المساعد الشخصي الرقمي

مشاهدة النسخة كاملة : الحقيقه قهرني هالسلك000000 وين بلقاه


بواسامه
19/12/2005, 06:50 PM
مرحبا بالجميع
هبل بي سلك ثلاجة انجل
اللي مثل سلك الكمبيوتر بس مقاس اصغر
اللي يركب على الولاعه
فريت الزل على مجداف وربعه ومهناش :(
وفريت سوق الكهرباء بالغرابي ومهناش :confused:

وسمعت ان الرمايه يبيعونه ب 90 ريال هبال هبال هبال :no:
واخاف اني اشتريه وطق جنوبي حراره :D
وش الدبره ياجماعه
احد يخبر محل ورخيص
ولا التلفيق اسهل مابه
بس نبي الشغل نضيف وزي ماهو بدون تعبث

رايكم لا هنتم :good:
جديد على البر
19/12/2005, 07:58 PM
أتركه واشتر ثلاجه جديده .
دبارة
19/12/2005, 08:19 PM
مساء الخير ابو اسامة
من بغى الزين يعطية حقة
يعطي السلك حقة وقانونة
ابو اسامة وشلون تغلي السلك وهو ياما وياما برد لك اميهك واغراضك وانت بعز الحر او نسيت
لاصرت بالصمان والقيض حاديك
اي تسعين ريال او سلك ولاعة
بواسامه
19/12/2005, 10:59 PM
جديد على البر واضح من ردك انك جديد على البر وتسلم على مرورك
امزح ترى مامعنا زعل ياجديدوه :D

دباره هلا بك
بس تسعين :eek: والله واجد
ما يجي طوله متر ونصف بتسعين :eek:
لوه مطعم بذهب ماوصل لهسعر
شكرا لمروركما سلمكم الله

وما زلت ابحث عن حل
الكونترولCONTROL
19/12/2005, 11:08 PM
جديد على البر ... ضحكتني ... ذكرتني بواحد لقى انتل رادو بالشارع
راح لخوياه يقول : من خبر لي رادو تراي لقيت أنتل !!!!!!!!!!!!!!!!!!!!!!!!!!!!!
رعد الجنوب
20/12/2005, 12:03 AM
السلام عليكم

اخوي بواسامة حتى عند الرماية مالقيناه وانا مستعد اشتري حتى 100 ريال
عندي ثلاجة 60 لتر سلك البطارية احترق والثلاجة قيمتها اكثر من 4500 ريال
والرماية يقول كل ماتصلت عليه قالي يبي يجينا قريب من اكثر من سنة على هالحال

واتمنى من يدلنا عى طريقة لترهيم سلك بنفس مواصفات الاصلي .

اجمل تحية للجميع
طالب الجنة
20/12/2005, 12:03 AM
شف وانا اخوك ... رح لمحلات زينة وادوات السيارات ..او محلات الرحلات
تبي تلقى عندهم توصيلة ولاعة ... اللي تجي سلك طويل بأولة الذكر الي ينشبك بالولاعة ... ونهايته مثل الولاعة ... قص الي نهايته بالولاعة ..وفتح ديكور الثلاجة وشبك به السلك .... وان بغيت زود امان خل الكهربائي يحط لك فيوز ...


ارجو انه واضح شرحي ... وانا اخوك
بواسامه
20/12/2005, 10:50 AM
هلا اخوي طالب الجنه
هو له فيوز من الشركه يعني شد بلد((مايحتاج ترهيم))
وفكرتك جيده بس سلك الولاعات حق الزينه ضعيف ما يتحمل ولا هوب كفو :d
ممكن حق القارمن يناسب اكثر لانه امتن وصنعه
بس ودنا بشد بلده اريح لان الولاعه حقت البلد فيها بعد فيوز غير فيوز الثلاجه

هاه ياجماعه من يخبر هالسليك وين بنلقاه
منهو تكفون وكيل انجل
طالب الجنة
20/12/2005, 11:17 AM
ابو اسامة


مريت محلات قطع غيار الاأكترونيات؟ .. اللي بالديرة ... ورا شارع الثميري ... عند سوق الزل

هذا الوصف ... وانت جاي مع طريق الملك فهد وانت متجه جنوب ... تبي تجيك اشارة اسواق مكة ... تلف معها يسار ..ويصير وجهك شرق
تجيك اشارة ... عدها رح قدام تجيك ثانية عدها رح قدام ... تجيك الثالثة ... لف معها يسار ... الشارع هذا يسمى سوق الزل
ابتل شوي ... شف ورا العماير الي على يمينك .. وراها فيه مواقف ...وفيه محلات يبيعون قطع اكترونية ... ان شاء الله انك تبي تلقى
بس خذ الثلاجة معك .... ممكن يحصلون لك شي شبيه به .. أو أخوه مهب لا زم حق الثلاجة نفسها



يارب تحصلة
بواسامه
20/12/2005, 10:45 PM
جعلك تسلم ياطالب الجنه
واشكرك على تفاعلك

ومريتهم كلهم ومهناش