الخويا بالكشته كيف يوزعون المسؤليات وماهي نصيحتك للي يبي فقط يخدمونه خوياه ولا يعاون

[مكرم الضيف]

السلام عليكم ورحمة الله وبركاته
اخواني الاعزاء في مكشات

اظن الموضوع واضح من عنوانه ولكن لاحرج باثارة هذا الموضوع لان الصراحة زينه بعض الاخوان هداهم الله يطلع معك ويجيب المركا ويتكي وما غير:) جيبو لي ودو لي:)

هذا بالاخص كيف نتعامل معه وبماذا ننصحه

وكيف توزع المسؤليات

تحيتي للجميع

[ايقاع المطر]

وعليكم السلام
اشوف ان توزيع المهام كلا حسب خبرته
يعني الي يزبط الشاي والقهوة والي يجمع حطب ويولعه
والي ينزل اغراض الكشته والي ماله خبرة فالطبخ على الاقل يغسل القدور وعدة الطبخ
او يجهز مايستلزم فالطبخ من خضار وغيرهـ حتى لايعرض نفسه للكلام
ومن رأي اني اتركـ الشغله اختياري والشخص الي مايختار شغله يسويها احدد اي شغله يسويها بدون اختيار
الطلعه مافيها احد يخدم احد كلنا يد واحدهـ
وانا اشوف الي يطلع ومايسوي شيء هذا مو حق طلعه دقه بالكلام عشان يحس ويحركـ عضلاته شوي
هذا من واقع تجربه وتحيااتي لكـ يامكرم الضيف

[عبدالله الموسي]

بعض الاخوان هداهم الله يطلع معك ويجيب المركا ويتكي وما غير:) جيبو لي ودو لي:)
اللي مثل هذا ماودك تاخذه معك من الاساس
لأنه يصنف من فئة ثقيلين الدم..
وهذهِ الفئة لاتصلح خوتها لافي مكشات ولا في سفريات
حدهم ضحكة سن وانت بطريقك..
والرجل اللي مايساعد اخوياه في كل صغيرة وكبيرة
هذا ما منه فايد ابداً والمفترض يحجر عليه ولا ينعطى وجه من الاساس
اما نصيحتي له(اقول له استح على وجهك واشتغل مع اخوياك بدل ما انت مسوي فيها شيخ ومتضبط المركا)
اما عن توزيع المسئوليات فهذا يعود الى اعضاء المكشات وتكاتفهم
احيان ليس هناك حاجة لفرض مهام مجدولة بالرحلة بسبب تكاتف اعضائها وترابطهم ومعرفتهم ببعضهم البعض..يعني تقدر يمونون على بعض...وهناك رحلات لابد من توزيع المهام على اعضائها وتعيين امير للرحلة ليكون صاحب القرار لتجنب الازدواجية واختلاف الآرى..

هذا مالدي وارجوا قبوله والسلام ختام!

[s2009]

خله بالبر وامش ولا ادفنه

[النجم الطائر]

حدهم ضحكة سن وانت بطريقك
قود لك

[أزيب الوسم]

نقع كثيرا في مثل هالمشكلة فإما يكون هالشخص صديق جديد فتنغش فيه وتعجبك سوالفه ولكن تنصدم فيه عندما تخاويه أو يكون أحد من أقاربك وهذا طبعا مشكلته مشكله يعني أي خرجة عائلية راح تلاقيه قدامك
.
فالحل بالنسبه للأول :
سهل جدا إما تكرمه إلى أن ينتهي مشواركم ثم ما عاد تخاوية مرة ثانية أو تحرجة بأخلاقك في كل مرة والأخلاق الحلوة تاثر في الحيوان فما بالك بانسان له عقل ومشاعر يعني خل عنك شغل المعاير والتلميح لأنه ماراح يجيب فائدة فهو في النهاية راح يزعل ويهج "وهذه أرجو أن لا تكون نهاية أي عشرة وخويك إذا ما عاد فيه امل في الصحبة خل أخر عهدك به ذكرى جيدة على الأقل" أو يطلع كليييح ويزيدك مغص .

.

النوع الثاني اللي يكون من أقاربك:
فهذا من أول ما تبدأ معه الى أن يقضي الله أمرا كان مفعولا فمالك غير طيبة الأخلاق وقم وافزع معه في كل شئ واصبر عليه وكثر من الصبر لأن الطبايع ما تتغير بيوم وليلة اذا ما نفع معه شئ ولم يتغير اتركه عنك ولا تنسى صلة القرابة اللي بينك وبينه وفي المستقبل بينك وبين عياله وكل انسان مليان عيوب فاعتبر هذا واحد من عيوبه ولاتجعل موضوع مثل هذا يقطع صلتك باقاربك .
.
.
أرجو أن أكون أفدت الجميع وأرجو أن استفيد أيضا من تعليقاتكم وتعقيباتكم

[mr.salih]

الحي يحييك والميت يميتك

[متعب السليمي]

