خذ 2000 ريال بس عطني فكرة قبض مقنعه

[برديس]

السلام عليكم ورحمة الله وبركاته

عندي جوال سعره حدود 400 الآن الجوال ضاع مني بمكان مغرز فيه قبل وصولي
لهالمكان كان معي وفقده يوم جيت البيت مانزلت من السيارة الا بنفس مكان التغريزه
فقط بحثت عنه بالسيارة لم أجده رجعت للمكان ولالقيته بحثت يدوي جبت اله زراعيه
اسمها (شوكه) مالقيت جبت حراثه وشلت من الموقع مسافة نصف متر ماحصلته

المطلوب

فكره لآستخراجه وله 2000 ريال سعودي والله على ماأقول شهيد

ملاحظه : الموقع مااحد يعرفه غيري يعني استبعدوا احد اخذه من الموقع (موقع خاص)
السيارة نزلت مراتبها مالقيت شي . رحت للسنيدي بحثت بكل مكان ماحصلت شي
فيه معلومه : اذا قربت للموقع أحس اني مخنوق ويضيق صدري لين أبعد وأفكر بشي ثاني
اذا طرى لي الجهاز احس بشي غريب ياجماعة الخير

عطوني حل ومثل ماقلت فوق


ملاحظه : نوع الجهاز 82n

وشكرا للجميع

[exsoskeleton]

السلام عليكم ورحمة الله وبركاته
جربت تستخدم جهاز الكشف عن المعادن
http://t1.gstatic.com/images?q=tbn:ANd9GcRMjp6dKFeVixqrrt_6u7K93BTOXWPlE 1kDNI2_rC5P96QeKwhX

أو ذا بس مداه بسيط ماهو زي الى فوق بس متوفر بكثره
http://t1.gstatic.com/images?q=tbn:ANd9GcTWIjqrABhvk0v04cv_3y767pjoIFeWV rE_zW7fFadE3OEAIgLLvuA1vKeQPw


هذا رابط لشركة تبيع المنتجات ذي

من هنا (http://riyadh.almubawab.com/%D8%A3%D8%AD%D8%AF%D8%AB-%D8%A3%D8%AC%D9%87%D8%B2%D8%A9-%D8%A7%D9%84%D9%83%D8%B4%D9%81-%D8%B9%D9%86-%D8%A7%D9%84%D8%B0%D9%87%D8%A8-qby-gold-com_a1231808)

[سلفاريو]

هلا بك اخوي
الله يكون بعونك ويرد لك ضالتك ان شاء الله
ياخوي تعوذ من الشيطان يمكن المكان فيه شي ماهو طبيعي
طيب خل احد من اخوانك ولا من اخوياك يروح معاك ويدور ...وتحصنوا واقروا المعوذات
وان شاء الله تلقاه ...
وبالتوفيق

[عزيز النفس 66]

جهاز كشف الجوالات يستخدمونه بقصور الافراح وبعض المدارس ما اعرف اسمه لكن نفس الي كاتبه اخونا بالرد الاول الصورة الثانيه


طريقة عمل الجهاز:
هو عبارة عن جهاز صغير تمرره وفي حالة وجود جهاز الجوال يصدر نغمة منبهة أو ممكن أن يكون على وضع الهزاز ,حتى لو كان الجوال مغلق أو كان الجوال بدون بطارية لأنه يتحسس الشرائح المعدنية الالكترونية الداخلة في تركيب الجوال.





قيمة الجهاز:
300 ريال والتوصيل مجاني لداخل مدينة الرياض
يضاف 10 ريال للتوصيل لخارج مدينة الرياض


منقول

وبالتوفيق ,,,

[volcano]

وعليكم السلام ورحمة الله وبركاته

شوف من تطلع من البيت الزم الاستغفار لين توصل المكان وابحث وانت تستغفر شرط تلقاه باذن الله .. هذي مجربة وانا اخوك حتى بعض المشايخ ذكروها وانا جربتها كثير المهم التجربة تكون على سبيل اليقين تستغفر وانت متأكد ان الله ما بخيب ظنك .

