خبراء الباترول الموديلات القديمه 92

[المقيرش]

السلام عليكم ورحمة الله وبركاته
مرحبا اخواني الاعضاء
طلب مشورة ورأي
عندي مشكله في باترول سفاري 92 عند تشغيله الصباح للتسخين ريحت الكربون قوية جدا وكذلك خروج ماء كثير لدرجة تشوف الماء معبي مكان الارض تحت الشكمان مع قطع كربون اسود بعد ما يحتمي ادوس له ما يطلع غير سواد بانزين ريحته مسكت به خط قبل فترة 1500كيلو وجلست ابو شهرين وغيرت الزيت لقيته ناقص حول العلبه ولحظت عليه قبل فترة وانا طالع من التطعيس وقفت شوي اعبي الكفرات ظهر لي دخان كثيف زي جلد البلوف وبعده انقطع ولا عاد شفته من قبل 3شهور علما بان صرفيت بنزينه كثيرة وكبليترة يبي الظاهر اصلاح وش تتوقعون يا اخوان يحتاج شمبر او جلد بلوف او اصلاح كبليتر مع العلم حرارته ماتتعدى الخط ومويته ماتنقص افيدوني جزاكم الله خير الجزاء
*تماتيك المروحه خربان له 8شهور من شريته واسافر عليه والحنه قويه هل ممكن الظرر منه؟

[صاروخ الغطغط]

كان الدخان الي يطلع من الشكمان اسود هذا الكبليتر يبغي تنضيف واصلاح ونقصه يمكن شنبر يفيدونك الزملا

[مولع قنص]

والله يا خوي انا كان معي اخو جيبك ((وبهدل بصحتي)) غيرت له اسلاك بواجي وكاله وطقم اصلاح وكاله وكل شيء وهالسوالف كلها اللي مرت عليك عانيت منها من نقص في الزيت وريحة بنزين وكربنه

اخر شيء توكلت على الله وبعته وشريت لي 95 بخاخ والحمدلله كل المشاكل اللي كنت اعاني منها راحت

وبيني وبينك الفرق بين الكلبليتر والبخاخ فرق كبير ما يحس فيها الا اللي جرب

وانا اكلمك من واقع تجربه واذا انت رجال ما تبي تبيع الله يعينك غير له صفاية بنزين وطقم اسلاك بواجي وكاله اذا مو وكاله لا تركب وغير له طقم اصلاح للكلبليتر وكاله وبأّذن الله انك ترتاح واذا كل هالمحاولات ما نجحت معك نصيحه بعه وزود على قيمته وخذ لك بخاخ وريح راسك

[المقيرش]

السلام عليكم شكرا اخواني
على الرد ومازلت انتظر الجواب والله يوفق الجميع

[نسيم المطر]

كان الدخان الي يطلع من الشكمان اسود هذا الكبليتر يبغي تنضيف واصلاح ونقصه يمكن شنبر يفيدونك الزملا

انا تعليقي نفس كلا م اخوي

[المقيرش]

السلام عليكم
اخواني النقص بسيط لايسذكر بالنسبه للباترول معروف يبخر واتوقع على المسافة الي قطعته وكذلك في شي ماذكرته لقيت غطاء الزيت حق المكينه يهرب ويطلع منه زيت وغيرته جديد قبل فترة بسيطة لكن الكبليتر صحيح ماهو مضبوط بس القطع السودا مع الماء الي بيطلع عند تشغيل الموتر للتسخين ضرب راسي بس الي يريحن انه ريحته كربون بنزين فقط والدخن مافي الى اذا دست له بقوة دخان بنزين اليوم شيكت عليه

[ابو عود]

وضعك طبيعي

[((السنياري))]

السلام عليكم

تعرف تعير الكبريتر ترا مايبيلها شي <=====نقص على هواء الكبريتر +ترفع على دعسة البنزين

شيك على الديلكو لان ناس واجد ترفع عليه <===هذا يبيله واحد فنان علشان ترجعه وكاله لان اوكيه يجي من9الى12عزم حلو وممشى حلو

اهم شي لاينفك الكبريتر لان اذا انفك راحت البركه الي فيه

[بندرالعتيبي]

