يا اهل حائل وين تتعيدون ؟؟؟

[مشغول]

السلام عليكم ورحمة الله وبركاته

حي الله الربع

اكيد المكشاتيين في العيد ما يقرون ... يا طالع بعياله والله يعينه على الصجه

او طالع مع الربع في احد هالمناطق ..

والحقيقة انا عزمت على اقامة رحلة أنا وبعض الشباب لمنطقة حائل (( بعد حيي ))

لكن للأسف أول مرة اروح لها ..وودي اروح لمناطق حلوة علشان ما اتحسف

وين تنصحوني اروح بالتحديد وياليت الاحداثية ..


بعد حيي لكل من شارك

[شـهـاب]

ياهلا ومسهـــــــــــلا

ياهلا ومسهلا



والله ياخوي تتشرف حايل بحضورك

وانا اتوقع اذا فيه مطر لا تدور غير جو لانها قريبه من حايل وزينه ( شمال من حايل )


واذا جاء مطر كثير لا تدور غير مليحا ( طريق الروضه )


واي خدمه تبيها من حايل انا جاااااهز

وسيّر علينا انت واخوياك ان شاء الله اول العيد حنا طالعين

[مشغول]

حياك الله اخوي شهاب

والله ما قصرت ويعطيك الله العافية

هذي المنطقتين (( جو- مليحا )) هل هي بعيده عن حايل ؟؟

وانت وين كاشت في العيد انت وربعك ؟؟

ووين أماكن تطعيس الشباب واماكن تجمعهم في العيد ؟؟

وشكرا لك يا حبيبي

[شـهـاب]

اخوي مشغول

للمعلوميه : ولكي ازيدك راحتاً واطمئناناً

حائل بسيطه ولا تحتاج الى توصيف للمكان

فلذلك انت اعرف اربع طرق رئيسية وتنتهي السالفه

شوف بالنسبه لجو فهي جميله جداً وتبعد عن حايل تقريباً 60كم

طبعاً مع طريق جبّه ولو تسأل الي واحد عن طريق جبّه قال هذا هو فهو في وسط المدينه
بعد السير في طريق جبه قرابة الـ40 يأتيك مفرق الحفير خذ يسار مع المفرق
ويأتيك لوحه مكتوب توارن -- وبعدها لوحه جو --- واذا تقدمت شوي قرابه 20 تجيك ردميه علي يدك اليسار هذه ردمية النايلات الردميه طبعاً قليله 10كم تقريباً واذا وصلت النايلات وهي قرية صغير اطلع من خلف المنازل وتواجهك طعوس خفيفه وهنا يجتمع طعوس وجبال بوقت واحد وهذا المكان يسمى التفيهي وهو مكان جميل جداً جداً
وخاصة في اوقات المطر .

واذا تريد مكان التطعيس :فبسيطه بعد وانت على طريق جبّه لا تفرق يسار للحفير تعدهـ بقرابة 20 يجيك قنا وهي نفود واذا كان اليوم اربعاء وبالليل يعني الساعه 12 تقريباً تجد انوار السيارات وانت على الطريق العالم الي تطعس

وطبعاً وانت على طريق جبه يجيك بعد مفرق الحفير على يدك اليمين مفرق التربيه وادخل مع هذا المفرق بعد 15كم تقريباً يجيك على يدك اليسار خط جديد لم ينتهي بعد قد انتها منه قرابة 250كم وهو خط الجوف - حائل السريع فهذا عن يمينه ويساره نفود يطرب الراس

طبعاً جبّه تبعد عن حايل قرابة 80 كم فإذا اردت ان تذهب الى جبه فهي قرية جميله كبيره وفيها متحف تراثي قديم
ومن جبّه تستطيع الخروج الى عليم العطش <- لكن لا اعرف وصفها جيد

جبّه : هي قرية صغيره تقع شمال حائل وهي ارض نفوديه
وطريق جبه : يجمع اماكن جميله وكثيره

