يا اهل الخبرة وش تنصحوني ارجو الدخووووووول

[ابوحميد122]

السلام عليكم ورحمة الله وبركاته
سيارتي سبق وان وضعت لكم مشاركة بخصوص حره عند السرعة من 130 الى 160 تقريبا .....
رحت يم الميزان عشان اشوف الخلل من عمود الدبل او من عمود الدوران الكردان
قال وش عندك قلت ابغى افك عمود الدبل وامشي بالسيارة حتى اشوف الخلل وين هل هو من عمود الدبل او عمود الدوران قالي شف افضلك انك تودي السيارة يم عبداللطيف جميل ويعملون كشف كامل على السيارة ... ذهبت الى وكالة عبداللطيف وطلبو من 400 ريال للكشف على السيارة من الصدام للصدام
هل تنصحوني اني اوديها علما ان السيارة لاندكروزر في اكس ار خليجي 99 8 سلندر

[كديان]

ابو حميد
مشكلة الجيب م98 و فوق ضعف بعمود الدبل
و يتم تغييره عندنا بالقصيم جديد تقريبا او من التشليح ب800ريال
ماني متاكد من السعر
لا تقرب الوكالات تراهم نصابين
تحصل هندي باحد الورش افضل منهم بمليون مرة

رد سابق لي


معروف عن مكاين المخارط ان دورته ضعيفه تقريبا 5 كيلو او اقل يعني ما تبين لك ابد

افضل حل مجرب و ناجح
و مجرب تفك عمود الدبل و تشوف الموتر هل اختفت الحرة ام لا ؟
بعدين تفك العمود الخلفي اللي هو الكردان و تمشي بالدبل الخفيف و تشوف هل اختفت الحرة ام لا ؟

و فيه حل اخر
ترفع الموتر من ورا و تدوس حتى على سرعة 140 و تشوف تطلع الحرة ام لا ؟
اذا ما طلعت
ترفع الموتر من الخلف و من الامام و تشبك الدبل الخفيف طبعا كل العمودين راكبه و تدوس
و راح يظهر لك مصدر الصوت

حل اخر و مجرب
ترفع الموتر و تخلي احد يدوس على 140 و تندعس تحت الموتر و تجيب مفك طوله شبرين تقريبا
و تقربه لحد العمود اذا هج العمود عن المفك فاعرف ان العمود فيه طعج و تقويس
طبعا تحط المفك على اول العمود من الامام بعدين تحطه بالمنتصف بعدين تحطه باخر العمود
يعني 3 جهات

و تاكد لا يكون احد الصليبات خربان عادة يكون طالع من الصليب صدا برتقالي يعني داخله ماء و لاعب به لعب واضح اللون يكون طابع الصليب و اللي حوله
و احيانا اذا هزيت العمود و هو راكب يصير به فضاوة و طقة

افضل من يفحص العمود لك ابو خالد الخضير بخضيراء
او ابو عبدالله الصمعاني بتشاليح بريدة

اخبر احد الربع على وقت الحوض م2000 طلع عنه حرة من العمود و راح لم مخرطة الغضية و قصوا
له العمود و حطوا ماصورة جديدة و ضبط مكان الورشة عند محلات التوانك الحديد اللي عند سوق التمر
او مر على مخرطة المشوح او الشقيران بصناعية السليم يغيرون لك الماصورة اذا كانت مطعوجة
التكلفة تقريبا 300ريال

او خذ عمود من التشاليح و جربه و على ما قال على الشرط او رجعه لهم

[ابوحميد122]

يعني اغير عمود الدبل افضل وشاكر لمرورك الكريم

ويفيدونا الاخوان

[الباثفندر 3.5]

100% من عمود الدبل غيره و كاله و افتك
صارت لنا نفس مشكلتك بالضبط

[BLA6K]

يعني اغير عمود الدبل افضل وشاكر لمرورك الكريم

ويفيدونا الاخوان

اخوي مثل ماقالك الأخ : كديان فك عامود الدبل منت خسران شي كلها 20 ريال
اذا اختفى الصوت أشتر لك جديد اذا ماأختفى فأكيد الحره من سبب ثاني
مالها داعي تشتري عامود ويطلع اللي عندك مافيه شي
للمعلومه ، عامود الدبل يتصلح لكن حظوظ ناس يظبط معهم وناس لا .. وبالتوفيق

[السنع كله]

فك عمود الدبل فقط وسترى الفرق

[ابوحميد122]

ان شاء الله رايح افكه
بس اليوم وبكره ان شاء الله النشرة تقول ان علينا امطار في الجوف بعد ما اطعس واتونس اتفضا للصناعية
مشكورين
واسال الله الذي جلت قدرته ان يوفقكم في الدنيا والاخرة
وان ييسر الله دربكم الى كل خير
وان يقيكم الله من شرور الدنياااااااااا
وان يمتعكم بالصحة والعافية
وان شاء الله عاااااااااااااااااافية تدوووووووووووووووووم وتدوم عليكم وعلى ابناااااااائكم
والسلام عليكم