الباثفايندر طلع فيه صوت وولعت لمبة المكينة!!

[الكشكول]

أول شي حي الله المكاشيت اينما وجدو وحلو ثاني شي يالربع عندي استفسار عن مشكلة صارت لي قبل شوي في الباثفيندر 2002 وهي اني مشيت عليه متجه لسدير من الرياض وانا مسرعن شوي المراد وقفت عن محطة اباخذ لي غرض من البقالة ويوم وقفت و اثر الموتر معلقة دعسته على رقم 1 في ضغط الماكينة والعادة اذا وقف الموتر تجي تحت الواحد المهم طفيت الموتر ويوم جيت اشغله ما جاز لي اشتغاله كني مشغلن موتر ديزل وصوت لقلقه في المكينه مادريت الا هي مولعة لمبة المكينة واوقف واطفيه واشغله مرة اخرى وقامت تلعب دعسة الموتر بلحالها تدبل مرتين الى ثلاث ثم تركد وكل ما دعست انا على البنزين وانا واقف اسمع في بداية الدعسه لقلقة ثم تبدى الدعسه تفوت وتقطع ولازالت لمبة المكينة والعه حتى ساعة اعداد هذا الخبر

فما هو الحل برأيكم هل تتوقعون ان المكينة خبطت أو سير المكينة فارط مع العلم ان حرارة الموتر زينه الربع

[كديان]

اللي اعرفه عن الباثفندر و صارت معنا بالصمان و كان معنى 3 مواتر
المهم الصبح الموتر عيا يمشي الصبح تدعس كل الدعسه و لا يمشي الا 10 طبعا تماتيك
جريناه بموتر ثاني من الصمان حتى محطة ام رقيبة 70كيلو و بسطحة الى بريدة
و طلع الخلل من حساس الدعسه و حساس دينمو اللهاة يوززن بالكمبيوتر لهن ميزانية و كلف شغلهن
250ريال

لكن مسالة ان اللمبة ولعت افحص كمبيوتر ب100ريال

فيه ورشة بالرياض تخصص باثفندر الثنيان
و ان بغيت بالقصيم علمن

تاكد من فيش منظم الهواء لا يكون منفصل
و ايضا افياش و حساسات المكينة لا تكون راخية
جرب افصل و اشبك البطارية

اساسا لو انقطع جنزير المكينة حق التيمن كان الموتر يطفى ولا يشتغل ابد ابد
الجنزير وظيفته فتح و اغلاق البلوف
لذلك اطمئن

[الكشكول]

أصبحنا وأصبح الملك لله
الله لا يهينك اخوي كنديان
بعد ما اصبحت اليوم نقزت وجبت ميكانيكي وقال ان اديترك منشق وانت مادريتا يالطقوع المصيف ههههههههههه اوما هندي والطقوع المصيف :)
المراد اني عودت للرياض مع رفيزن لي وجبت رديتر وحاليا انا في الطريق ناكس وعساه منه ولا هوب من شي اخر
في رجاء الله وبين يديه
ولازال الموصوع قائما حتى الان وسأوفيكم بالاخبار ان شاء الله
والمعذرة اذا فيه اخطاء في الكتابة لاني اكتب بالجوال
الله يعين

[adel488]

علمنا وش صار

[كديان]

شكلك معاشر عجز و شيبان ههههه
توصل بالسلامة
اذا كان منشق عادي جدا يلحم
نوع الاديتر ادرني صيني اصلي ؟

[الكشكول]

علمنا وش صار

هلا بك أخوي عادل يالله صبحه بالخير
أبشرك يا جدي الامور ولله الحمد تبشر بالخير والمعذرة على التأخر في الرد حاولت اكتب رد البارح ولكن ما كتب الله ومثلك خابرن الجوال والكتابه به
وعلى طاري اللي صار يا خلفهم بعد ما جبت الرديتر قال لي المكانيكي انقلع ولا أشوفك الا المغرب وفيها :$ قلت له ان شاء الله ياطويل العمر ويوم جت الساعة 4 ونص العصر ما دريت الا الاتصال يجيني ( موترك خلص ) والله يا صحيبي وانقز يوم جيت و لاه الحمد لله قاضين منه واشغل الموتر وادبل له والحمد لله طفت اللمبه وراحت الاصوات فكانت تفاصيل التكلفة كالتالي والشكوى على الله :
قيمة الرديتر أصلي من الوكالة 1900 ريال
قيمة طقم سيور المكينة 150 ريال
شغل يد الميكانيكي 160 ريال >>>> بين ان فيها انواع المكاسر ههههههههههه
اجرة السطحا 50 ريال
المجموع الاجمالي 2260 ريال والعوض على الله :(

