المساعد الشخصي الرقمي

مشاهدة النسخة كاملة : تكفون ياهل مكشات وش عقوبة اطلاق النار والسلاح بدون تصريح ؟؟؟؟؟؟؟؟؟؟


عبدالله آل بريك
15/05/2011, 11:53 AM
السلام عليكم ورحمة الله وبركاتة


اخواني الافاضل


احد يفيدني يالربع وش عقوبة السلاح بدون تصريح امسك معي انا وولد عمي رشاشين وساكتون برنو 97 ومية طلقة نارية كنا رايحين قنص في هريسان
واطلاقنا النار وسمع واحد اطلاق النار وبلغ الدوريات وجونا وحنا نايمين وضربوبنا بالسجن وسين وجين ورح وتعال خمس ايام بعدها طلعنا بكفاله


1-الحين هل بيلحقنا شي مع العلم ان ماعلينا مدعي والقضية عند هيئة التحقيق ؟
2- وإذا كان بيلحقنا شي وش بيلحقنا سجن أو غرامة أو إيش بالضبط ؟


--------------------
تكفون لمن عندة خبر لا يبخل علينا
عبدالله آل بريك
15/05/2011, 01:11 PM
26 مشاهدة وما أحد عنده خبر
عاشق المخيله
15/05/2011, 01:27 PM
وين جوكم فيه في هريسان
عبدالله آل بريك
15/05/2011, 07:51 PM
ايه في هريسان حول البياض
mr.قهد
15/05/2011, 07:58 PM
والله وانا اخوك ؟؟؟؟ السلاح الي مو مصرح مصــادره مافيها كلام مع غرامه مااديه..
واطلاق النار سجن من 6 شهور الى 1 سنه وربما اكثر؟؟؟ حسب الي اذكره
تقبل تحيااتي
«نجم الخير»
15/05/2011, 08:04 PM
انت عايش بديره تقدس الواسطات شف لك واسطه تطلع مثل الشعره من العجين
عاشق الوعل170
15/05/2011, 08:11 PM
انا مسكو معي شوزن وغرموني 500 ريال والبندق انساها الا بالواسطه
وان مسكوك مره ثانيه يسجونونك سنه ويغرمونك
قناص صفوى
15/05/2011, 08:47 PM
شوفلك واسطه وانتهى الموضوع
واذا الواسطه قويه تطلع البنادف بعد
YUKON_GMC
15/05/2011, 10:07 PM
اطلاق النار سجن من 6 شهور الى 1 سنه وربما اكثر؟؟؟ حسب الي اذكره

لا لا لاتخوف الرجال :D

اللي انت تقصده لما يكون فيه اطلاق نار على اشخاص ماهو على طيور وبالبر :good2:
الحصان 1
15/05/2011, 10:37 PM
واسطه وتنتهي المشكلة
ابو منور 93
15/05/2011, 10:56 PM
اللة يعوضك ويفكك منهم تقبل مروري
Abo gssar
15/05/2011, 11:13 PM
اللي اعرفه وانا اخوك ان البنادق تتصادر الا اذا كان الموضوع في الشرطة ولا ارتفع من ضمن الوقوعات للداخليه وعندك معرفة يمكن يطلعونه لك وياخذون عليك التعهد . اما بخصوص اطلاق النار اذا اعترفتوا في التحقيق باطلاق النار يختلف الوضع على حسب المكان اللي انتم فيه لانه في داخل المدن والقرى يكون الوضع اصعب اما اذا كان خارج العمران وفي اماكن بعيده يكون الوضع اهون شرط ماتكون داخل محميات وطبعا هناك عقوبات مختلفة على حسب المذكور بالتحقيق لاكن ان شاء الله ان الامور تكون بسيطة طالما مافيه احد يدعي عليكم بانكم اطلقتم عليه النار.
الصايخة
15/05/2011, 11:55 PM
المادة الأربعون :
يعاقب بالسجن مدة لا تتجاوز ثمانية عشر شهراً وبغرامة لا تزيد على ستة آلاف ريال ، أو بإحدى هاتين العقوبتين ، كل من تثبت حيازته لسلاح ناري فردي أو ذخيرة دون ترخيص .

المادة الخمسون :
إضافة إلى العقوبات المنصوص عليها في المواد (الرابعة والثلاثين، والخامسة والثلاثين، و السادسة والثلاثين ، والسابعة والثلاثين ، والثامنة والثلاثين ، والتاسعة والثلاثين ، والأربعين ، والحادية والأربعين) من هذا النظام ، يصادر بحكم قضائي جميع ما يضبط من أسلحة وذخائر ومعدات متعلقة بها ، وإذا كانت المخالفة تهريباً فتصادر وسيلة النقل المستخدمة في التهريب .

