شاص 2011 ودبله الثقيل

[صديق كلم رفيق]

السلام عليكم ورحمة الله وبركاته


بعد ثلاثه اشهر من اقتناء شاص 2011 بريمي ، وبعد التجربه اتضح لي ان دبله الثقيل سيء جدا جدا جدا .


قبل كان معي شاص 93 كان مجرد ماتعشقه بالدبل الثقيل ترفع رجلك عن البنزين كانت الكفرات تدور مايحتاج تدعس بنزين يعني يقص وتحس نمرته ثقيله.


لكن هذا الله يخلف تعشقه بالثقيل تحس نمرته خفيفه لازم تدعس بنزين وغير كذا يطفي من متى الموتر يطفي بالثقيل ايه يا التويوتا انا اشهد انك من جرف لدحديره


لكن الشهاده لله الموتر زال انه يمشي قوي في النفود لكن مشكلة اذا غرز تبطي يطلعك الثقيل احبطي صراحه . وين اهل الشيصان الجديده وش انبطاعاتكم هل كلام صحيح وإلا انا غشيم للحين ما تعودت عليه ، وهل مشكلة الدبل في المكينه الجديده وإلا حتى في 2009 ؟

[حسام الأسلام]

السلام عليكم ورحمة الله وبركاتة، معي 2010 عند الغراز الصعب يجب تشغيل الدفلوك هذا مالاحظتة والله اعلم.

[العابر2222]

هلا أخوي

معنا واحد 2011

كلامك صحيح ... والسبب الدعسه الكهربائية وكلتشه كهربائي بعد

لاكن دخلتبه في اماكن رباضات وانبطح ... وعشقت الثقيل .. ودعست له شي بسيط والله انه قص وطلع بالراحه والجيوب الثانيه ما طلعت الى بعد الحفر والدفن والتسحيب


انت الله يعافيك ما تعودت عليه لحد الحين لأن دعسته تختلف وكلتشة يختلف وخفيفه جدا ... نفس حالتي اول ما طلعناه في كل صيهد يغرس معي الين عرفتله

اصبر لك كم يوم ولا راح تحتاج الدبل الثقيل ابد ابد

[صديق كلم رفيق]

حسام الاسلام

السلام عليكم ورحمة الله وبركاتة، معي 2010 عند الغراز الصعب يجب تشغيل الدفلوك هذا مالاحظتة والله اعلم.

جربت والله الدفلوك لكن نفس الحكايه الموتر دبله ضعيف مره ، المسألة إن دبله الثقيل اذا عشقته تحس ماله روح ، اقولك لازم تدعس بنزين وغير كذا يطفي مب مثل الشاص الاول ،

[صديق كلم رفيق]

العابر

هلا أخوي

معنا واحد 2011

كلامك صحيح ... والسبب الدعسه الكهربائية وكلتشه كهربائي بعد

لاكن دخلتبه في اماكن رباضات وانبطح ... وعشقت الثقيل .. ودعست له شي بسيط والله انه قص وطلع بالراحه والجيوب الثانيه ما طلعت الى بعد الحفر والدفن والتسحيب


انت الله يعافيك ما تعودت عليه لحد الحين لأن دعسته تختلف وكلتشة يختلف وخفيفه جدا ... نفس حالتي اول ما طلعناه في كل صيهد يغرس معي الين عرفتله

اصبر لك كم يوم ولا راح تحتاج الدبل الثقيل ابد ابد

هلابك اجل عانيت مثلي :D
يعني ظنك البلى في الدعسه الكهربائيه ، الله لا يبارك فيها ، اجل وش فايدتها يوم انهم حاطينها .

[العابر2222]

وازيدك من الشعر بيت بس لا يضيق صدرك ... الشاص الجديد فيه عيب مصنعي ... البدي مايل يسار ... لو تدقق بتلاحظها

[جديعان]

اقوول التايوتا موديلاتها القديمه دبلاتها اقوى واحسن واصبر من الجديد وعلى قولتك من جرف لدحديره

وشوف قبل فتره طلعنا معنا شاص 2010 جديد وانا كنت راكب وفيه واحد من عيال عمي معه عشه 84 اشراع
وطحنا بطعس ناااااااعم وراعي الشراع لف الطاره لخر شي وما شا الله يقص قص كان المكان ضيق وطلع زي الحلاوه
وحنا بالشاص قلنا خلاص الحين نسبقه لف الطاره لخر شي قام يحفر وهو محله وشبك الثقيل وبرضوه يحفر وما طلعنا غير ما كبر الفه وطلعنا واستغربنا مدري ليش اللي يقول الدبل القديم اقوى واللي يقول الدفرنسات اكبر من الجديد والله العاااالم


وتاايوتا الحين موديلاتها الجديده كلها كهرب وازرار المفروض الشاااص يفكونه من شي اسمه كهرب والمقفص برضوه لكن الشكوى لله
ياخي ليييش ما يخلونه نفس العضلات ابيهم بس يغيرون المكينه تكون اقوى فقط

