استفسار : كيف نحافظ على نظافة عزبة الكشته من سواد الادوات بعد الطبخ بالحطب [الأرشيف]

me 6210

24/01/2011, 09:16 PM

كيف تحافظ على نظافة عزبتك بعد استعمال الحطب للطبخ او للشاي او القهو او الشوي تجد ان كل الاواني اصبحت سوداء من الخارج من اثار الحطب لو تقعد تغسل كل الاواني تكرهك بالطلعلة ولو وضعتها بسوادها تصير العزبة كأنها كيس فحم

من خلال تجاربكم هل فيه طرق للمحافظة على ادوات الطبخ بقدر المستطاع من السواد

ذكر احد الاخوان طريقوة وضع القصدير على اناء الطبخ تحمية من السواد ... احد جربها ؟

العاذر

24/01/2011, 09:21 PM

موضوع جميل ..
افرك القدر مثلا على الرمل ..
استخدم قماش تمسيح .. وارميه ..
خذ معك اكياس ودخلها فيه ..
تحياتي لك

سليمان 10

24/01/2011, 09:26 PM

يساف الابريق والقدر بالرمل المبلل (الخراف ) 000

القنصل,,,

24/01/2011, 09:29 PM

السواد اللي يجي بعد الحطب سهل ويطلع من اول فركه
ولا اطبخ على الدافور وفك عمرك

عشق الجنوب

24/01/2011, 09:29 PM

مساء الخير للجميع
ادهن القدر بزيت طبخ وبعد الطبخة اغسله بصابون تايد وان شاء الله يصير تمام
وتقبل مروري

جيبي جايزلي

24/01/2011, 09:41 PM

لا تغسل القدور ولا الاباريق من السواد اللي برا

اذا تبي تعدل عدل بشنطه العزبه حط بلاستك او لبس العزبه من داخل قماش قابل للفك عند التنظيف

بومحمدسطام

24/01/2011, 10:09 PM

في طريقة انا مستخدمة ملبس العزبة بقسدير وكل ماتوسخ غيرتة سهل ومتوفر

المـطنـgـgـgخ

24/01/2011, 10:10 PM

الحل بسيط وانا اخوك
ادهن القدر اوبريق النار اوى اي شى تحطه على نار الحطب او الفحم بزيت عافيه
((خذ قطعة اسفنج وشبعها بزيت عافيه ودهن الاوانى من برا قبل ماتحطه على النار))
وبعد مايخلص من الطبخ افركه بشوى فيرا او تراب في وجه العدو.... سوف تجد نظافه باذن الله))
والتجرررررررررررربه خير برهان

me 6210

25/01/2011, 12:05 AM

ALOTAIBI

25/01/2011, 12:16 AM

تحيه طيبه للجميع
البراد (الابريق) والدلة ما عليها خوف بعيد عن الشعلة ما تحطها الا على الجمر , اما القدر امسحة بالفيري جنوبه كلها

وتقبل مروري يالغالي

بريق الحسام

25/01/2011, 12:35 AM

شكرا لصاحب الموضوع ولكل من أفادنا في هذا الجانب تحياتي

almosafer909

25/01/2011, 01:04 AM

مثل ما قال الأخوان ..
وايضا .. خذلك دايم معك اكياس للزبالة لزوم النظافة بعد اي كشته وايضا ممكن تحط فيها اغراضك الوسخة او اللي فيها سواد واذا رجعت البيت نظفها ..

عقيد حرب

25/01/2011, 01:23 AM

والله اذا ماتبي لابد تطبخ على الغاز وتريح راسك ههههههه

تناهيت

25/01/2011, 02:20 AM

بالنسبه لي اغراض البر للبر
:r

لا تقلق عمرك وريح راسك

من برا ما اغسلها أبد أبد أهم شي من الداخل

اصلاً ما يهنا لي بال ونا اطبخ الا وانا اشوف القدر من برا اسود يلق لق :D

وكذالك الأباريق ما يضبط الشاهي الا والبريق لونه متواسي مع الفحم :)

