الفورد يحتر ؟ يقطع؟ وش الحل

[حاتم البدراني]

سلام عليكم ورحمة الله وبركــاته..



يا اخوان ويا اهل الخبرة بالفورد عندي مشكلتين ..


المشكلة الاولى


انا عندي فورد له اسبوع بادن يحتر


مع دخلت الحر وش الحل


مع العلم ان الاديتر جديد (صيخ واحد) ورحت وغسلت السرندن والاديتر وغيرت الماء اصلي


بس مافيه فايده


يعني اذا مشيت المغرب او الضهر مسافة 50كم وامشي 140 و ورى


ترتفع الحرارة حول الاتش يعني ثلاث ارباع الانبير واذا هديت حول 70 ترجع


طبيعي النص


وحد من الشباب نصحني اغير بلف الحرارة ...ونتم وش رايكم؟؟


السيارة فورد ماركيز 98
.................................................. ........


المشكلة الثانية


السيارة فيها تقطيع خفيف وانا امشي فقط


واذا هديت ودست احس بالتقطيع واضح


يعني وانا امشي التقطيع خفيف مثل الرجة


واذا هديت مرة ودست صارت زي السيارات الي قيرهن عادي اذا قومتهن بنمرة


باردة مثل الثالث


مع العلم اني غيرت صفاية البنزين و البواجي اصلية والكويلات الي تشبك بالبواجي

والمكينة نضيفة يعني لاتقلب لون الزيت ولا تنقص ولا تدخن صافية ما شاءالله

بس فيه سلك كانه سلك الكويل الي بالدداسن الي مشبوك بوجه المكينة

الايسر يهرب زيت خفيف مدري وش سالفته بس اتوقع ماله دخل

ننتضر رايكم........مع خالص الشكر

::

[مركز حراره]

اخوي تاكد من طرمبت الماء

[حاتم البدراني]

اخوي تاكد من طرمبت الماء

اخوي كيف اتاكد؟

بعدين هو مايحتر وصط الديرة ابد

بس اذا طلعت مشور من الــ50كم وورى وامشي مسرع

ومايرتفع دايم

خمات مره يرتفع ومره مايرتفع


وشاااااااااااااكر مرورك ياغالي

[حاتم البدراني]

؟؟؟؟؟؟؟؟؟؟؟؟؟؟؟
عطون الشور يهل الشور

[عزيز قوم]

أخوي الثلاجة لا يكون تهرب لها سبب في التقطيع الرديتر ينقص مويه أو لا المروحة فيها مشكلة

[مهند الرويلي]

تأكد من تماتيك المروحة أو حط لها بلف ددسن 90-91 اصلي احسن والله يعينك

[مهند الرويلي]

والله اعلم انه تماتيك المروحة اصلي حول 200ريال

[yms002]

المشكلة حصلت لي مع فورد 2002 وصار يوجد تهريب بالثلاجة بسيط ويصب على البوجي زيادة على ذلك وتحتر وتطفي حاولت ادور تهريب وما حصلت ورحت لتشالنجر بالصناعية بالرياض افحص كمبيوتر واكتشف التهريب بالثلاجة لأنها اضنها بلاستيك فايبر وغيروها والحمد لله

[بدوي جنوبي]

مراوح الفورد كهرب

بلف الحرارة Thermostat معلومات + استبدله بنفسك للمبتدئين خطوه بخطوه ب 54صوره (http://www.mekshat.com/vb/showthread.php?t=305944)

هل غيرت غطا الرديتر (أصلا اسمه غطاء القربه الاضافى لكن نسميه غطاء رديتر وهذا خطأ)

[سدير كوم]

اخوي حاتم انا عندي نفس المشكلتين بالضبط وسيارتي فكتوريا 98

[حاتم البدراني]

صبحتم بالخير يالربع

انا رحت القصيم ولقيت هاك الهندي المشورب

يطق صدره ويقول الحل عندي وانا ابوهندي

قالي رح جب بلف حرارة حق كـــــــــــــــابرس رقمه 160

والله وجبته وركبه وماشاء الله هذا زينها مارتفعت

لاكن اه يا لاكنّ!!!!!!!!!!!

يوم رقيت طلعت الغاط وانا مثبت السرعة على 160

والله يوم اعتدلت السيارة ورقت الطلعة وهي تفور الله يجيركم

والله ويفور ضغطي معهاااااااا
..........
تكفـــــــــــــون دورو لي حل قبل لا اولع فيهااااااا
.................................................. .

