ياأهل الباترول وش أسوي مع الباكم

[سواق الشيخ]

إخواني ملاك الباترول

سيارتي باترول 98 عادي والقير عادي طلعت بعد العشاء أبشتري خبيزات للعيال

وإلا والله الفرامل محجره (فجأه) تدوس ولا ماتدوس

مابه فرامل وأميــل على راعي ورشة حولنا(ابو يمن) شافها وقال تحتاج تغيير باكم

من الوكاله في حدود 1500 ريال ولو رحت لتشليح الحاير يمكن تأخذه

بـــ 500 ريال وللعلم أنا من سكان الرياض

أبي رأيكم وفزعتكم

هل السياره تحتاج للباكم في مثل هذه الحاله؟؟

وهل كلام ابو يمن صحيح؟؟

تكفون لاتخلون أخوكم

[سواق الشيخ]

معقوله 14 ولا واحد فيهم يعرف؟؟
يمكن ليش لأ!!

[قناص خلاوي]

اي نعم اذا حجرت الفرامل الغالب من الباكم
وتقدر تغيره من التشاليح اللي بالصناعية القديمة
انا مغير باكم ياباني لباترول 95 بـ 150 ريال بس وعلى الضمان
او تسوي له إصلاح يمكن يضبط .

[سواق الشيخ]

الله يجزاك خير اخوي قناص


ولكن ياليت توصف لي مكانهم بالضبط أو أسم المحل اللي باعك الباكم وركبه

ولو حبيت على الخاص مرة اخرى جزاك الله خير والله يرحم والديك

وأنتظر المزيد من الأراء أخوكم يبني بيته والريال
ينفعه وأبي مشورتكم

الله يحرم أجسادكم عن النار

[قناص خلاوي]

الله يسلمك اخوي
تركيبي للكاتم قديم طال عمرك من كم سنة
لكن بوصف لك المحل وعل وعسى تلقاه مثل ما كان
تروح لصناعية العويضة من طريق علي بن ابي طالب
وتدخل من عند مسجد العويضة تخليه على يسارك وتلف يمين يصير وجهك غرب
امش لين آخر الشارع اذا وصلت t تحصل المحل بوجهك بالضبط
لو ماحصلت عنده لف مع التي يسار ثم إجباري يمين يجي على يسارك ويمينك كذا تشليح اسألهم وبتحصل عندهم إن شاء الله
ان شاء الله يكون الوصف واضح

[سواق الشيخ]

عزيزي قناص خلاوي ماقصرت أبدا وإن شاء الله أروح

بكره لهم ربي يعطيك العافيه

يا أيها الشقردي

[Inch]

أخوي رح للصناعية تحصل في ناس متخصصين بالباكمات يفحصون لك الباكم

فإذا كان مضبوط فممكن علبة الفرامل . فلا تتخسر افحص أول .

[سواق الشيخ]

فحصت عند أكثر من ورشه في صناعية أم الحمام


ومتفقين على تغيير الباكم


وجدت تشليح قال لي بـ450 ريال وهات القديم وأخصم 50 ريال الحقيقه خفت

أشتريه وأنعدمت ثقتي
وأحذركم أي قطعه تجدها على الرف.أنتبهوا إن لم تشاهدها في السياره وتتأكد وإلا أبعد عن التشليح


وجدت الجديد وكاله بـــ 2400 ريال


وفي السوق صيني وارد مؤسسة التركي بــ 190 ريال


ويقول البائع أعطيك ضمان شهر بعد التركيب


وأنتبهوا بعض المحلات يبيعونها على إنه صناعه تركيه


بينما المورد كما ذكرت مؤسسة التركي أما صناعته فهو صيني


ولم أقرر حتى الأن!!!

[قناص خلاوي]

عزيزي قناص خلاوي ماقصرت أبدا وإن شاء الله أروح

بكره لهم ربي يعطيك العافيه

يا أيها الشقردي




الله يطول عمرك على الطاعة ومن يقرا اخوي
رحت اليوم العصر على حسابك للرجال اللي وصفت لك وسألته
الورشة نفسها موجودة ومتخصص بالباكمات
سألته عن موديل 99 قال عندي سعودي واركب له اصلاح ياباني أصلي
قلت عندي الباكم قال تجيبه اركب له اصلاح ياباني أصلي
حتى وراني الباكم الياباني فيه شحم الوكالة
الشغلة تستغرق ساعة وحده فك الباكم وتركيب الاصلاح
وتكلفك طال عمرك 300 ريال
ويعطيك ضمان شهر ويقول زيادة اسبوع اسبوعين مو مشكلة

الصراحة انا ماكاسرته بالحيل عليك به كسر راسه بالمكاسر
وان رفض ينزل لك على الاقل طول مدة الضمان لشهرين ثلاثة
بالتوفيق اخوي وهذا رقم المحل
مركز البرق للباكمات
عمر / 0503194233

يعلم الله مالي مصلوح ريال بهالشغلة ولا اعرف صاحب المحل معرفة شخصية الا اني جربته قبل كم سنة وأعجبني شغله واستعملت الباكم كم سنة وبعت السيارة وهو ماشي تمام ..

[سواق الشيخ]

الله يجزاك خير أخوي قناص ووالله عذبتك

والله يجعله في موازين حسناتك

أتمنى أعرف جنسية راعي هالورشه لو تكرمت؟؟

[قناص خلاوي]

آمين واياك اخوي
جنسيته يماني