مشكلة في امبيرات اللاندكروزر بعد المطر

[بـــ نجد ـــرق]

السلام عليكم ورحمة الله وبركاته

يا اخوان عندي جي اكس ار 2007

قبل كم يوم جانا امطار وخير وانتم تعرفون شوارعنا كيف تمتلي بالمياه مع العلم ان ماجاه الا شي عادي جدا لاقطعنا به وديان ولا غيره بس في الشوارع

المهم امبيرات الطبلون طفت كلها وبعض لمباته

وبعد فتره اشتغلت لمبات الطبلون كلها واشتغل عداد السرعه والضغط

لكن امبير البطاريه على اخر شي وكذلك امبير الزيت على الفل

والحراره طافيه والبنزين مولعه اللمبه مع العلم انه فل

والمشكله لها الان تقريبا 5 ايام وعرضته على مهندس و يقول المشكله من الظفيره وانا ما اقتنعت بكلامه

ياشباب اللي حصله مثل هالمشكله او يعرف كهربائي جيد في الرياض ياليت يفيدنا

[العنيد952]

اخوي تفقد افياش الظفيرة اللي تتوقع انها تعرضت للماء وافخها بالهوا

[العمده 0ون0]

وعليكم السلام ورحمة الله وبركاته0
اخوي برق نجد لاتخاف هذي بسبب وجود رطوبه في علبة الفيوزات بعد المطر تسبب ضعف الماص فك الغطاء حق علبة الفيوزات نظفها اوعرضها للشمس والهواء نص ساعه او ساعه لين تروح الرطوبه ان شاء الله او انفخ بالهواء0
افصل اصبع البطاريه 10دقايق علشان البرمجه زيادة خير وسلامتك0

وبالتوفيق ان شاء الله
:r:f:r
:s

[العنابي 616]

تبي نصيحتي لا تسوي شي
كلها أسبوع على الكثير و تنحل جميع المشاكل و الله إن عمال الورش ما عندهم ذرة أمانة
أنا كل ما جا مطر و دخلت بمناقع ماء و لعت عندي لمبة البيبان و لمبة الجلنط و مرات تشتغل المساحات و لا تطفى
أفصل فيش المساحات و إذا حسيت إن السيارة نشفت أرجع أشبكه و الحمدلله كل شي سلييم

[بـــ نجد ـــرق]

الله يعطيكم العافيه ياشباب عالردود

وابسوي اللي قلتو عليه وان شاء الله تضبط

وفي انتظار مزيد من الاراء

[القناص 3626]

فيه ورشة العثيم في القصيم اسمه محمد العثيم رقمه 0505488325 رجل عنده ذمه واتصل عليه ويقولك وش تسوي وهل عنده حل او لا وبين له انك من الرياض
والله يسر لك امورك
اخوك ابو فيصل
ابغى منك الدعاء ولك الشكر

[بـــ نجد ـــرق]

الله يوفقك ويرزقك ويجزاك كل خير اخوي ابو فيصل

[أبو مسفر]

انت مركب سلة فوق ؟؟
وهل فيها مسامير ناقصة ؟؟
البارح واحد يسولف علينا يقول عقب المطر يوم نزلت والى النور مولع واجي ابطفيه وعيا وافصل البطارية لين اصبحت واروح لكهرابائي
يقول انا مركب سلة وبعض المسامير ما ركبتها ودخل المطر مع فتحة المسمار وداخل في الديكور الداخلي ووصل لاسلاك النور وسوا التماس

يقول نظف الكهربائي الاسلاك وظبطت وسديت فتحة المسمار مؤقتاً لين لقيت مسمار نفس المقاس وركبته

[ابن القريات]

احيانا الحساسات الموجوده من جهة غطا القير تحت السيارة يجيها مويه تسبب التماس
ان شاء الله ماهي هي المشكله لان اسعار الحساسات مكلفة

[بـــ نجد ـــرق]

الله يعطيكم العافيه ياشباب

المشكله لها الان حول ثلاث اسابيع ولا تغير شي

فكينا الظفيره كامله وتم تنفيخها وتنظيفها ولا تغير شي

وقفنا الموتر في الشمس وفتحنا كبوته وابوابه كم يوم ولا تغير شي

شغلنا المكيف على الحار وحولناه على الطبلون لفتره طويله ولا تغير شي

الكهربائي يقول غير الطبلون كامل

لكن الانبيرات يشتغل بعضها وبعضها واصل للاخير

وش رايكم ياشباب اغير الطبلون مع العلم ان سعره حول 2000 ريال ؟؟

[بـــ نجد ـــرق]

اللي خابر طبلون جي اكس ار 2007 للبيع ياليت يدلنا عليه

[ابن القريات]

يا خوي الله يعوض عليك
مادام انك سويت كل هالفحصيات على الموتر
ما شيكت على الحساسات

[بـــ نجد ـــرق]

لا والله ماشيكت عليها

لاني اعتقد لو كان منها بيحدث خلل ثاني غير الطبلون

لكن ابشيك عليها بكره واشوف

وبيض الله وجهك يابن القريات على اهتمامك

[عبدالرحمن 11]

السلام عليكم
اخوي برق نجد ان شاء الله مافيه اي مشكله
غير حساس لمبه الريوس

[ابوحميد122]

كان الله في عونكـ