تكته في المكينه

[الزعيتري]

السلام عليكم ورحمة الله وبركاتة
اخواني في هذا المنتدا الشامخ حبيت اطرح لكم مشكلة التاهو وارجو مساعدتي الله يعطيكم العافيه
المشكله عندترك التاهو شغال اكثر من دقيقه اسمع صوة وبعدما ادوس يختفي وذاتركته شغال على طول اسمع الصوت
لم اذهب لي ورشه فقط غيرة الزيت خفيف 10w30 ولكن دون فائده
وبعض الزملا يقولون شي طبيعي
علما ان السياره مديل 2003 استخدام امريكي عداد 130000 الف ميل
وعداد السرعه 120
والصوة موجود من اول ماشريت السياره قبل سنه

ويليت لو تدلوني على ورشه في بريده

[مفتون الضبي]

اخوي تعال للصناعيه عنيزه

[7ابو نواف7]

احتمال تكون المشكلة من طرمبة الزيت، مر على ورشة وخلهم يشيكون عليها

[نآآآصر]

اذا كان البنزين 91 حوله 95 وشف

[كديان]

غالب المشاكل من السيفون اذا كان مقاسه يختلف
او كان تجاري مهب اصلي
فجرب حط فلتر اصلي + زيت الترا سفن 50 20
الفلتر تحصله عند الغنام او العبيدان
الورشة الثقة باذن الله عندك ورشة العثمان و مكانهم بتشاليح بريدة
قبل لا توصلهم بكيلو فيه خط يطلع جنوب حق سكراب حديد
ادخل معه تجيك ورشتهم على اليسار كبرة لونه زرقاء تحصل سليمان و عبدالعزيز

الموتر ماشي معك 208000الاف كيلو انصحك بزيت 50 20

[الزعيتري]

غيرة طرمبا زيت في ورشه في التشليح ولكن ماتغير شي

[قمة افرست]

اخوي هذا الصوت من التكايات
وغالبا اذا ضغط الطرمبة حقت الزيت طبيعي مافيه مشكلة منه
الاذا اصبح الصوت مستمر
فاذا كان ضغط الطرمبة سليم والامبير مابين النص والربع او على النص
فمافيه حل الا بتغيير طقم تكايات
ويصير هذا الصوت لسببين
1- ضعف بطرمبة الزيت ادى الى فراغ بالتكايات
2- شد السيارة بقوة يؤدي نفس السبب خاصة اذا باردة

وهذا عيب بجميع مكاين اليوكون والتاهو مع الاسف
طرمبة الزيت
اضافة لطرمبة البنزين
ولم تحل المشكلة حتى الان 2011

[حبران والمسمى]

صارت معي صوت زي اللي تقول السيارة كراون فكتوريا وديته وقال المكانيكي الأستخدام الأمريكي كله كذا لكن اترك البنزين الاخضر وعب احمر
وسويت مثل ماقال خفت عن اول وداومة على الأحمر
والله يدلك على العطل وترتاح من وجع الراس
ولكن انصح بكلام الأستاذ القدير قمة افرست لعلمه الواسع في السيارات

[الزعيتري]

اشكر الجميع
غيرة الزيت وحطية زيت كسترول
ولله الحمد اختفا الصوة

[بدوي جنوبي]

مثل ما ذكر اخى أفرست
أذا ضغط الطرمبة سليم شيئ طيب
طبعا صعب تحديد مصدر الصوت

وجرب روح 3 ورش بيقولك واحد من التكايات
والثاني ممكن يقول من عمود البستم والثالث اتوقع بيقول من عمود الكرنك(يعني يحتاج سبايك)

عندك الجموس وجيوب النيسان والفوردات تقريبا يظهر منها نفس الصوت
النيسان غالبا يكون من البلوف اما الامريكي 8 سلندر غالبا يكون من التكايات
واللى يدل انها من التكايات عند الضغط على الدعسه يختفي الصوت والسبب
انها تتشبع أكثر بالزيت فتقضي على الفضاوة (هذا في حال ان طرمبة الزيت سليمه)
أبحث عن مصدر الصوت من فوق الكفر ما بين الكفر والرف ولاحظ هل الصوت في الجهتين
او جهة واحده ،،، وهل يوجد أكثر من صوت يعنى من تكاية واحده فقط او اكثر من تكايه فرضا
الحل أرجع للزيت القديم اتوقع كان عيار 20w
السيفون أشتر من الوكيل سعره ممكن 13 او 15 ريال
وأطمن لك سنه ما شاء الله تستخدم وما حصل اى مضاعفات
انا أقترح ما تسوي شيئ اتوكل على الله وأستخدم طبيعي .