قصه حقيقيه حصلت بالقصيم

[al_fheed2006]

السلام عليكم ورحمة الله وبركاته

يشباب هذي القصه حقيقية وماجبتها من مخيلتي كنت في يوم 22/9/1423هــ بالشهر الفضيل خرجت الساعة الحادي عشر صباحا للقنص حبارى مسوي فيها قناص المهم كان يبعد عنا الفنود تقريبا 10 كيلو رحت ودخلت فيه كل اشوي ابعد اقول يمكن الاقي قدام وعلى الطريقه وفجئه تعلقت السيارة والمشكله مافيه ابراج وجلس من الساعة الخامسه عصرا حتى 11 بالليل حتى والله العظيم مافطرت ماكان معي حاجه ادور يمين يسار احد هنا هناك مافيه كنها الارض انشقت وبلعتهم والله العضيم ياشباب كانت درجة الحراره صفر كان برد تجمدت يديني وماقدرت احركها حتى مامعي شي يدفيني المهم السيارة تماتيك ولما تسكر الباب تلقائي بزر تقفل الحبات كلها وكنت اشوف ساعة السيارة واتحسر كنت فاقد الامل نهايتي قربت خلاص وتمت الساعه على ماعتقد 11.10 دقائق وجت سيارة وانا بردان مااقدر اتحرك وكانوا عيال حرتنا الله يجزاهم خير راسلوا حايل وراسلو الحفر والزلفي بالكنود ان كانوا شافوا سيارة بمواصفات سيارتي وراسالو الكشات وانتشر الخبر في ديرتنا اخواني وعيال عمي ماخلوا احد مسئلوه عني المهم يوم جاء راعي السيارة سمع عنها بالكنود موصفاته مثل الي ذكرت وطق علي النافذه وانا والله ماقدر اتحرك واحاول يمني ويسار بس بدون جدوى والله اني اناظره بطرف عيني وحاول ينكز الباب بسيم لاكن عجز المهم راسل جماعته وقالهم اني لقيته ومايتحرك على كلامه هو وجوا اخويه الله يجزهم خير وحاول وعجزوا المهم راسلوا شباب من القصيم وصل الخبر لخواني وجابوا رقم الي يبي يساعدني والمفاجئه يشباب اني ابعد عن القصيم 270 كيلوا الحفر اقرب لي من القصيم تخيلوا امشي 80.100 اكيد رايح اقطع المسافه بالرحه وتفاجئ اخوي وقال اكسروا الكزازه ورفضوا قالوا صعبه عد انا غبت عن الوعي والكلام الي سمعت منهم ان اخوي قال ابيكم تعلموني وين مكانكم بالضبط انا اجي وكسرها عاد اقتنعوا وكسروها واخذوني ويقلون بعد سعتين بمستشفى الحفر وصحيت بعد ثلاث ايام وعلى كلام الدكتور يقول لو متأخرين ساعة ممكن يصير كلام ثاني بس الحمدلله الحين بصحه جيده ولله الحمد وانا ماقلت القصه بسمعكم بس عبره لأن البرد جاي وطلعات البر بتكثر وانا اول متردد اني اقول القصه بس عا د الشكوى الله بس للعبره واتمنى انكم تخذون حذركم

[عاشق الجنوب]

الحمدلله على سلامتك الفهيد

[راعي العوجاء]

الحمد لله على السلامة ومشكور على التنبيه

[هاوي صيد]

الحمد لله على السلامة ومشكور على التنبيه

[مرقاب الشرق]

مشكور
وهذا درس للجميع بعدم الاستهتار بقوة الطبيعه مهما كانت السيارة .

[عجمي]

السلام عليكم ورحمة الله وبركاته


الحمد لله على السلامة وماتشوف شر يالفهيد ....


والحمد لله اللي جت على كذا ...


