لمبة الماكينه شغاله في جمس 2010

[الفارس 2005]

السلام عليكم ورحمة الله وبركاته ،،

تحيه طيبه لجميع الاعضاء الكرام ،،،

ومبارك عليكم الخيرات الله يجعلها سقيا رحمه ،،

اخوتي اشترينا جمس 2010 ماشي 20 الف الموتر ماشاء الله نظيف اخو الجديد ،
وفحصنها عند البريدي ولاطلع فيه شي ولله الحمد ،،،

المشكله :

لمبة الماكينه في الطبلون والعه ماتطفى رجعنا للبريدي وفحصه بالمكبيوتر الصغير اللي يشبك داخل السياره ماطلع فيه شي !!!

رحنا لورشة الجميح اللي بالصناعيه القديمه وطلعو المهندسين وشابكين الجهاز ويقلون دبل لا مافيه شي والله ماندري خله عندنا ونشوف ( سواليف ) ما اقتنعت بكلامهم حسيت ماعندهم سالفه !!!

فصلت البطاريه وشغلت راحت اللمبه بس ترجع بعد كم تشغيله !!!

الله لايهينكم نبي الفزعه وانتم ماتقصرون ،،

جزاكم الله خير مقدما ،،،

[alannaby]

أعانك الله الشباب يفيدونك بإذن الله لأني مالي خبره بالأمريكي
لكن سمعت من واحد عن فصل البطارية لمدة ربع ساعة ثم شبكها ومعاودة التشغيل

[الفارس 2005]

اشكرك اخي على الرد ،،،
فصلت البطاريه لمده ساعتين ولا في فايده ،،
اشكرك لمرورك ،،

[THE KILLER]

اخوي انا ولعت عندي لمبة المكينة بس بدون رسايل ولا شي وقفت السيارة فصلت اصبع البطاريه السالب لمدة تقريبا 10 دقايق ورجعتها واختفت .. افصل السالب

[الفارس 2005]

اشكرك اخوي ،،المبه مولعه بدون رساله ،وفصلت البطاريه لمده ساعتين ونفس المشكله ،وحاولت اكثر من مره في فصل البطاريه تروح وترجع ،،

اشكرك اخي على مشاركتك ،،

[K.S.A.A]

هذا طال عمرك وعمر السامعين حساس الشكمان ( الكربون )
وأمره عايدي جدا . لاتشيل هم ولاتخاف
خصوصا أن كان الموتر أمريكي .

[yazn2322]

جرب تنظف حساسات الكنداسه .
وأطلب منهم رقم كود الخطأ اللي يطلع معاهم وشوف بجوجل هو كود ايش ,
لأن الوكاله أكثر من مره فحصت عندهم ويقولولي من أنبير البانزين ومدري ايش وبالأخير طلع حساس تحت الثلاجه ,

[الفارس 2005]

الموتر سعودي وراعيه الاول مطلعه قبل اربع شهور معقول يكون حساس الشكمان !!!

جزاكم الله كل خير

[عزوز114]

اخوي 70 في الميه حساس شكمان وانا قد صارت معي

[الفارس 2005]

طيب يا اخوان اجرب وانظف حساس الشكمان ،
وين مكانه هل اقدر افكه انا وانظفه او لازم ميكانيكي ،
جزاكم الله خير على اهتمامكم

[~EmPeRor~]

اذا ولعت المبة لابد من تسجيل رقم الخطاء داخل وحده التحكم بالسيارة

انت توجه الى الجميح او العيسى < وراح تكون الصيانة تحت الضمان وخلهم يكشون ويحددون الخلل ويغيرون القطع مجاني من الضمان

وبوجود الاجهزة الي عندهم راح يطلع رقم الكود ويعرفون العطل بالظبط

اتمنا لك التوفيق

[Magellan]

معقولة ليش لا..
إذا كان مفرّغ دبات الشكمان
أنصحك تشتري جهاز فحص كمبيوتر من الانترنت مايكلف 200-300 ريال يستخدم لجميع السيارات تقدر تكتشف المشاكل بالسيارة
2- ارجع لمواضيع المشرف : كبسولة2 راح تلقى الحل

[K.S.A.A]

نعم حساس الشكمان .
وعلى ماأعتقد يكون في مقدمة الشكمان .
وعلى فكره لو فصلته تتم اللمبة مولعه .
لكن تبي نصيحتي تجاهل اللمبة ويعينك الله .

[الفارس 2005]

جزاكم الله خير جميعا ،،
ابروح لمحل شكمانات ونفك الحساس وانظفه اذا هو ينظف ،،
بخصوص الوكاله راعيه مطلعه من التوكيلات العالميه بالاحساء ولا دخله الضمان ولا مره والان ماشي 20 الف اعتقد مايشمله الضمان لعدم الالتزام معهم ،،
اكرر شكري لجميع الاخوان ،،

[K.S.A.A]

والله لو تبي نصيحة أخو مجرب وسامع وشايف
أترك عنك الوكاله النصابين ويرزقك الله . إلا في أمور مثل الكمبيوتر وما الكمبيوتر ..
أنت جرب حساس الشكمان وأتمنى تضبط معك , والأهم أحس إني نفعتك لو بشي بسيط .

[الفارس 2005]

مرحبا اخواني الكرام
اسف على الانقطاع
تم اصلاح المشلكه وهي تغير حساس العداد ،تم تغيره في الوكاله وعلى الضمان ولله الحمد .
جزاكم الله كل خير ماقصرتو .