سالفه صارت في مركز شرطة الروضه

[القناص-sniper]

السلام عليكم ورحمة الله

اسعد الله وقاتكم بكل خير

اليوم صارت لي سالفه ما كانت لا على البال ولا على الخاطر لكن الحمدلله على قضاء الله وقدره


الموضوع باختصار طلعت اليوم من البيت المغرب واخذت سيارتي ورحت مشوار وانا عندي سيارتين وسيارتي الثانية اكسنت كانت واقفه قدام سيارتي الي طلعت فيها وكل شي طبيعي اللوحات كانت فيه المهم رجعت الساعه 12 بالليل وانتبهت للوحه الخلفيه للاكسنت مش موجوده رحت للوحه الاماميه ولقيتها مش موجوده تعرف لحضة اليأس مع ذهول واحباط وكل كلمة تحطيم انا حسيت فيها لحضتها مع انها مو اول مره تنسرق لوحة سيارتي انسرقت لوحات سيارتي الي رحت عليها مشوار قبل كذا وياني تمرمطت مرمطه المهم طلعت لشرطة الروضه كأجراء احترازي اقدم بلاغ عاجل بسرقة اللوحات واكنت الاستمارة والهويه معاي ولما وصلت استقبلني فرد عند الباب سلمت وانا شاطف قالي تعال تعال وين يالحبيب ، قلت ابي اقدم بلاغ لوحات سيارتي انسرقت قال اقر الورقه اللي على القزاز قبل ما تخش، فلما قريت الورقه انصدمت من المكتوب وهي كالتالي :
1- خطاب مصدق من مركز المعلومات برقم اللوحه .
2- صورة من عقد الاجار او فاتورة الكهرباء واذا كان السكن ملك صورة من فاتورة الكهرباء.
3- صورة من استمارة السيارة.
4- صورة من بطاقة الاحوال.

يعني على بال ماجمع الطلبات امدى السارق وصل باللوحات طهران ولا اسطنبول وانا القط في الاوراق علشان اقدم بلاغ
جلست اتامل المكتوب وبعدين طلعت ورقة صغيرة وقلم وبديت اكتب الشروط جاني عسكري وقالي خير، هو قالها ولا ما قالها واطير فيه بس باسلوب قلت ياخي الي يشوفني اكتب هالشروط يقول جاي يقدم على وظيفة والدعوة كلها بلاغ واخلاء مسؤولية الحين منوين اروح اجيب خطاب من مركز المعلومات الساعه 12:30 واليوم خميس وبكره جمعه يعني يمكن يوم السبت الصباح وانا رايح اجيب الطلبات والا والدورية تطابقني ويقولون تعال مطلوب في خطف ولا مخدرات ولا ارهاب ولا بلوه، الكلام هذا كله اقوله والعسكري يطالع فينين وعينه تقول ليتني ما سألته وشلي به، بس الرجال طلع اجودي قال وين ساكن قلت جمبكم قال جب صورة فاتورة كهرباء وتعال وتتيسر امروك وارجع للبيت واجيب فاتورة والطلع لهم وادخل واقدم الاوراق الهوية والاستمارة وصورة فاتورة الكهرباء ويكتب لي الرجال تعميم بحث عن لوحه ويرسل صورة منها لمدري وين الضاهر البحث واعطاني صورة قال راجع بها مركز الملعومات الي بالروضه او بالناصريه علشان اللوحات قلت خير شكرت الرجال ومسكت الباب ويا معين الصابرين.

الي غابني في الموضوع كلها اللوحات انسرقت في وقت الشارع كله حركه ولسا الناس ما نامت وش قلوبهم ذولا (( اذا امنت العقاب *** اسأت الأدب ))

حبيت اكتب هالموضوع علشان يكون عندكم درايه فيما لا قدر الله وانسرقت على احدكم لوحاته يكون عنده شوية معلومات ويمكن تزيد الشروط مع مرور الوقت

تحياتي للجميع والله لايريكم مكروه

[حديب الضميان]

الله يعوض عليك خير
وجعل يدينه الكسر لانه ناوي بها شر لامحالة
الله يجزاك خير ويرحم والديك عن النار

[المرواني1]

الله يعوضك خير وانا اخوك ....
ويبدلك في ما اصابك خيرا في نفسك
وفي اهلك... ويعوضك في مالك.

