معي 50.000 وش تنصحونن اشري

[فرخ قطا]

السلام عليكم كيف حالكم مثل ماهو في العنوان ودي اشري موتر يصلح للديره يعني مب ثقيل ولا شي وبنفس الوقت يصلح للبر مع العلم جربت باترول 2003 باب وثقيل ويصرف بنزين ماخاب من استشار انتظركم اخواني

[نديم القهوة]

الله يعينك ويسر امرك

[الدنيا سفر]

الله يوفقك
جيب نيسان
وستخر وصل ركعتين صلاة الاستخاره

[أبو إياس]

كورولا :D:D

أمزح (طال عمرك):( بس الوقت هذا الخمسين ألف ماتجيب شئ يسوى وعليه العلم والله المستعان ..

أتوقع يمكن امريكي إذا كنت من عشاق البر

[ولد الغلباء]

لاتعدى الهلي نصيحة مجرب
ولاتنسى الاستخارة
ومبروك مقدما

[درعية ديرتي]

السلام عليكم
الله يوفقك اخويي على العموم
فيه مزاد علني على سيارات شركة الكهرباء جيوب موستبيشي باجيرو ماشيه 100000 وانت نازل موديلات 2007 2006 والقليل من 2008
المهم اسعرها على حسب النظافة والممشى وهي تابعة لشركة شري
وفيه فورد كراون فوكتوريا وميركوري ولومينا
بالنسبة للاسعار من 43000 الى 50000
الله يوفقك
السيارات نظيفه وجديدة بعضها جايه كد وبعضها ممتازة
اتمنى اني شرت عليك وبالنسبة للاسعار هذي فهي اسعار منافسة وفيها مكسب لو بعتاها خارج المزاد العلني

[فرخ قطا]

جزاكم الله خير وكثر الله من امثالكم لاحرمكم الاجر

[شيخ المواتر]

كان في راسك كروزر

تقدر تقول تجيب لك Gx 1996 . :) و يمكن يكون ماشي اكثر من 300 .. صراحة ماعندي خبرة

و الموتر لا يعلى عليه .

[فرخ قطا]

كان في راسك كروزر

تقدر تقول تجيب لك Gx 1996 . :) و يمكن يكون ماشي اكثر من 300 .. صراحة ماعندي خبرة

و الموتر لا يعلى عليه .

اخوي هل هو نضيف ومتماسك مابه اصوات ولارجه
شف عنه وخبرن

[شيخ المواتر]

اخوي ما اتكلم عن موتر معين انا شايفه وعارضه للبيع بس اتكلم عن الموديل نفسه ..

يشهد الله انه موتر متماسك بمعنى الكلمة ولا فيه رجه .. بالنسبة للأصوات ما اخفي عليك فيه صوت صرصره أحياناً بس ما ادري وش عيبه (يمكن من الشكمان مب ثابت) .. سمعتها في اكثر من جيب موديل 96 .

بس بشكل عام خذه موتر ينشد به الظهر :)

[فرخ قطا]

جزاك الله خير ماقصرت

[راكان 11]

والله ان الـــــ 50 الف هاليومين مثل الــــ 25 الف قبل ثلاث سنين ماتسوي شي

[قاصد_الخير]

واحد من الشباب راح للكويت واسترى جيب مستبيشي 2007
بـ 36 الف
نظيف

نفس سيارات ( ساهر )

[MjNo0oN]

اخوي عليك بالباجيرو ربع باب واحد مكينة 3.8 بتلقى 2006 دون القيمة الي معك ونضييف ممشاه دون ال100 وانت وشطارتك و الموجود في السوق

وفيه شور ودي اشور عليك لاكن انا الصراحه ماجربته في الديره مجربه في البر شفلك هايلوكس دفرسين مديل 2006 او 2007 تلقاه حول القيمة الي معك في بعض مواصفاتهن الموتر تراهيبيض الوجه وعزمه حليل بس اهقى انه حول الباترول مهوب بعيد عنه او شف لك ددسن دبل تراه مهوب شين وماشي مع الناس وبعضهم يفضله على الهايلوكس الدبل

او اذا ماهمك تشيل معك احد عز الله الهايلوكس الغمارة غزال ماشاء الله عليه وممشاها في النفود يبيض الوجه لاكن جبلها سواق ماتعود على الجيب

او ربع تيوتا 2003 او 2004 يبيض الوجه في كل مكان بس عليك بالنضيف و النضاف في هالموديلات اغلب الوانهن بيض او شاص بس بيجيب لك موديل اقل حول ال2000 او 2001 انت وحضك ويمكن ماتلقاه