ركبت بلف +غسلت السرندن والاديتر وركبت ماء اصلي
ولانفع

وش اسوي قبل لا اشب فيهاااا


مع العلم ان كان فيه تهريب بالثلاجه ورحت لمكانيكي

وحط عليه شمع مدري سلكن اسود وضبط لان التهريب خفيف

السؤال هلا الثلاجه لهااااااااا دخل؟؟؟


نبي الحل يالربع افزعووووووووووو


وشاااااااااااااااااااااااااااكر جميع من رد ومر على الموضوووووع

[حاتم البدراني]

للرفع.....

[الهاجر 7002]

قبل معي 2002 فكتوريآ تقطع .. كل شي غيرتهـ


آخر شي طلع من آلثلآجه <~~ لكن مآترتفع آلحرآرهـ ..

بس تقطع رفعت ضغطي .. شريت ثلآجهـ وضبطت لين بعتهآ..حوآلي 950 ..

آن شآء آلله تكون حآجهـ سهلهـ ..

شيكـ على آلمروحهـ ..


آلله يعينكـ

[حاتم البدراني]

ماقصرت على مرووورك

وننتضر باقي الاحتمالات

[K.S.A.A]

أخوي حاتم مشكلة الحراره والله أعلم من الراس
لأنه قد قالي ميكانيكي أن الموتر لما يطلع طلعه طويله
وبعدها يفور هذا دليل أن الراس منشعر .
لكن أنت تأكد من طرمبة المويه .
وهل ماء الرديتر ينقص أو لا ؟؟
في طريقه جربها وهي لما يكون الموتر محتمي أو انت راجع من مشوار قريب
خذ معك فوطه أو قطعه قماش أهم شي حاجه واقيه ليدك
وأضغط على خرطوش الماء ( الرديتر ) إن كانه أنضغط بسهوله فهذا دليل أن الراس منشعر
أما إن كانك لقيته محجر فأن شاء الله إن الراس سليم .

اما التفته مادامك غيرت البواجي والأسلاك والكويلات ولا راحت فهي الثلاجه فيها تهريب بسيط
خصوصا إن كان الموتر إستخدام إمريكي .
والله يوفقك وييسر أمورك .
انا مجرد شخص يبدي رايه معرض للصواب والخطأ ..

[الصيادالمليح]

إحتمال عندك تهريب في الليات و الوصلات حق التبريد و توصيلات المكيف لأن الفورد بشكل عام كل شيء يتداخل في بعض

غير الثلاجة احتمال يكون منها

[حاتم البدراني]

أخوي حاتم مشكلة الحراره والله أعلم من الراس
لأنه قد قالي ميكانيكي أن الموتر لما يطلع طلعه طويله
وبعدها يفور هذا دليل أن الراس منشعر .
لكن أنت تأكد من طرمبة المويه .
وهل ماء الرديتر ينقص أو لا ؟؟
في طريقه جربها وهي لما يكون الموتر محتمي أو انت راجع من مشوار قريب
خذ معك فوطه أو قطعه قماش أهم شي حاجه واقيه ليدك
وأضغط على خرطوش الماء ( الرديتر ) إن كانه أنضغط بسهوله فهذا دليل أن الراس منشعر
أما إن كانك لقيته محجر فأن شاء الله إن الراس سليم .

اما التفته مادامك غيرت البواجي والأسلاك والكويلات ولا راحت فهي الثلاجه فيها تهريب بسيط
خصوصا إن كان الموتر إستخدام إمريكي .
والله يوفقك وييسر أمورك .
انا مجرد شخص يبدي رايه معرض للصواب والخطأ ..

المكينة ماتنقص ولا تغير لون الزيت ولا تدخن ...كيف يكون الراس نشعر؟؟

وموية الاديتر ماتنقص

والثلاجه ماتهرب وشيكت على جميع الخراطيش مافيه تهريب

ومشكووووور على الافاده وماقصرت
جزاك الله خير

[جيب ربع]

تأكد من الخراطيش...