----------------

اما مليحا فلا انصحك ان تجي لمه هالعيد لانه لم ينزل مطر وهي ارض تحتاج الى مطر غزير ليزيدها بهجتاً واشراقاً

وفي طريق المدينه بعد 60كم تقريباً يجيك المختلف والسنيم وهذه اماكن جميله
وسوف انزل لك خريطه جميله جدا وسهله
واعذرنٍاخوي على الاطاله

اما بالنسبه لي انا واخوياي فوالله الى الان ماحددنا المكان وسوف اعطيك خبر اذا حددناه ان شاء الله

اخوك شهآبـ بالخدمه

[منتعش]

ماشاء الله عليك يابوعبدالله (( مشغول ))
أثرك صامل على الروحة .
تراني خويك ومعنا (((((( المالي )))))
وعساك على القوة .
جهز الجيب الله يحفظك ويرعاك .

[أبوزيد]

اخي الكريم ( شهاب )

ممكن تدلني على أجمل منطقة في نفود حائل تستحق الزيارة ؟

[الضاري]

السلام عليكم

أضافة لكلام أخوي شهاب الله يعطيه العافية عندكم الرابط هذا فية بعض ما تحتاجونه من معلومات عن بنت الجبل وأخت القصيد

تفضل من هنا (http://www.barzan.ws/)

وأيضاً تفضل من هنا (http://www.hail1.com/hail/07-mcls02.html)

[شـهـاب]

اخوي بوزيد

السراحه حايل اغلبيه نفود
واذا تبي الي يطعسون فيه الشباب فهو قنا على طريق جبه تقريباً 60 كم

واذا اردت نفود جميل
فطريق الجوف كله نفود وجميل وطريق جبه كله نفود وآخر طريق جبه طعووووووووس على كيفك طويله مرررره وشكلها عجيب

[شـهـاب]

اخوي الضاري
مشكور على الاضافه

وللمعلوميه الموقع الاول حق عمّي <-- :d
اكرر شكري لك

[الضاري]

هلا شهاب

أدري أن الموقع الاول لعمك لذلك حطيته الاول ..... >>>> من زود الصدق ;) ;)
:D

تحياتي لك ولأهل حائل كلهم

[أبوزيد]

أخوي ( شهاب )
* الصراحة أريد مكان فيه حطب .. أبتونس وأكيف رأسي ..
* وش رأيك بالحيانية أنا لم أزرها من قبل ، وأود زيارتها ..

[الضاري]

وتفضل هذا رابط لموضوع يفيدك بعد ( فيه أحداثيات منطقه حائل )

احداثيات خاصة بمنطقة حائل (http://www.mekshat.com/vb/showthread.php?t=5467)

[شـهـاب]

اخو بو زيد

ما اخفيك

والله ماعمري جيت الحيانيه ولا ادلّه

لكن اذا تبي حطب لا تفوت نفود الخطه وطريق الجوف اذا معك جيب وتبي تبعد بالنفود

[أبوزيد]

طيب اخوتي الكرام

المكان الذي يسمى ( الغوطة ) في نفود حائل أين يقع ؟

[الضاري]

الغوطة يابو زيد قبل ما تاصل جبه بـ 15 كلم تفرق يسار وتلقاها قدامك أو أسئل أقرب واحد أو صاحب المحطة اللي بالمفرق وعلى طوله يشر عليها.

تحياتي للجميع

[أبوزيد]

بيض الله وجهك يالضاري

[مشغول]

حياكم الله يا بعدي

والله ما قصرتوا يا شباب حايل (( شهاب _ الضاري )) تسلمون والله

واسف على التأخير في الرد لأني والله كنت مسافر وتوي واصل الحين ..

الله يعطيكم العافية

والشكر موصول لأخوي ابو زيد على مشاركته واسالته التي افادتني .. تحياتي لك .
شكرا يا صديق صالح (( شقران )) هع هع ..