او تشوف لك باترول فتك 2002 تلقاه بحول القيمه الي معك مهوب بعيد عنها

واذا قفلت في وجهك والله لايقوله عليك بجمس الحوض شاص طويل دبل ارضي وابعد عن ابو شاص قصير عكاسه كثير و الموديلات تجيبلك من 2006 لل2004 شي نضيف ممشاه حول ال100 ويحبه قلبك وعز الله انه ابيض وجه بس عليك بالشاص الطويل وهاذا كلامي من تجربة احد الاخوان له دفرنشه و قيره وعكوسه ومكينته اكبر وتعيش وتتحمل الجور اكثر من ابو شاص قصير


ونصيحه لك ابعدعن الشروكي و الباث فندر ولاتغرك اسعارهن ووذافتهن تراهن ان عوكسن معاد وقفن

[MjNo0oN]

والله ان الـــــ 50 الف هاليومين مثل الــــ 25 الف قبل ثلاث سنين ماتسوي شي

عز الله انك صدقت

بس عموماً الجيوب غاليه وربعك مايرغب الا التيوتا وان قلت دراهمه التفت على النيسان وقليل من يفكر بالمتسوبيشي و السوزو و الشروكي < لاكن ماينلامون قطع غيارها نااااار

[فارس الحربي1]

يالطيب انا ابي انصحك نصيحه لوجه الله اذا كنت عسكري خذلك اجازه خارجيه واطلع للامارات
عمي باخر عطله جيبله هلكس 2010 غمارتين وحده دبل ووحده عاديه جل ال اكس ورخيصه بالمره 32الف مع انها وكاله
او مر الزاد اللي على طريق الفروسيه وانت طالع من حي الجنادريه بالرياض كل يوم خميس او كل يوم جمعه يبيعون فيه سيارات الحكومه وارجو اني افتدك يالغالي

[قناص خلاوي]

مثل ماشاروا عليك الربع
واذا انت هاوي الددسن خذ لك ددسن غمارتين دبل (ديزل أو بنزين) والديزل أحسن من وجهة نظري
عزم وراحة ورخص وقطع متوفرة بس عيبة الغمارة الثانية ضيقة
بالخمسين الف تطق واحد اخو الجديد موديل 2008 -2009وفيها
بالتوفيق اخوي

[فرخ قطا]

اخواني جزاكم الله خير وبيض الله وجيهكم
والله اني تحيرت لاكن الله يكتب الي فيه خير

[فرخ قطا]

للرفع رفع الله مقداركم

[web]

السلام عليكم ..

دامك تقول لديره وان طلعت البر ..وبالمبلغ الي تقوله ..

انصحك بالفورد اكسبلورر ومر على الرابطه حقته وسئلهم عن علوم الموتر اخوياي الي معهم كلهم يمدحونه ويطلعون معنا البر وياصلون مواصل مواترنا وعادي ومريحه وشكلها وذف وتقدر تخذ شي نظيف بالمبلغ الي انت محدده ..

[فرخ قطا]

السلام عليكم ..

دامك تقول لديره وان طلعت البر ..وبالمبلغ الي تقوله ..

انصحك بالفورد اكسبلورر ومر على الرابطه حقته وسئلهم عن علوم الموتر اخوياي الي معهم كلهم يمدحونه ويطلعون معنا البر وياصلون مواصل مواترنا وعادي ومريحه وشكلها وذف وتقدر تخذ شي نظيف بالمبلغ الي انت محدده ..

شكراً لك اخي الكريم

[المنيعي1]

ددسن خليجي 2011
بـ 55000 ألف ريال أو 2010 في قطر بـ 48000 ألف ريال

[ذيب-الفلا]

عليك بالبليزر بس 2006 وفوق

[sgl2002]

والله ماعرفت معنى كلمة جيب الا بعد ما جربت الربع النيسان

ياهو موتر
انا استخدمه للديره والبر والسفر
يارجال والله انه هو الموتر وبس
خذلك من 2004 وفوق عشان تجي بخاخ مايصرف وعزم ابداع

[المرتهي]

شوف الباثفندر 2004-2005 حجمة حلو شبابي عائلي 6 سلندر مريح بالمدينة والبر ومافي جيب وصل لخفتة ولايهمك من يقول لك خراباته كثير الخيل من خيالها

[فرخ قطا]

