هل ضروري اغير جميع قطع الغيار بالسيارة اتمنى الأفادة ..

[axa]

السلام عليكم ورحمة الله وبركاتة..

وديت سيارتي لكزس اي اس 300 موديل 2002 لم ورشة القرعاوي في عنيزه تخصص ياباني قلت له افحصها فحص كامل وشيك عليها المهم فحصها وعطاني اشياء احس بعض مومهم المهم قال ابي واحد صوفه مكينه خلفي وثنين صوفه عكس وثنين صوفه قير قدام واحد معجون تويوتا وثنين ذراع يمين ويسار قدام داخل اسمه مسنيه وثنين سير مكينه وثنين فلتر قير رغم اني مغيره من فتره وثنين جلده مقص وثنين جلدة متواصل قدام واربعه مساعدي وسته بواجي واحد فلتر بنزين وثنين وجه قطع بلوف اتمنى منكم الأفاده هل الاشياء هذي اكثرها ضروريه المهم يقول شغل ايده بس 3000ريال غير اسعار القطع اللي راح اشتريها غير انه الحراره قال ماصلحها رغم انه اهم شي عندي الحراره وشكرا لكم ...

[كاشت وحداني]

طيب مر ورشه ثانيه وثالثه ورابعه وشوف
لا تصدق اول واحد
خوفي نص القطع يبيعها لزبون ثاني
واهم شئ عالج مشكلة الحراره حاليا ثم اذا ضبطت صلح الباقي
لان لو صلحت هالاشياء كلها وبقيت الحراره ما استفدت من الموتر .
موفق والله ييسر امرك

[يعنني مهندس]

وعليكم السلام ورحمة الله وبركاته
اشتري سياره افضلك
لانه طالب قطع كثير وشغل يده 3000 ريال ممكن راح توصل 6000 ريال مع القطع
اذا مافيها تهريب واصوات لاتشتري هذي القطع لان اغلب القطع مسئوله على التهريب والاصوات اسفل السياره
واسباب ارتفاع الحراره
هي
1-غطاء الراديتر شيك عليه
2- شيك على الراديتر اذا فيه ثقب او انسداد
3- وجود قثب في الطبات راح تشوف صدى على الطبات اذا كان في ثقب
4- شد السيور اذا كانت مرخيه
5- الزيت ماينقص
6- والاهم لما ترتفع الحراره ضع يدك على اللي الي خارج من الديتر الى الميكنه والعكس
وحس اذا في فرق تلاقي واحد ساخن والثاني عادي اعرف ان البلف قافل غيره

[مركز حراره]

متى يحتمي موترك اذامشيت بسرعه او اذا وقفت؟

[الصارم7]

بقول لك شي وبتدعيلي بأذن الله

اول شي اللكزس مواتر والله واغلب القطع اللي قال لك عليها ماتحتاج تتغير وسعره مبالغ فيه مليون مررره

ركز معي شوي اغلب مراكز الصيانة اسعارهم غالية ويغيرون شغلات مو المفروض تتغير بس من باب شي اسمه صيانة !!!

انت روح ورشة ثانية وشوف اللي لازم يتغير زي الصوف اذا فيه تهريب زيت مثل صوفة المكينة او القير هذه لازم تتغير الاذرعة اذا لازم تتغير غيرها المساعدات وانتي بنفسك تقدر تحكم على السيارة بعد ماتزل على الحفرة وتشوف سيارتك (غير الشي العطلان فقط )

وربي من حب الخير لك وللجميع لا يضحكون علينا هالاجانب والله اغلبهم جاي يلهط فلوس ويمشي ماهمه غير الفلوس

معلومة جدا جدا جدا بتفيييدك ترى اللكزس اللي عندك فيه قطع تركب له 100% والسيارة المناسبة كامري قراندي واحد من الشباب مغير مساعدات كامري قراندي على لكزس 2002 اي اس 300 والله نفس المساعدات اللهم السعر يفرق سعر اللكزس اغلى مع انها نفس المساعدات حبيبي طولت على في الكلام عموما زي ماقلت لك شوف القطعة المناسبة وغيرها وفكها وقارنا بقطع كامري قراندي اذا نفسها توكل على الله وركبها ترى مافيه فرق ولا تغير الا الشي الضروري واكرر انتبه من الورش والله اغلهم نصابين حسبي الله عليهم

لاتنسانا من دعواتك