ابي رايكم

[ابو عادل SS]

انا عندي خبرة كافيه عن الطيور وشريتلي طير ولاتهنيت فيه ضاع دورته شهرين ولا عينته
اشرايكم اشتري طير ثاني ولا اهمل الصقاره وقهرها

[مشبر البران]

هواية ما وراها الا التعب و الخساير
لا كنت تبي تهتوية فتحمل التعب والخساير
عشان برقا الجناح لا قصيت جرتها نسيت هموم الدنيا
والخيار لك

[دعاس]

حياك الله والله يعقل طيرك عليك
والله يابن الحلال هذي هوايه كاي
هوايه وتراها توافيق من ربك
والضياع حاصل حاصل لو فيه ريشه
وانت يالغالي ادرى بوضعك المالي
ومن حيث امكانيات فضاوتك للمقناص
في رجال راعي بارود شاريها ب12الف
وسرقت منه قلت له تراها مثل ضياع الطير
او موته وعلى قولة المثل القديم والمعروف
(اللي يبي الدح مايقول اح)ومثل الدخان
(اللي اوله نصب وتاليه غصب)والصقاره
هوايه متعبه ومكلفه ,والخيار اولا واخيرا لك
وتحياتي للجميع

[صقرالعوسي]

حياك الله والله يعقل طيرك يالحبيب
الضياع موجود الجرا عليك جارا على كثير من اخوانك
الموضوع يتعلق في حالتك المادية أولآ وفي حبك وتعلقك بالصقور
والصقارة أنا في رأيي من أجمل وأرقى الهوايات
اذا كان الله منعم عليك من فضلة روح وشتريلك طير ثاني
وطيب خاطرك
تقبل تحياتي

[جلاد الحباري]

تضيع طيور وتموت طيور وكلها غالية لكن الصقار لابد يكون صبور وتكبر وتنسى واذا اوضاعك تساعدك واصل ولاتيأس تراها هواية قشرة وتبيلها وسعة صدر خل صدرك مثل ميدان الخيل وسيع ولايشكي كثرها والمقناص دربكته واجد واولها نقلة الطير من الربطة وتدهيل ودعو وجرد ومقناص اول النهار واخره دعو لاصار ما من صيد

[السومر]

هواية الصقور مرتبطه بعلاقة الانسان مع البر

يعني اذا انت من عشاق البر والكشتات فا اقولك خذلك طير ثاني

لكن اذا ما تعشق طلعات البر كثير يفضل تبعد عنه

ولا تيأس خلك صبور وكل جواد له كبوه

غيرك وفي المنتدى كاتب موضوع عن فقدان صقرين وهو له باع طويل بالصقاره

[سبتان]

يفيدونك بقية الأعضاء
والله يعوض عليك

[العجمي20]

الله يعوض عليك ان شاء الله