ودهنها بالزيت مجربه

اسد الطوارق

25/01/2011, 02:55 AM

اما انا فعندي طريقتين
الاولى
وضع الاشياء اللي تتوسخ داخل جرابات جاهزة من عند السنيدي وهي:
1 جراب للملقاط (8) ريال
2 جراب لقدر الكاتم (35) ريال
3 جراب لكرسي الجمر (12) ريال
4 جراب للذرايه (10) ريال
وبهذه الطريقه احمي عزبتي من الاوساخ والسنا (يعني السواد الناتج عن الاحتراق) وتكون تواجهه عند الناس لان النظافه دليل على اهتمام الشخص
وهذه الطريق استخدمها اذا كانت الطلعة طويله ومعي ناس يواجهون

الثانية
صندوق بلاستيك نفس موضوع الاخ مهند تمير
في البدايه احط في حطب وفي الرجعة الاغراض اللي تتوسخ احطها فيه
واذا رجعت للبيت اغسلها على مزاج
واستخدم هذي الطريق اذا كانت طلعه خفافيه واللي معي امون عليهم

ولكن هناك نقاط مهمه:
أ_ السواد في الاباريق له نكهه فلا تحاول ازالته
ب_ استخدم الصابون مع ليفه خشنه وافركهن يروح السواد
ج _ الاباريق والدلال اذا كانت غاليات فعليك بالجرابات وهي موجوده عند السنيدي ولا تحرص تاخذهن للبر
د_ لاتفسد طلعتك بكثرت الغسيل وتخلي اخوياك

بوسطام

25/01/2011, 09:01 AM

شكرا لصاحب الموضوع

me 6210

25/01/2011, 11:18 AM

طيب يا اخوان هل يطيب قلبك قدر مثل السب او التيربو تحطه على الحطب

fusfus

25/01/2011, 11:28 AM

الاخ me6210 وجميع اعضاء مكشات احسن طريقه ومن تجربه واختراع مني هي استعمال رماد الحطب لإزاله اي سواد كان
الطريقه هي بل الليفه بالماء ثم غمسها برماد الحطب ثم شف شغلك سوف تتفاجاء ارجو اني افدتك بهذه المعلومه والسلام عليكم

DurangoX

25/01/2011, 11:53 AM

أريح طريقه لتنظيف السخام ( السواد الناتج احتراق الحطب ) بعد ما ترجع بيتك بالسلامه نظفها بملمع المجوهرات او الفضه ب 3 ريال في محلات ابو ريالين وبليفه ناعمه حتي لاتجرح الدلال والاباريق والقدور وبعدها شطفه فيري بالماء من احلي ما يكون ترجع جدد.
النظافه من الايمان
دمتم

drive

25/01/2011, 12:40 PM

ب 3 ريال في محلات ابو ريالين

اروع مافي الموضوع

بالنسبة للسنا .... اذا قاهرك فاقهره ولا تخليه يقرب مواعينك ... شب غاز او بنزين او جمر

البواردي...

08/02/2011, 04:45 PM

بارك الله فيك على المعلومات المهمة والنفيده لصاحب العزية

وانا عني نفسي استفد من هالمعلومات

سرهيد

08/02/2011, 05:03 PM

السلام عليكم

بلا شك ان استخدام الادوات في الشتاء وعلى الحطب يجعلها وسخة بالسواد ( السنو )

لذلك وضعت جرابات للادوات اللي استخدمها وبكذا حافظت على عزبتي لا تتوسخ

تقبلوا احترامي

مريقب العيفار

08/02/2011, 05:56 PM

عن نفسي اغراض الشاي والقهوة طبعا سود ولا اذكر اني غسلتهم من برا

واصفهم بعزبتهم الخاصة

عندي شنطة الفناجيل علشان ما يلصق لها السواد ( السنو ) احطها في كيس قبل ادخلها بعزبة القهوة

الطبخ في الغالب اني اطبخ على دوافير ولو اضطريت للطبخ على النار

اكيد اني باغسل السنو علشان ما يحوسني بالوسخ وما يهم لو ما نظفوا زين

* ابو باسل *

08/02/2011, 07:16 PM

جراب لكل شي منها وريح راسك حطه في جرابه وخله بسواده وهو احسن شي له السواد .

aborajwa

08/02/2011, 08:05 PM

شوف وانا اخوك خل عزبة خاصة لاواني الطبخ على الحطب ومثلها خاصة بالطبخ على الدوافير .. اذا صارت طلعتك بالشتاء وشبة نار ووناسة وطبخ وشاهي وقهوة عليها خذ عزبة الحطب .. واذا في الصيف والا طلعة مافيها شبة نار وطبخ او شاي وقهوه عليها خذ عزبة الدوافير ..

