المساعد الشخصي الرقمي

مشاهدة النسخة كاملة : ما خاب من استشار !!!


شرق الرياض
30/05/2011, 01:49 AM
السلام عليكم ورحمه الله وبركاته


ان شاء الله الشهر القادم ناوين نسوي رحله لجنوب المملكه واتفقنا ان تكون رحلتنا بدون عناء الايجارات المرتفعه وانت تكون ذات طابع بري وهو الاجمل بلا شك

الزبده من الموضوع حبيت ان اعرف ماهي الاغراض او اللوازم اللتي يجب علينا ان نتزود بها قبل سفرنا للرحله بشكل عام
يعني وش اللي بنحتاجه ودنا ما نطلع ان شاء الله من الرياض الا واغراضنا كامله والكامل وجه الله سبحانه

بانتظار ارائكم وخبراتكم بارك الله فيكم جميعا
ابولولو
30/05/2011, 02:15 AM
اول شى تروحون وترجعون باالسلامه
ثانيا خير مااخترت جنوب المملكه
ثالثا يعتمد على المده والعدد
اهم شى باالرحله الخيمه وعده الطبخ والقهوه والشاهى وفراش البر والشراع الازرق البلاستيك
وحافظه الماء والثلج اتوقع ماتحتاجونه لان الجوء بارد واذا شفتوا له حاجه الجنوب فيه كل شى موجود الحمدلله
والمثل الثعبى يقول (ماهان تبارك)
واهم شى شيك على السياره والكفرات مهمه تصير نظيفه لان الجنوب اكثره جبال وصخور
ونصيحه لايفوتك بر عقاله باابها جنب الواديين اذا وصلت اسئل اهل الواديين يدلونك ارضه زينه ووسيعه وذراء
اتمنا لكم رحله سعيده وممتعه
مطرح الحشو
30/05/2011, 04:11 AM
وعليكم السلام ورحمة الله وبركاتة
اخوي // شرق الرياض :heart::heart::heart:
يالله حيه اهم شي التخفيف من اغراض الرحلة والله ترا متعبه كثرتهاااا تتعب الرحلة
اذا كنتم خفيفين عزبة القهوة والشاهي تكون لاحالها وتكون صغيرة وكذالك الطبخ تكون صغيره ولاتكثر من اغراضهااا والاهم( ثلاجة سياره) اذا ماكان عندكم ثلاجة دبروهااا تراهاااا مهمه والفرشات الوذفة وتكون صغيرة( الخيمة الجيدة ضد الماء):r:r:r وملابس لكم تكون شتوية ترا بيكون الجو بارد في الجنوب ومفارش النوم
طبعا الاغراض التموين الي هي
عزبة الطبخ
الرز والحووووم البهورات والملح والبصل والطماط وزيت الطبخ والثوم والتنويع تراه احسن مكرونة ادامات مثل البطاطس وقرع والباميا وكوسة
وعزبة القهوة والشاهي
والقهوه والهيل ومسمار والزعفران والشاهي الربيع ونعناع والشاهي الاخضر والسكر والتمر
الاغراض المنوعه والفطور
فول مدمس حدائق كالفونيا :D تراه لذيذ والجبن والعسل والخبز يكون طازج ماء الشرب
والصماط :Dولاتنسون اكياس انفاية :good2: الله يكرمكم
((اهم شي واحسن لكم ))اشتروهااااا من الجنوب احسن لكم تثقل على السياره وتفتكون من مشوارهاااومن تعبهااا تكون احسن واوسع صدر
المعذره اذا نقص شي هذا الي عندي والله يستر عليكم ويحميكم من كل مكروووه ياااارب
وشكرا لك
محلات الكشاتة
30/05/2011, 04:21 AM
الروقات تراها مهمه

