روباجة الطير غريبة ؟؟

[أبوتركي]

السلام عليكم ورحمة الله وبركاته..

مساء الخير على جميع الأعضاء ..

مالكم بالطويلة نبي ندخل بالموضوع على طول ..

أنا عندي طير حر فرخ ..وقبل كم يوم شفت الطير وهو يروبج بطريقة غريبة ...لأن الروباجه ماطلعت زي العاده على شكل دائري ، لكنها هالمرة طلعت مفتتة على قطع صغيرة مرة ووسخت الطير .. كأنها الله يعزكم ترجيعه ماهي روباجه ...علما أن الطير كان عالف حمامه مع الريش.. وبعد يومين سوى الطير نفس الحركة !!

مادري ياشباب وش العلة هل باطنية الطير ماهي تمام ؟ ياليت اللي عنده خبر يفيدنا ومشكورين مقدما ..



وعليكم السلام ورحمة الله وبركاته

[ابو عايد]

السلام عليكم ورحمة الله وبركاته

مرحبا اخوي أبوتركي

كأنك حول الرياض افزع بالطير لمستشفى الصقور وان شاء الله يشخصون الحاله ويعطونك الدواء المناسب

وجعل الطير مايشوف شر هو وراعيه{لمستشفى 014567723 }

[مارشال]

السلام عليكم
هل روبج الطير بهذه الطريقة وهو مفرع ام مبرقع
وشكرا

[المري]

دائما تحصل مثل هالروباجه وخاصه اذا الطير حاووول يروبج وهو مبرقع ...

او ان الطير يأكل على رمل فتأتي روباجته مقطعه..


وسلامتك..

اخوك / المري

[# نومـــــاس#]

يا اخ ابو تركي طيرك انشاء الله مابه الا العافيه

يمكن يكون البرقع ضيق والروباجه كبيره وبها الحاله لايمكن ان تخرج الا بها الطريقه اللي قلتها ، لاكن انصحك بتغيير البرقع وجرب لعله يكون السبب ، اما اذا كانت الروباجه بها الشكل وهو مفرع فحاول اخي الكريم ابعاد الطير عن الشحم الزائد اللي بنفس العلف وحاول انك تعلفه بعد ما تسلخ اللحم عن الشحم .

وبالتوفيق انشاء الله

[سرهيد1]

السلام عليكم ورحمة الله وبركاته

حياك الله أخوي وكلام الاخ نوماس صحيح من ناحية الشحم

أنصحك بان تذيب قليل من الملح في ماء دافيء وتسقيه طيرك قبل العلف

ملاحظة : أسقي الطير هذا المحلول بواسطة برشام وتأكد بانه لا يصل للرئة لانه يهيج الشعب الهوائيه

والله تعالى أعلم

[أبوتركي]

السلام عليكم جميعا ...

أخوي أبوعايد / تسلم يالغالي ماقصرت .. لكن أنا راجعت بالطير قبل أسبوع من اللي جاه وقالو لي الطير سليم ..

أخوي مارشال / الطير سوى هالطريقة هذي مرة وهو مبرقع وكانت الروباجه كبيرة فعلا .. لكن المرة الثانيه سواها وهو مفرع ..


أخوي أبومعيض / ماقصرت يالغالي ..الله يسلمك..

أخوي نوماس / انشالله بنغير البرقع .. لكن ودي أعرف ليه الشحم يسوي كذا ؟ وهل فيها مضره على الطير ..

أخوي سرهيد / لاحظت أن الطير يدور الأشياء المالحه مثل لما يكون حوله كرتون تحصله يقطع فيه !! لكن الصراحه ماعرفت وشو البرشام ؟ ولاعليك أمر ليتك توضح لي..هل هو البخاخ والا شي ثاني ؟



ومشكورين ياشباب جميعا على التفاعل .. والله يجزاكم كل خير ..

[سرهيد1]

السلام عليكم

البرشام هو الحقنه من غير الابره الخاصه بها

تقوم بسحب المحلول بواسطتها وتدخلها في معلف الطير ثم تفرغ المحلول فيه حتى تضمن أن لا يتسرب شي للرئة

ملاحظة : تقوم بذلك والطير ممسوك من قبل معاون لك


والله تعالى اعلم

[أبوتركي]

أخي الغالي سرهيد .. بيض الله وجهك على التوضيح وماقصرت يالغالي وأبشرك أخذنا بنصيحتك .. وضبط الطير .. . الله يجزاك كل خير ويجعلها في ميزان حسناتك ..

أخوك / أبوتركي ..

[سرهيد1]

السلام عليكم ورحمة الله وبركاته

أخوي ابو تركي حياك الله وبياك وجعل الجنة مثوانا ومثواك

والحمد لله على سلامة الطير

هذا من قدر الله سبحانه وتعالى وليس لاي أحد دخل في سلامته غير الله سبحانه وتعالى إنما نحن اسباب ومن أخذ بالاسباب وطاء للقدر

هذا والله تعالى أعلم

[محمود المصرى]

بسم الله الرحمن الرحيم
اولا ماقصر احد منكم ياشباب ثانيا ممكن البرقع ضيق فعلا ثالثا ممكن الحمام يكون عنده برد ولزلك ممكن يعدى الطير بمرض معوى تاكد من سلامه الحمام

وشكرا
محمود المصرى

[عابر المحيط]

ياخوان انا احب الطيور ويالية توضحون انواع الطيور مع الصور وبكل توضيح انكان فرخ ولا قرناس
تروني ماعرف للكمبوتر