[مدمن فتك]

انا كان معي 2006 فل كامل وبالرباضات مايطلعه الا الدفلك

[صديق كلم رفيق]

العابر

ايه ذكرت موضوعك يوم تقول الشاص بديه مايل ، مايل ودبله الثقيل مخيس حلها عاد :D

جديعان

والله مافيه مقارنه من ناحية قوة الدبل بين 93 و2011 فرق مب سهل لصالح القديم ، لكن انا ما ادري هل الدبل سيء في كل الموديلات التاليه يعني من 2007 وطالع وإلا بس في العشره والاحدعش وهل البلى مثل ماقال العابر بسبب الدعسه الكهربائيه وإلا البلى بالمكينه الجديده << ادري انكم صدعتوا من كثر الاسئله :D

لكن قسم بالله مغبوووون موتر جديد واسمه شاص واخرتها دبله الثقيل بهالشكل والله ولا دبل هايلوكس ، يا ناس والله انه عيب وعار على تويوتا ، اقولها لكم مستحيل الشاص بهالدبل يسحب شي مستحيل إلا عساه يخارج نفسه بهالدبل المخيس .

مدمن فتك

جربت الدفلوك نفس الحكايه . اللي جرب دبل الاول والجديد راح يعرف وش اقصد والله يا ناس فرق مب سهل .

للتوضيح تراني اقصد الدبل الثقيل بس ، وإلا الموتر اذا كان يمشي وبالدبل الخفيف قوي جدا .

[يريور عيمان]

نفس العيب موجود في اللاند كروزر 2008 و فوق و بالتحديد القير العادي
الموتر اذا غرز صعب تطلعه و يطفى بشكل مستمر

[hamido]

هذي بس موجوده بالمكينه الراسين يعني من 2010 وفوق لان العزم اضعف من الاول ولا 2009 ماعليه خلاف نفس المكينه الاوله والقير

[صقر أمه 506]

المشكله مثل ماقال الاخوان السبب في المكينه الجديده
وايضا الدعسه الكهربائيه لها دور ..<< يعني زايده الطين بله والموتر مايستجيب لدعستك على طول وهذي حلها انك تتعود عليها وعقبها مايصير منها اي مشكله..

وايضا الدبلات تختلف
واكبر دليل انك حتى بالثقيل تقدر تمشي بالاول , بينما الموديل السابق لو تمشي ب2 شوي وينفجر
وطبعا هو عيب لكن انت اذا تعودت عليه بتضبطه ..

وفي النهايه انا اقول لكل شي ميزه
الجديد ميزته يمشي بالاول الخفيف الى حدود 65 عكس القديم .. يعني النمره نفسها طووووويل

[kbobe]

اعذرن يا رفيق الى الحين ما عرفت له

العابر
قلي وشلون مايل هههههههههه

جديعان
اول شىء ماتقارن ربع ب شاص لان الربع قصير والشاص طويييييييييييل

hamido

هههههههه ضكتن بقوه من قالك ان العزم ضعيف اجل هي سوليف

صقر

بصراحه انت مجرب ال 2010 ولا لا
انا معي ربع 2010 تشبك الثقيل ما تقدر تمشي بالاول مثل ما قلت شوي وينفجر

[kbobe]

والعذر والسموحه كاني اخطيت على احد

[هويدي]

اللي يتعود على الكبليتر مايبرد تسبده غيره

الجديد بخاخ ودعسه الكترونيه وكمبيوتر يتحكم بكميه البنزين والهوا وفلسفه زايده

وكلامي عن السيارات الجديده بشكل عام ما اخصبه الشاص او التايوتا

[قناص حارتنا]

اللي ما يعرف للشاص ليش يشريه؟

[hamido]

hamido

هههههههه ضكتن بقوه من قالك ان العزم ضعيف اجل هي سوليف



ياحبيب قلبي انا ماتكلم عن قوه اتكلم عن عزم مادري شكل معك ربع او انك ماجربت المكينه الاوله
المكينه الجديده حلوه لما تكون شاده اما اذا كانت عاكه بشي .... يبيله شوي عشان تنهض عمره
وممكن تقارن قوة العزم بالكتلوجات

[هاوي القنص505]

اول شي كلامك صح الكلبليتر يجر مايطفا اما البخاخ لازم تدعسله خفيف
والي يعذرب الـ10 ماعنده سالفه انا مجرب 2004 و2008 و2010
والصراحه الـ2010 غيرهم كلهم لا يهمك الحكا الي في السعه جربناها في ديار يبطون بعضهم ماوصلوها
بس بعضهم حاط الهوا 60 ويقول يطفا اكيد بيطفا الكفرات محجره وبعضهم خلاص دبل ماينسم
تبي الهرج الي ملحه في على كفرات السلق حطها 15 او18 اي طعس في راسك بيطلعه وبالهون
والجيب مايبيله ادعس وبس يبغله مسايس وابشر بولد يبيض وجهك