حلاة العزبة بمعاميلها في كل حالة للبر .. واللي يخاف من الوجهنه وان الناس تنقد على مواعينه ويبونها تلق وهي تستخدم على الحطب خليهم يجلسون عند حريمهم في البيوت ويتصورون جنب مواعينها .. البر مافيه مناقيد دام معاميلك نظيفة من الداخل والبر للشقردية وطوال الشوارب اللي حكحكتهم الخشونه .. وخل النواعم لاهلها ..

هارون97

08/02/2011, 11:22 PM

اذا ماتبيها توسخ لا تكشت

شموخ انسانه

08/02/2011, 11:43 PM

يعطيكم العافية
اما أنا عندي طريقة تختلف شوي عن كل الطرق اللي كتبتوها بس يبيلها واحد شاطر
تاخذ صابون تايد وتصب علية شوي مويه حتى يصير شوي سايل وافرك القدر من برا كله بعدين خله ينشف ولأفضل تسويه قبل موعد الطبخ بفترة واذا جيت بتطبخ اغسل القدر بمويه من دخل لأنه يمكن دخل فيه صابون
بعدين اذا جاء وقت الغسيل عادي وتلقها مره سهله والحمم تطلع على طول وهذا الطريقه الوحيدة اللي نستخدمها وقت الطلعات والكشتات
اما أبريق الشاي والقهوة حلوة لماتصير محروقه من برا لأنها تحط نكهة بالشاي والقهوة
وشكرااااااااااااا

علي الشهري

08/02/2011, 11:47 PM

بالنسبه لي اغراض البر للبر

:r

لا تقلق عمرك وريح راسك

من برا ما اغسلها أبد أبد أهم شي من الداخل

اصلاً ما يهنا لي بال ونا اطبخ الا وانا اشوف القدر من برا اسود يلق لق :D

وكذالك الأباريق ما يضبط الشاهي الا والبريق لونه متواسي مع الفحم :)

ودهنها بالزيت مجربه

100% :good2:

الطنب

08/02/2011, 11:47 PM

فيه طريقه كانو الاباء يحمون الادوات والمواعين من السواد قبل مايضع القدر على النار يفركه يدهن بطين ومعروف عن الطين قوته ومقاومته للنار مر لك شعيب وخذ بكيسه طين يكفى لمواعينك وبلله بالمويه وادهن قدورك وشف النتيجه
ومجانى بدون ماتدفع ريال واحد والشعبان مليانه طين وماليه البلد

الطااااني

08/02/2011, 11:56 PM

اما انا فعندي طريقتين

الاولى
وضع الاشياء اللي تتوسخ داخل جرابات جاهزة من عند السنيدي وهي:
1 جراب للملقاط (8) ريال
2 جراب لقدر الكاتم (35) ريال
3 جراب لكرسي الجمر (12) ريال
4 جراب للذرايه (10) ريال
وبهذه الطريقه احمي عزبتي من الاوساخ والسنا (يعني السواد الناتج عن الاحتراق) وتكون تواجهه عند الناس لان النظافه دليل على اهتمام الشخص
وهذه الطريق استخدمها اذا كانت الطلعة طويله ومعي ناس يواجهون

الثانية
صندوق بلاستيك نفس موضوع الاخ مهند تمير
في البدايه احط في حطب وفي الرجعة الاغراض اللي تتوسخ احطها فيه
واذا رجعت للبيت اغسلها على مزاج
واستخدم هذي الطريق اذا كانت طلعه خفافيه واللي معي امون عليهم

ولكن هناك نقاط مهمه:
أ_ السواد في الاباريق له نكهه فلا تحاول ازالته
ب_ استخدم الصابون مع ليفه خشنه وافركهن يروح السواد
ج _ الاباريق والدلال اذا كانت غاليات فعليك بالجرابات وهي موجوده عند السنيدي ولا تحرص تاخذهن للبر