بالتوفيق

[محمد-الرس]

أولا احمد ربك ألف مرة >> ضاع منك جهاز ,,,فية أوادم ماتوا ابنائهم .....
ثانيا المكان اللي انت فية قد يكون مسكون بالجن ...
اقرأ وردك ومايجيك شي ....
....الجوال ضاع بمكان ما ...يعني مب معقولة يختفي
وان شاء الله تلقاه
وبالتوفيق....

[اجهزة يدوية]

حياك الله
هذا المنتج عندي ممكن يساعدك
تفضل هنا لتعرف اكثر عنه
http://mtgry.com/aljwalln95/ads/53690/
وبالنسبه للسعر لايهمك لك خصم خاص لانك من مكشات
http://mtgry.com/fgopsx/aljwalln95_6237a0c21d5482e21db1914293e67425.jpg

[كاشت وحداني]

سؤال .
وش موترك
انا مره ضيعت الجوال وقلبت الدنيا عليه 4 ايام واخيرا لقيته ناشب في قاعدة المرتبه من الداخل يعني لما انزل راسي واناظر مباشره ما اشوفه .
الله يدلك ضالتك

[اسهيل]

تبي اروح معك الدور

[اورنس الشرق]

اذا لك احد فى الاتصالات يقدر يحدد لك موقع الجوال ويعطيك الاحداثي

[عاشق ورق]

الله يردلك ضالتك
شريت مره وانا مسافر فول وخبز ورحت للشفا بالطايف انا والعيال جيت ادور الفول مالقيته وانبش السيارة نبش مالقيته تعوذت من الشيطان وافطرنا على الخبز بعد مارجعت للرياض عقب اسبوع اجي انظف السيارة والقاه قدام عيني علما ان سيارتي كابرس
ارجع ومعك واحدمن الربع وان شالله بتلقاه
تحياتي

[حمايهن]

يابن الحلال تعوذ من الشيطان

وبعدين جوالك يمكن انك حاطه فوق الغماره وبعد مسافه طاح حاول انك ترجع مع اثرك وتتأكد ترا السالفه صارت مع ناس كثيييير
وان شاءالله تلقاه

[برديس]

شكرا ياجماعة الخير
صليت بالمكان اكثر من مره ودعيت ولكن مالقيته للحين والحمد لله على كل حال

بالنسبة للأجهزه ماجربت واذا فيه اجهزه للأيجار عادي لكن ماراح اشتري الا انه مضمون يطلعه

والسيارة ابدا ماهو فيها

اقول لكم وصلت اني نزلت المراتب والارضيه للسيارة ماهو فيها مستحيل

اول ماضاع دقيت عليه مغلق

وانا قلت الي بيجيب لي جهاز او فكره له 2000 ريال
يعني الي عنده جهاز يتواصل معي ويأجره بشرط يطلع الجهاز له 2000 من غير قيمة الجهاز
وجربت الوالد الله يطول بعمره وراحنا وشيكنا على الموقع مافيه شي ...

وشكرا لكم

[a1s1am]

أنا عندي الفكرة ألي ترجعلك جهازك بأذن لله تعالى رح إلى المكان الذي فقت جهازك و توض وصلك ركتين وبأذن لله بتلاقية لأن الشيطان بيشغلك في صلاتك فيذكرك بأماكن الي ممكن تجدة فيه
أخوك / أبو عبدالرحمن

[اسلم]

اخوي
انا حاط جزمتي اكرمكم الله خلف باب غرفتي وهذا موقعها الاساسي ويوم من الايام دورت عليها ما حصلتها وبعد اسبوع حصلتها في نفس المكان
اقول يمكن هذا واحد طفران ن الجن اخذ جوالك عاد انت وحظك يمكن يرجعة او يكون نذل ماعنده ذمة

ممكن سؤال :
المكافأة اغلى من سعر الجوال ليييييش ؟

[ALBDRANE]

الجوال نسيته على الطاولة حقت المحاسب في المحطة الي وقفت عندها ... حشكيد مشكيد كوندكساد هههههههه

[مطاليع المزون]

أخوي الله يعينك ويصبرك ،، بس بفيدك بمعلومه مهمه ،، لان حادثتك سبق وحصلت لي حادثه مشابهه لها تقريباً ،،