شوف الباثفندر 2004-2005 حجمة حلو شبابي عائلي 6 سلندر مريح بالمدينة والبر ومافي جيب وصل لخفتة ولايهمك من يقول لك خراباته كثير الخيل من خيالها



صدقت اخوي بس كثير يسبونه يقولون اذا شاف التراب يحتمي وتنقص المكينه شد بلد
ابستخير وشوف جزيت خيرا

[ابوعقل]

الله يرزقني ويرزقك من واسع فضله


اخوي


عندك سياره غير السياره اللي تبي تشريها ؟؟

[حرنابك]

أخوي انـا عندي جمس موديل 2001 فل كامل نظييف مابه ولا صدمه الحمد لله ولا سمكره أبد واللوحه رقم مميز حااده ب 50.000 للاستفسار 0504890063

[الليث الذهبي]

ياخيي لا تعدا الاكستيرا المستعمل 2008 حول دراهمك تلقاه فال55 يزود وينقص
ما فيه جيب اقوا منه واقتصادي و مريح مقارنتن انه جيب المكينه 4 سيسي 6 سلندر 291 حصان القير ست تعشيقات مع الريوسسبع مريح فالخط ماتسمع صوت المكينه يعني تمشي 180 الظغط على 3
واذا تبي تعرف الموتر اكثر ادخل منتدى( اكستيرا الدفع الرباعي )ويفيدونك فيه اكثر

[ابوالباسل]

اخوي
فكر في الباذفندر (نيسان )2005 -2006
مناسب للمدينه والبر وماهو ثقيل زي الجيوب
وماسك سعره عند البيع .
او
اكسبلورر (فورد ) اعتقد انه اريح جيب ومناسب للمدينه والبر.
وياليت تتصفح المنتديات الخاصه بالسياراة
بالتوفيق

[درعية ديرتي]

السلام عليكم ورحمة الله وبركاته ’’’
بالنسبة الي تواصل معي بخصوص المزاد
موقعه الرياض طريق الدمام وهو مشهور تابع شركة الرياض للتعمير
على العموم هم الان فيه كمية من جيوب فورد اكسبلور راح يحرجون عليه
السبت14-5-2011مصدوم ومعطل
الاثنين16-5-2011سليم
الاربعاء18-5-2011سليم
الموقع
http://www.ardco.com.sa/auction/


الأسئلة الشائعة



س: هل يسمح بالدخول للمرافقين؟
ج:يمنع دخول المرافقين و الأطفال إلى صالة المزاد .
س:متى يتم استرداد المبلغ؟
ج: سيتم رد مبلغ المزايدة مباشرة ونقدا ً في حال عدم استخدامه و خلال أسبوع من تاريخ صدور الكرت وفي حال تجاوز المدة سيتم رد المبلغ بشيك خلال خمسة أيام عمل من تاريخ تقديم الكرت.


س: هل تتم مصادرة التأمين؟
ج: يتم مصادرة التامين آليا في حال عدم مراجعة العميل للمزاد خلال ستة أيام من يوم رسو المزاد عليه.


س: كم هي عمولة المزاد؟
ج: عمولة المزاد كما يلي:


- السيارات السليمة:
• 500ريال المباعة بمبلغ 19999 واقل.
• 1000 ريال المباعة بمبلغ 20.000 وأكثر.


- المركبات الحكومية:
• 1000 ريال قيمة ثابتة لكل مركبة.


- المركبات المتعطلة و المصدومة:
• 500ريال المباعة بمبلغ 9999 واقل.
• 1000 ريال المباعة بمبلغ 10.000 وأكثر.


14- قيمة تعديل اسم المشتري (تنازل ) 100 ريال وقبل سداد قيمة المركبة.


س: هل سيتم احتساب أرضية فيما لو لم أخرج السيارة؟
ج: احتساب أرضية من اليوم الرابع من تاريخ إتمام البيع 100 ريال عن كل يوم تأخير.


س: كيف يتم الدفع؟
ج: في حاله شراء مركبة يكون الدفع نقداً أو بشيك مصدق باسم ( شركة الرياض للتعمير)

[حطام]

دقسن ولا هلكس

[الليث الذهبي]

دقسن ولا هلكس
الرجال يبي جيب

[حمدااي]

انصحك بباترول 1997او1996اذا انت راعي بر ورخيص سعره

[رهيب الرهيب]

والله لو انا مكانك ماتعديت الددسن الجديد حول ها الاسعار ومعروفه الددسن ماداج بحياض البدو مثلها