المساعد الشخصي الرقمي

مشاهدة النسخة كاملة : هل من المعقول مالقو حل للقطعه الى في الهالكس 2006 وطالع


مربط القعاسي
15/02/2011, 09:49 AM
بسم الله الرحمن الرحيم

ياشباب غيرنا البطاريه والله لا يعدي ذا التغييرة من عقبها والسيارة تقطع قطعه وحده فقط

او كتمه وبعض المرات اذا كنت مادهست زين تطفي

والعجيب اذ دعست شوي شوي مافيه كتمه ولا قطعه واذا دعست دعسة متوسطة يعني تقويمه عادية حقت شبابا هي الى يجي فيها كتمة وحقت الشياب مافيه كتمه بعد الى هي شوي شو وعد حقت ونا بسراحه بديت امل من السيارة خاصه اذا كانت السيارة باردة ايس تكتم وتطفي غصب والسيارة عزمها قوي في النفود وفي الطريق تصفق 170 الى 180 براحة لا كن المشكله كلها في القومة هالقطعه جننتني

وهل من المعقول ماحد لقالها حل للحين رغم ان الكثير يشتكون منها وبعضهم عنده تكون بسيطة وبعضهم لا قويه

ياشباب الى مرت عليه وصلها يعلمنا وين صلحها فيه ولا اني رحت لليابان ولا استراليا اصلحا هناك

والله الموفقه لما فيه الخير
خالد السعد
15/02/2011, 12:18 PM
وانا عندي نفس المشكله هايلكس 2008 غيرت صفاية البنزين وبعدها طلعت هالكتمة
لكن انت ممكن إنك مركب بطارية أقل من بطارية بلاده.
ترى البطارية لها دور فعال في عمل البخاخات .
مكنيكي مبتدأ
15/02/2011, 02:38 PM
السلام عليكم

ياشباب تراها اضاهر موب اكيد

عشان الدعسه كهرب والله اعلم

انا عند اخوي هايلوكس2010

نفس المشكله بس ماتطفي .
أبو محمد 3113
15/02/2011, 02:45 PM
عندي نفس المشكلة
إذا فصلت البطارية أو غيرتها ورجعت أشغل الموتر ضغط المكينة ضعيف والموتر يتفتف وبعض الآحيان يطفي إذا شلت رجلي عن الدعسة آخذ عليها مشوار ويزين وبعض الآحيان يطول ويروح
ابوعمرالحربي
15/02/2011, 02:56 PM
تغيير بطارية هايلكس 2008 م

واجهتني مشكلة بعد تغيير بطارية السيارة وهي أن المحرك لايعمل عل السرعة العادية بعد التشيغيل وينطفى مباشرة بعد تشغيله حاولت أ ن أ رفع الدعسة ( خبري قديم قاعد أدور مسمار رفع الدعسة ) لقيت أنه حتى سلك دواسة مالها ومالقيت الا فيش يركب على البخاخات يوم فصلته لقيت أن السيارة ماتتأثر عند الدعس على دواسة البنزين ؟؟؟؟ رجعته مكانه ودعست على دواسة البنزين عملت بشكل طبيعي ولاكن المشكلة مازالت موجودة ( عرفت أن نظام دعاسة البنزبن هالنظام الجديد الللى سوى المشاكل لتويوتا بأمريكا ) !!!!!!!
بعد التفكير قلت يمكن تحتاج الى إعادة ضبط زي السيارات الأمريكية شغلت سوتش السيارة على وضع التشغيل بدون تشغيل المحرك ودعست على دواسة البنزين ثلاث دعسات للأخر مدة كل دعسة ثلاث ثواني تقريباً بعدها شغلت الموتر ونجحت الفكرة ورجعت السيارة كما كانت ميه فالمية حتى لمبة فحص المحرك ذات اللون البرتقالي كانت شغالة أنطفاءت بعد هالحركة .
مربط القعاسي
16/02/2011, 08:21 AM
جزاك الله خير على الردود وبندجرب طريقه الاخ حنضل وبنوفيكم بالمعلومات رغم انتي متأكد انها ماراح تجيب نتيجه