أول شيء بما أنك نخلت الأرض نخل ولا لقيته ، فتأكد أنه فيه شخص من اللي كانو معك أو اللي ساعدوك وقت التغريزه سرق جوالك ( سواء كان شخص معك بالسياره أو شخص مار عليك وطلب أنه يساعدك ، وتلقاك أثناء محاولة أخراج السياره طاح منك الجوال ولا انتبهت له وسرقه الشخص الثاني وقفله علطول ) صدقني تصير ولاتثق بأحد ترا الشيطان يعمي عيون الناس عن الحرام أحياناً حتى ولو كان جوال وقيمته قليله ،، وأصحاب الذمه قليلين بهالوقت للأسف ،، حاول تتذكر من كان معك وقت التغريزه أو من ساعدك وحاول الوصول له والتحقيق معه وصدقني بعد الدعاء واحسان الظن بالله ستجد أنه مسروق من شخص ما !

[خالد العمراني]

أخوي شف أذا جوالك تتوقع أنه باقي شغال ولا طفى شحن

واذا انت حاط لك منبه ينبه للدوام أو لاي شيء

رووح للمكان اللي تتوقع أن جوالك ضايع فيه في نفس الساعة اللي أنت موقت عليها المنبه يمكن تسمعه يدق
لان الجولات حتى وهي طافية يدق المنبه

نصيحه للجميع :
وقت منبه جوالك على وقت معين يدق فيه الجوال واجعل التنبيه متكرر يعني يدق يوميا
هذا عشان أذا ضاع جوالك في مكان ما حتى لو مافيه شبكة تجي له بنفس وقت المنبه تسمعه يدق.

أتمنى أن الفكرة وصلت لكم

والله يجمعك بجوالك أخوي برديس

[ابو الماسه]

رح للمكان وقل ( اللهم رب الضاله اهد الضاله لايهدي اليها الا انت)
اللهم صلي على محمد

[ودي تشوف الهم]

الله يرد لك ضالتك
ياخوي الموسم الي طاف من طرح الطيور
قانصين انا واخوي حول الدبدبه وحنا نجربع بلليل طاح بوك اخوي منه
ولافقدناه الا يوم جينا نعبي بنزين وندور وندور ونرجع لمكانا وندور ونمرح ورحنا لمركز الشرطة
وماقصروا الاخوان طلعوا ودوروا معنا ولالقينا شي المهم بالعربي انقطعنا ونروح للمحطه ومافي مخباي غير 20 ريال ونلقى عجوز تطلب الرزق على باب البقالة قالت لااخوي عطني يعطيك الله وقالها سالفتنا وقالها ان لقيناه لك 1000 ريال وطلعنا من البقاله الظهر وعودنا لمحلنا وبالخط ونلقاه وتصير من رزق العجوز
وهذا ربك يسوق الرزق لعباده
فانت بدل لاتعطي2000 انذر نذر لوجه الله وان شاء الله بتلقاه

[برديس]

ياأخوان مافيه شي من الي ذكرتوه ماسويته
ولا طلعنا بحل
الموضوع واضح الي عنده فكره والا جهاز يتواصل مي ع الخاص او ع العام
ويطلع معي للمكان اذا حصلناه له 2000 ريال
وشكرا لكم ولأقتراحاتكم

[المعرقب]

الله يكووون بعووونك ارجع المكانك الي غرزت فيه وحفر عند الكفارات الي برحتلها الاربعه وتلقاااه
واحد تراه مبندقك يعني معطيك عين وعلشان كذا تحس نفسك تظيق
راح هلحين وبتلقااااة باذن الله

[عالي الكيف]

السلام عليكم ورحمة الله

قد صارت معي نفس قصتك مع الجوال لكن الجوال ماكان لي ( لولد اخوي )

دورناه من بكره في محل غرازنا ولا لقينا ,,,دقيت عليه وسمعت النغمه بعييييييييييييد

مشيت على الصوت ولقيته ((( لكن الغريب لقيت جرة كلب الله يكرمكم )))

سألت ولد اخوي قلت له انت جيت هنا قال لا !!!!

