ الكرتون وبالتالي يكسر مجرى الزيت و عندها مايرقى الزيت للمكينة و بالتالي تبدا المكينة تطقطق + تولع لمبة الزيت
اخبر باترول الموتر حار بعد مشوار تبدا لمبة الزيت تولع و تطفي تشكل على كيفه و يصاحبه ظهور اصوات
و السبب سيفون تجاري

سبب اخر
احيانا يكون السبب اهمال تغيير السفون نهائيا اذ الافضل تغير السيفون مرة واحده كل 3 تغييرات

معلومة اخرى احيانا يكون السبب من جنزير عمود التيمن يكون مرتخي لان عليه راكب فحمات مثل فحمات السلف و الدينمو و الفحمات تقضي بناء على العمر الافتراضي
لكن تراهن ما يضرن كضرر شديد

مداعبة هل انت مدرس ؟ :D
لان اغلب راعي الكامري اللي انا اعرفهم مدرسين و معهم موديلات م2001 و م2002
و تلقاهن ماشيات فوق ال350الف كيلو :D:p:D مدرسين قعيطية :p:D ههههه

موقعك ؟ ان بغيت ورشة ثقة ادلك عليه



وافحص كمبيوتر وشوف وين المشكله
والله يكون بعونك وانا اخوك



فحص الكمبيوتر ما يبين المشكلة ابد خصوصا اذا ماولعت لمبة المكينة او التشك
و العطل عند الرجال ميكانيكي و ليس كهرب

[sgl2002]

طرمبة زيت مافيها كلام ،، دفعها ضعيف ،، وانتبه لاتوقف الطرمبة ثم يخبط الموتر

[adil33]

لا تغير الزيت كل ما شفته نقص زيده لمده سنه تقريبا حتى بواقي الزيت تغطي الفجوات الي تسبب فيها نقص الزيت من قبل وباذن الله الصوت يروح وبدون اي مشاكل