[الحصان 1]

لاحول ولاقوة الابالله

[خيال السفاري]

الله يستر ..

و الله ما حنا بعيدين عن شرطة الروضة ..

سيارة أخوي فورد كسروا قزازتها مرتين علشان يسرقون الاستبنة .. و مرة سرقوا مسجل السيارة .

اما شروط الشرطة .. فهذا من زود الآمان عندنا .. الله لا يحدنا عليهم هم و شروطهم ..

و ليتك تصور الشروط و ترسلها للسبق أو الوئام ..

[نواف العز]

اللة يعينك

[بر الوالدين]

شروط و تعقيد و فلفسه و تمطيل و و و و

و بالأخير قال العسكري ( جب فاتورة الكهرباء ) فقط

طيب ليه كل هالطلبات و التعقيدات

أهم ما في الموضوع ( رقم اللوحة و الإستمارة و وقت السرقة المتوقع و قت تقديم البلاغ )

و إنتهى

[أطلال نجد]

نفس الحركة صارت مع أخوي على سيارته الثانية لومينا

سُرقت اللوحة الأمامية من سنتين وإلى يومك السيارة بدون لوحة بسبب الإجراءات المعقدة !

لكن أنا لاحظت شيء في الموضوع

لاحظت أن السارق يركز على لوحات السيارات المهملة أو التي تقف بالأيام حتى وهي أمام منازل أصحابها

لذلك أحرص على سيارتك الثانية إذا ما كنت تستعملها بشكل يومي وحاول تدخلها في البيت أو تشوف لها مكان آمن .

الله يعينا وياك وكل مسلم .

[فارس الديار]

اخوي الله يعينك ويحفظ والجميع
وبا قي برناااامج سااااهر :( ان كان الي سرقها ارتكب له كم مخااااالفة :(:(:(:( بيقلولك سدد ومن ثم راجعنا :(:(:( الله يهونها على المسلمين ياااااااارب العالمين

[سليمان الربيعان]

حسبي الله على من حط النظام
هذا اسمه مساعده السارق على السرقه اجل فاتوره كهرب وش دخله بالسرقه والي جاي من منطقه ثانيه لازم يجيب فاتوره الكهرب
الله يستر لا يقولون جب دفتر العايله او صك البيت هههههههههه
وساهر وما ادراك ما ساهر

[ابن الاصيل]

الله يعين صارت كل ماله تعقد الامور

[دكتور/مجنون]

لاحول ولا قوة الا بالله

[gomr-15]

الله يسهل امورك ان شاء الله

[رسيس نجد]

الله يكفين شر من فيه شر 0 حسنا الله ونعم الوكيل 0

[عتيبي 511]

اخوي ازين شيء تبلغ بدون ماتجي وتربشهم ويجونكم وتسوي زحمه واذا جو كتبوا كل شيء ومايحتاج تروح لهم

اهم شيء حاول انك تسوي زحمه بشكل رسمي ههههههههههه يعني افهمها

[قناص الوسطى]

طيب ليش التعقيد وش دخل فاتوره الكهربا او عقد الايجار (لاحول ولا قوةالاباالله)

[سامر عبدالله]

مسخرررررررررررة للمواطن

[abo_hoor]

الله يكون بعونك اخوي
مفروض من مخفر انه مايحط هالشروط
لانك جاي تقدم بلاغ وتثبت حاله اخوي ان لوحة سيارة مسروقه
مفروض يتم قبول انك تقدم بلاغ
والله يعينك على هالشروط الصعبه ومعقده واللي اعتقد مالها شغل
الله يسهل امرك اخوي

[انسانه؟]

لاحول ولاقوة الابالله
الله يعوضك خيروربي ييسر امرك.,,
وحسبي الله على هالحراميه جعل ايدهم القطع .,,
الله يعينك .