والمثل يقول
((الي مايطول العنب حمضاً عنه يقول))

[ابو عاذر]

اول شي كلامك صح الكلبليتر يجر مايطفا اما البخاخ لازم تدعسله خفيف

والي يعذرب الـ10 ماعنده سالفه انا مجرب 2004 و2008 و2010
والصراحه الـ2010 غيرهم كلهم لا يهمك الحكا الي في السعه جربناها في ديار يبطون بعضهم ماوصلوها
بس بعضهم حاط الهوا 60 ويقول يطفا اكيد بيطفا الكفرات محجره وبعضهم خلاص دبل ماينسم
تبي الهرج الي ملحه في على كفرات السلق حطها 15 او18 اي طعس في راسك بيطلعه وبالهون
والجيب مايبيله ادعس وبس يبغله مسايس وابشر بولد يبيض وجهك


والمثل يقول

((الي مايطول العنب حمضاً عنه يقول))


كلامك صح المشكلة تكمن في الدعسة ( المسارع \ الابنص ) لأننا تعودنا على الدعسة القديمة السلك وهذه كهرب لازم تدعس على خفيف

مع تحيات اخوك ابو عاذر

[kbobe]

HAMIDO

لا مجرب المكينه الاوله على ربع 2006 و 2008 و شاص 2006

[kbobe]

اخوي هاوي والله انك صادق
اللي ما يطول العنب حامض عنه يقول
وسلملي على 2010

[عمر السحيباني]

انا معي 2010 وجدت ان المشكله في التنسيم
نسم 20 او اقل ان كان الماكن وعر وعش حياتك
وصدق اخوي هاوي القنص لا يحسب الواحد اذا صار معه دبل يعني ماينسم
بالعكس نسم وشف وشلون الجيب يمشي وشف وشلون الموتر مرتاح وشف بعد انت وشلون مرتاح من المطاب

[شريك القلم]

يفيدونك الخوان

[صديق كلم رفيق]

يريور عيمان

سمعتوا يا شباب وش قال يريو عمان يعني البلى مب فيني البلى بالموتر :D

حميد

ظنك المشكلة من المكينه ؟
لكن الموتر زال انه يمشي قوي جدا مابه عذروب ابد ، كامل والكامل الله ، لكن عيبه الوحيد بس دبله الثقيل مايقص ابد سيء جدا جدا ، طيب سؤال هل الدبل الثقيل في 2009 مثل الشيصان موديلات التسعينات؟


صقر امه

صدقت الجديد اخف نفس ونمرته مب شاده مثل القديم ، القديم كان يغثك في البلد وخصوصا عند الاشارات الاول والثاني مايمشي ابد تحس المكينه بتنفجر. وانا اعتبر هالشي ميزه للجديد على قولتك نمرته نفسها اطول .

كبوب

حياك الله ، اتمنى والله ان المشكلة مني مب من الموتر . اجل نعطي سداح فرصه ..

هويدي

من جد عقدوها ، لكن بعد فيه ايجابيات كثيره .

قناص حارتنا

كان معي شاص 93 مطلعه وكاله وقعد معي لين بعته قبل ثلاثة اشهر ، ظنك ما نيب اعرف للشاص ، وجهة نظر تحترم على العموم حياك الله .

هاوي القنص

يا الله حيه ، كل ما اشوف توقيعك اتهيض ، صدقت من ناحية تنسيم الكفرات ، انا نسمت كفراته وحطيت بها 25 ومع الدبل الخفيف وبالثاني الموتر ماشاءالله ما عاد يرده رداد ، لكن اذا غرز المشكلة دبله الثقيل مقارنه بالاول فااااااااااااااااااشل ، حتى لما تدعس له مايقص مثل الاول .

هاوي القنص سؤال لاهنت مادام انك جربت 2008 هل دبله الثقيل مثل دبل العشره ؟


عمر

هلابك ما غابت عني وانا اخوك تنسيم الكفرات ، اكيد شي ضروري حتى الجيب اللكزس لو مانسمته ما راح يمشي .

شريك القلم

ماقصروا الاخوان بيض الله وجيهم وحياك الله .

[قطب 999]

تعبر بأم شوشه لما تجي المنقوشه

[ابن عكاش]

معي 2005 وبصراحه معجبني العشره واتوقع اننا دائماً نخاف من الجديد مدري هل صحيح ولا الا
بس يمكن موترك كلتشه فيه مشكله تاكد يمكن لو هو خلل مصنعي ولا شي

[صديق كلم رفيق]

ابن عكاش

خذها مني المكينه الجديده ممتازه زال الموتر شاد حلوه وعزمها قوي ، واقتصاديه في صرفية البنزين ، لكن ما ادري انا مشكلة الدبل الثقيل هل هي من المكينة الجديدة او لا . اما الكلتش ماظني فيه مشكلة ، لان كذا واحد من الاخوان في هالموضوع اكد هالمشكلة .