وصف طريق الرياض // عرعر مختصـر ..

[الحمش1]

بســــم الله الرحـمن الرحــــيم ..


السلام عليـــكم يامكشاتيه ..


انا ان شاء الله بمشي من الرياض لعرعر .. وانا دايم امشي مع الرياض بريده حائل الجوف عرعر وابي منكم طريق مختصر الي هو من بريده لتربه حائل ..


ابي اسأل اذا وصلت للقصيم بريده من وين اطلع لتربه حائل .. وابي خط الرحله من تربه حائل للعويقيله ..


تحـيتي ../

[انسانه؟]

ان شاء الله يرشدونك الأخوان اللي عندهم خلفيه ,,

[ابويزن2010]

والله ياخوي ماعرفه ولا رحت عرعر بحياتي ... بس حبيت ادعيلك
ان الله يسهل طريقك ويجعلها سفر وقمر بوجهك يابعد حيي ,,

اللهم احفظه في حله وترحاله اللهم في هذا اليوم الفضيل أن تعيده لأهله سالما غانما اللهم حقق مراده وتقبل سعيه واجعل التوفيق حليفه ولا تخيب له رجاء يا احكم الحاكمين

[كهلان]

فيه طريق بعد القصيم وقيبل حايل ب60 كيلو يجيك مفرق على اليمين يروح تربه
اطلع معه وعندما تصل الي تربه فيه طريقين :
الاول تربه .. لينه .. رفحاء .. العويقيله .. عرعر
الثاني تربه .. جبله .. الحيانيه .. اليديه .. العويقيله ..عرعر
وللمعلوميه من تفرق من طريق القصيم طريق واحد رايح جاي ماهو سريع
ويصلح ايام الربيع او اذا كان معك خويا بسياره ثانيه
والله يستر عليك وييسر أمرك

[التاج الشمالي]

اخوي الحمش
نقولك من الحين ان شاءالله تاصل بالسلامة .


اقرب طريق مختصر من الرياض لعرعر .
القصيم -الاجفر-الشعيبات -تربة -جبلة - العويقيلة- عرعر-
الوصف سهل بالواقع غير الكلام

اذا وصلت القصيم تطلع على ((طريق حايل القديم ))مسار واحد

تمشي بعد شري مسافة تقريبا 60 /كم يجيك مفرق الاجفر على اليمين تروح للاجفر بعد الاجفر بـ10/كم بالظبط
يجيك مفرق على اليسار وفيه لوحة مكتوب فيها
(بقعاء تربة ) تروح معها مسافة 60 /كم بالظبط يجيك حرف تي t تروح يمين ناحية تربة 50/كم بالظبط
اذا وصلت تربة لازم(( تعبي بنزين )) اول دوار تروح على طول قدام ثاني دوار خذ يسار معه باتجاه جبلة والحيانية ودربك خضر انشاءالله بحدود 300 /كم راح يلتقي الطريق مع الطريق الدولي بالظبط على هجرة (( ابن عايش )) شرق العويقيلة 10 /كم والباقي معروف .

اتمنى اني وصفي واضح


وتاصل ان شاءالله بالسلامة

[aassz]

الله يسهل امورك ...
بس سؤال طال عمرك بطاعة الرحمن..
انت لازم تمر بطريقك على بريدة او لا ؟

لاني انا من اهل عرعر .. ورايح جاي للرياض من ايام الدراسة .. فأقرب طريق من عرعر الرياض او العكس هو كالتالي تطلع من الرياض على طريق القصيم السريع .. لين تجي المجمعة بحفظ الله ثم تطلع من المجمعة الين حفر الباطن ثم يسار الى رفحاء ثم عرعر وبحفظ الله ... ثم تكلمني اجهز لك الخروف.

مع العلم ان هذا الطريق يختصر لك اكثر من 350كيلو من طريقك السابق عن طريق الجوف (الممل)
بعدين طريق سريع رايح جاي وكله محطات وعلوم سنعه...

ان شاء الله اكون قدمت لك شي مفيد مع احترامي للجميع..

تحياتي

[صقر البحيرات]

ايد كلام اخوي aassz


( الرياض .. طريق القصيم .. مخرج المجمعه ( المجمعه) .. الارطاوية .. ام الجماجم .. او رقيبه .. حفر الباطن ـ رفحاء ـ عرعر )) طريق سيدين ( فيه كم تحويله دون رفحا ) بس طريق زين

والمسافه بين عرعر والرياض ( لا تصل إلى 1000 كلم ) 950 ـ 980 كلم ( لاأعلم بالضبط)

توصل إن شاء الله بالسلامه

ولا تنسى دعاء السفر .. والخوي إن أمكن

وتوكل على الله

(( عليك بهذا الدعاء قبل أن تسافر ..(( بسم الله .. توكلت على الله .. ولا حول ولا قوة إلا بالله ))

في أمان الله

[الحمش1]

مشكورين ..


