المساعد الشخصي الرقمي

مشاهدة النسخة كاملة : وش حل المكافخ .......!!!


blehe2002
15/12/2005, 11:02 AM
السلام عليكم ورحمة الله وبركاته........

يالربع عندي طير -هبل بي وجاب لي الصمرقع - ... أزعجني بالمكافخ ... أمس حطيته على يدي ساعه كاملة امسح على صدره واتوددله وبعدين لاحسيت انه سلك معي قام يكافخ .....

وش الحل.............!!

وهل برقعة الطير أثناء التدهيل تجيب نتيجه ....!!
blehe2002
16/12/2005, 01:31 AM
عطونا وجه يالاخوان ..........الي يعرف لايبخل علينا
عبدالله الصالح
16/12/2005, 03:21 AM
اكثر من تدهيل الطير وهو على يدك

وخاصه وانت تعلف الطير

وخلك مفرعله اثناء جلوسك في مكشات او غيره

وعموماً الطيور وفقه به شي يسلك وشي مايسلك

وعلى فكره وشو طيرك



اخوك القصمنجي ......
راكب الستين
16/12/2005, 04:07 AM
السلام عليكم ورحمة الله وبركاته

اخ blehe2002لايكون طيرك مذير من راعية الاول خله يجوع وفرعه وادعه وعلفه وامسح عليه وخله على يدك

وتوددله ( وخذه معك في السيارة وافتح الدرايش وانتبه للمواس لا تتكسر ).

يا طير ماحدك نصيبك على خير **** وراك مسجون بوسط الغمارة

حسبي على اللي عزروا فيك تعزير **** تكفخ ويصلاك الحديد بحراره

حشرت وحش البر حتى العصافير **** من يوم دور من وراها تجارة

مار الغشيم من الولع غير تدبير **** دايم عماره صاير في دماره

تحياتي

اخوك / راكب الستين
blehe2002
16/12/2005, 12:39 PM
الله يعطيكم العافية .... الطير فرخ شيهانه بحريه
ابو طنب
16/12/2005, 06:40 PM
السلام عليكم ورحمة الله وبركاته

الطير اللي عندك لازم انك تنقله معك وتبلج عنه

وتدهله بكثرة ولازم انك تكون شحيح عليه فالعلف

لا تعطيه شيء خله على النسر نسرله سيء بسيط

جناح حمامه او اصغر بعد ولا تكون كل يوم يوم نسرله ويوم خله

والجوع انشاء الله ان يبي يركد طيرك و اذا جيت بتعلفه خله ينقز على يدك

والله اعلم

تحياااااااااااااااااااااااااااااااااااتي
اخوك ابوطنب
blehe2002
16/12/2005, 06:55 PM
الله يعطيك العافية ...
طيرحوران
17/12/2005, 08:45 AM
بليه 2002 حياك الله
عندي علاج له مجرب وممتاز مافيه كلام والطير والله بعده مايرف جناحه لا على تكيه ولاعلى يدك
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟
ودك تعرفه ولا ماودك شكلك ودك تعرفه
اعلمك عنه بس اول شيء اسمي عليك
العلاج رقمه 1 ظغط 0 عرفته
فشقة الشوزن
هاها
اصبر لاتزعل علي علاج العلاج الثاني يمكن يصلح معك
وهو الشياهين تراه ماتركد مثل الحرار ابد
لكن وسع صدرك عليها وانقلها على يدك وخل البرقع بيدك الثانيه ثم إذا حسيت أنها تبي تكفخ برقعها ولا تشد البرقع لأنك تيبي تفكه الحين ثم إذا ركدت شل البرقع وعلى هالطريقه بالجلس وفيه رجاجيل وصجه ولجه لاكن لايكون في المجلس بزران أو اطفال لأن الطير عدوه اللدود الصغير ماله خلق عليه
وإذا حطيت الطير على وكره ومبرقع جب الرادو وخله يشتغل عنده ولا يسكت ابد
والطير لايعلف إلا على يدك ولا تضايقه إذا جاء يعللف خله يحس بالأمان منك وإنشاءالله بتشوف تغيير بالطير ملحوظ
وآسف على الإختصار الشديد .والسموحه منك
والسلام
# نومـــــاس#
17/12/2005, 10:01 AM
اخي العزيز blehe2002 عندي لك علاج بسيط جداً وما كل واحد يعرفه وترى هالطريقه مجربه على كثير من الطيور وهي كالتالي:

حط الطير على يدك وهو مفرع ورشه بالماء بالتدريج وهو بها الحاله ترى بيكفخ لاكن حاول مره ومرتين حتى يبتل ريشه بالكامل وترى الماء مايضر الطير ابد وحاول انك ماتنزله من يدك حتى ينشف الطير بالكامل وبأذن الله مره والا مرتين راح تجد الفرق وراح يركد.

ملاحظه اخي العزيز:
حاول انك تجنب الطير المكيفات بعد رشه .
حاول انك ماتفرعه دوم الا وهو على يدك.
وقت تدهيل الطير وقت العشاء ومن بعده .
خفف العلف الطير .

وبالتوفيق انشاء الله
blehe2002
17/12/2005, 10:46 AM
اخوي طير حوران ... كثر الله خيرك ....مشكور وماقصرت وعلى العموم جربت طريقتة البرقعه ...لكن الطير سريع مايمدين الحق ابرقعه قبل مايكفخ ...

الاخ نوماس ...ماقرت يابعدي ... هالطريقه جديده علي ولازم اجربه .... الله يعطيك العافية ...

مشكورين جميعاً وما قصرتوا يالغالين
ذيب الساحل
17/12/2005, 08:24 PM
طريقة نوماس طريقة100/100ومجربة
blehe2002
18/12/2005, 12:21 AM
أبشركم الطير زان طبعه بفضل الله ثم ببركتكم ... هذا اليوم الثالث له ودعيته من مسافة متر .... إنشالله السبوع الجاي او الي بعده على الملواح .... كثر الله خيركم ............. سلمتوا عسى الله يرفع دجاتكم
ابو طنب
18/12/2005, 06:57 PM
الله يطعمك من خيره ويكفيك شره


لا كن خلك على التنسير لا تشبعه هالأيام وهو صنيع


ثمن يتنكر عليك


تحيااااااااااااااااااااااتي لك
حر الجنوب
21/12/2005, 07:56 PM
بسم الله الرحمن الرحيم
السلام عليكم ورحمة الله وبركاته
الحمد لله بعد مازان طبع الطير
والبركه عاد في الشباب الله يجعله في موازين حسناتهم
لزوم الحين تخبرنا علي الهدد والمقناص
تحياتي
blehe2002
21/12/2005, 09:12 PM
ابشر والله ..... أول هدد له ابصوره وانزله هنا
صوح الجبل
22/12/2005, 03:03 AM
والله وانا اخوك الشياهين البحريه ..... دمها حار .... ولاتوالف على سنع .... لاكن احرص على ان يكون تعليفها وقت واحد .... لايتغير تراها مااسرع ماتستنكر .... والا وانا اخوك ..... طق الحر ..... وارتح تراه بيريحك واجد وتولع فيه اكثر
blehe2002
22/12/2005, 07:34 PM
أنا كان عندي حر وجابلي قيمة زينه وبعته .... ويوم جيت أشري خطر ابالي الشواهين قلت خن نجرب هالسنه الشواهين .... والله على قولك الحر مامثله