وش مشكلة رجة المكينة

[mrsaal999]

السلام عليكم ورحمة الله وبركاته

اخواني المكشاتية صبحكم / مساكم الله بالخير ،،،

عند مشكلة وان شاء الله انها بسيطة


( نوع السيارة )

السيارة فورد موديل 95 <<<< مشاكلها كثيرة بس حليلة



السالفة يالربع قبل امس غسلت المكينة

ديزل + صابون + ماء + نفخ بلي الهوى = رجة في المكينة :D <<< كانها طلعت معادلة

الشاهد عقب ما غسلت السيارة بستم صارت المكينة ترجف ، واذا دعست عليها تروح الرجفة بس العزم احس انه ضعيف ، واذا عشق القير على نمرة وريحت السيارة صارت تقطع ، وللمعلومية البواجي غيرتها قبل تقريبا شهر واسلاك البوجي قبل سنة والله اعلم .


السؤال هل الكويلات اذا دخلها ماء ولا ديزل تخرب ؟ ﻷني والله اني شاك فيهن .


وقلت ياولد اصبر يمكن داخلهن ماء ولا ديزل خله ينشف ، بس صارلي يومين والسيارة على الحالة ، مدري وش السوات هل اغير الكويلات ولا وش الدبرة ياجماعة .


ياليت الي عندة علم ولا مرت عليه مثل هالمواضيع يفيدنا الله يجزاكم خير ،،

[محمد العوني]

اكيد بواجي او كيولات شيك عليها وبالتوفيق

[الهاجر 7002]

آخوي آنآ معي فورد آول..::/ كآنت تقطع من آمطآر..وذبحتني بآلتقطيع

رحت لورشهـ متخصص بآلآمريكي وقآل كويلآت وغيرت آلكويلآت وضبط آلموتر

[المهند9]

تأكد خوي من كراسي المكينه انها سليمه

وكذلك الذي ذكروه الأخوان

[تــــوني]

الكويلات فيها موية

شف اي طريقة جففها ( فوطه مناديل هوا اي شي ) وما تحتاج تغيير

[تشيتا]

اكيد الكويلات وانا اخوك, ولكن انصحك روح ورشة عندة كمبوتر
وخلة يشبكة عندك في الفورد, ويطلع لك اي الكويلات معطوب
لو بتغيرها كلها تكلفك بشغل اليد حول الالفين
انا مثلك غسلت المكينة وضربت ثلاجة المكينة والكويلات
وكلفتني 4500 ريال ومن الورشة على المعرض
وسلامتك.

[محب الودق]

ياخوووي شيييك على غطاء الكويلات .. يمكن الغطاء فيه تشعيير او الشاكووس مصدي من المووويه ...

كان تبي النصيحه اول شي شووف الكويلات والغطأ يمكن منه او البخاخات يمكن فيها واحد مسدووود ويسبب رجه بالمكينه...

والله يعيييينك ,, وان شاء الله تسااهيل ...

[mrsaal999]

محمد العوني
=====
الهاجر 7002
=====
المهند9
=====
تــــوني
=====
تشيتا
=====
محب الودق


*************


يعطيكم العافية ياجماعة وشاكر لمروركم




**************************


الحمد لله ، انحلت المشكلة ،، لكن خلوني اول اعلمكم وش صار معي


انا قبل شهر تقريبا غيرت بواجي ،، جديدة وركبتها بنفسي ، الشاهد عقب ماغسلت السيارة صار الى صار ،، اليوم بعد صلاة العشاء قلت خلني افك البواجي وانظفهن ،، يمكن جايهن شيء ،، فكيت البواجي ،، فيه اثنين من البواجي ،، يربصون من الزيت ،، تقول حاطهم في وسط كاس مليان زيت ومطلعهم ،، واكثر من ذالك انه القزوز الي طالع من السرندل الخاص بأحد البواجي فيه تهريب زيت مدري وشهوا منه ،، المهم نقزت للصناعية واخذت بواجي جديده وركبتها والحمد لله الموتر ضبط ،، اول ما شغلت السيارة ، الله ليوريكم شوفوا الدخنة الى تطلع من المكينة ،،


لكن عندي سؤال / وش جاب الزيت لم البواجي وهل له ضرر ( يعني المكينة خلاص تبي تودع ) وهل لها طريقة تصليح ؟؟


وفيه ملاحظة ( لحست مخي ) اول مبدت معي مشكلة التقطيع والرجفة في السيارة ، المكيف لا شغلته في الظهر يبرد مدة نصف دقيقة بعدين يفصل ويسخن لمدة 4 دقايق تقريبا ويرجع يشبك نصف دقيقة ..... وهكذا .


عاد قلت يمكن فريون ناقص ، ولا حساس ولا يمكن من القسام لأن المكيف اكتروني وقريت في احد المنتديات ان الفوردات الي مكيفاتها اكترونية ، يعلق ويخرب بسرعة ويبدء المكيف يفصل ويشبك على كيفة ،، المهم عقبل ما غيرت البواجي وصفى الموتر ، رجع المكيف زي اول لا يفصل ولا شيء شغال زي الحلاوة .


هل للصفاوة الموتر علاقة بالمكيف ؟؟؟


هذي خلاصة تجربتي مع هذا العطل . وان شاء الله محد يمر بلي مريت عليه .


والسلام عليكم ورحمة الله وبركاته ،،،

[صاروخ الغطغط]

مسها خط خلها تحرق البواجي جايها ماء اوغيرها زود معلومه من الزملاء

[نعيم الغانمي]

مشكووور الله بجزاك خير