ولازال الموتر تحت التجربة

[الكشكول]

شكلك معاشر عجز و شيبان ههههه
توصل بالسلامة
اذا كان منشق عادي جدا يلحم
نوع الاديتر ادرني صيني اصلي ؟

هلا بك والله ابوي كديان والله يابيي الشيبان مالنا غناة عنهم عسى الله يطول باعمارهم على الطاعة ويرزقنا برهم آمين
وعلى طاري الرديتر والله اني مدري وش صناعته الوكاد اني خذيته من وكالة نيسان بام الحمام في الرياض وقيمته قبل الخصم 2700 وبعد الخصم 1900
والله يعين واناخوك الكديان
ويامال العافية والله يا بعدهم
وعز الله انك كسبت فيني معروف بردك الاول اللي يثلج الصدر يا جعلي ما ابتسيك
وشرفتني بردك الثاني الله يخليك لعينن ترجيك يابيي

[كديان]

يابيي >> عنيزة :p . مابتسيك . ههههههههههههههه
به مير نيم .. بتسم هوبه ذا .. اولاه .. :D:p:D
هههههههه
اسمع يالقصمنجي المفروض تجلد جلد لين تعض الارض و تقول بس
وشلون تشري الاغراض و لا تشاور ؟؟؟ :mad:
عندنا هنا الاعضاء ما يقصرون و حتى فيه رابطة لملاك الباثفندر و فيه مواضيع عن افضل الاديترات
فيه اردني و فيه صيني على ال300 و 350 تقريبا
و الاصلي تاخذه من الموزع اصلي اصلي تقريبا ب1200 الى 1100
الله يهديك و يهدينا قل امين
ان كان عندك سلف قروش او قروش قاعده سلفنا :p

عموما درس لك و الواحد المفروض ما يستعجل ابد :good: يشاور قبل :good:

لكن مابه حسافة دام كل شي اصلي
الله يطرح بهن البركة :good:

[كديان]

تذكرت شي مهم جدا
خذ السيور القديمة و حطهن تحت المرتبة اسبير
على الاقل تلقى احد متعطل بسفر او منقطع عليه سير
تراه تصير ليش لا
و تصير كانك معطيه الجنة و ((من فرج عن مؤمن كربة فرج الله عنه كربة من كرب يوم القيامة))

[الكشكول]

ههههههههههه اضحك الله سنك يالكديان والله يشرفني اني انتمي للقصيم وعنيزه على وجه الخصوص لهم عندي معزة ومقدار ما يعلم به الا الله ولكني مع الاسف منيب من القصيم ولانيب حولها :( مع الأسف ياخلفهم
وعلى طاري الاستعجال وما الاستعجال ياجدي فللضرورة أحكام والا انا خابرن ان الاخوان في المنتدى مهمب مقصرين وبالنسبة لكلامك فهو صحيح وعلى متمه ولكن عامل الوقت مع الاسف ما كان حليفي فاضطريت اخخذ احسن شي عن الحسوفة :)
وعلى طاري السلف فما شاء الله تبارك الرحمن ما ينقصكم سلف يا اهل القصيم الله يزيدكم بنوك متنقله هههههههههههههههه

[النبع الصافي]

الأصلي من الوكالة تطوئن أكثر من الموزع مع فارق الغلاء بس ترتاح
موفق

[صالح ابو وليد]

الباث فندر 2002 انت مشيت على موترك والزيت ناقص ومحترق
انا كان معي باث 2005 ومشيت عليه من الرياض الى الطوقي ويم وصلت كبري الفروسيه
ولعت لمبة المكينه وضعف عزمه والدعسه صارت ثقيله وطوالي غيرت الزيت ويوم رجعت للرياض غيرت الزيت بعد والحين ماشي زي الحلاوه

[الكشكول]