ولاكن نقول انشاء الله تنجح

وبالله التوفيق
K.S.A.A
16/02/2011, 09:37 AM
معروف أن دعسة البنزين كهرب في الهايلكس من 2006 وطالع
ودعسة الشاص كهرب من 2010 لهذا السبب تجد الكثير يقول إن الجيب يطفى وقت التغريز
خصوصا مع الشيبان .
والفكسار من موديل 2008 كهرب بعد.
لكن طريقة أخوي حنظل سمعت عنها في السيارات الأمريكية وأعقد تضبط .
على العموم مشكورين ياشباب والله يوفقكم لما يحب ويرضى.
ابوعمرالحربي
16/02/2011, 10:30 AM
جزاك الله خير على الردود وبندجرب طريقه الاخ حنضل وبنوفيكم بالمعلومات رغم انتي متأكد انها ماراح تجيب نتيجه





ولاكن نقول انشاء الله تنجح


وبالله التوفيق





أخي مربط القعاسي تأكد من وجود صوت يدل على تحرك الدعسة عند كل ضغطة حيث غالباً مايطلع الصوت الآ بالدعسة الأولى وهنا لاتنجح الطريقة .

لذلك يتم فصل البطاريه والأنتظار لمدة خمسة دقائق ويعاد توصيلها وتعاد المحاولة الى أن يسمع الصوت في الثلاث دعسات .
وإنشاء الله تنجح مسويها مرتين ونجحت على هايلكس 2008 م
ووافينا باللي يسيرمعك لاهنت ...
فواز الحربي
17/02/2011, 07:25 PM
السلام عليكم ورحمة الله وبركاته


أنا لي تجربه ونجحة و الحمد لله
عند واحد من أصدقائي ونيت هايلوكس 2008 بيغير البطارية لاكن في ناس يقلون له أنه بعد فصل البطارية تبدى السيارة بالتقطيع أو التفتفه و أقترحة عليه أنه يركب أشتراك من سيارة ثانية في الأصابع و يفصلها ويركب البطارية الجديدة
ويفصل الأشتراك .

وجربها ويقولي الحمد لله السيارة تمام وماجاتني أي مشكلة .
ابو رشيد
17/02/2011, 08:02 PM
هذي المشكلة مذكورة في دليل السيارة وذاكرين طريقة لابد تعملها اذا ركبت بطارية جديده
طبعا ما تحضرني لاني قريت الدليل على عجل وماني متذكرها
YUKON_GMC
17/02/2011, 08:59 PM
اعتقد ان المسأله تحتاج اعادة برمجة كمبيوتر السياره ..

وافضل طريقة هي فك اصبع البطاريه وتوصيله والسوتش مفتوح مرتين ثلاثه ومن ثم شغل السياره
ذيب النجيل
17/02/2011, 11:13 PM
أخي مربط القعاسي تأكد من وجود صوت يدل على تحرك الدعسة عند كل ضغطة حيث غالباً مايطلع الصوت الآ بالدعسة الأولى وهنا لاتنجح الطريقة .




لذلك يتم فصل البطاريه والأنتظار لمدة خمسة دقائق ويعاد توصيلها وتعاد المحاولة الى أن يسمع الصوت في الثلاث دعسات .

وإنشاء الله تنجح مسويها مرتين ونجحت على هايلكس 2008 م

ووافينا باللي يسيرمعك لاهنت ...








يعطيك العافية

بس الصوت حق الدعسة ياليت لو توضح لنا هل هو طقة او صوت ثاني ؟؟؟؟

والصوت متى يطلع من اول الدعسة ولا بعد ال3 ثواني ؟؟؟؟
مربط القعاسي
19/02/2011, 08:05 AM
الف شكر على الردود الجميله

ولا كن نرجع ونقول اخي الفاضل حنضل بيض الله وجهك على المعلومات القيمه لكن انا سويتها وصار القطعه من الثاني الى الثالث وقبل كانت من الاول الى الثاني على العموم ياريت

توضح لنا الطريقه اوضح يعني هل لازم السيارة تكون باردة ولا لا
وهل لا زم تفك البطاريه ولا لا
والدعسه الى تدعسها كيف طريقتها هل اني ادعس الى اخر الدعسه وعلق عليها لمده ثلاث ثواني ثم افكها واضعطها ثلاث ثوني ثانيه
وقبل ما اضغطها كم المده الى يكون فيها شغال

الله يعطيك العافيه

ويجعله في موازين اعمالك

اخوووووووك مرررربط القعاسي
أبو زياد الحنيني
28/02/2011, 10:25 AM
ادخل على الرابط و ان شاء الله تضبط امورك
http://www.mekshat.com/vb/showthread.php?p=5619492