د_ لاتفسد طلعتك بكثرت الغسيل وتخلي اخوياك

كلام سليم :good2:

KM2

09/02/2011, 12:33 AM

الماعون بدون سواد شبه الخطب ماله طعم ، احس اني ما طلعت اذا ما كان السواد يلفح جنوب الماعون ( قدر ، ابريق ، دله ) وش فايدة الطلعة اذا ضلت مواعيني نظاف ؟ بعدين السواد هذا يدل على انك مكشاتي وله فائده ، هي ان الماعون هذا كلما زاد السواد فيه اصبح ينضج ما بداخلة بسرعة اكثر من الماعون الجديد و انشد جدتك

alwssam6

09/02/2011, 12:57 AM

ادهن القدر بشحم وينزل بسرعه كل ما علق فيه من دخان

ورد طائفي

09/02/2011, 01:28 AM

انا عن نفسي ..

اذا خلصت مسوي القهوة وجيت امشي ، آخذ الملقمة حقت القهوة واكبها على الارض ، بيصير فيه شوية قهوة وماء ..
اخلطها مع تراب وافركها بالملقمة والدلة ، ومن أحلى ما يكون !

أخت الجديدة ..

في القدور ما جربتها ، لكن مثل ما قلت مع الدله والملقمة من أحلى ما يكون

abood

09/02/2011, 12:10 PM

بالنسبه للقدور قبل ماتطبخ وتحطه على الحطب خذلك اسفنجه او منديل وصب عليها زيت عافيه وامسح القدر مع جنوبه
وبعد ماتخلص من طبختك اغسله بالفيري ينظف على طول طريقه مجربه

عزيز 3333

09/02/2011, 01:06 PM

مشكوور على الموضوع ... أولاً
بالنسبة لي أمسح القدر بشوي زيت أما البريق حلاته بلونه
بعد الطبخ الملاس والقدر في كيس في البيت يغسل ويروح السواد على طول بسبب الزيت

مهاجر161

10/02/2011, 11:44 AM

جرب استخدم زيت قبل الطبخ على القدور وبعد ماتخلص فيري وتشوف النتجية او رمل مبلل بماء
تحياتي لك وللجميع
المظهر قبل وبعد الاستخدام مهم ودليل على حرص ونظافة الشخص .. وبعدين لما تنظف اغراض وتغسلها تحس بمتعة غريبة اما ادا كنت في الديرة فانواع العجز .. فعلا البر بريره وبس
المهاجر (مخاوي الاحزان) المخاوي

ربيع الشمال

14/02/2011, 09:36 PM

طريقتي المتبعه

اقوم بلف المفواح بكيس من البلاستيك ووضعه داخل العزبه

اما الابريق والدله اقوم بوضعهما داخل مركابة النار :f

بوضعية معينه تمنع احتكاكهما بجسم العزبه من الداخل

وبالنسبه لمواعين الطبخ فنادراً ماتصداء

كون اغلب الطبخات تتم بواسطة الغاز ,,

,,,,,,,,,,,,,,,,,,,,,,,,,,,,,,,,,,,

,,,,,,,,,,,,,,,,,,,,,,,,,,

ابو حسان الجنوبي

15/02/2011, 02:14 PM

عزبة البر للبر والفيري ما يبقي شي مع الفرك طال عمرك
وإذا ماني نشيط بأكياس بلديه حتى البيت وهناك نكمل العمليه بالماء الساخن والفيري والجف

نجم000الشمال

16/02/2011, 05:20 PM

الله يعطيكم العافية على اثراء الموضوع ، بالنسبة لي : ان كان الطلعة يوم وحله اغسلها غسيل مبدئ واحطها بكيس والباقي بالبيت ، وان كانت الطلعة مطولة فأنا ما ارتاح الا بعد ما اغسل اغراضي كاملة بالرمل والفيري ...الا معاميل القهوة والشاهي اغسلها بسلك ناعم واسفنجة مع ترك بعض السواد لغرض النكهة ههههههههههههههه ما يغثني الا براد الحليب لازم ينضف زين ،من وجهة نظري الخاصة ( العزبة والموتر وجه راعيها) !