استفسار من أهل المملكة الكرام ......

[بوجندل]

السلام عليكم ورحمة الله وبركاته...


عندي جي ستاندر موديل 1997م


به شويّة أعطال ودّي أضبطه ولكن الاسعار عندنا بقطر غالية


علاوةً على ان اللي يشتغلون بالمواتر أصبحوا ينتقون المواتر الجديدة


ويبغون الشغل البسيط والفلوس الواجدة


الموتر به مشكلة في الكربريتر لأنه مو بخاخ


ولم اجد من ينفعني الغالبية يقولون اشتر جديد


وانا صراحه ودّي اجيبه للشرقية لكن ما أعرف وين اتوجّه


أبغي راعي كراج ثقة ومضمون وراعي حلال وحرام

وبالمرّة بغيت راعي قطع غيار تويوتا أصلية

وتكون أسعاره مناسبة


جزاكم الله خير



بوجندل / قطر

[Somebody]

مرحبا اخوي ابو جندل


فيه ورشة في الدمام معروفةاسمها ( الثقة) بالنسبة لي كل سياراتي اصلحها عنده
يمني اسمه راشد متخصص تويوتا-نسيان-جمسي


ما اقول لك انه الوحيد في الدمام. ولكن بحسب الخرابات اللي ضبطها في سياراتي
اقدر اقول انه معلم ومثلة قليل والرجل أمين. ويكفيك ان ورشته أشبه بمستشفى ما تخلى.

وراح ارسل لك رقم موبايله اذا تريد على الخاص
والله من ورى القصد.

[بوجندل]

تسلم وماقصّرت

ارسل لي رقمه أو وصف المحل

وهل يقوم باصلاح الكربريتر؟

[عبدالله الموسي]

وعليكم السلام ورحمة الله وبركاته

اخوي الآن كلمت محل قطع غيار اصلي متعهد يسحب من تويوتا
ويقول سعر الكلبليتر الأصلي بعد الخصم 1100 ريال سعودي
مدري كم تعادل قطري... لكن المحل بتبوك وأكيد ان اسعار السعودية قريبة لبعض..
وانا انصحك انك تركب جديد مع بواجي جديده أفضل من انك تركب طقم اصلاح وبيشتغل معاك
لمدة 6 اشهر وبعدين يرجع يدخن ويكتم ..هذا رائي
واتمنى من الاخوة القريبين لك مساعدتك عاجلا

ولك تحياتي

[صالح-القصيم-]

مجرد معلومه ارجو ان تفيدكم جميعا
كانت معي سيارة تيوتا كراون موديل قديم 89 تقريا وكان فيها تقطيع على السرعة القليلة 20/كم إلى 25/كم

وكل شيئ صلحته من اجل ازالة التقطيع من تنظيف كربريتر وتركيب طقم اصلاح كربريتر وضط كهرباء و و و ولم يصلح التقطيع
وبالصدفه خبطت المكينه وتم توضيب المكينة وانتهى التقطيع من دون ان نغيّر الكربريتر يعني بعد التوضيب انتهت المشكلة
باختصار قد تكون المشكلة ليست من الكربريتر تأكد

[بوجندل]

اخواني الاعزاء

- ولد الحويطات
- صالح القصيم

أشكركم على معلوماتكم القيّمة ومساعدتكم

أنا سألت عن الكربيتر الجديد بقطر سعره 1650 ريال (تقريبا 1000 سعودي = 970 قطري)

اما بخصوص ان المكينة فيها شي هذا عاد يبغي له فنّي شاطر وميكانيك ولد ابوه ومايغشني

وهذا اللي ابحث عنه وبعد لو يكون في الحسا افضل وأقرب

[العنابي 616]

أخوي بو جندل
أنصحك بورشة صبيا بالدمام بالخضرية من أشهر الورش و ما يتعاملون إلا مع اللاندكروزر
و عندهم قسم خاص للكربريتر في واحد سوداني شايب فاهم بشغله أنا عندي فكسار 95 كربريتر كان فيه تعليقه و تفتفه و كربنه صلحته هنده قبل سنة ب 190 ريال مع قطع الغيار و الحمدلله شغله تمام

أنصحك فيه

[بوجندل]

تسلم يا العنّابي

أيضا قالوا لي الربع ان في سوداني في تماني مضبوط

وراعي كربيرتر وشغله مايحتاج

مادري حد يقدر يفيدني

وبخصوص الراديترات هل يوجد بالحسا محل راديترات مضبوط

[طناف]

الأخوان ماقصروا

أذا السالفه كلبليتر عندك في الحسا
رقم 1 ـ فني تركي عند النقل الجماعي موقعه السابق
ورقم 2ـ سوداني في بدايه الشارع الملكي على اليسار أسئل عنه

والأفضل ركب جديد وارتح

[بوجندل]

الشكر للجميع

وفي انتظار الرد

والشور الطيّب

[YUKON_GMC]

يالغالي الشله بسيطه وماتستاهل ..

في الحساء في ورش كثيره وكبيره وزحمه .. منها الشامي سنتر والبراهيم والعيسى والبطي الخ كلهم في الصناعيه والصناعيه كان ماتدلها ..

وانت طالع من الحسا للرياض قبل نقطة التفتيش تلف لها يمين وتجيك على بعد 7 كيلو ..

وفيه ورشه متخصصه بالتايوتاء لكن ماظنتي يشتغلون كبليتر .. لأن شغلم في السيارات الجديده فقط ! وسرى عليه تصل لمدة شهر

لكن فيه سوري على الشارع العام في الصناعيه تخصصه كبليتر ودبلات وقيور .. محله على شارع قطع الغيار مقابل ورشة الموسى والشامي

قطع الغيار في محلات كثيره متخصصه تايوتا .. منها - المغلوث تايوتا والنهدي والعلوان .. احسنهم المغلوث في الشارع الملكي داخل الهفوف وبعده العلوان تويوتا

هذه ارقام محلات المغلوث من واقع فاتوره عندي .. لكن لقسم الامريكي تقدر تتصل وتأخذ رقم قسم التويوتا
الارقام مع المفتاح الدولي

009665925296
009665941508
009665930830
009665929566