سؤال عن قارمن الفزعة يا أهلها

[ذيب الصحرا]

بسم الله الرحمن الرحيم
السلام عليكم ورحمة الله وبركاته

شباب حاب أشأل وش جهاز الجارمن الكويس وسعره معقول مايتعدى ال 1500 ل 1700 تققريبا نصيحتكم تكفون

[الجارمن]

اذا كنت تبي جهاز مضمون في البر وممتاز ومريح للاستدلال على الاماكن البرية
زود فلوسك شوي وخذ لك 276C النسخة الانجليزية
تراه سعره بدون الشريحة 2100 ريال وطبعا تحتاج إلى شريحة سعة 32 ميجا لتخزين خرائط الصحراء وسعرها مع التحميل 400 ريال يعني المبلغ كله 2500 ريال تقريبا
اذا كنت راعي طلعات كثيرة إلى مناطق الصمان والنفود ومناطف رملية بعيدة عن العمران
تراه هذا المبلغ مهوب حسوفه على هذا الجهاز
الجهاز اكثر من رائع............. اسأل مجرب

[ذيب الصحرا]

واللي مايقدر يزود فلوسه وش يسوي

[طخيمان]

أنا عندي جهاز حلو مررررررة اللي هو street pilot lll وملون وتقدر تدرج عليه خرائط الصحراء و تراه انجليزي ومعه ميموري 128 ميغابايت مخزن عليها خرائط المملكة التفصيلية وخرائط أوروبا وتراه جهاز حلو مررره وودي أبيعه .(وترا عليه ظمان من دار موجه)
وسبب أن ودي أبيعه : انه نزل جهاز 276 العربي وقيمته 2650 والوالد ناوي يشتريه وقال لي بع الجهاز اللي معك .
ان كان لك نظر تراني جاهز للبيع (واسأل عن الجهاز وشف اللي يريحك).
وما راح نختلف على السعر ولالك اللا اللي يرضيك.وان كان ودك تشوفه وتجربه ماعندي مانع.

[ذيب الصحرا]

ابو الطواري ماقصرت ومشكور بس انا رجال معلوماتي 0 بالجارمن ومحد عطاني علم غير الجارمن الله يسلمه وين باقي الجماعه شكلهم كاشتين

[دبارة]

لايفوتك ماجلان جي بي سي 320 سعرة رخيص ويافي بالغرض وبعدين وشلك ووش للخرائط والتلوين يعني خلك من الحكي الفاضي انت تبي شي يمسك يدك ويوديك الي اي مكان تبية عليك 320ماجلان انجليزي به بعض العيوب لاكن مقدور عليها وسعرة لا يتجاوز تسعمائة ريال من الرمياة شارية لي اكثر من ثلاث اسنين ووين ماقلتلة ودن ودان ونسبة الخطا فية ماتعدا واحد متر لاوبعد معة قاعدة وسلك تقدر تحمل عليه احداثيات من الكمبيوتر واذا واجهك اي مشكلة فية علمني واحلهالك وانت في بيتك فقط ارسل رسالة ماودي احط رقمي اخاف المشرفين يزعلون علي وانا توي مشترك بالموقع واخاف يمصعون اشتراكي او يحرمونن من مطالعة افضل موقع عالمي ادمنت علي شوفتة الله يجازي من سوي هذا الموقع كل خير اخوك دبارة الـــــــــــــــــــــــــرس

[طخيمان]

لكن يا دبارة مافيه أحد يستخدم الماجلان كل الناس يستخدمون القارمن يعني اذا بغيت تصلح الماجلان ماتلقى أحد يصلحة لكن القارمن يفرحون فيه فرحة ، وبالنسبة للخرائط والتلوين أحسن مافي القارمن الخرائط والتلوين وبالنسبة للخرائط تقدر بدون ماتدخل الاحاثية تروح للمكان اللي تبيه وبعدين تقدر تطلب موقع أقرب محطة عندك أو برج جوال أو مستشفى أو أي شيء تبيه وبعدين يخدمك حتى في المدن لو سافرت يعني مثلا سافرت للامارات تحمل خريطة الامارات ويجيب لك كل شيء فيها و بعدين شف اللي يشترون أجهزة الملاحة تلقى 99% يشترون جارمن و1% يشترون ماجلان وبصراحة أنا عندي مافيه مقارنة بين الجارمن والماجلان الجارمن أفضل وبكثيير وبعدين شف محلات الأجهزة دائم تلقى عندهم جارمن وماتلقى ماجلان وعندهم برامج للقارمن وما عندهم برامج للماجلان .

[طخيمان]

والله يالغالي الغالب في اللي يشترون أجهزة الملاحة انهم ياخذون قارمن وبعدين أحلى مافي القارمن انهتقدر تحمل عليه خرائط يعني بدون ماتدخل الاحداثية تقدر تتوجه للمكان اللي تبيه ويبين لك الدروب المعروفة والفياض والنفود والشعبان والجبال والدحول ومحطات البنزين والمستشفيات والمدن والقرى وغيرها الكثير يعني لوماكان عندك خرائط محملة على الجهاز ماتدري حولك فيضة ولا لا أوحولك محطة ولالا يعني أي موقع تبيه لازم تدخل احداثيته ولاماتدري عنه وبعدين فيه ميزة البحث يعني اذا بغيت أقرب محطة للبنزين تظغط على زر البحث ويطلع لك المحطات اللي حولك كلها من الاقرب الى الابعد وبعدين القارمن تلقاه في كل مكان يبيع أجهزة وكلهك يصلحونه أما الماجلان ما تلقاه لا ينباع ولا يصلح اللا في محلات محددة مثل الرماية وفي رأيي ان مافيه مقارنه أبد بين القارمن والماجلان.

[ذيب الصحرا]

الله يعطيكم العافية جميعا ومشكوريين
لو كان قل المادة رجلا لقتلته
لكن السواة سواة رب العالمين والله يدبرها

[طخيمان]

ياذيب الصحرا ترا القارمن حقي للبيع وانا ناوي أبعه بشكل جدي مهوب مزح وان كان لك نظر ماراح نختلف في السعر يالذيب ...
(ناوي أشتري الجديد العربي)...
راسلني على الخاص...

[مزاجي]

يابو الطواري وينك لاقيه 2650 علمني