حره بعمود الدبل بالشاص

[هولوكس2005]

السلام عليكم ورحمته وبركاته

مبروك عليكم هال خير والمطر

عندي مشكله بالحوض في عمود الدبل حره

المشكله ماهي بالكفرات ولا ترصيص المشكله بالعامود

وش الحل مع العمود مع العلم بأن المخارط العاديه ماتبين علشان سرعتهم بطيئه

والعمود وكاله 1300 ريال تقريبا

الحره من 120 إلى 145 تقريبا

لأحد يقول فرار لو افك العمود بس ماركب فرار

نبي حلول

[كديان]

حياك يالقصمنجي به مير نيم هههه
لا تخاف تراي اشهب الهب ههه

معروف عن مكاين المخارط ان دورته ضعيفه تقريبا 5 كيلو او اقل يعني ما تبين لك ابد

افضل حل مجرب و ناجح
و مجرب تفك عمود الدبل و تشوف الموتر هل اختفت الحرة ام لا ؟
بعدين تفك العمود الخلفي اللي هو الكردان و تمشي بالدبل الخفيف و تشوف هل اختفت الحرة ام لا ؟

و فيه حل اخر
ترفع الموتر من ورا و تدوس حتى على سرعة 140 و تشوف تطلع الحرة ام لا ؟
اذا ما طلعت
ترفع الموتر من الخلف و من الامام و تشبك الدبل الخفيف طبعا كل العمودين راكبه و تدوس
و راح يظهر لك مصدر الصوت

حل اخر و مجرب
ترفع الموتر و تخلي احد يدوس على 140 و تندعس تحت الموتر و تجيب مفك طوله شبرين تقريبا
و تقربه لحد العمود اذا هج العمود عن المفك فاعرف ان العمود فيه طعج و تقويس
طبعا تحط المفك على اول العمود من الامام بعدين تحطه بالمنتصف بعدين تحطه باخر العمود
يعني 3 جهات

و تاكد لا يكون احد الصليبات خربان عادة يكون طالع من الصليب صدا برتقالي يعني داخله ماء و لاعب به لعب واضح اللون يكون طابع الصليب و اللي حوله
و احيانا اذا هزيت العمود و هو راكب يصير به فضاوة و طقة

افضل من يفحص العمود لك ابو خالد الخضير بخضيراء
او ابو عبدالله الصمعاني بتشاليح بريدة

اخبر احد الربع على وقت الحوض م2000 طلع عنه حرة من العمود و راح لم مخرطة الغضية و قصوا
له العمود و حطوا ماصورة جديدة و ضبط مكان الورشة عند محلات التوانك الحديد اللي عند سوق التمر
او مر على مخرطة المشوح او الشقيران بصناعية السليم يغيرون لك الماصورة اذا كانت مطعوجة
التكلفة تقريبا 300ريال

او خذ عمود من التشاليح و جربه و على ما قال على الشرط او رجعه لهم