ماهو خط سير رحلتك غداً الأربعاء

[najazy]

السلام عليكم ورحمة الله وبركاته
هذه أول مشاركة لي

وأقترح فيها أن يكتب لنا كل واحد منكم ما هو تخطيطة لرحلة غداً
لأن الأغلبية يخطط لذلك الآن
وأيظاً ليستفيد بعضنا من بعض
وهذا ماعودنا عليه مكشات
ولن أطيل عليكم
وآمل منكم إفادتنا من خبرتكم

[ابوذيب]

انا خط سير رحلتي عرعر ثم الى رفحاء ثم الى حفر الباطن ثم الى النعيريه واخيرا الجبيل الصناعي لاني قاعد بالبر من اسبوع والله اعلم

[ابو درع]

والله وما درك انا اقول يزين القصيم نشوف الخير ولأمطار ..

ورفيقلي ملز اروح معه الم ارقيبه ..

يم الأربعاء بنسبه لي يوم السريع .. الثمامه .. او المكتب ..

[nahham]

حتى الان ما اتخذنا القرار النهائي

تسلم

[najazy]

شكرا على الردود وأتمنا نشوف المزيد من الخطط
أنا بالنسبة لي أب أطلع من الطوقي إلى الخفجي إن شاءالله
يمدحون الشرق
والله يجيب الخير

[ابو ايمن]

وعليكم السلام ورحمة الله وبركاته
حياك الله اخونا ابو صالح

كنا مخططين على أم رقيبة ولكن أراد الله أن نجعلها هذا الإسبوع قريبة

يمر علي إن شا ءالله احد الإخوة قادم من بريدة . وعلى موعد مع بعض الشباب من الرياض

الهدف الأول اليوم الإربعاء المبيت في نفود حول لبخة وحويتة

صباح الخميس إن شاء الله ندور على السيول اللي هطلت على شعبان الحرملية وما حولها

ومنها على السريع باتجاه ( يذبل ) جبل صبحا جنوب الخط السريع من عند حلبان .

نشوف الأرض ونعود الجمعة بإذن الله على طريق الشعراء الدوادمـي .

العزبة جاهزة والنشاما شرواكم على استعداد وإن كان فيكم خوة الله يحييكم

أما الإسبوع القادم بإذن الله على أم رقيبة وما حولها .

أنا أريد وأنت تريد والله يفعل مايريد .

[مشوت الحصى]

لم يتقرر

وبالنسبة لي
اذا ركبت السيارة
فكرة وين نروح له

[مهراس]

السلام عليكم ورحمة الله وبركاته:

انا عندي الونيت وعدة البر جاهزه مخطط اشوف اثنين من الأصدقاء ونطلع نبيت في البران اللي شرق جده، الجو معتدل ولو انه مافي ربيع بس خايف من النامس.

[najazy]

زودونا يالنشاما بخطط لرحلة ممتعة
تدرون أننا ماغير مطيرين عيوننا بهالسحاب وين را يح ونلحقة ؟؟!!

[الشقردي]

هناك خيارين بالنسبة لي
- من الرياض-طريق الدمام- مخرج رماح- خريم - شوية- ام المصران وما جاورها والعوده عن طريق الرفيعه الى دوار الحفنة وهناك نقرر على حسب التساهيل وأخبار الكنود , فأما اننا نروح للتنهات ومنا للشوكي وتمير والمجمعة أو نرجع من جهة الطيري والطوقي

وكل الدعوى على حسب التساهيل وعلى حسب الصملة .....

[مريوس قدام]

وين الخيال الزين خلك حوله هذا وقت هطول امطار والا الأرض ما بعد زانت هذا رايي


خلك حول الأمطار

[شـهـاب]

هلا هلا

انا لن اتعدا حائل هذا اليوم ان شاء الله

السماء غيوم الجو جميل جدا

مع برووووووووده شديده


يعني اليوم وباتسر قريب من حايل

والسلام خير ختـآم
شهـآبـ

[الكونترولCONTROL]

ما ادري وش بها ام رقيبة ؟؟؟؟؟؟؟؟؟؟؟!!!!!!!!!!!!!!!!!!!!!!!
=================================
حتى انا ودي بالقصيمم ...... و اخواني متواعدين بام رقيبة ............ ما ادري وش اللي يشجع فيها
البعارين تصلح لاهل البعارين ..... و حنا ما غير مكاشيت .... و ما نشرب الا حليب السعودية ... و الدنمارك
================================================== ====
السوق فيها زوين لكن ما هوب لدرجة اننا نتحمل مسافة الخط ............
ادعوا لي انهم يغيرون رايهم و نروح للقصيم ....... يارب يا رب يا رب ....
================================================== ==
و عموما اذا قدر الله ورحت اروح باذن الله الخميس بعد ما اصلي الفجر
يمكن اروح جهة الدهنا ثم مع وسط الصمان من جهة رديفة الحاج
الى ان اصل ام الطين ان شاء الله ثم دايركت الى ام رقيبة
و متواجد ان شاء الله على الجهاز 146:775 او 145000 او 144000
و عسى الله يوفق بجو زين في كل الاحوال لجميع المسلمين ....
--------------------------------
قولوا آمين
==========

[nahham]

على حسب اتجاه السجاب وين مايروح نروح معه

الله يجيب الخير يارب

---------------------

الكنترول .... امين . امين . امين

[mrzoq]

السلام عليكم صباح الخير

أنا ودي أتجه من الرياض إلى الطوقي ثم الحفنه ثم التنهات ثم المحارق ثم الطيري ثم الترابيع ثم الحقاقه ثم أم الرجوم ثم الشوكي ثم الرياض إلا وش رأيكم ياأحبابي

[القصبي]

انا الحين في العمل
خط سيري زي العاد
من العمل الى البيت الى المسجد الى الفراش
لية مااطلع زييكم؟؟
لان الله باليني بربع مهوب يحبون البر وان طلعو ويسمونها طلعة بعد طلعو للملعب الفريان
اما انا عبرتي تكسر في وريدي ودي اطلع لو مرة في العمر
على قول الشاعر ودي اسهر معكم لو ليله ليلة بس
والسلام عليكم ورحمت الله وبركاتة

[عاشق المزايين]

بسم الله الرحمن الرحيم
السلام عليكم ورحمة الله وبركاته
انا ياطويل العمر بامشي اليوم الاربعاء الفجر ان شاء الله
من الكويت على خط ابو حدريه لام ارقيبه
واسلام عليكم ورحمة الله وبركاته

[أبو يحيى]

من الجبيل الصناعية لجو سمين ثمن أرجع للجبيل الصناعية.......