الناموسية ...!!

[ابو شكاع]

السلام عليكم
مسيكم بالخير كلكم
ياجماعة
هل يوجد ناموسية قد الفراش التنزاني حق البر ؟
يعني هل توجد ناموسية أقدر احطها فوق الفراش التنزاني حق البر وارتاح نفسيا من الدواب والهوام والخنافس وغيرهن .؟
وكم سعره
ووين يوجد

انتظركم

[حد السيف]

السلام عليكم ورحمة الله وبركاته

:D
:good:

http://www.mekshat.com/pix/upload/images12/mk4544_picture-035.jpg

ممتازة جدا

[ابو شكاع]

هلا وغلا حد السيف
الله يعطيك العافية ماقصرت وجزاك الله خير
السؤال طال عمرك
هذي من وين وكم سعرها ؟
وهل بالإمكان الحصول على نوع أثقل منها ؟
هذي احس انها خفيفة وضيقة
يعني لو تكون ابعادها ابعد من الفراش مثلا بـ 10 أو 15 سم
أعتقد أزين
ولاهنت

[المموه]

الاخ ابوشكاع
السلام عليكم ورحمة الله وبركاته
هذه الناموسيه موجوده لدى السدحان للملابس بطريق الملك عبدالله . تحصلها معلقه في اخر المحل من شمال وبمقاسات مختلفه . وقيمتها حوالي 99 ريال . واذا اشتريتها تروح للغرابي الله يسلمك وتفصل لها جراب بـ 20 ريال مثل البندق طويل وسحابه فوق بس للحفاظ عليها . لانها وهي ملفوفه تكون بعرض 20سم وطولها حول مترين . واذا تبي اكبر واكبر وتصلح للغداء اذا انتم مجموعه وفيه ذباب تروح طال عمرك يسار من تحت كبري عتيقه ( غرب ) الى السويدي بعد ثالث اشاره على اليمين تحصل محل اسمه فهد للرحلات عنده المطلوب .
وعلى فكره هي لا تقي من الهوام والحشرات الزاحفه لخفها وانما من الناموس والحرمس والذباب . والذي يقي من الهوام بأذنه تعالى ( اعوذب بكلمات الله التامات من شر ما خلق ) ثلاث مرات ( اعوذ بكلمات الله التامه من كل عين لامه ودابة وهامه ) ثلاث مرات عندما تنزل في اي مكان وخاصه البر .
والسلام

[ابن بدران]

السلام عليكم

سبق واشتريت ناموسية قبل اربع سنوات ممتازة جدا وقوية ولها عدة أحجام ..

الحجم الكبير يغطي الفراش التنزاني النفرين ويغطي السرير الحديد العادي (النفر) بالراحة

سعرها على ما اذكر كان 60 أو 70 ريال من اسواق حجاب بالنسيم ...

نسيت اسم المحل لكن على ما اذكر انه كان في الجهة الجنوبية من السوق وأظن والله أعلم

أنه كان بيع أقمشة إذا لم تخني الذاكرة ..

[ابو شكاع]

السلام عليكم

سبق واشتريت ناموسية قبل اربع سنوات ممتازة جدا وقوية ولها عدة أحجام ..

الحجم الكبير يغطي الفراش التنزاني النفرين ويغطي السرير الحديد العادي (النفر) بالراحة

سعرها على ما اذكر كان 60 أو 70 ريال من اسواق حجاب بالنسيم ...

نسيت اسم المحل لكن على ما اذكر انه كان في الجهة الجنوبية من السوق وأظن والله أعلم

أنه كان بيع أقمشة إذا لم تخني الذاكرة ..

الله يعطيك العافية ياخوي يابن بدران ولاهنت