معناتها ان الكلب شاله من مكانه ورماه في مكانه اللي لقيناه فيه ((( يمكن كان فيه ريحة دسم بعد العشاء)))

[دل البحار]

يالطيييف ألطف
أخي الفاضل عليك بقرأة القرأن والمعوذات ، تبعدك عن الشياطين
هذه القصة العظيمة التي رواها الإمام البخاري رحمه الله تعالى في صحيحه : عن أبي هريرة قال: (وَكَّلَنِي رسول الله صلى الله عليه وسلم بحفظ زكاة رمضان، فأتاني آتٍ فجعل يحثو من الطعام، فأخذته وقلت: والله لأرفعنك إلى رسول الله صلى الله عليه وسلم، قال: إني محتاج وعليَّ عيالٌ ولي حاجةٌ شديدة، قال: فخليت عنه، فأصبحت فقال النبي صلى الله عليه وسلم: يا أبا هريرة ما فعل أسيرك البارحة؟ قال: قلت: يا رسول الله! شكا حاجةً شديدة وعيالاً فرحمته فخليت سبيله، قال: أما إنه قد كذبك وسيعود، فعرفت أنه سيعود لقول رسول الله صلى الله عليه وسلم: إنه سيعود. فرصدته فجاء يحثو من الطعام فأخذته فقلت: لأرفعنك إلى رسول الله صلى الله عليه وسلم، قال: دعني فإني محتاج وعلي عيالٌ ولن أعود، فرحمته فخليت سبيله، فأصبحت، فقال لي رسول الله صلى الله عليه وسلم: يا أبا هريرة ما فعل أسيرك؟ قلت: يا رسول الله! شكا حاجةً شديدةً وعيالاً فرحمته فخليت سبيله، قال: أما إنه قد كذبك وسيعود. فرصدته الثالثة فجاء يحثو من الطعام، فأخذته فقلت: لأرفعنك إلى رسول الله صلى الله عليه وسلم، فهذه ثلاث مرات تزعم أنك لا تعود ثم تعود، قال: دعني وسوف أعلمك كلماتٍ ينفعك الله بها، قلت: ما هي؟ قال: إذا أويت إلى فراشك فاقرأ آية الكرسي – {اللَّهُ لا إِلَهَ إِلَّا هُوَ الْحَيُّ الْقَيُّوم } [البقرة:255]- حتى تختم الآية، فإنه لن يزال عليك من الله حافظ، ولا يقربنك شيطانٌ حتى تصبح؛ فخليت سبيله. فأصبحت، فقال لي رسول الله صلى الله عليه وسلم: ما فعل أسيرك البارحة؟ قلت: يا رسول الله! زعم أنه يعلمني كلماتٍ ينفعني الله بها، فخليت سبيله، قال: وما هي؟ قلت: قال لي: إذا أويت إلى فراشك فاقرأ آية الكرسي من أولها حتى تختم الآية: - {اللَّهُ لا إِلَهَ إِلَّا هُوَ الْحَيُّ الْقَيُّوم} [البقرة:255]- وقال لي: لن يزال عليك من الله حافظ ولا يقربك شيطانٌ حتى تصبح -وكانوا أحرص شيءٍ على الخير- فقال النبي صلى الله عليه وسلم: أما إنه قد صدقك وهو كذوب، أتعلم من تخاطب منذ ثلاث ليالٍ يا أبا هريرة ؟ قال: لا. قال: ذاك الشيطان).

[viv999]

جب راديو ولف حول المكان اذا كان يشتغل الجهاز

[جيمكروز]

تصدق اخوي بديت اشك في الآمر .....ليش...؟
انا اقولكم ليش....
مقعولة واحد يضيع جوال يحوســ عشان يحصلة ....>معناته في شي خاص
او
معليش على الكلمة بس جرد توقع ...
ان صاحب الموضوع وراه سالفة كايده ...بس مدري ايش السالفة .