وترجعون بالسلامة
رسيس نجد
30/05/2011, 05:05 AM
الاهم لا تنسون دعاء السفر 0
وبالنسبه للاغراض ما خف وزنه وكثرت اهميته 0
وتروحون وتجون بالسلامه 0
أبوجهاد التبوكي
30/05/2011, 07:37 AM
للرفع..............
wafi4sa
30/05/2011, 08:43 AM
اولا اتمنى من الله ان تكون رحلتكم موفقه وترجعون بالسلامة
و لن ازيد على ماقيل لك بخصوص المتطلبات
لكن حبيت انصحك بعدم السرعة لكي تزداد متعة رحلتكم ولا تجعل الوصول الى الجنوب هو الرحلة
ونما اجعل كل الطريق هو الرحلة يعني وقف في اماكن متعددة واسترح وثم واصل على مهل
وإذا كان عندك قلص لحمل الأغراض يكون افضل
عندما اشاهد الأجانب بالرحلات احس انهم يتمتعون من اول الرحلة حتى اخرة
بالتوفيق لك برحلة سعيدة إن شاء الله
شرق الرياض
30/05/2011, 02:49 PM
الشكر كل الشكر وجزيل الشكر لمن اثرى موضوعي
فجزاكم الله الف خير
بانتظار بقيه الاعضاء
سرهيد
30/05/2011, 04:30 PM
السلام عليكم

اجمل ما في روحة الجنوب انك تسكن الخلاء وتبعد عن البيوت

اهم شيء في ظني الخيمة ، لأن الاجواء هناك اجواء ممطرة وامطارها تكون غزيرة وتكون شبه اسبوعية او يومية باذن الله ..

انصح بحافظة كبيرة تكون مثل الثلاجة ويتم وضع الثلج فيها ... لحفظ اللحم وغيره

طبعا بلا شك عزبة القهوة والشاي ولا يمنع من تانكي ماء متحرك حيث يتم انزاله والاستفادة منه ..

كذلك لمبات داخل الخيمة وخارج يعني تكفي ثنتين .

هذه الاشياء قمت بها بنفسي وكان الاجواء رائعة

وموفق خير ان شاء الله

تقبل احترامي
جبل خزة
30/05/2011, 06:11 PM
نصيحتي لك دور لك وايت صغير سحب يريحك اذا بغيت تعبي ماء ويفكك من الجراكل وغثاها وترى ممكن تحصله في الجنوب عند محلات اللي تأجر زل .

طع شوري ترتاحون بقوه
البيـرق
30/05/2011, 06:14 PM
+ حمام بلاستيكي
زمان وطاف
30/05/2011, 06:21 PM
اولا اتمنى من الله ان تكون رحلتكم موفقه وترجعون بالسلامة

و لن ازيد على ماقيل لك بخصوص المتطلبات
لكن حبيت انصحك بعدم السرعة لكي تزداد متعة رحلتكم ولا تجعل الوصول الى الجنوب هو الرحلة
ونما اجعل كل الطريق هو الرحلة يعني وقف في اماكن متعددة واسترح وثم واصل على مهل
وإذا كان عندك قلص لحمل الأغراض يكون افضل
عندما اشاهد الأجانب بالرحلات احس انهم يتمتعون من اول الرحلة حتى اخرة

بالتوفيق لك برحلة سعيدة إن شاء الله



الاخوان كفو ووفو
ماقصرو وكلن اعطاك العلم الي عندهـ

وانا مع اخويـ wafi4sa
أميرالعشاق
30/05/2011, 06:36 PM
أخي الكريم/شرق الرياض..

