الفزعه ياهل الباترول

[sniper hremla]

السلام عليكم/
انا خويي معروض عليه باترول صالون 91ومسيوم من راعيه 20 والبيع يقول قريب ..
الباترول ماعليه ك وقفه لاكن فيه بعض الخرابات وهي
1/المكيف يبيله مكره وسير والثلاجه يبيلها فيوز
2/والديكورات الداخليه يبيلها تنجيد
3/والدبل خربان يبيله تيله
لاكن الموتر ك ممشى ماعليه ماشي 290الف
والبدي حليل فيه دقشات خفيفه ومصلحه والاستمارة جديدة لكن ماهوب مفحوص
وانا الله لايهينكم ابي مشورتكم في سعره هل يستاهل ولالا واسف على الاطاله

[العارض 511]

وعليكم السلام اخوي الجيب ب20غااااالي ياغاالي ويبيله شغل بعد انا اشوف ب14الف زين بعد الكشف على المكينة والقير والعضلات لانه نيسان مو تايوتا والنيسان مهما تحط فيه دايم خربااان واللة ولي التوفيق

[راعي العشــه]

هلابك اخوي sniper hremla (http://www.mekshat.com/vb/member.php?u=146079)

انا اشوف انه يبيلك سفاري كامل على اللي ذكرته
كل شي فيه يبيله صيانه هذا اللي تعرفه غير اللي بيطلعلك
وكلام اخوي العارض صحيح السفاري يعشق الورش :)
وانا اشوف اذا انه بيبيعه بـ11 الف ولا اتركه
بعشرين تجيب انظف منه
وهذي وجهة نظر لا اكثر ولا اقل
والله يكتبلك اللي فيه الخير

[ابو عود]

السعر مهوب غالي ولا هوب رخيص

على حسب نظرة الموتر

على كلامك هذا الموتر حده 18 الف

ولا يهمك كلام المتعصبين

[ذيب عتيبه]

حياك الله اخوي


اللي يقول 11 واللي يقول 14 ... لو انها سلعه لك ماقلت هالسعر هداك الله


اقسم بالله لا اعرف راعي الموتر ولا يعرفني ..


لكن نفسرها اخوي ..


فيوز وفريون بتكلف تقريبا ميه ريال

تنجيد بيكلف تقريبا اربع ميه ريال

تصليح الدبل بيكلف حول الميتين ..


تشييكات على الموتر بيكلف الخمس ميه ..

ان كان بذمه الرجال انه ماشي هالممشا صحيح .. 290 .. يعتبر قليل على موديله وعلى مكينه نيسان ... شيك على الدفرنسات والمكينه تنقص او لا .. والقير .. وكامل الموتر .. وبديه وبويته ان كانت ممتازه ولا يمنع الدقشات الخفيفه اللي ذكرتها


توكل على الله وقله قيمه الفحص بخصمها وهي خمس ميه ريال .. وبيطلع لك كذا بال19و500 وانقله بالخمس ميه بيكلف العشرين صافي . وسعره جيد ان كان الموتر ممشاه صحيح



بالتوفيق اخوي