[ساحووق]

الجوال قيمته 400 رياااااال يعوضك الله خير يارجااااااال

اللي يشووف يقول قيمته 40 الف

[كانون666]

الافكار كلها قلتوها ماعندي شي الايمكن ماخذته بلمره معك او شف اذا كنت نزلت بمحطه
او انت والسياره امغرزه اسف يمكن يمكن قضيت عليه
والله ساااااااااالفه الصراحه منتضر وش يصير

[محمد النجدي]

بسم الله الرحمن الرحيم


بعض الأفكار ممكن تساهم في الوصول اليه :

دور في شنطة العزبة وفي دروجها وسحاباتها .
دور في ثيابك التي كنت تلبسها فربما انك وقت الغراز نزعت ثوبك وغيرته بقميص او لبس رياضي وبقي الجوال في الثوب الاول

دور في شنطة السيارة في شنطة العدة في محل عفريته السيارة ان كنت قد استعنت بها
اذا كنت مستخدما شنطة ملابس ففتش بها

دور في الأكياس التي بالسيارة ....داخل جزمة الكورة

هل فتحت كبوت السيارة اثناء مكوثك في المكان

قصة حدثت لي :

كنت عند البحر انا والعائلة ومعي سيارة جي ام اس وبعد صلاة العشاء قررنا العودة للسكن وحملت الأغراض ومشينا وكانت الارض بطناج الى ان مسكنا الطريق المسفلت وبعد 25 كلم أردت أن اتصل بالوالدة للسلام عليها ولم اجد الجوال فأدركت انني اضعته عند البحر

فقررت ان انزل الاهل في السكن لاننا كنا قريبين منه واذهب بعدها للبحث عنه

وسحان الله الجوال كان جديد وغالي الثمن وكنت واضعا له تلبيسة من البلاستيك خوفا عليه

المهم اول ما وصلت السكن وانا اضع رجلي على الارض واذا بالجوال على الدعاسة عند رجل السائق

سبحان الله كل هذه المطبات والسرعة ولم يسقط

بكل تأكيد ان الأذكار والمحافظة عليها هي السبب بتوفيق الله

الله يرد ضالتك واعلم ان الخيرة فيما اختاره الله

[خوي الشاص]

هلا اخوي مو شرط انه بنفس المكان يمكن انك حطيته على الكبوت او انه طاح على الوطايه الخارجيه ومشيت مسافه وطاح لاكن مثل ماقالو الاخوان صل ركعتين واطلب الله وبعدين على عموم الاخوان لازم الشخص يحط رمز شخصي للجوال ورمز شخصي مخالف للذاكره عشان حتى لو ضاع الجوال او انسرق وفيه طريقه اجمع البزارين وخلهم يدورونه شرط خمس دقايق وهم جايبينه لك

[dr.mekshat]

انت ضاع عليك جوال قيمته 400
قبل شهر ونص تقريبا كنا طالعين وواحد من الشباب ضاع عليه اي فون فور بنفس الطريقه اللي ضاعت منك ولا فيه شي ما سواه وما لقيناه كأن الارض بلعته
نصيحتي اطلب العوض من الله

[سليمان الربيعان]

الله يعوضك بخير منه صل ركعتين وادع الله انه يرجعه لك :(

[مركز الثقل]

لو هو اي فون 4000 ريال كان شكلك مرقد بالتخصصي ههههههه الله يوفقك وتلقاة

[حبنان]

ارجو ان تظنوا باخيكم خيرا الرجال داخل جواله شي مهم ثل صور او ارقام او حسابات اكيد ماتعب الا فيه سر قد يكون محقق والموضوع له صله بحادثه او قد يكون هناك رسايل مهمه او ماشابه ذلك ماوصلت انه يصرف 2000 ريال وينبش الارض عبث الواحد لازم يفكر بعقله يااخوان

[Xterra11]

قل الدعاء اللهم ياجامع الناس ليوم لاريب فيه اجمعني بضالتي
واتوقع انك حطيته ع السياره ومشيت وطاح بالطريق فحاول تتبع اثرك لعله موجود

[حسن الشمالي]

اخي الكريم كانك ملزم علية
فأبحث عنه في الظهيرة الساعة الواحدة ظهرا في الصيف
وان لم تجدة فجب شيول وشل من الرمل اللي مغرز فية وودة لاقرب قاع وانثرة
وكلها 7 او 8 غرفات وتبي تلقاه ان كان موجودا....
او
الاوقات هذي ايام هبايب
مع الايام يبي يظهر الجوال من الهوا

لا تنسى اذا لقيتة حولي الالفين