اخوك عجمي,,

[الرمث]

:d بسم الله الرحمن الرحيم
أخي الفهيد الحمدلله على السلامه
هناك قصه مشابهه حدثت لزميل في الشتاء ولكن مضحكه
ومعروف الشتاء وجه ذيب مثل ماقال الأولين
حيث ان زميلي أراد ا ن يذهب الى زملائه المخيمين في العود جنوب بريده من بعد العشاء وذلك قبل وجود
الجوالات وليس معه كنود وكانت الأرض بها اثر من المطر فسقط في الطين وكان غير مستعد بأكل معه
فأنتظر ولم يشاهد سياره فاختار الذهاب الى المخيم مشيا" واستمر يمشي الى الفجر ولما وصل المخيم
بحث عن اكل فوجد كيسة صامولي فاكل منها حتى سكن جوعه ثم قام زملائه لصلاة الفجر فصلى معهم
ثم نام ولما صحا اراد ان يفطر فوجد كيسة الصامولي التي أكل منها وهي مقطنه ولونها اخضر
وكان قد هضمها فذكر القصه لزملائه فضحكوا

[LAND CRUSER]

الحمدالله على السلامه لاكن ليش ماخليت السياره شغاله وطقيت السخاااان لان تقوول متعلقه السياره يعنى مو متعطله
والله قصه مؤثرهواعتقد انك فتحت مووضووع حلووو تحياتى لك

[البوصلة]

الحمد لله على السلامه والله كتبلك عمر جديد . والحذر في كل شىء واجب .

[صوح الجبل]

الحمد لله على سلامتك .... وهذا درس للجميع .... والاحتياط واجب في كل شي وخاصه الاسودان التمر والماء

[نقا خريم]

الحمد لله على السلامة
ذبحتنا بالبرد معك ههههههههه
مشكور على التنويه....جزاك الله خير
اخوك(نقا خريم)

[al-nashmi]

الحمد لله على سلامتك .... وهذا درس للجميع .... والاحتياط واجب في كل شي وخاصه الاسودان التمر والماء


الاسودان التمر والماء

صحيح هما اهم شئ واخف شئ

[ابو محالة]

الفهيد
الحمد للة على السلامة
ولا عاد تعودها تروح ولا معك شى
وبعدين تعوذ نبينا علية الصلاة والسلام من الوحدة
تحياتى

[صقر]

قصة مؤثرة والحقيقة ان الانسان يأخذ حذره عادةً بالصيف ... لكن من خلال هذه القصة يجب علينا أخذ الحيطة حتى في الشتاء .

على العموم مشكور على هذا التنبيه.

وبارك الله فيك.

[عبادل العاصمي]

الحمد لله على السلامة والأحتياط واجب

[المترو]

السلام عليكم ورحمة الله وبركاته

اخي الكريم اولا الحمدلله على السلامه وعودك الى اهلك وربعك واخونك بمكشات وتشكر على هذا النقل لقصتك والله يحفظ الجميع

وبعد قدر الله وامره
ثانيا يجب ان لا يسافر الشخص بمفرده وخاصه وخاصه بالصحراء مهما كانت الضروف وعسى الله يحفظ الجميع من كل مكروه وان تكون هذه القصه عبره للجميع

وقد نهي عن السفر منفرادً كما ورد بالحديث الشرف (الراكب شيطان والركبان شيطانان والثلاثة ركب ) والله اعلم
والسلام

[الضاري]

الحمدلله على السلامه
وكل شي مقدر ومكتوب

[ابو سلمان]

الحمد لله على السلامه

هذا دعاء الوالدين

[adfd2002]

بسم الله الرحمن الرحيم
اخي al_fheed2006
الحمد لله على السلامه وما تشوف شر إن شاء الله ونحمد الله انها جت على كذا.
وإن شاء الله انها خيره واتمنى من الكل ان يتعض.
ولكن ما المفروض ان احمله من الأساسيات حتى لوكانت الرحلة بضع ساعات ؟
من وجهة نظري يجب ان لا تخلى السيارة من الماء وبكمية كافيه وبطانيه أو فراء أو مشلح (بشت) وايضاً يجب توفر الغذاء بحيث لا يتأثر بالحرارة او البرودة مثل الشابورة.
اتمنى من الكل ان يضع اقتراحاته حتى نتمكن من معالجة المشكله.

