تعليف الطير ..؟؟

[منوخ الذيابه]

بسم الله والصلاة والسلام على رسول الله ..

الله يمسي الجميع بالخير والرضا والعافيه ...

كيف حالكم عساكم بخير .؟ وش حال طيوركم عساها تزقح .؟

حبيت اطرح هالموضوع لجل الكل يستفيد منه وماادري اذا سبق وطرح او لا
لكن حبيت اشارك وانشالله يكون في محله

الموضوع تعليفك للطير ..؟؟

لكل صقار طريقة لتعليف طيره منهم من يكرمه ومنهم من يتبع قاعدة (( جوع كلبك يتبعك )) ويقتصد على الطير فالعلف ومنهم من يقول كثر العلف يضر الطير ومنهم من يقول الجوع سبب لكثير من الامراض وضعف مجس الطير وطاقته !!

اليوم حبيت اسمع من كل صقار نظام تعليفه لطيره , سواء قبل وقت الهدد او من غير هدد او في المقيض من ناحية الاكل

وايضا الماء بنفس الاوضاع اللي ذكرتها ..

اتمنى من كل صقار يشارك ويفيد ويستفيد ..

تحياتي / ابو خالد

[قرناس شماالي]

وعليكم السلام ورحمة الله وبركاتة

صبحك الله بالخير يامنوخ الذيابه
ومشكور على الموضوع الطيب
وكل صقار له طريقه وكل طريقه يبيلها ناس تفهمها
وكل طير يبيله وزن وكل جسم طير يبيله عنايه
الشياهين اكرمها بلعلف وتعجبك بلهدد والحر موكلهن نصهن لازم تقصر
انا بنسبه لي اوزن الطير قبل الهدد وهده وعلفه منها ولوحله ويكفيه ثنادي
وعقبه اشربه ماء
وتقبل تحياتي

[مجاكر]

والله يا خوك وقت الهدد للحر

ثندوه ورجل ..

وقت المقيض حمامه كامله

او سمنه وجربوع

[طبيب المواتر]

السلام عليكم ورحمة الله وبركاته
في البداية احسب تعليف الطير وقت طرح الفريسة واجب إلى حد الإشباع ولكن بعد الممارسة اتضح إن أفضل شي هو إن يقوم بذبح الفريسة وبعدها يحاول إن ينسر الصقار له تنسير فقط وبعد إن يرتاح الطير يقوم بتعشيتة وبعد ذلك يقوم برش الماء عليه وأتوقع السبب هو إن لايلتهم الطير كل الأحشاء وتقل الأمراض الرئوية وغير ذالك.

* عند طرح الفريسة يقوم الصقار برش نحر الطير وتحت الجناح فقط لتبريد وليس لشرب الماء.

تقبلو مروري.

[منوخ الذيابه]

لاهنتم يالربع .. بيض الله وجيهك .. وطيب الله طيوركم ..

نسمع من باقي الصقارين وياليت مع التوضيح اكثر مثل (( تقسيم الوجبه فاليوم وحده او ثنتين ))

ونوع الوجبه (( سمانه كامله )) (( جربوع )) (( حمامه ))

[صقار مبتدئ]

بالنسبه لي انا استخدم مع كل طير طريقه
الشيهانه لا نجوعها و لا نكرمها زود قبل الهدد نعطيها تندوة و حدة فقط استعداد لليوم الثاني و بعد الهدد نكرمها و على كذا الى و قت الربطه

اما الوكري ازيد له العلف لحد ما يصنع و قبل الموسم اثبت له ميزانيه و حده في العلف و هي نصف تندوه يومياً لاني مخليه طراد و لازم يكون محتاج على طول
اما الماء بعد الهدد و التلويح

[غربي وهواوي]

افادوك الاخوان

[شلهووب]

سلام عليكم
بنسبه للحر تدعيه اذا اصطاد فريسته اعطيه ثنداه فقط. اذا بي صير وقت الربطة قبلها ب١٥يوم تدعيه صبح تعطيه ثندا وحده. اذا صار الظهر اضرب وكره. وخلا بشمس وفرع الطير علشان يتشمس ورش الطير ماي على منسره ورجله وخله بشمس. اذا صار العصر تدعيه بعد بالملواح وتعطيه ثندا ورجل. اذا بالمقيض جربوع وسمن

[راعي عزام 123]

السلام عليكم ورحمة الله وبركاته
مسيكم بالخير كلن بسمه
بالنسبه لي انا وللربع
الشاهين صافق ورجل وقلب فقط
والحر صافقين وقلب بعد الدعو

[نسل الشيوخ]

افادوك الاخوان
اما بالنشبة للشيانة الي عندي فاكرمها كل يوم بثنودتين (( سمان ))
لكن اذا نويت الهدد اخليها يوم او يومين بالكثير ما اعلفها وبعد الهدد اكرمها
واذا نويت العبها على الشلو بعد التلويح اكرمها


لاهنت يالغالي ونستفيد من الصقارة الآخرين

نسل الشيوووخ