ابي الحل الوكاد تكفون

[الباحث6]

ياشباب تكفون ابي حل سريع وعلاج فعال عندي طيري اذا هديته او لوحت له يتعب بسرعه ويلهث ولا هو دايم مره ومره مع انه سليم ولله الحمد تكفون اللي عنده علاج لا يخفي علينا

[جبار1]

هلابك الباحث

الأسباب كثيره قد يكون صنعه وهي لها دور لكن الوقت الحالي

لاتستغرب من فحمة الطير وفتحت فمه لأن في أيامنا هذي حر بس دامه يلاعب

حتى ولو فاتح فمه فهذا عادي بشرط انه سليم مافيه مرض أو يكون

فتحات الخشوم مسكره من وسخ وغيره أو يكون فيه ملوع
غير هذه المشاكل يكون وضعه سليم.

[صقار مبتدئ]

الطير يكون فيه احد الامرين
1- لايقه ضعيفه و انت تكثر عليه في الملواح ابدأ معه 5 ثم 10 ثم 15 و زيده كل يوم خمس لحد ما يصك معك 30 و اثبت عليها ترها طيبه


الامر الاخر
يكون الطير ضعيف ارفع عدة الطير قليل ترا الطير اذا ضعف ما يقدر يلاعب الملواح

[قرناس شماالي]

ماقصر اخوي صقار مبتدى

ولا يهونون الربع

[سطام ابو سعود]

كلام الاخ تركي سليم

[صقارالواحة]

الجو بدا يحتر وكلام تركي صحيح

[ابوعزيز2007]

هلابك الباحث

الأسباب كثيره قد يكون صنعه وهي لها دور لكن الوقت الحالي

لاتستغرب من فحمة الطير وفتحت فمه لأن في أيامنا هذي حر بس دامه يلاعب

حتى ولو فاتح فمه فهذا عادي بشرط انه سليم مافيه مرض أو يكون

فتحات الخشوم مسكره من وسخ وغيره أو يكون فيه ملوع
غير هذه المشاكل يكون وضعه سليم.

ماشاء الله عليه تركي ماخلا شيء

[طبيب المواتر]

السلام عليكم اخاف الطير فيه ملع عطه سكر نبات مع العلف والاخوان صادقين حاول تدرج في الملواح والله يرزقك بالكراوين

[الحمش1]

اخوي اتوقع توك مطلع الطير من المربط

ومافيه لياقه ماهو مجرود وان شاء الله الموسم الجاي يطلع معك على الحبارى

والطير مافيه ملوع لو ملوع مايفتح حلقه ويتعب

[الصاعقة33]

بالنسبه للطير مافيه الا العافيه اول شى الجو احتر وثانى شى طيرك صنيع او ماتدعيه الا من فتره لفتره ونصيحتى لك افحصه وبعدها اربطه انتهى وقت الطير الحين وقت الشياهين

[صقرالحروب]

طير مابه الا العافيه الجو اختلف وانصحك بان تحضر لربطة الطير

[دعاس]

الطيور هالوقت فترانه ورامكه ونفسيتها زفت لزيادة الهرمونات وقت المشابط’’’واغلب الطيور تغيرت واذا الطير اخذ حصته من المقناص
السنه اربطه وريحه وافحصه قبل الربطه

[ابو فهاد0]

كلام اخوي دعاس مضبوط الطير الحر هالوقت تتغير نفسيته بسبب الحر واغلب الحرار الحين رامكة تبي الربطة انصحك انك تربط الطير وما قصر معك اخوي ( تركي و صقار مبتدى )

[الباحث6]

عز الله ما قصرتو بيض الله وجيهكم لكن مشكلة الطير ماهي هالوقت من له كم شهر وهو يتعب بسرعه ويلهث ويهدل جنحانه اذا كثرت عليه الملواح ما فيه حاجه اوعلاج للفحمه اذا كان به فحمه