القطع السوداء الي تطلع من شكمان طبيعي جدا عندي ددسن كلبليتر كذا تسوي وكل الدداسن الكلبليتر الي جت معي زي كذا بضبط ولاصار فيها شي عادي جدا

[ابوصالح77]

هلا بك أخوي
أكثر ما يضر المكينة إذا كان تماتيك المروحة مجيم
فيأثر في نقص الزيت وكذلك صرفية البنزين وكذلك العزم والقومة
أولاً : غير التماتيك
وبعدها يحلها ربك
تقبل مروري

[almjrooh_07]

من ناحيت الزيت وانا خوك اعتقد انك تستخدم زين 10-40 انصح تغيره 20-50 لانه مايتاثر بالخط الطويل ولا ينقص اما اذا يطلع دخان ازرق مع بدايه التشغيل وبعد مايسخن ينقطع فهذاجلد بلوف هذا والله اعلم

[YUKON_GMC]

كل السفاري يصرف بنزين ودايم اشتغاله ماهو صافي والتانكي صغير

لكن خذ نصية احد الاخوان

غير الديلكو الى الكتروني + كويلات الكترونيه ويفضل حقت 4500

وركب له فرارات وغير بنزينك خله 95 وبعد اسبوعين من هالحركه بتشوف

النتيجه بس اهم شي لاتركب عليه جنوط ثقيله وانصحك بالهلل + بالون بطله

[المقيرش]

السلام عليكم
شكرا اخواني على الردود وجزاكم الله خير

[عقيد حرب]

شف واناخوك غير لة بواجي وبليتين وصلاح كلبليتر تلقاه اظن حول85ريال عند الوكالة وش لك بالخساير بالذات هذي المواتر القديمة مايظرها شي اسئل مجرب معي واحد مثلة اذا والدخان طبيعي معي لة 3سنوات
مايننقص ويطلع دخان اسود بس اما بالنسبة للمروحة تمشيك بالشتاء بس لاجاء الصيف كلام ثاني وانصحك تغييرها وتركب مراوح كهرب سوبارو

[أحمد محمد1429]

أخوي موترك طبيعي لاتتعبث فيه وأحتمال يحتاج حاجه بسيطه لن تكلفك الكثير وزن الديلكو لأعتقد أنه متاخر قليل ووزن هواء الكلبليتر فقط

[المقيرش]

السلام عليكم
اخواني
اعتقد انه جلد بلوف لاني لاحظت لما اشغله وهو بارد يطلع شوي دخان جلد ويروح بعد الحرارة والكبليتر صحيح لعب فيه واحد الله يهديه لكن اصلاح الكبليتر عند الصيعري وكيل قطع غيار اصلي بـ250ريال وبالنسبه للمروحه تماتيكها خربان قالي حق قطع الغيار بالوكاله نصيحه اني اركب مروحه مع تماتيكه حقت بخاخ يقول افضل وانا بصراحة متخوف اركب مراوح سوبارو اخاف تخرب على بطريق او سفر ومدري وش الراي واذا بغيت اركب مراوح سوبارو من والى من يوفر لي بالقصيم هل كهربائي ببريدة ممكن يوفر ويركب لي هذا السؤال ؟
والله يوفقكم جميعاً

[((السنياري))]

تركيب مكلتش مروحه حقت البخاخ تحتاج مروحه كبيره لان يفرق الحجم
هو نصحك نصيحه حلوه بس مكلفه
اذا انت تبي تستعمل مده طويله ركب كلتش مروحه +مروحه +حكارة المروحه الي تجي على الرديتر

خلنى اول بخرابك الي باالكبريتر لاتركب تجاري لانك مراح تستفيد شي ولاتبدل طقم الاصلاح الا عند واحد فنان كبريترات
اذا استعمالك موب يومي له ركب كبريتر شفر +ثلاجه =صج عزم بس استهلاك بانزين اذا انت راعي مشاوير

[بانتيوم فور]

الكبليتر يحتاج تغيير ولا تركب غير الاصلي أنا معاي 98 واحيانا الصباح مبيتات واذا اشتغل دخان اسود ولايريحك في اشتغاله وغيرت الكبيلتر 2800ريال ينطح ريال بس الحقيقه تركية ولله الحمد من التفافه والدخان الاسود
ترا طقم إصلاح والي مهو اصلي مايصلللح ابد