الأصلي من الوكالة تطوئن أكثر من الموزع مع فارق الغلاء بس ترتاح
موفق

أؤيد كلامك 100 % أخوي النبع. .. بالنسبة للقطع الميكانيكية اللي تتوقف عليها حياة السيارة افضل ان تكون من الوكيل حتى ما يلوم الواحد نفسه اذا صار شي لا قدر الله وتعطلت به السيارة
اما الاشياء الثانوية اللي ما يتوقف عليها عطل السيارة مثل مساعدات أو يايات أو سست أو أي قطعة أخرى ما تتعطل السيارة بسببها فالامر فيه سعه
بالتوفيق للجميع اخوي النبع

[الكشكول]

الباث فندر 2002 انت مشيت على موترك والزيت ناقص ومحترق
انا كان معي باث 2005 ومشيت عليه من الرياض الى الطوقي ويم وصلت كبري الفروسيه
ولعت لمبة المكينه وضعف عزمه والدعسه صارت ثقيله وطوالي غيرت الزيت ويوم رجعت للرياض غيرت الزيت بعد والحين ماشي زي الحلاوه

هلا بك ابو وليد والله يالغالي الزيت توني مغيره وما مشيت عليه الا 1400 كيلو بس ومغيره مع السيفون بعد ولكن حيل الله اقوى الله العالم ان الرديتر انتهى عمره الافتراضي
والعلم عند الله
مشكور اخوي ابو وليد على المشاركة

[كديان]

ههههههههههه اضحك الله سنك يالكديان والله يشرفني اني انتمي للقصيم وعنيزه على وجه الخصوص لهم عندي معزة ومقدار ما يعلم به الا الله ولكني مع الاسف منيب من القصيم ولانيب حولها :( مع الأسف ياخلفهم
وعلى طاري الاستعجال وما الاستعجال ياجدي فللضرورة أحكام والا انا خابرن ان الاخوان في المنتدى مهمب مقصرين وبالنسبة لكلامك فهو صحيح وعلى متمه ولكن عامل الوقت مع الاسف ما كان حليفي فاضطريت اخخذ احسن شي عن الحسوفة :)
وعلى طاري السلف فما شاء الله تبارك الرحمن ما ينقصكم سلف يا اهل القصيم الله يزيدكم بنوك متنقله هههههههههههههههه

ههههههه
نتشرف يا خلفهم ;)
مهب من صار قصيمي صار تاجر ! بعدين التجار اطلعوا و سكنوا بالرياض
خلنا بالمهم و لا تلف و تدور ابخاشرك :p بالتجارة انت مغنيك الله وش قلت ؟ ههه


الباث فندر 2002 انت مشيت على موترك والزيت ناقص ومحترق
انا كان معي باث 2005 ومشيت عليه من الرياض الى الطوقي ويم وصلت كبري الفروسيه
ولعت لمبة المكينه وضعف عزمه والدعسه صارت ثقيله وطوالي غيرت الزيت ويوم رجعت للرياض غيرت الزيت بعد والحين ماشي زي الحلاوه

ابو وليد الزيت ماله دخل بعزم المكينة اساسا لو مافي زيت كان على طول المكينة
تطقطق و تخبط و على طول
لكن بما ان اللمبة ولعت فالمشكلة كهربائية فقط لا غير منظم لهاة او حساس كرنك
او بواجي او وزن ديلكو او بخاخات او حساس دعسه اذا خرب يبدا الموتر يالله يمشي يعني اشياء كهربائية خلت اللمبة تولع
هالحين مثلا لو تفصل حساس الهواء حق القربة على طول تولع اللمبة
لو تفصل اية فيش على المكينة على طول تولع اللمبة
و الزيت فيه ناس تمشي عليه 20الف كيلو همن يغير الزيت و لا يوجد ضرر اطلاقا

[باثفيندر2002م]

السلام عليكم ورحمة الله وبركاته

بصراحه استفد كثير من منتداكم كزائر

والان لدي مشكله مواجهتني وهي

لدي باثفيندر 2002 طلعتلي مشكله جديده وهي تفتفه لما اشغل السيارة الصباح وامشي عليها بعد ماتحمى وهي تفتف لكن اذا طفيت السياره بعدين شغلتها تختفي التفتفه رحت للميكانيكي شيك البواجي واسلاك البواجي كل شي طلع سليم ونظف الثروتل بودي كان مليان تراب
وبعد ماراحت المشكله قلت بفحص كمبيوتر لكن راعي الكمبيوتر قالي ماراح تستفيد شي ماراح يبين السبب بالفحص

يمكن مر على احد نفس المشكلة
افيدوني الله يعافيكم