وش الدبرة مع حكاكة القدر ...؟

[الدهماني]

السلام عليكم ورحمة الله وبركاته

ياليت من الأخوة طيور البر يلقون لي حل مع حكاكة القدر وكيفية التخلص منها عند الغسيل

لأن الغسيل أصلا غثيث وأغث شي فيه إنك تنظف الحكاكة السودة اللي بقاع الجدر

نبي خبراتكم

[جلاد الصحراء]

بالعادة نربص القدر بالماء وبعد ساعة نغسله باستخدام الفيري . على العموم الطباخ الجيد لايبقي حكاكة.

[المموه]

اخوي الدهماني صباح الورد
الطريقه سهله جدا جدا . بعد ما تنقل الرز واللحم للتبسي . تضع في القدر ماء الى حد الربع تقريبا وتتركه على النار لحين ما يغلي لمدة دقيقتين ثم تنقله عند التانكي وتتركه لما تغدى وتقهوى . ستلاحظ بدون ليفه بيدك تطير الحكاكه وبالهناء والعافيه .

[ساق الجواء]

عند الطبخ أذا فار طعامك اقصر على النار حتى لا تتكون الحكاكة القاسية.

وهذه حلول منقولة من هذا المنتدى:

تنظيف الحكاكة
اذا خلصت من عمل الكبسة واخر القدر دايم يكون محترق من الأرز والكشنة وتكون صعب ازالتها في الغسيل ابدا ما عليك الا انك تغلي شوية ماء في الابريق ثم حط الماء الحار في القدر واتركه لمدة ربع ساعة أو نصف ساعه تجد انه يزول بسرعه اثناء الغسيل.

القدر إذا لصق فيه الأكل صب فيه ماء وخله على نار هادية جدا جدا وحط أعصابك في ثلاجة 20 قدم وبمشيئة الله يرجع القدر كيوم ولدته المطرقة

منع تكون الحكاكة
مرة كنت أبغي أسوي مندي وقلت أحط مع الأرز حمام وخفت على الحمام يذوب وقلت أحط أسفل القدر صحن مقلوب يخفف حرارة الجمر شوي على الحمام0 وفعلاً حطيت صحن مقلوب أسفل القدر بكبر قاعة القدر تماماً ( يعني الأرز وملحقاته فوق الصحن وفي قاعة القدر الصحن مقلوب).
تدرون وش صار يوم طلعت القدر ونكبت الأرز؟ هل تتخيلون يوم رفعت الصحن وش لقيت؟
لقيت أسفل القدر نظيف جداً كأنه ما طبخ فيه مع إني مكشن فيه وغمست الصحن بدون ما أطلع الكشنه مجرد أخرت الحمام 000
أصبحت أستخدم هذه الطريقة في البر000 وبدون ما يتعبني القدر بالتنظيف مجرد صحن 000 حطه بأسفل قدرك 0000أرجو تجريب هذه الطريقة000 ويا تدعون لي أو تدعون علي وشكرا.

[الدهماني]

الأخوة ...

جلا الشعبان

المموه

ساق الجواء

الله يجزاكم خير على التفاعل الطيب

[المرتاع]

عليك بالماء الحار والنار شب عليه

تحياتي

[حاقد على لخمه]

اذا انت تقصد اللون الاسود الى يطلع فى اسفل الجد انا كنت متعقد من هذى السالفه لين ما واحد عطانى الحل
بعد ما تخلصو اكل انقع الجدر بالماء لمدت فنجان قهو او سجاره وبعدين اغسل الجدر من داخل بليفه خشنه وحط مع الفيرى نص قلاص ماى وتراب وحصى
اما عن السواده الى فى الاسفل رش على الجدر ماى من تحت وحط عليه تراب وحصى بس وافرك بتحس انه يطير بسره وبعدين اغسله بفيرى علشان الريحه

[سواق الوايت]

تسلمون والله

على هالموضوع


بس

" انقع الجدر بالماء لمدت فنجان قهو او سجاره "

لا تعليق

[العذق]

ياخخخخخخخخخخخخخي

إذا ما تبي حكاكه بالكبسه اذا استوى اللحم كب الرز عليه وزود النار عليه

لمدة دقيقتين ثم خفف النار جدا خله على جمر خفيف مره

ولو حصل ولقيت حكاكه إذا انسبت الأكل حط عليه شوي ماء وحطه على الجمر لدامك تغدا

وبعده تلقاه ليّن يمشي بيدك مشي,,,,,,, مع تحيات ابو خالد

[عبدالرحمن العمر]

افضل حل مثل ماقالو الاخوه حط شوي ماء وخله على النار دقيقتين0

[الوافي عزام]

المشاركة الأصلية بواسطة الأخ جلاد الشعبان (الطباخ الجيد لايبقي حكاكة )

[أبو ثا بـت]

يمدحون السفن .. صب علبة سفن وإلا علبتين وخلها في القدر حوالي 10 دقايق وشف وش يصير !!

[II^العازمي^II]

والــلــه الــعــاده علــى قولــه اخـــونـــا الاولــــــي اذا خــلــصت من الطـــبخ كــــت فـــوقــه مــاي او خــلــه لـــي الطبـــخــه الــى وراهــا :>

[هاوي خلا]

العزيز الدهماني الطريقه هي :يحط ماء مع قليل من الفيري ويدفى على النار لمدة دقيقتين ثم يترك حتى تنتهي من الشاهي اللي بعد الغداء أو اذا كنت بنفود أو حول رمل حط لك جمعين ملى ايديك رمل مع شوي ماء ودفه على النار شوي وخله عشر دقايق ثم احركه بيدك والليفه معك سوف يصبح القدر توه جاي من المصنع وكذلك ينفع الرمل مع السناء وهو السواد اللي يطلع بالقدر من النار يجليه لك جلي .
وهناك طريقة يقال أنها فعالة وهي بيالة كلوركس بعد الطبخ توضه بالقدر مع شوي ماء وتترك على النار حتى تفوح ثم يفرك مكان الحكاكة .
والمثل يقول ((الحكاكة للمهكاكة)) مثل قديم .
تحياتي لك أخوي الدهماني وجيع الأعضاء والمشرفين
أخوكم هاوي خلا .

[النثريه]

الى جميع الشباب الحل لمشاكل (الحكا كحه) بعد ماينتهي اللحم أو الدجاج الخ................ ضع الرز في الكاتم وعندما (يتش)لمدة 20الى30ثانية سكر على القدر الكاتم وأنتضر لمدة 25الى 30 دقيقة وبعدها فك الكاتم تحصل كل شي تمام وبدون (حكاكه)ومشاكلها وعلى فكره الطريقه مجربه وجرب وتلقى كلامي صحيح*/*/*/*/*/*/*/*/ ولا تنسانا من صالح دعاك0

ملاحضه / الطريقه اللي ذكرت بس بالقدر الكاتم

[غيّام]

صح لسان الربع واولهم المموه

[عاشق سلطان]

وشلون ياولد الديرة الرز في الكاتم وعندما يتش لمدة 20 الى 30 ثانية اسكر على القدر الكاتم ليش هو يتش وهو مفتوح معليش تراى مافهمت قصدك اخووووي

[ابومدين]

بالعادة نربص القدر بالماء وبعد ساعة نغسله باستخدام الفيري . على العموم الطباخ الجيد لايبقي حكاكة.


نعم هذا الجواب اخوي

[غيانا]

لي تجربة مع القرارة (الحكاكة ) ارجو ان تفيد
اترك القدرالكاتم مغطى بعد تطفئة النار ولمدة ربع الى ثلث ساعة
وسترى القرارة تطلع معك