[سي سي]

الله يعوضك خير

[storm way]

والله غريبه التعقيد

وش دخل البيت وفاتوره الكهرباء

في سرقة لوحة سياره

هنا تكمن مشكلة الدوائر الحكوميه

اذا ما يعقدونك ما يرتحون

[ماجد الحايلي]

السلام عليكم
القناص اخبارك عساك طيب
قريت موضوعك قبل فترة وقلت
في نفسي الله يعينه
واليوم صار لي مثل ماصار لك
وحالتي حالة وركض من قسم
الى قسم وتزوير عقد ايجار ماهو تزوير بمعني تزوير لكن وهمي
وكل من سالت العسكر ان لوحتي ضايعه اشوف بعيونهم
( ايه علشان ساهر اكيد مخفيها )
وهي اللوحة الخلفية
الشاهد الله يعيننا وياك
ويرد لك لوحتك ولوحتي
ويفكنا منهم

[الخيمة والذرا]

ما شفت شي ....ولله ياسالفةٍ عندي انها تغبن من جد


الجهل وعدم الإهتمام بالمواطن هي السائدة ما يدرون انهم ياخذون رواتب لخدتنا ااااااااااااااه

تقول يمن عليك بحقك

[موسع الصدر]

ودي اتكلم بس بي غصه من حر ما أوجس
قسم بالله اشك أحيانا إن الشرطه تبي انتشار الجرائم عندنا بل ويشجعون عليها
بعطيك سالفه ومختصره
والله إنه واحد من الضباط اللي يرويها لي
يقول بالقسم أغلب المحاضر والقضايا اتلفها (وبكل بجاحه يقولها للجالسين) والمقبوض عليه اخيسه الليل بالتوقيف وإذا اصبح طلعناه آه آه آه يالقهر
طيب ليش كذا تسون يالضباط قال علشان ما تجينا مسآئلة ليش القضايا كثيره
والله ثم والله أول واحد حقدت عليه من الأشكال ذي رفيقي الضابط
نعنبو داركم هذا وأنتم حامينها أجل وش نقول باللي ناويها
يالله خلها على ربك والله يرزقنا الصالح منهم ويعدل سلوكيات بعض العساكر الله يهديهم

طبعاً ما نعمم عليهم بل فيهم من يحتسب بعمله ويبذل الجهد الكثير لكن القله يفسدون ما أصلحو هؤلاء المخلصين

الله يحمانا وياقانا

[abdulaziz_1414]

الله يعينك ويجزاك خير

[دايم العز22]

الله يعينك وانا اخووووووووك

[..sky..]

الله يعوضك خير وانا اخوك ....
وحسبي الله عليهم ...

[ملك الفكتوريا]

ههههههههههههههه والله النشبه


طيب المشكلة الحين بيتنا شارينه وفيه عقد واضح بس فاتورة الكهرب على صاحب البيت الاول








اقول والله من التعقيد اخاف بكره يقولون تجيب خمس شهود من الحاره

[حوات جده]

الله يعوضك خير كويس انه ساعدك

انا مره مع سيول جده راحت اللوحه قعدت اروح من مكان لمكان وغير كم \دوريه يوقفك ويسالك ويحقق عشان اللوحه

[ساما]

الله يسهل امورك ان شاء الله

[ابو سمر]

الله يعوضك خير ويحفظنا وإياكم من الأشرار ..

[ابومشعل3]

كلما قلنا زانت الامور جابو شي جديد ابي افهم وش دخل فاتورت الكهرباء والا عقد الا يجار في سرقت اللوحات:confused:

[خيال الغلبا]

اقرا مصيبتي تهون مصيبتك

خرجنا من البيت بعد صلاة العصر شرق الرياض

فهجم ستة لصوص متلطمين على بيتي تسلقوا الباب وفتح احدهم الباب

والشغالة تراقب اقتحامهم للبيت وهي في الدور الثاني ثم اختفت داخل صندوق المكيف الصحراوي مسكينه

وقاموا بتكسير الباب الداخلي والدخول الى البيت .. ولا تسال بعد ذلك عن التخريب والسرقة

تخيل ستة رجال يقتحمون بيت في وضح النهار

ويوم جيت اقدم بلاغ قال الضابط غيرك كثير اقضب الدور والسراء

اما الشغالة فقد اصيبت بانهيار نفسي

هذا في الرياض وفي وضح النهار ........