الخوي اللي ترتاح له نفسك
لوانك تؤكله وتشربه
وتكون بهذي مشتري خوته
هذه بالنسبه للخويا
__________
اما اذا كان ماينفع هذا مورجال
ولايعرف خوت الرجال خله عند اعياله احسن له ولك

[مكرم الضيف]

شكرا للجميع على الردود كلا باسمه

لكن

انا اشوف انه يكون فيه حزم وقائد للرحلة غالبا يكون الاكبر سنا بالمجموعة. وهو يعطي التوجيهات وليست الاوامر. لان الناس اليوم ماتتحمل نداريهم مداراه وسهل انهم يتفرقون لكن صعب نلمهم مرة اخرى
والكلمة الطيبه والوناسه وعدم التجريح ودمح الزله ان حصل شئ من هذا. يجعل للرحلة طعم خاص وتلقى الناس يدورونكم ويبغون خوتكم

[نجم000الشمال]

تقصد ضيف الشرف ، المشكله احيانا يصيرون ضيوف شرف ماهو واحد بس لكن اتجمل واصبر علشان لا اعكر الجو العام للطلعة . خصوصا لاصار علة بطن ما منه فكة
يشوفك تشتغل وتكرف وهو ماسك المركى سوالف وتنقد :mad: ويشره لو درى انكم طلعتو وما عزمتوه !

شف الي ما يستحي وينقد نفسه ... مافيه طب !

[عساس المطر]

موضوع جميل وشيق :good2: ,,,


الترتيب والتعاون مطلب اساسي لنجاح الرحلة او الكشتة ,,,


انا عادة معاااي قروووب ( شلة ) لي تقريبا 8 سنوات ما نطلع الا سوا ...


عددنا خمسة وممنوع منعا باتا استضافة اي شخص ,,,


لانه بصراحة لدغنا مرات كثيرة من ضيوف الشرف ليته بس ما يشتغل لا وبعد


مايقط ,,,


ولله الحمد اصبحت المهام تتوزع اوتماتيكي على الجميع ,,,


كل واحد عارف ويش يجيب ويش يسوي في الطلعة ,,,


ولله الحمد جميع رحلاتنا ناجحة بجميع المقاييس العالمية الحديثة ,,,

[مكرم الضيف]

شكرا لكم ثم ان هناك اضافة بسيطة وهي ان بعض الشباب ربما يكون لديه بعض الخجل خاصة اذا كان اصحاب الكشته مايعرفهم ولايعرفونه واول مرة يطلع معهم.فيجب ان نلتمس لهم العذر الى ان يتعرفوا ونحاول ان نجذبهم معنا للحديث والمشاركات الرياضيه مثل لعب كرة القدم او الطائرة ونحوه.
وشكرا لكم مرة اخرى

[wrs3975]

نقع كثيرا في مثل هالمشكلة فإما يكون هالشخص صديق جديد فتنغش فيه وتعجبك سوالفه ولكن تنصدم فيه عندما تخاويه أو يكون أحد من أقاربك وهذا طبعا مشكلته مشكله يعني أي خرجة عائلية راح تلاقيه قدامك


.
فالحل بالنسبه للأول :
سهل جدا إما تكرمه إلى أن ينتهي مشواركم ثم ما عاد تخاوية مرة ثانية أو تحرجة بأخلاقك في كل مرة والأخلاق الحلوة تاثر في الحيوان فما بالك بانسان له عقل ومشاعر يعني خل عنك شغل المعاير والتلميح لأنه ماراح يجيب فائدة فهو في النهاية راح يزعل ويهج "وهذه أرجو أن لا تكون نهاية أي عشرة وخويك إذا ما عاد فيه امل في الصحبة خل أخر عهدك به ذكرى جيدة على الأقل" أو يطلع كليييح ويزيدك مغص .


.


النوع الثاني اللي يكون من أقاربك:
فهذا من أول ما تبدأ معه الى أن يقضي الله أمرا كان مفعولا فمالك غير طيبة الأخلاق وقم وافزع معه في كل شئ واصبر عليه وكثر من الصبر لأن الطبايع ما تتغير بيوم وليلة اذا ما نفع معه شئ ولم يتغير اتركه عنك ولا تنسى صلة القرابة اللي بينك وبينه وفي المستقبل بينك وبين عياله وكل انسان مليان عيوب فاعتبر هذا واحد من عيوبه ولاتجعل موضوع مثل هذا يقطع صلتك باقاربك .
.
.

أرجو أن أكون أفدت الجميع وأرجو أن استفيد أيضا من تعليقاتكم وتعقيباتكم


كلام جميل ورائع بارك الله فيك أخوي الغالي أزيب الوسم :good2:..... والشكر موصول لصاحب الموضوع :good:

[قناص الحاير]

حسب الخوه والكبر في السن


يمكن الى معاك شيبان لزم يكون كل شي عليك يالصغير او على حسب المعرفه البعض ازهله عن القهواه والشاهي والبعض عن المطبخ وعدته


والبعض ازهله عند السوالف وسعت الصدر وتجهيز المكان


ولزم الواحد في الرحلات يكون حفيف نفس وذرب