[sniper222]

السلام عليكم
اخوي حاتم توني اشوف موضوعك
لكن شيكت على طرمبة الماء؟
وهل شيكت على المراوح؟
------------
على فكره لي اسبوع وانا في صناعية الخبر
بسبب ان الحراره عندي ترتفع وانا مشغل المكيف الين توصل النص
ولا لقيت لها حل اكيد
كلن يخمن ولا هوب متأكد
لكن الله يعين
نصبر عليها إلى ان نخلص اختبارات

[صريح المقال]

السلام عليكم ورحمة الله وبركاته :)

مانيب ميكانيكي ولانيب خبير، لكن الأمريكي موتري من 7 سنين تقريبا وبأقول اللي عرفته من خبرة ولا تاخذ من كلامي شي أكيد ، لا شفت موترك ولا فحصته :)

ونصيحتي قبل كل شي هي انك لا تبخل على موترك لا خرب تراه ينقلك ويوديك وبعشر دقايق تلقاك قاطع 50 كيلو لو وقف عليك تحسفت قد شعر راسك على تقصيرك في بعض القطع ( وتمشية حالك بغرا ولا صمغ في أمور ما يصلح معها التسليك اللي زي كذا وخاصة قطع المكينة واللي تتعامل مع حرارة شديدة ويتوقف عليها سلامة المكينة ) مثل الثلاجة اللي رحت تسلكها عند أقرب ورشه :)

وأتذكر بيت شعر قريته هنا من أحد الأعضاء يقول فيه:
يا شاري الدون بالدون .. تحسبك غابن وأنت مغبون

---

بالنسبة لحرارة الأمريكي والي عانيت أنا منه بموتري الأول (فورد96) وموتري الحالي (2004) بأعطيك بعض النقاط المهمه والي لاحظت انك ما انتبهت لها من ردودك :

1-الثلاجة: إذا صار فيها تهريب حلها الوحيد تغييرها ولا تقول غالية ولا غيره هذا الحل الوحيد والله يعينك تتعب على شي أصلي وتنتبه لها وبإذن الله بتعطيك نفس عمر الثلاجة الأوله أو أكثر وتراها تخرب في موديلات الـ2008 والـ2009 وهن ما كملن سنة وبالنهاية ترجع للإستخدام .

2- تهريب الخراطيش: تبهذلت منه كثير زمان والي عرفته ان التهريب ممكن يكون أصغر من انك تشوفه :)
ومع حرارة المكينة وحرارة المويه غالباً يتبخر ولا يجلس وبكذا ما تقدر تحكم من مجرد ( النظر) على تهريب الموية .
والأخوان قالوا لك طريقه وهي انك تمسك الخرطوش وتضغطه وتشوف ضغطه كيف ومفروض انه ما ينضغط معك إذا الموتر شغال له فترة والموية حاره ، وفيه أكثر من خرطوش واحد فوق وواحد تحت اللديتر .

3- بالنسبه للحرارة المفاجئة والتقطيع هذي أسبابها كثير لكن مع موترك أغلب الظن انها الثلاجة لأنها خربانه حسب كلامك والله يعينك أنا غيرتها الصيف الي راح بحوالي 1400 مع التركيب وان شاء الله تلقى أرخص وإحتمال موترك قطعه أرخص من موتري بحكم فرق الموديل لكن أرجع وأكرر لا تبخل عليه ولا تصير غشيم وينلعب عليك ، اعرف كم كلفة تركيبه واعرف كم سعر الثلاجة وإذا نويت اشترها أنت وجبها لهم .

4- حاجات كثير تأثر بالأمريكي والصيف يذبحه بالحرارة لكن إذا غيرت الثلاجة بتفرق معك ان شاء الله وإذا تبي زود تضبيط ولاهوب يكلف، عليك بالكناديس كاتمة الصوت ، ومعروف الفورد فيه 3 كناديس أصغرهن تجي بعد القزوز تكون لكتم الصوت وفلترة الدخان الي طالع من المكينة وهذي سلمك الله يكون فيها زي الفلاتر مدري من أي مادة لكن مع الوقت تمتلي وصخ وتنكتم وتطلع كنها قطع ( جص) تسد على المكينة وتكتمها وترفع حرارتها وتضعف العزم ، وأنت بالخيار اما انك تغير الشكمان كامل ولا تفك الكنداسة وتفضيها وبيطلع موترك له صوت ( بربره ) وش زينها :D
وإذا ما تبي الصوت فكها وانطلها ويحط لك ماصورة بدالها أخف صوت ،
ونفس الشي مع الكنداسه الوسطية ان فضيتها من جوا أخف وأريح للموتر ولكن بيطلع صوت وأنا شلتها نهائي وخليتها ماصورة من الصغير إلى الكبيرة ، أما الكبيرة خلها ما تأثر كثير .
وهذا يكلف كحد أقصى 150 ريال ولا عليك منهم هذا سعر كلش وأنا مسويها بموتري الأول من 4 سنين وسويتها بموتري هذا على دخول الصيف ونفس السعر الحمد لله .

5- بلف الحرارة لا تفكه مهما قالوا لك ونصحوك تراه مهم وضروري جداً للسيارة وان بغيت غيره بجديد بس لا تخلي موترك بدون بلف حرارة أبد .

