هايلوكس 2008 علقت في الطين وش صار فيها ؟

[غافي]

بسم الله الرحمن الرحيم ..
السلام عليكم ورحمه الله وبركاته ..



اخواني الاعزاء
اليوم اخذت سياره اخوي هايلوكس 2008
غماره وحده ..

وطلعت
فيها .. المهم كان فيه طين وحاولت ابعد
عن الخفيف وطبيت في الثقيل قراده وقدر من الله . والنعم بالله .
المهم مشت السياره قربت تطلع وقفت
في اخر لحظه .


طبعا
السياره عاديه جدا بس واحد من الكفرات
يدور بمحله . يعني السياره ماغاصت او اندفنت يعني هي نزلت
شوي بس مو كثير . تحت السياره
يلمس الطين تقريبا .


المهم
جاء واحد الله يكثر من امثاله
وبعد ماجلست ساعه احاول سحبني وطلعني برا .
والوضع كله تمام


رحت للنفود
اللي ابيه وجلست والوضع
مزبوط


طلعت
ومسكت الطريق
يوم وصلت 80 بالسرعه السياره ترج
رجه فضيعه . وقويه مره
الى 120 وتبدأ الرجه تخف بس من كثر الرجه
اللي في السياره تحس ان كل شي يبي يبعد عن مكانه ويطيح صراحه .



الحين السياره
جبتها ماوديتها لمكان
ولا ودي اوديها الا انا عارف الخراب وش هو
خبركم كل واحد يطلع فيها شي وفي الاخير يطلع الخراب بمكان ثاني



فـ وش السواه يالربع تكفون ؟
وش المشكله اللي في السياره ؟ وش اللي جاها ؟
وش دواها ؟


والله يجزاه خير اللي يرد مقدما ً
ودي اخذ العلم بسرعه حتى اوديها بدل ماهي موقفه كذا ..
الله لايهينكم !

[ضفنان]

وعليكم السلام ورحمة الله وبركاته


اخوي ان شاء الله ان مشكلتك بسيطة تأكد من الجنوط يمكن يكون متراكم عليها طين من داخل غسلها بالمويه وجرب بس تأكد انه ما يبقى فيها طين وان شاء الله تكون هذه مشكلتك بس .....

[فيصل التميمي]

اخوي السيارة سليمة المشكله في الجنط فيه طين اقرب مغسله خله يغسل الكفرات ويروح الطين الي في وسط الجنط وان شاء الله يكون الوضع تمام

[صامولي]

زي ما قال الاخ ضفنان
موفق

[عبدالاله 123]

يمكن الترصيص طاير

[نقاء المطوع]

ماتشوف شر شي طبيعي يالخوي

غسلها بستم وعائر الكفرات وترجع تمام واذا مارحت ودها للبنشري ينضفها من جوه ويرصصها بالتوفيق انا معي هائلوكس 2007 ودائم تصيرلي

[مريقب العيفار]

وانا بعد اقول المشكلة من الطين

غسل السيارة وترجع زي اول

[THE KILLER]

زي ما قالوو .. بعدين لا تخش طين ثقيل هاذي يبيلها مواتر جبارة زي جمس حوض وباترول ولند كروز .. الخ

[ملك الصيانه]

السلام عليكم ..
اغشل موترك اول شي ثم جربه وبشرنا . ( الغسيل بستم خله ينفظ بطن الموتر )

[alisabr]

أقرب مغسلة سيارات بستم الين يروح اللي في بطن السياره وخصوصا الفحمات والهوب

وبعدها جرب إن شاء الله مايصير الا كل خير

[الخادم]

اخوي الله يوفقك و يخلي لك الهايلوكس
غزلها بستم و ان شاء الله يفرج لك و ترجع لك سيارتك مثل ما كانت

[السبيعي 503]

يا خوي أناا معي مثل موترك وحصلي مثل مشكلتك


غسل الموتر بستم وتاكد ان ماايكون فيه طين على الجنوط من ورا وان شاء الله تروح الرجة


اهم شي لايطول الطيب فيها

[النبع الصافي]

وتأكد من تنظيف عمود الكردان معه

[الصارم 444]

ماقصروا الاخوان افادوك وهو الطين عالق في الجنوط

دايم تصير لي ومجننتني دايم بالسكروب اول مااطلع من الطين

[خيرالله]

نااااااااشب بوووووه طين

[~ Abo Rashed ~]

مثل ما قالوا لك الأخوان

أغسل الجنوط والكفرات و بطن الموتر بنفسك علشان تعرف ما تطب بالطين مرة ثانية :D
وإن شاء الله يرجع كل شي تمام

[gx 94]

مساء الخير يالغالي انا قبل فترة كنت في الرياض ودخلت داخل حي با العليا وليتني مادخلت طحت بحفرة مليانه أسمنت بدون ارشادات ولقيت العمال باخر الشارع وماقصرو سحبوا الجيب ولكن الكفر صار تقول جدار وغسلته ولله الحمد راحت المشكلة صار الجنط مليان اسمنت والله يوفقك يالغالي.