حياك الله ...وبالنيابة عن اهل الجنوب أرحب بك وبكل مكشاتي..وبالجميع..
واتمنى لك رحلة ممتعه ..
اما بالنسبة لسؤالك...
فمنطقة الجنوب عبارة عن قسمين/
مناطق مرتفعة/
الطائف..الباحة..ابها..عسير..فيفا..وغيرها
وتتميز ببرودة جوها شتاءً واعتداله صيفاً..
وتتميز بكثرة المنتزهات والغابات الجميلة (بعضها للعوائل فقط)
والاودية الجارية وكثرة الامطار والمناظر الطبيعية الخلابة
والطرق غالباً جيده..وبعض مناطقها جبلية شديدة الوعورة ..
.................................................. ..........
ومناطق منخفضة/
تهامة الباحة..تهامةعسير..جيزان...وغيرها
وتتميز بحرارة جوها صيفاً واعتداله شتاءً..
وتتميز بشواطئها الجميلة..ومتنزهاتها ..واوديتها المشهورة..وجبالها الوعرة..
وبها بعض المناطق الرملية...
.................................................. .......
وبما ان الشقق والفنادق غالية جداً..
فأنصحك بضرورة التخييم...والاحتياط بالعدة اللازمة/
خيام..مظلة..رواق..فرش نوم..ثلاجة او حافظة ثلج للطعام...
ادوات طبخ وشاي وقهوة
(يفضل الاحتياط بدبة غاز)
ولا تنسى الاحتياط بملابس مناسبة للبرد(حيث ان الجو احياناً يكون شديد البرودة ليلاً)
إذا كنت من هواة صيد السمك او الغوص/

عليك بتجهيز ادواتك معك..حيث انها غير متوفرة بكثرة في المنطقة..
.................................................. ....
واذكر لك بعض المناطق الجميلة (التي اعرفها)/
الطائف/الشفا ...الردف...حديقة الحيوانات..متحف الطائف..جبال بني مالك..
اسواق الطائف..وغيرها
الباحة(مدينتي)/غابة رغدان..غابة خيره..اودية المندق.....
اودية تربة..جبال شدا وجبل نيس..غابة القمع..وادي الأحسبة..وغيرها
تهامة/ القنفذة وشواطئها..شاطيءالقنع..شاطي البرك..شاطيءالشقيق
وادي لجب..وادي قنونا..جبال القهر..محافظة فيفا..شواطيء جيزان..وغيرها


.................................................. .........................
وإذا أحتجت اي شيء..أنت أو أي احد من ألإخوان... فجوالي موجود بملفي..
وبإذن الله لن أتأخر في خدمتكم بكل ما استطيع...مرحبا هيل عد السيل..:D
شرق الرياض
31/05/2011, 12:15 AM
الصراحه ردود تثلج الصدر وما قصرتوا بيض الله وجيهكم جميعا
-------
الاخ احمد الزهراني تقول وتفعل يالقرم
اصيل نجد
31/05/2011, 01:29 AM
اولا واخيرا اقول الله يسر امركم وترحون وتجون بالسلامه واحرصوا على دعاء السفر واحرصوا على الكشاف ويكون فيه بطاريات سبير احطياطيه كذلك احرصوا على اقتنا شنطه عده كامله مثل شنطه اصيل ترها تنفعكم (( ترى امزح)) اسوي دعايه غير مباشره ربي يردكم بالسلامه وعلى فكره نسيت اقول لأتنسون الكمراء ترها تسجل اجمل الذكريات وادعيلكم الله انكم ترجعون بالسلامه تحياتي لكم
شرق الرياض
31/05/2011, 02:42 PM
اولا واخيرا اقول الله يسر امركم وترحون وتجون بالسلامه واحرصوا على دعاء السفر واحرصوا على الكشاف ويكون فيه بطاريات سبير احطياطيه كذلك احرصوا على اقتنا شنطه عده كامله مثل شنطه اصيل ترها تنفعكم (( ترى امزح)) اسوي دعايه غير مباشره ربي يردكم بالسلامه وعلى فكره نسيت اقول لأتنسون الكمراء ترها تسجل اجمل الذكريات وادعيلكم الله انكم ترجعون بالسلامه تحياتي لكم

اسعدني مرورك اخي اصيل نجد