6- الأمريكي يتأثر بالوقفة كثييير وأحيان تنشب بزحمات تخلي الموتر يجاهد عشان يحافظ على الحرارة ونصيحتي تنتبه لا توقف والمكيف شغال فترة طويلة بالبداية بتمشي امورك ومع الوقت بتطلع الخرابات ودايم إذا شفت الموتر بيطول واقف طف المكيف واصبر على الحر ولا تجور عليه تراه حلالك وأمانة بين يديك والله يرزقنا ويرزقك .

هذا الي عندي وعساني نفعتك لو بشي بسيط ولا نبي إلا دعوه بظهر الغيب والله يعين ويوفق الجميع للي فيه خير وصلاح :)

والسلام عليكم ورحمة الله .

[الذيب 502]

يا رجال لا تصلح الثلاجة ولا تطري عليك تصلحها

الغ الثلاجة كلها ما قد شفت فورد الا وهو ملغى الثلاجة

لانها تهرب موية

اشوف الحل هو انك تلغى الثلاجة .
2)تفك البلوف كلها حقت الحرارة

ودائما ابدأ بالارخص والغير مكلف

والله يعينك

[حاتم البدراني]

..........

[حاتم البدراني]

السلام عليكم ورحمة الله وبركاته :)

مانيب ميكانيكي ولانيب خبير، لكن الأمريكي موتري من 7 سنين تقريبا وبأقول اللي عرفته من خبرة ولا تاخذ من كلامي شي أكيد ، لا شفت موترك ولا فحصته :)

ونصيحتي قبل كل شي هي انك لا تبخل على موترك لا خرب تراه ينقلك ويوديك وبعشر دقايق تلقاك قاطع 50 كيلو لو وقف عليك تحسفت قد شعر راسك على تقصيرك في بعض القطع ( وتمشية حالك بغرا ولا صمغ في أمور ما يصلح معها التسليك اللي زي كذا وخاصة قطع المكينة واللي تتعامل مع حرارة شديدة ويتوقف عليها سلامة المكينة ) مثل الثلاجة اللي رحت تسلكها عند أقرب ورشه :)

وأتذكر بيت شعر قريته هنا من أحد الأعضاء يقول فيه:
يا شاري الدون بالدون .. تحسبك غابن وأنت مغبون

---

بالنسبة لحرارة الأمريكي والي عانيت أنا منه بموتري الأول (فورد96) وموتري الحالي (2004) بأعطيك بعض النقاط المهمه والي لاحظت انك ما انتبهت لها من ردودك :

1-الثلاجة: إذا صار فيها تهريب حلها الوحيد تغييرها ولا تقول غالية ولا غيره هذا الحل الوحيد والله يعينك تتعب على شي أصلي وتنتبه لها وبإذن الله بتعطيك نفس عمر الثلاجة الأوله أو أكثر وتراها تخرب في موديلات الـ2008 والـ2009 وهن ما كملن سنة وبالنهاية ترجع للإستخدام .

2- تهريب الخراطيش: تبهذلت منه كثير زمان والي عرفته ان التهريب ممكن يكون أصغر من انك تشوفه :)
ومع حرارة المكينة وحرارة المويه غالباً يتبخر ولا يجلس وبكذا ما تقدر تحكم من مجرد ( النظر) على تهريب الموية .
والأخوان قالوا لك طريقه وهي انك تمسك الخرطوش وتضغطه وتشوف ضغطه كيف ومفروض انه ما ينضغط معك إذا الموتر شغال له فترة والموية حاره ، وفيه أكثر من خرطوش واحد فوق وواحد تحت اللديتر .

3- بالنسبه للحرارة المفاجئة والتقطيع هذي أسبابها كثير لكن مع موترك أغلب الظن انها الثلاجة لأنها خربانه حسب كلامك والله يعينك أنا غيرتها الصيف الي راح بحوالي 1400 مع التركيب وان شاء الله تلقى أرخص وإحتمال موترك قطعه أرخص من موتري بحكم فرق الموديل لكن أرجع وأكرر لا تبخل عليه ولا تصير غشيم وينلعب عليك ، اعرف كم كلفة تركيبه واعرف كم سعر الثلاجة وإذا نويت اشترها أنت وجبها لهم .