[ولد البراري]

حيوى العضو الجديد ولد البراري

[هاوي قصيده]

الحمد لله على سلامتك

وانكتب لك عمر جديد

وهذا درس للي يدق سلف ويطلع ولا يفكر بالعواقب..ولا يقول معي موتر

[غالي]

الحمدلله على السلامه اخوي
والحمد لله والشكر على ان ربي نجاك ورحمك برحمته
والله يستر فعلا القطعه تخوف لو على الجماعه عاد مابالك واحد

[أبو الكيف]

الحمد لله على السلامة

[ريع الدياب]

بسم الله الرحمن الرحيم
السلام عليكم ورحمة الله وبركاته

الغالى al_fheed2006

الحمد لله على سلامتك
وثمن التجارب قد يكون قاسى ولكنه عبرة وفائدة

[منتعش]

الحمد لله على السلامة والعافية .

[فتى الروضه]

الحمد لله على السلامه والله كتبلك عمر جديد . والحذر في كل شىء واجب .
__________________
((فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّاراً() يُرْسِلِ السَّمَاءَ عَلَيْكُمْ مِدْرَاراً() وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَاراً () مَا لَكُمْ لا تَرْجُونَ لِلَّهِ وَقَاراً))


احمد ربك ماصر شي ثاني لاسمح الله

[اليتيم 2002]

ياخوي الفهيدالمفروض

لوتروح عشرة كيلو انت ولاغيرك لازم

ياخذ احتياطة يا اخواني كل واحدمنكم يحط

بسيارتة شنطة عزبة كاملة مع الماء

لازم اخذالحيطة والباقي على الله==

[جمره]

تحيه طيبه

انا قصتي في الرياض طلعت انا وواحد من الشباب الى خريم وقلنا نبي نستمر الى ان نشبك مع خط الدمام واستمرينا بعد ان صارت رماح 30كم وطريق الدمام 45كم بنشر الكفر الاول وشوي والثاني مشينا على البنشر الى ان تقطع ركبنا الثاني ومشينا الى ان مسك السياره وصارت ماتمشي قلنا قدام وراء ماحولك شي المهم مشت السياره بعد اسباب ارادها الله ومشينا الى سعد وركبنا كفر جديد والى الرياض من الساعه 9 صباحا اللا الساعه 4 عصرا استمرت المشكله فاالحمدلله كما ينبغي الحمد له وله المنه والفضل

[gasomi]

الحمد لله على السلامة ......... ولكن الحق يقال لابد لك من خوي يساعدك ويسليك ...... وقال الرسول صلى الله عليه وسلم "الراكب شيطان ... الخ "


أخوك ابن علي

[مريقب العيفار]

أخي الفهيد

الف الحمد لله على السلامة

والله يجعلها سلامة دايمة يا رب

لقد كتب الله لك عمرا جديدا

رزقنا الله واياك شكر النعمة

[راعي الكيف]

الحمد لله على السلامة ....

وماترا باس ياوخيي .... وانتبه مرة ثانية ... لازم تزبن عمرك لانشبت مثل هالنشبات

واستفد منها دروس واجد ...... وربي يعينك

[الشاطر]

حمدلله على السلامة فعلا الحرص واجب دائما

وعلى فكرة يقولون الشي بشي يذكر

مرة من المرات كاشتين ورى روضة التنهات نصيد كراوين...ومخيمين خميس وجمعة
لوم صار يوم الجمعة قلت لشباب العصر خلوا نظف الخيام قبل الليل ولا يبقى الا لوازم الطبخ ...قالوا لا وشوله حنا واجدين وبعشر دقايق نظف هالخيام والغراض...

تعرفون الجماعة تغلب دائما خله على الله
المهم لوم تعشوا بعض الشباب النشيطين بدوا يتسحبون يبون يمشون ..وكل واحد يجي للامير يحلف ويقسم
مثلا واحد قال عندي بحث لازم اسلمه باكر
واحد قال مايمديني لازم اصل الرياض اخذ ملابسي ..قبل لا يسكرون المغاسل
وهذا بيروح لعياله وهذا يبي يمشي للقصيم اهله اهناك
وكل واح ...بداء يجيب عذر
المهم الامير حبيب وسمح بداء يعطي تصاريح العوده وخيامنا ماضفيناها
عاد اخوكم الشــــــــــاطر معصب وقوله لاتوافق يافهد لا توافق يقولي اللي مايسدحي يالشــــــــــاطر مانبية .مانبية