يمال العافيه ع تعاونكــم ..



انا لازم امر ع القصيم .. وبعدين ابمشي لعرعر ..

طريق حائل القديم من وين اطلع له من بريده باي اتجاه ابي وصف لاهنتم ..

[العاذر]

نريد تحديث للوصف
لان الموضوع من 2011
من يفيدنا

[ريف النشاما]

لاجديد يذكر ولا شي يعاد

نفس الطرق التي ذكرها الاخوان

[العاذر]

يعطيك العافية
لكن فيه مفرق مع سامودة
هل ينصح به

[wail2]

اخواني الكرام
السلام عليكم ورحمة الله وبركاته
اخوكم من الشمال ووصف الخط الأفضل المسافة من عرعر إلى الرياض 1070 كم تقريباً

عرعر- العويقيلة- رفحاء- الشعبة- حفر الباطن- ام الجماجم- الارطاوية- المجمعة- الرياض
الخط سريع مسارين الخط متوفر به المحطات
هذا الأفضل

[العاذر]

كفو
وبيض الله وجهك

[hsht]

مرحبا .. هل افضل طريق من الرياض الى طريف هو نفس الطريق من الرياض الى عرعر ثم اسلك طريق عرعر طريف؟؟
والغريب ان هذا الطريق غير موجود في خرائط القوقل!!

[][][زلفاوي][][]

مرحبا .. هل افضل طريق من الرياض الى طريف هو نفس الطريق من الرياض الى عرعر ثم اسلك طريق عرعر طريف؟؟
والغريب ان هذا الطريق غير موجود في خرائط القوقل!!

حياك الله اخي الكريم

نعم من عرعر الى طريف على خبري طريق واحد يمر بحزم الجلاميد

المسار من الرياض - المجمعة - تلف يمين من الشارع الرئيسي باتجاه الارطاوية- وقبل الحفر يمكن بـ 70كلم تجيك محطة البطيحانية على اليسار افرق دونها يسار- والطريق يمر بديار واجد منها ساموده ورغوة ولينه وصولا الى رفحاء (ميزة هالطريق يختصر لك شوي)- و مع خط التابلاين مرورا بديره ابن شريم وطلعة التمياط الى عرعر - وبعد كذا مرورا بحزم الجلاميد واخيرا طريف :f

والله يحفظنا واياكم

[hsht]

[][زلفاوي][][;10403503']حياك الله اخي الكريم

نعم من عرعر الى طريف على خبري طريق واحد يمر بحزم الجلاميد

المسار من الرياض - المجمعة - تلف يمين من الشارع الرئيسي باتجاه الارطاوية- وقبل الحفر يمكن بـ 70كلم تجيك محطة البطيحانية على اليسار افرق دونها يسار- والطريق يمر بديار واجد منها ساموده ورغوة ولينه وصولا الى رفحاء (ميزة هالطريق يختصر لك شوي)- و مع خط التابلاين مرورا بديره ابن شريم وطلعة التمياط الى عرعر - وبعد كذا مرورا بحزم الجلاميد واخيرا طريف :f

والله يحفظنا واياكم

اخي زلفاوي كم يختصر هذا الطريق عن طريق الجوف؟

[][][زلفاوي][][]

اخي زلفاوي كم يختصر هذا الطريق عن طريق الجوف؟

حياك الله اخي الكريم

http://www.mekshat.com/pix/upload06/images/2015/02/mk280_987.jpg

مثل ما تشوف فرق المسافات بين المسارات

والمظلل باللون الاحمر هذا هو الاختصار من عند محطة البطيحانية او البطيحان وتقريبا يختصر ما بين 70 الى 90 كلم لم احسبها بالضبط عن اكمال الطريق الى الحفر ثم مواصلة السير الى رفحاء قبل ما يقارب الـ 3 أسابيع كان رحلتي الى طريف مرورا بالاختصار والعودة كانت عن طريق الجوف وحائل ونصحني من هم اعلم مني من الزملاء :) باكمال الطريق مع الاختصار اما العودة فكانت عن طريق حائل وذلك لوجود متسع من الوقت

وهذا والله اعلم،،

[hsht]

شكرا اخي الكريم