4- حاجات كثير تأثر بالأمريكي والصيف يذبحه بالحرارة لكن إذا غيرت الثلاجة بتفرق معك ان شاء الله وإذا تبي زود تضبيط ولاهوب يكلف، عليك بالكناديس كاتمة الصوت ، ومعروف الفورد فيه 3 كناديس أصغرهن تجي بعد القزوز تكون لكتم الصوت وفلترة الدخان الي طالع من المكينة وهذي سلمك الله يكون فيها زي الفلاتر مدري من أي مادة لكن مع الوقت تمتلي وصخ وتنكتم وتطلع كنها قطع ( جص) تسد على المكينة وتكتمها وترفع حرارتها وتضعف العزم ، وأنت بالخيار اما انك تغير الشكمان كامل ولا تفك الكنداسة وتفضيها وبيطلع موترك له صوت ( بربره ) وش زينها :D
وإذا ما تبي الصوت فكها وانطلها ويحط لك ماصورة بدالها أخف صوت ،
ونفس الشي مع الكنداسه الوسطية ان فضيتها من جوا أخف وأريح للموتر ولكن بيطلع صوت وأنا شلتها نهائي وخليتها ماصورة من الصغير إلى الكبيرة ، أما الكبيرة خلها ما تأثر كثير .
وهذا يكلف كحد أقصى 150 ريال ولا عليك منهم هذا سعر كلش وأنا مسويها بموتري الأول من 4 سنين وسويتها بموتري هذا على دخول الصيف ونفس السعر الحمد لله .

5- بلف الحرارة لا تفكه مهما قالوا لك ونصحوك تراه مهم وضروري جداً للسيارة وان بغيت غيره بجديد بس لا تخلي موترك بدون بلف حرارة أبد .

6- الأمريكي يتأثر بالوقفة كثييير وأحيان تنشب بزحمات تخلي الموتر يجاهد عشان يحافظ على الحرارة ونصيحتي تنتبه لا توقف والمكيف شغال فترة طويلة بالبداية بتمشي امورك ومع الوقت بتطلع الخرابات ودايم إذا شفت الموتر بيطول واقف طف المكيف واصبر على الحر ولا تجور عليه تراه حلالك وأمانة بين يديك والله يرزقنا ويرزقك .

هذا الي عندي وعساني نفعتك لو بشي بسيط ولا نبي إلا دعوه بظهر الغيب والله يعين ويوفق الجميع للي فيه خير وصلاح :)

والسلام عليكم ورحمة الله .

جزاك الله خر وماقصرت على المحاضره المفيده هههه

والله يكثر من امثالك

ويزقك بالفورد الي مايكثر طلباته

وبنت الحلال الي ماهي كثيرة طلباتها

قل امين..

مشكووووووووور

[حاتم البدراني]

السلام عليكم
اخوي حاتم توني اشوف موضوعك
لكن شيكت على طرمبة الماء؟
وهل شيكت على المراوح؟
------------
على فكره لي اسبوع وانا في صناعية الخبر
بسبب ان الحراره عندي ترتفع وانا مشغل المكيف الين توصل النص
ولا لقيت لها حل اكيد
كلن يخمن ولا هوب متأكد
لكن الله يعين
نصبر عليها إلى ان نخلص اختبارات

وعليكم السلام

هلا ابوبراهيم

شيكت على كلشي مابقا الا الراس شكلي ابشيك عليه

يارجال السيارات مايعيشن بالسعودية مع ذى الحر

الضاهر نبي نرجع للخيول والبل ابرك
...
الا خل السيارات والحرارة على جنب وين الي يبي يسير علي؟؟

الله يعين يارجال

[K.S.A.A]

وأنت الصادق ياحاتم عليك بالياباني وأترك عنك الأمريكي إن كانك تبي تريح راسك .
لكن حبيت أعلمك أن الراس ماله دخل بزيت المكينة أبدا .
والله يوفقك

[عبدالرحمن السالم]

غير غطاء الرديتر بواجد جديد وان شاء الله يضبط معك
اتوقع فيه تبخير عندك من الغطاء ، ايضاً يمكن حدى الشكامين عندك منسد إلى هي (الشخالات)

[حاتم البدراني]

وأنت الصادق ياحاتم عليك بالياباني وأترك عنك الأمريكي إن كانك تبي تريح راسك .
لكن حبيت أعلمك أن الراس ماله دخل بزيت المكينة أبدا .
والله يوفقك

مشكووور على المرور




غير غطاء الرديتر بواجد جديد وان شاء الله يضبط معك


اتوقع فيه تبخير عندك من الغطاء ، ايضاً يمكن حدى الشكامين عندك منسد إلى هي (الشخالات)


وديته امس لحق الاديترات وقال
ان الاديتر والخراطيش كويسه
وقالي وده للمكنيكي يشيك على الراس اكيد فيه مشكله