الاختصاص بالتحقيق والمحاكمة :

المادة الثانية والخمسون :
تتولى هيئة التحقيق والادعاء العام التحقيق في مخالفات أحكام هذا النظام .
المادة الثالثة والخمسون :
تكوَّن – بقرار من الوزير – لجنة من ثلاثة أعضاء يكون من بينهم واحد من المؤهلين في العلوم الشرعية ، أو النظامية ، للنظر في توقيع العقوبات المنصوص عليها في المواد (الثالثة والأربعين ، والرابعة والأربعين ، والخامسة والأربعين ، والسادسة والأربعين) من هذا النظام ، ويعتمد قرارات هذه اللجنة الوزير أو من يفوضه ، ويجوز لمن صدر ضده قرار بالعقوبة التظلم أمام ديوان المظالم خلال ستين يوماً من تاريخ إبلاغه به .
المادة الرابعة والخمسون :
مع عدم الإخلال بما تقضي به المادة (الثالثة والخمسون) من هذا النظام ، يختص ديوان المظالم بالنظر في قضايا المخالفين لأحكام هذا النظام ، وتوقيع العقوبات الواردة فيه .

المادة الخامسة والخمسون :
لا يخل تطبيق العقوبات المنصوص عليها في هذا النظام بأي عقوبة أشد ينص عليها نظام آخر .
الصايخة
15/05/2011, 11:56 PM
http://vb.bip.gov.sa/showthread.php?t=9115
عبدالله آل بريك
16/05/2011, 08:56 AM
الله لا يهينكم جميع على مروركم شرفتونا وافتونا

والله يا mr .قهد انك خرشتنا يصادرون السلاح بس يفكوننا

اخي SX30 IS جعل والله مايطرحونك شرطة الحوطة
شي اسمة واسطة اغسل يدك كانهم ماسكين اكبر غنيمة
يدريك يوم جونا بعد البلاغ جاينا 6 دوريات من حبهم للشر

وعسى الله يعين وتكفون ياخون اللى يعرف احد في هيئة

التحقيق في حوطة بني تميم

يقدر يتوسط لنا وينهي المعاملة
له 2000 ريال
وحبة خشم فوقها
دوربيل
16/05/2011, 09:37 AM
الله يعينك ويسهل عليك , والله ان البر والمقناص صار مصيبة المصايب , كثرة النااس وقل الصيد وفوق ذا لايوجد مجال تصرح فيه سلاحك , حتى ماتقدر ترمي نصع وتوسع الصدر ...

مير الله ييسر أمركم وتهوون إنشالله بحول الكريم
عبدالله آل بريك
16/05/2011, 11:27 AM
الله يعينك ويسهل عليك , والله ان البر والمقناص صار مصيبة المصايب , كثرة النااس وقل الصيد وفوق ذا لايوجد مجال تصرح فيه سلاحك , حتى ماتقدر ترمي نصع وتوسع الصدر ...

مير الله ييسر أمركم وتهوون إنشالله بحول الكريم



والله انك صادق اخوي

الله يعين بس حتى وسعه الخاطر في البراري
صار فية تنكيد

كانهم يبون يكتمون المواطن بيت - دوام - بيت - دوام
إلين يموت الرجال وهو على هالحال

الله يخراجنا بس هذا اللي بنقدر نقوله
فارس الحربي1
16/05/2011, 01:32 PM
انا عندي واحد من الجماعه دخل مسدس 9ملي بشنطت مرته بشهر العسل وفتشو شنطت مرته وطلعو المسدس
وراجع فيه مرجعه الشرقيه ويالله وبالله افتك منهم دفع غرامه 2000ريال والسلاح مصادره
بس لو معك واسطه تمشي
خيال البوادي
16/05/2011, 02:00 PM
هونها واتهون الأنظمة المذكورة اغلبها ماتطبق والنظام هنا تخويف بس , عسى الله يكون بعونكم اطلب من الوالدة تدعيلك وان شاء الله تفرج .
مرعي السرحاني
16/05/2011, 03:05 PM
اطلاق النار بتصريح ولا بدون واحد كله فيه كلبوش........
عشق سهيل
16/05/2011, 05:42 PM
الله يكون بعونك
ع العمرو
16/05/2011, 06:32 PM
الله يستر عليكم من كل ما تمرون به من ضائقة ويدفع عنا وعنكم الشرور وعظائم الامور وتبي منك التوجه الى رب الارباب ومكون السحاب وعالم السرومايخفى اطلب الله وكفى والصلاة على النبي المصطفى .
عبدالله آل بريك
16/05/2011, 08:42 PM
الله لايهينكم جميع ومشكورين على مروركم شرفتونا


واللهم رد سلاحي سالم غانم يرب العالمين


وهذي صور له زيها عطفة وكرز


http://www.qahtaan.com/works/up/get.php?hash=245abcdimt1219157318
ذيب سايه
17/05/2011, 02:32 AM
الله يعينك ..

وان شاء الله يفكك من معقدين الامور .
عبدالله آل بريك
17/05/2011, 09:55 AM
الله يعينك ..

وان شاء الله يفكك من معقدين الامور .




اللــــــــــــــــــــــــــــــهم آمين