[YUKON_GMC]

يارجال الله يعينكم يا اهل الرياض ..

انا قبل كم سنه رحت للرياض وكان معي جيب وسرقت الاستبنه المعلقه على الباب الخلفي والموتر موقف على الشارع العام بالنسيم والشارع واقف من السيارات ..

الظاهر ان الحراميه هذولا بايعينها ان حصلت سرقه وان شافوك اعتربرها سطوا بس وخر عن دربهم ..

المضحك رحت لشرطة النسيم ابغى ابلغ وقال لي الضابط يارجال كل يوم يجينا عن بلاغ 10 سيارات مسروقه وانت جاي تبلغ عن استبنه .. بس روح للغرابي واشتر لك استبه وتوكل على الله

[أبوسلطان جوفي]

الله يعوضك خير ويحفظنا وإياكم من الأشرار ..

[الصامل1]

الله يعينك

[ابوغزاي]

طيب اللي ساكن بالبريجيب فاتورة الماطور0
لاحول ولاقوة الابالله0
اللهم اجرنافي مصيبتنا0

[شاص نيسان 93]

شكلك ما صليت الفجر مع الجماعه

(( من صلى الفجر في جماعه فهو في ذمة الله حتى يمسي))

[نبض البوسنة]

الله يستر الحال ...

حنا ... قبل ايام .... اتعبونا اهل التغحيط ...

ما بين العلميات .... والضابط .... والامر

ولا احد يسمعك ... ولا مجيب .

[ماجد الحايلي]

طيب اللي ساكن بالبريجيب فاتورة الماطور0
لاحول ولاقوة الابالله0
اللهم اجرنافي مصيبتنا0
اضحكتني جزاك الله الف خير
والله انه بلشه
اما فاتورة الماطور
حلوه الله يرج بليسك

[التركوازي]

كلهم مايبون احد يبلغ

ويعطون السرقان راحتهم

[ع العمرو]

الله يسهل امورك

[عماش الصداره]

حسبي الله ونعم الوكيل
نسأل الله أن يرد لك ضالتك

[فتاح الجواد]

اعاننا الله واياكم وكل مسلم
اللهم اجرهم في مصيبتهم وخلفهم خيرا منها

[مغرم بالفتك]

الله يعينك

[مدرس بالغصب]

بكرا علشان تبلغ عن اللوحات لازم تجيب واااسطة

[القنآإصة]

قسسم بالله شي يقهر
يعني بلاغ وشهوله الشروط والتعقيد والخرابيط ذي


ان شاء الله تتسهل امورك
ولو عرفت الحراميه ذولا ثور فيهم على حسابي


اختك

القنآإصة

[ابوسعيد999]

أستودعها الله ألذي لاتضيع ودائعه
وعلى طاري ساهر صورني البارح في العليا العام وأنا داخل أيمين
حسبي الله ونعم الوكيل

[HTLER]

الله يصبرك بس دامه سرق اللوحه بدون السياره تراه

ناوي يسوي شي و يزبن و السبه تجي عليك انت

عرفت

[talak511]

لاحول ولا قوة الا بالله

[(هزاع)]

تعقيد في تعقيد المفروض سرقة اللوحات يكون لها اكثر جديه (لاكني لقيت المفروض منقلب الله يرحمه)

[حزم نجد]

وسع صدرك يا رجال

انا انسرق ذهب من بيتي قبل شهرين فوق 40 الف الوقت بالنهار العصر والبيت على شارع عام وكله اسواق ههههههه

وبلغت وتحسفت بس يسألوني وين كنت بهالوقت ومن تشك فيه وفيه مشاكل بالبيت ياشيخ شككوني اني انا الي سارق حلالي

الكلام هذا من شهرين و وكلت امري لله سبحانه

[سعود 35]

لاحول ولاقوة الا بالله

يله الحمدلله علاقل مشا امورك