نص توضيب ولاتوضيب كامل ؟؟؟ محتار ومحتاج مشورتكم

[LENS]

السلام عليكم
أسعد الله الوجوه النيرة


عندي التيما 2006 v6 تصرف زيت ويطلع من شكمانها دخان أبيض متوسط مع دعس البنزين بشكل قوي :(
مريت على كذا ورشة وكلهم يقولون توضيب كامل حول ال 9000 :eek: وانا متردد في تصديقهم لأن البعض همه التكسب بأي طريقة وانا اعتقد ان السيارة تحتاج لتسقيط شنابر فقط مع العلم أني محافظ على عيار الزيت ولا اشد على الموتر واجد والسيارة صافية وعزمها جيد ولاترتفع الحرارة ولله الحمد
شوركم ياأحبة وهل تدلوني على ورشة في الرياض متخصصة في مكاين النيسان يكون أمين وصادق ولايغشنا

يعطيكم العافية

[LENS]

من يفيدنا يالنشاما :(

[سوبر VTC]

ياطويل العمر

دخان ابيض هذا امره سهل جدا و هو جلد بلوف راس المكينة
لو
كان الموتر يدخن ازرق كان اقول على طول شنبر بستم

علامة ان الموتر يحتاج توضيب امره سهل جدا
1 الموتر ينقص زيت بشكل ملاحظ مثلا كل 1000كيلو علبة و هكذا
2 الموتر يدخن ازرق باستمرار كانك تشوف كسرة ددسن او هايلوكس قديمة لذلك اطمئن

لو افترضنا
ان الموتر ينقص يتم فحص ضغط البستم بواسطة ساعة مثل عيار الهواء
اذا كان الضغط نازل فان الشنابر ضعيفة ما تحجب الزيت عن بيت النار وا غرفة الاحتراق

اسباب اخرى لنقص الزيت
تهريب من وجه الكرتير المكينة
تهريب من صدر المكينه
تهريب من الصوفه اللي بين القير و المكينه
تهريب من وجه غطاء الراس
تهريب من خلال وجه فلتر الزيت




هلا بك اخوي اذا انت من سكان الرياض فيه ورشة الثنيان على الدائري عند مخرج 18 فيها ابو ابراهيم وهو رجال خبره وامين وشغله نظيف



عندك ورشة ابو ابراهيم الثنيان بصناعية الدائري الجنوبي
او ورشة التركي ابوصالح بالصناعية القديمة
بجانب مركز ترايستار



الثنيان على حد علمي تخصص باثفندر و هو ولد عم الالتيما
التركي تخصص باترول


اذا كانت المسالة جلد بلوف فهي ماتضر و لا تغير الجلد الا اذا بدا الموتر ينقص زيت بشكل قوي
طبعا تغير الجلد بدون فك الراس
اقرا ردودي في كيفية معرفة قياس نقص الزيت كل مسافة معينة
رابط

الحل في جلد البلوف - منتديات مكشات (http://www.mekshat.com/vb/showthread.php?t=269654)

أبي فزعتكم يالنشاما هل هي جلد بلوف والا شنبر تكفون الجيب توني ... (http://www.mekshat.com/vb/showthread.php?t=268740)

افاده يا اهل الدمام( تغيير جلد بلوف بدون فك الراس) - منتديات مكشات (http://www.mekshat.com/vb/showthread.php?t=285036)

[LENS]

بيض الله وجهك ياغلا
كلامك سليم وعلى العين والراس لكن الحمد لله ماعندي اي تهريب ابدا
الموتر كل 2000 كيلو تقريا ينقص علبة وشوي ويحترق بسرعة وبشكل ملحوظ وفيه زيت في الشكمان من الخلف والدخان لاطلع يستمر فترة مايوقف على طول ويزيد كل مازادت الدعسة انا اعتقد جزما انه شنبر بستم لكن ابي احد يعطيني العلم اليقين في موضوع انه هل بإمكاني ان اغير الشنابر فقط دون ان اخرط الراس والبساتم والشغلات الطويلة العريضة لأني كل مامريت على واحد يقولي توضيب كامل :( واحس ان المكينة نظيفة ولايحتاج انفضها من جديد
والف شكر لك على تفاعلك
ياليت احد يوصف لي ورشة الثنيان

[LENS]

وش دعوة يالربع :-(
معقولة مافي غير اخوي سوبرvtc عنده علم بالمشكلة ؟

[سوبر VTC]

في محل بصناعية الدائري وصاحبها شخص سعودي ماشاء الله عليه موضع ثقه

وكل ماجيته لقيت عنده الباث فاندر يشتغل فيهن .... مدري اذا تروحله وتاخذ شوره


تراه مايشور الا بالزين


اسمه ابو ابراهيم الثنيان

وهذا رقمه
0554889337






قلت لك سابقا
دخان ابيض جلد بلوف
دخان ازرق شنبر بستم




خل الموتر يشتغل 10دقائق خصوصا الظهر

همن دس بنزين دوسة وسط
اذا طلع دخان ابيض فهذه جلد بلوف
يفك الراس و تغير الجلد
او تغير بدون فك الراس



اذا كان الموتر يدخن ازرق
فقط تغير الشنابر + وجه راس

[سوبر VTC]

رد سابق

الباث معروف انه ينقص طبيعي لذلك اطمئن
تقريبا كل 1200 الى 1800 علبة الا ربع

ادخل الرابط و شف ردي
رابط

مشكلة بالباثفندر -الحرارة ترتفع -والزيت ينقص - واليوم فيه تفتفه ... (http://www.mekshat.com/vb/showthread.php?t=213833&page=2)



سوالف لأهل الباثفندر - منتديات مكشات (http://www.mekshat.com/vb/showthread.php?t=156734)


الاخوة اصحاب الباثفندر<<انتم مطلوبون هنا؟؟؟ - الصفحة 2 - منتديات ... (http://www.mekshat.com/vb/showthread.php?t=158770&page=2)


نقص الزيـت ؟ - منتديات مكشات (http://www.mekshat.com/vb/showthread.php?t=400174)


رابط عن التوضيب صور

التوضيب - الصفحة 2 - منتديات مكشات (http://www.mekshat.com/vb/showthread.php?t=30226&page=2)

[LENS]

بيض الله وجهك ماقصرت أخوي :)

[accoorrd]

جرب تغير نوع الزيت لاثقل

ولاحظ الفروقات