ونا اتساسر مع الامير وتناقش معه جا واحد من الشباب قال يافهد انا بمشي وباخذ اربعه من الشباب لان عندي وعندي
قلت خل اعيال ورح انت خلهم يساعدونا ورفض وبداء يجيب الاعذار

قلت بخاطري ومن قلب ...رح الله لايردك ...(ياقلبي والله مهيب عادتي بس اقهروني الساعة 12 بالليل ويوم جمعة وابكر دوامات خله على الله مته تاصل لرياض

المهم وصلنا محطة الحفنه وحنا معنا الونيت محمل بالخيام والعده نبي نعبي بنزين ونعبي هواء الكفرات ...الساعه هالحين وحده ونصف ويلا هذا خوينا اللي اعتذر الاخير ومعه اربعة من الشباب ...جايك بالمحطه منفجع ضايع الاخ بالبر يبي يروح للمزفلت انجم وتجه جهة الصماااااان ومن وقت ماراح منعندنا وهو ضايع .
عاد لو م دريت كنه مبشرني هالخو بانه اكله علقة ..........

وياليتك تشوفني مبسوط طول الخط راع الزعل والتعصيب وخذت طول الطريق اعلق علية بالكنود وهيجن ...من فرحة رد الاعتبار لان لو ماجاء من هالموقف الا ذكرى هالعلقه لخوينا

حبيت اوسع اصدوركم ...بمناسبة سلامة خوينا

[قاهر الكرك]

الحمد لله على السلامه

[a.الخثلان]

أولا الحمد لله على السلامة

أحد يطلع وقت العشر الأواخر

وزي ما قالوا الأخوان الاحتياط واجب منها ترك المغامرة في النفود وأماكن السيل واذا أراد الانسان يطلع لوحة يحدد الوقت ووقت الرجعة والوجهة ويخبر أي أحد بذلك ويحمل معه الزاد والماء وتزداد أهمية الحذر والحيطة وقت الصيف

بعدين ودك الواحد ما يصير رخمة وقليل نفعة ولقافته واجد راعي تفرج وزحمة
الحين تلاقي واحد متعلق في البر ولا يقدر يتحرك ويغمى عليه والناس تدوره ومعلنين عنه ويصايحون يا جماعة الربع افزعوا ويتردد في كسر زجاج السيارة واظهار المريض وانقاذه


أخيرا
عساك لقيت حبارى

[غيّام]

الحمد الله على السلامه والحقيقه قصه محزنه ولكن اسلوبك فيها جعلني اضحك بعض الشئ فعذرا اخي

[ابوحازم]

الحمد لله على السلامة

[فهيد711]

الحمد للة على السلامة والاحتياط واجب في كل شي

[ابو درع]

الحمد لله على سلمتك ..

وقد تكون عبره للغير بعدم التهاون وان يخذ جميع احتياجته ..

والله الحافظ..

[الكونترولCONTROL]

ما مثل الخوي بالطلعات ..... و يفضل سيارة أخرى .............. و يفضل برمجة الرحلة ووضع حدود و غايات لها
================================================== ==========
و لكن اذا فات الفوت ما ينفع الصوت
حفظ الله الجميع
=========================

[ولد بن حمد]

الواحد يطلع الحاله دمار وبعد سياره وحده ادمر لجمعه فله على الاقل كنود وقارمن والحافظ الله

[خيال الغلبا]

الحمدلله على سلامك يافهيد ولو انها متأخرة جدا

[عروان]

الحمد لله على سلامتك يا الفيد

هذا عبرة لك ولنا جميعاً

ودك الواحد يبلغ أهله او أخوياه عن مسار رحلتة و غياتها حتى اذا سعبت الامور مثل قصتك يسهل عليهم تدويره.

الله يحفظك من كل مكروه و يعافيك و يسلمك

[ثقل]

الحمد للله على السلامه

[ولد]

الحمد لله عللى السلااااااااااااااامه


ومره ثانيه لا تفلسف :) :) :)

[Shawly]

الحمد لله على سلامتك أخوي

سلامة دايمه ان شاء الله




مع التحية...